Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Akaleberyo—ey’Erigha  |  Okwakathano 2016

‘Mughende, Muyire Abigha oko Bihanda Byosi’

‘Mughende, Muyire Abigha oko Bihanda Byosi’

“Mughende, muyire abigha oko bihanda byosi; mubatizayebo . . . , mukangirirayebo bakole ebyosi ebyo nabiribahana.”—MT. 28:19, 20.

ESYONYIMBO: 141, 97

1, 2. Ebinywe bya Yesu ebiri omu Matayo 24:14 bikaleka ihabya bibulyoki?

MBULHA abandu bakaligha ebya thukabugha kutse eribihakanisya, ni bake abanga ghana ngoku Abema ba Yehova basibwe busana n’omubiiri wabu w’erithulira. Obundi wanabiribana omw’ithulira mw’abakabugha bathi nomwakine indi sibali lighirana n’ebya thwikirirye, aliwe bathusikirye habw’omubiiri owa thukakolha. Ngoku thunasi, Yesu mwabugha athi engulhu yuwene y’Obwami yikendi syathulhughanibwa omwa kihugho kyosi. (Mt. 24:14) Aliwe ibbwa thukaminya thuthi ndeke-ndeke ngoku omubiiri owa thukakolha akaberereraya ekya Yesu abugha? Mbwino thukabya ithwamayilhabirirya thwamalengekania thuthi n’ithwe basa abakakolha omubiiri oyu?

2 Amadini mangyi akalengekanaya athi akathulha Enjiri, kutse engulhu yuwene. Aliwe mughulhu mungyi bakabera erikania okwa byabere omwa ngebe syabu, erisomesya omwa makanisa, kutse eribya n’esyondegheka okwa maradio, okwa tivi kutse okwa Intaneti. Abandi bakakanaya okwa byabakakolha eriwathikya abandu kinyamubiri kutse okwa kaghalha akabakahiraho omwa by’emithambirire  n’eby’esukuru. Ebyabakakolha ebyo kwenene byan’ebyo Yesu abugha athi abigha biwe bakole?

3. Erikwamana na Matayo 28:19, 20, ni bindu bbini byahi ebyo abakwamire Yesu batholere ibakolha?

3 Mbwino abigha ba Yesu banabya batholere eriyitheka, erilinda abandu bayirethe eyo bali? Eyihi nahake! Yesu abere abirilhubuka mwabwira abigha biwe bangyi athi: ‘Mughende, muyire abigha oko bihanda byosi, mubatizayebo. Mukangirirayebo bakole ebyosi ebyo nabiribahana.’ (Mt. 28:19, 20) Busana n’eki, hali bindu bbini ebitholere ibyakolhwa. Thutholere ithwayira abigha, ithwa babatizya, n’eribakangirirya, aliwe ibbwa ithwabiritsuka erikolhaki? Yesu mwabugha athi: “Mughende”! Omusomi mughuma ow’ebye Biblia mwakania okwa kihano eki athi: “‘Erighenda,’ ni lhukwamirwa lhw’obuli mwikirirya, mbulha okwa syombalhu kutse erisoka engetse.”—Mt. 10:7; Lk. 10:3.

4. Omubiiri w’eribya “basohi b’abandu” mwamuliki?

4 Mbwino Yesu amanyisaya akaghalha ak’obuli mwigha wiwe angahiraho iyo ahabwiwe, kutse akanaya okwa mubiiri w’erithulhughania engulhu yuwene ogho banga kolha abosi haghuma omwa buyithondeke? Kundi omundu iyuwene syangathoka erighenda okwa “bihanda byosi,” omubiiri oyu angayithaghire akaghalha k’abandu banene abakakolhagho omwa buyithondeke. Yesu mwakangania ekyo omughulhu akokaya abigha biwe eribya “basohi b’abandu.” (Soma Matayo 4:18-22.) Erisoha erya Yesu ahulha siryabya ly’omusohi mughuma oyukakolesaya oburobo neryo iniayitheka erilinda eyiswe yilhume ekyambu. Iryo ly’abya mw’erikolesya obutimba—omubiiri munene owabya akayithagha akaghalha k’abandu bangyi abakakolha omw’ikolangana.—Lk. 5:1-11.

