Wune wathayibulya okwa bwikalho obw’abawithe engebe y’ekirimu? Kyamabya ikwa kiri kithya, siwe iwuwene. Habw’emyaka mingyi, abandu babiribugha bingyi okwa mwatsi oyu. Hane abasi bathi omwa bwikalho obo yiri ab’okw’ithwe abaholha kera kandi batholere ibasikibwa. Abandi bakabya bak’owa okwa bwikalho obo, bakalengekanaya okwa mwanya ow’ahumulikene ndeke ow’asibwe mwa elhubulha, eyuswire abamalaika n’abandu abuwene ababiriholha. Kandi n’abandi bathi omwa bwikalho obo y’eyiri engulele n’engulele y’esyonyamuhanga.

Abangyi bakabugha bathi sihali oyuwanga minya ebiri omwa bwikalho bw’abawithe engebe y’ekirimu kundi sihali oyuwabirithahikayo akasyathulhagho okwa biriyo. Aliwe ekyo sikihikire. Yesu athali asa okwa kihugho, abya elhubulha, obwikalho bw’abawithe engebe y’ekirimu. Ahathe eribisirira mwabwira abakulhu b’edini omwa kighonye ky’erimbere athi: “Sinandaghalha erilhua elhubulha erikolha erianza lyaghe, nikwa nandaghalha erikolha erianza ly’oyo wanyithuma.” Neryo kwesi Yesu abugha eby’abya iniabiriyilhangirira iyuwene-wene omughulhu abwira abigha biwe athi: “Omo nyumba ya Thatha muli byumba bingyi by’erikalhamo.”—Yaone 6:38; 14:2.

Thunasi ngoku Thatha wa Yesu ni Nyamuhanga oyukahulhawa mwa Yehova, “n’enyumba” yiwe yiri elhubulha. (Esyonyimbo 83:18, NW) Neryo kwesi Yehova na Yesu n’ibo banga soborera ndeke ebiri omwa bwikalho bw’abawithe engebe y’ekirimu. Mubabisulha myatsi mingyi okwa biri omwa bwikalho obo erilhabira omo nzoli esy’abya akakangya abathaleghulha biwe.

Omwatsi owakakwamako akakanaya okwa biri omwa Biblia ebikakanganaya ebyabya bikalhangirwa n’abandu omo nzoli. Wukasoma okwa nzoli esi, isiwibirirawa ngoku obwikalho bw’abawithe engebe y’ekirimu sibuli nga bwa bandu indi wangana lhangira kutse erithulha oko biriyo. Neryo kundi erithusoborera emyatsi eyi omwa mibere y’obunyakirimu kyanga thukalire eriyitheghereryayo, Nyamuhanga mwathwamu erikangania emyatsi eyi omw’ikolesya ebindu ebya thunasi ebya thwangana yitheghererya. Ebya kanganibawa omo nzoli ebi bikendi kuwathikya eriyitheghererya abali omwa “byumba bingyi by’erikalhamo” ebiri elhubulha.