5. Ni bibulyo byahi bbini ebikayithagha erisubwamu, kandi busana naki?

5 Eriminya nga ni bahi abakathulha engulhu yuwene munabwire omw’iberererya obuminyereri bwa Yesu, thutholere ithwasubirya okwa bibulyo bbini bino:

  • Ni mwatsi wahi owatholere erithulhwa?

  • Thutholere ithwabya na kilhubirirwaki thukakolha omubiiri oyu?

  • Ni nzira syahi esitholere erikolesibwa?

  • Thutholere ithwathulira okwa lhulengo lhungahi kandi erihika mughulhu wahi?

Eby’erisubirya okwa bibulyo ebi bikendi thuwathikya eriminya nga ni bahi abakakolha omubiiri w’erilhamya esyongebe oyu, kandi n’erighumya erithwamu lyethu ery’eriyitsingirira mugho.—1 Tim. 4:16.

NI MWATSI WAHI OWATHOLERE ERITHULHWA?

6. Ni kyahi ekikaleka iwakakasya ngoku Abema ba Yehova ba bakathulha omwatsi owatholere?

6 Soma Luka 4:43. Yesu mwathulha “engulhu yuwene y’Obwami,” kandi ekyo ky’ananzire abigha biwe ibakolha. Ni kithunga kyahi ky’abandu ekikathulha engulhu eyi okwa “bihanda byosi”? Eky’erisubirya kinalhangirikire ndeke—Abema ba Yehova basa. Nibya n’abakathuhakanisaya bakalighirana n’ekyo. Ng’ekyerireberyako omumisyonare omufaza mwabwira Omwema wa Yehova athi iyo abir’ikalha omwa bihugho binene athi kandi iniakabulya Abema ba Yehova omwa buli kihugho eky’akahikamo nga ni mwatsiki owa bakathulha. Ibakamusubamu bathiki? Omufaza oyo mwabugha athi: “Abosi omwa bukiru bwabu ibakabugha kighumerere, bathi: ‘Engulhu yuwene y’Obwami.’” Obo si “bukiru” ngoku alengekanaya, aliwe Abema ba Yehova abo ibakabugha kighuma aha banikya, ekindu ekitholere okwa Bakristayo b’okwenene. (1 Kor. 1:10) Kandi babya ibakaberereraya omwatsi ow’akabya omwa Akaleberyo Akakarangirira Obwami bwa Yehova. Egazeti eno yiri omwa mibughe 254, kandi hakuhi esyokopi miliyoni 59 sy’obuli gazeti sikahulhukibawa, neryo iyabya iy’egazeti eyikahulhukibawa kutsibu omwa kihugho kyosi.

7. Thukaminya thuthi ngoku abakulhu b’amadini sibalithulha omwatsi owatholere?

 7 Abakulhu b’amadini sibali thulhughanaya omwatsi w’Obwami bwa Nyamuhanga. Bamasalha babukaniako wukowa ibabugha bathi n’iyowa kutse ni mibere eyiri omwa muthima w’Omukristayo. (Lk. 17:21) Sibaliwathikaya abandu eriminya ngoku Obwami bwa Nyamuhanga ni buthabali bw’elhubulha obukathabalhawa na Yesu Kristo, kandi ngoku bwa bukendi syaghunzaho ebitsibu byosi by’abandu n’eribakangania ngoku bukisiya ibwaghunza okwa kihugho kw’obubi bwosi. (Erib. 19:11-21) Omwakanya k’ekyo, ekya bakakolha ly’eryibuka Yesu okwa Krisimasi n’okwa Ista. Bakabya nga sibasi ebya Yesu iyo ng’Omuthabali muhya-muhya w’ekihugho kino akendisyakolha. Kundi babirithalha okwa mwatsi ogho batholere erithulha, mbwino kyangana swekya eribya isibasi ekilhubirirwa ky’erikolha omubiiri oyu?

THUTHOLERE ITHWABYA NA KILHUBIRIRWAKI THUKAKOLHA OMUBIIRI OYU?

8. Ekilhubirirwa ekithuwene ky’erikolha omubiiri w’erithulira ni kyahi?

8 Thutholere ithwabya na kilhubirirwaki thukakolha omubiiri w’erithulira? Sikitholere kikabya iry’erisorokya esyosente n’erihimba amanyumba awuwene. Yesu mwabwira abigha biwe athi: “Mwabiryangirira butsira eririha, muhe abandi butsira eririhisya.” (Mt. 10:8) Ekinywe kya Nyamuhanga sikitholere kikaghulibwa. (2 Kor. 2:17) Abakathulira sibatholere bakayironderya ndundi omwa mubiiri owa bakakolha. (Soma Emibiri 20:33-35.) Ekihano eki n’omukinalhangirikire ndeke kithya, amadini mangyi abirikisighania omw’ihira omuwatho w’okw’isorokya esyosente kutse omw’ikolha ebikingiraya esyosente. Abakangirirya babu n’abandi bakoli bakathunga omusara. Abasondoli b’amadini we Kristendomu babirithunga bindu bingyi eby’obugaga.—Erib. 17:4, 5.

9. Abema ba Yehova babirikangania bathi ku bawithe ekilhubirirwa ekyuwene eky’erikolha omubiiri w’erithulira?

9 Abema ba Yehova nabu bakana sorokaya esyosente? Eyihi. Omubiiri wabu akasighikawa omw’ihayo ahathe erikakwa. (2 Kor. 9:7) Okwa Bisenge byabu by’Obwami n’okwa mihindano yabu eminene-minene sikulibya erilhabya akibo. Aliwe kandi omo mwaka owahwa musa mubakana ghunza esyosaha hakuhi bbiliyoni ibiri omw’ithulira n’erisondolha abigha be Biblia abalhabire oku miliyoni mwenda obuli kwezi. Kandi ibbwa ekikaswekaya sibali thuhawa busana n’omubiiri oyu, aliwe bakayibanira esyosente esya bakakolesaya ibanatsemire. Oyukasekulhaya mughuma abere akakania okwa mubiiri w’Abema ba Yehova, mwabugha athi: “Ekilhubirirwa kyabu kikulhu ly’erithulira n’erikangirirya. . . . Sibawithe abakulhu abakathuhawa, neryo ekyo kikakehaya kutsibu emihulhukirye yabu.” Ibbwa kwesi ekilhubirirwa kyethu ky’erikolha omubiiri oyu ni kyahi? Omwa bikuhi, thukakolhagho omw’iyihayo, kundi thwanzire Yehova na bandu. Omuthima w’eriyihayo oyu ni bererera ly’obuminyereri obuli omwa Esyonyimbo 110:3. (Soma.)

NI NZIRA SYAHI ESITHOLERE ERIKOLESIBWA?

Thukathulira ahosi-hosi aha bandu bangabanika (Lebaya enungu 10)

10. Yesu n’abigha biwe mubakolesya nzira syahi sy’erithulira?

10 Yesu n’abigha biwe mubakolesya nzira syahi bakathulha engulhu yuwene? Ibakaghendera abandu ehosi-hosi eyo banga banika—ahakabya bandu banene n’omwa miyi yabu. Omubiiri w’erithulira abya mw’erisondya abandu b’emithima myolho nyumba okwa nyumba. (Mt. 10:11; Lk. 8:1; Emib. 5:42; 20:20) Erithulira omwa nzira eyi mukyakangania erithendibya n’akasolholho.

11, 12. Bikabya bikahika okw’ithulhughania engulhu yuwene, wanga linganisya wuthi ab’awandi madini n’abandu ba Yehova?

11 Amadini we Kristendomu anabirikolha eki? Kutsibu-tsibu, hamabya eriri ng’ithulira,  abanya madini bangyi bakalirekera abakulhu babu kundi bakathunga omusara. Aliwe n’abakulhu abo, omwakanya k’eribya “basohi b’abandu,” bakabya nga batsomene eribya “n’ababirisohwa” basa. Ni kwenene, hakanayira abakulhu b’amadini ibahiraho owali nga muhwa w’erithulira. Ng’eky’erileberyako, okw’itsuka ly’omwaka wa 2001, Papa John Paul II, omwa baruha yiwe mwabugha bino: “Hamabiri lhaba myaka mingyi ikungane mubugha indi thutsuke eribya thukathulha enjiri. Lino kandi ngathasya kisubamu . . . Thutholere ithwabya mw’omuhwa munene kutsibu owali ng’owa Paulo oyuwabugha athi: ‘Obulighe okw’ingye namathendi thulha Enjiri.’” Papa mwongerako athi olhumimbi olhu “si lhw’erilekera bandu balebe ‘abathendekirwe,’ aliriryo lhutholere ilhwabya lhukwamirwa lhw’obuli mundu wa Nyamuhanga.” Aliwe ni bangahi abamathaghendera okwa byabughawa ebyo?

12 Aliwe Abema ba Yehova basibwe bathi okwa mubiiri oyu? N’ibo basa abakakangiriraya bathi Yesu abiritsuka erithabalha ng’Omwami erilhua 1914. Ngoku Yesu anabugha, omubiiri w’erithulira gho bakahira embere. (Mk. 13:10) Ekitabu Pillars of Faith—American Congregations and Their Partners kikabugha kithi: “Okwa Bema ba Yehova, erithulhughania engulhu lya bakahira kw’amalengekania wabu kwilhaba ebindi byosi.” Omuhandiki w’ekitabu ekyo, abere akakania okwa byabughawa n’Omwema wa Yehova, mwongerako athi: “Ibo bamabya omwa nzalha, omwa mbwera, kutse amakoni, bakanalengaho eribirwanisya ngoku banga thoka, . . . aliwe bakabya iban’ibukire ngoku omubiiri wabu mukulhu ly’erihikya okwa bandu kw’omwatsi w’enduli eyinemwasa kandi ngoku abandu batholere ibalhamibwa.” Abema ba Yehova banemulholha embere erikolha omubiiri oyo omw’ikolesya esyonzira esyo Yesu n’abigha biwe banabya bakakolesya.

ERITHULIRA LITHOLERE IRYAKOLHWA OKWA LHULENGO LHUNGAHI N’ERIHIKA MUGHULHU WAHI?

13. Omubiiri w’erithulira atholere iniakolhwa okwa lhulengo lhungahi?

13 Yesu mwakania okwa lhulengo lhw’erithulira omw’ibugha athi engulhu yuwene yikendi syathulhughanibwa ‘omwa kihugho kyosi.’ (Mt. 24:14) Abigha batholere ibalhua omwa ‘bihanda byosi.’ (Mt. 28:19, 20) Eki kikakanganaya ngoku omubiiri oyu ni w’erikolhwa omwa kihugho kyosi.

14, 15. Ni byahi ebikakanganaya ngoku Abema ba Yehova banemuberererya obuminyereri bwa Yesu obuhambire okwa lhulengo lhw’omubiiri w’erithulira? (Lebaya ebisasani ebiri okw’itsuka.)

14 Erithoka eriyitheghererya Abema ba Yehova nga babiriberererya bathi obuminyereri bwa Yesu obuhambire okw’ithulira, thuthalebya esyonzumwa ndebe. Ng’omwa Amerika muli abakulhu b’amadini nga 600,000, aliwe Abema ba Yehova abaliyo bane nga 1,200,000. Omwa kihugho kyosi, abafaza b’omwa Kikatuliki abosi bali nga 400,000. Ibbwanu thalebya enamba eyo n’ey’Abema ba Yehova omwa kihugho kyosi abanemusangira omwa mubiiri w’erithulhughania engulhu y’Obwami. Omwa kihugho kyosi, Abema ba Yehova abalhabire omu miliyoni munani banemuthulira omwa bihugho 240. Oyu  ka ni mubiiri munene owanemukolhwa eripipa Yehova n’erimuha olhukengerwa!—Esy. 34:1; 51:15.

15 Ithwe ng’Abema ba Yehova, thwanzire ithwahikya okwa bandu bangyi kw’engulhu yuwene enduli yithe yasa. Busana n’ekyo, thukabya ba mbaghane busana n’omubiiri owathukakolha erihindulha n’erihulhukya ebitabu ebiseghemere okwa Biblia. Okwa bbule, thukaghabira abandu b’esyomiliyoni sy’ebitabu, esyogazeti, esyotrakit, n’esyokadi esikakokaya abandu b’okwa mihindano minene-minene n’okw’Ibuka. Thwabirihulhukya ebitabu muthina-muthina omwa mibughe eyilhabire omwa 700. Esyo Biblia esya New World Translation of the Holy Scriptures esilhabire omwa miliyoni 200 syabirihulhukibwa omwa mibughe eyilhabire omu 130. Omwaka owahwere musa, muthukana hulhukya ebitabu ebiseghemere okwa Biblia hakuhi bbiliyoni ini n’embindi. Okwa muthahulha wethu we Intaneti owahamulirwe, kune emyatsi omwa mibughe eyilhabire omu 750. Ni bandi bahi abakakolha omubiiri ng’oyu?

16. Thukaminya thuthi ngoku Abema ba Yehova ba bali n’omulimu abuyirire?

16 Omubiiri w’erithulira oyu akendisya kolhwa erihika mughulhu wahi? Yesu mwabugha athi omubiiri ow’erithulhughania engulhu omwa kihugho kyosi angakolirwe erihika omwa biro by’enyuma-nyuma “neryo enduli” iyahika. (Mt. 24:14) Ni yindi dini yahi eyine muthulhughania engulhu yuwene omwa biro by’enyuma-nyuma bino? Abandi abo thuk’eghaya omw’ithulira ibangana bugha bathi: “Ithwe thuwithe omulimu abuyirire, aliwe n’inywe mukakolha omubiiri.” Aliwe eribya ithwangana yiyinia omwa mubiiri oyu, mbwino ekyo sikiri kanganaya ibbwa ku n’ithwe thuli n’omulimu abuyirire wa Nyamuhanga? (Emib. 1:8; 1 Pet. 4:14) Hakanayira n’awandi madini inianza erikolha ekyo Abema ba Yehova bakakolha, aliwe erighunzerera inialemwa. N’abandi ibalengaho bathi ambu bakathakolha omubiiri w’eriyathulira omwa bindi bihugho, aliwe kandi biro bike-bike ibabikyako. Nibya n’abandi ibalengesya erithulira nyumba okwa nyumba. Aliwe wamath’owa ebyo bakathulira, wukalhua iwalhangira isibali kolha omubiiri ogho Kristo atsukisaya.

OMWA KWENENE, NI BAHI ABAKATHULHA ENGULHU YUWENE MUNABWIRE?

17, 18. (a) Busana naki thukakakasaya ngoku Abema ba Yehova ba bakathulha engulhu yuwene y’Obwami munabwire? (b) Thukathoka thuthi erilholha embere omwa mubiiri oyu?

17 Neryo ni bahi kwenene abakathulha engulhu yuwene y’Obwami munabwire? Ahathe erithika-thika, ithukendi bugha thuthi: “Abema ba Yehova!” Busana naki ithwakighumya thuthya? Kundi thukathulha omwatsi owatholere ow’engulhu yuwene y’Obwami. N’omughulhu thukaghendera abandu, thukabya ithwamakolesya enzira eyitholere. Thukakolha omubiiri oyu busana n’ekilhubirirwa ekihikire—olhwanzo, butsira busana n’erisondya esyosente. Erithulira lyethu ly’erikakolhawa okwa lhulengo lhunene kutsibu, kundi thukahika okwa bandu b’ebihanda byosi n’emibughe yosi. Kandi thukendi lholha embere erikolha omubiiri oyu buthalhuhirira, omwaka omwa wundi, erihika aho enduli yikendi syasira.

18 Thukasweka thukalhangira ebya bandu ba Nyamuhanga banemuthoka erikolha omwa biro ebya thulimu bino. Aliwe ebyosi ebi bikathokekana bithi? Omukwenda Paulo akasubiraya ekibulyo ekyo omwa baruha ey’ahandikira Abanya Filipi athi: ‘Kusangwa ni Nyamuhanga oyukakolha omwisi syenyu, imwabya mukaligha n’erikolha ebikamutsemesaya.’ (Fil. 2:13) Kwesi ithwe bosi ka thulhole embere erithunga akaghalha erilhua oku Thatha wethu w’olhwanzo, thwanaberererya ndeke omubiiri wethu w’erithulira.—2 Tim. 4:5.