Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Akaleberyo—ey’Erigha  |  Okwakathano 2016

Mbwino e Biblia Yikina Hindulha Engebe Yawu?

Mbwino e Biblia Yikina Hindulha Engebe Yawu?

‘Muleke Nyamuhanga abahindule n’eribaha obulengekania buhya-buhya.’—ABAR. 12:2.

ESYONYIMBO: 61, 52

1-3. (a) Ni mbinduka syahi esyangathukalira erikolha enyuma w’eribatizibwa? (b) Thwamathendi kulha-kulhana ngoku thulhwe thukalengekania, ni bibulyo byahi ebyathutholere ithwayibulya? (Lebaya ebisasani ebiri okw’itsuka.)

KEVIN [1] abere abir’igha ekwenene, mwanza akamathaye obughuma bwiwe na Yehova. Ahabw’emyaka abya iniabirisangira omwa misathu y’erisathira esente, erinywa ethaba, erithamira, n’erikolesya nabi emibatsi eyikathamiraya. Kevin abya atholere erileka emitse eyithelighawa omwa Masako eyi nuku Nyamuhanga amulighe. Eki mwakikolha omw’iyikethera Yehova n’amaaka awakahindulha engebe aw’Ekinywe kiwe.—Ebr. 4:12.

2 Mbwino Kevin abere abiribatizibwa mwalekeraho eribinduka? Kwabithe bithya. Kundi abya iniakinawithe eby’erikolha eribya inianemuwania emibere yiwe y’Ekikristayo. (Efe. 4:31, 32) Ng’eky’erileberyako, mwalhangira ikimukalire erikakirya omubere wiwe ow’erihithana lhuba-lhuba. Kevin mwabugha athi: “Erigha erikakirya ekinigha kyaghe mukyakalha kw’ilhaba n’eritsira emitse mibi eyo nabya nayu!” Erisaba kutsibu n’erigha kutsibu e Biblia mukyaleka Kevin iniakolha esyombinduka.

 3 Nga Kevin, abangyi omw’ithwe muthwakolha esyombinduka esikalha-kalire thuthe thwabatizibwa nuku engebe yethu yihambane n’ebikayithaghisibawa omwa Biblia. Thwabere thwabiri batizibwa, muthwaminya ku thutholere erilholha embere erikolha esyombinduka—n’esithelhangirawa n’abandi—nuku thwanga thoka erigherererya ndeke Nyamuhanga na Kristo. (Efe. 5:1, 2; 1 Pet. 2:21) Ng’eky’erileberyako, ithwangana yowa ithune mw’omubere ow’eritsweba abandi, eryubaha abandu, olhuthongo, kutse obundi butseke. Mbwino thukanalengaho erileka emibere eyi aliwe ikyathukalira? Kyamabya ikwakiri kithya, iwangana yibulya, ‘Namabya imunanathoka erikolha esyombinduka esikalha-kalire, busana naki ikyanyikalira erikolha esyolhobire esi? Nanga lholha indi embere erilighira e Biblia erihindulha engebe yaghe?’

IWANGANA TSEMESYA NYAMUHANGA

4. Busana naki sithuli thoka eritsemesya Yehova omwa buli kindu?

4 Ithwe ng’ababiriminya n’eryanza Yehova, thwanzire n’omuthima wethu wosi erikolha ebyanga mutsemesya. Nomuthwangabya ithwanzire bungahi erikolha ekyo, obuthahikana bwethu bukathulemesaya eritsemesya Nyamuhanga mughulhu wosi. Thukayowa ng’omukwenda Paulo oyuwahandika athi: ‘Nyinanzire omo muthima waghe erikolha ekibuya, nikwa sindithoka erikolhakyo.’—Abar. 7:18; Yak. 3:2.

5. Ni mbinduka syahi esyo thwakolha thuthe thwabatizibwa, aliwe n’ithendihikana lyahi eryathwanganabya ithukinarwanisaya?

5 Thwabiri leka emitse eyanga leka ithuthatholera eribya omwa kithunga kya Yehova. (1 Kor. 6:9, 10) Aliwe sithuli thwahikana. (Kol. 3:9, 10) Neryo kwesi isithwalengekanaya thuthi eribatizibwa—kutse nibya erighunza myaka mingyi omwa kithunga—kikendi leka ithwabya isithwangasobya, erisubirira enyuma, kutse eryasa mw’amalengekania mabi. Thwangana ghunza emyaka mingyi ithunemurwanisya emitse mirebe.

6, 7. (a) Ni kyahi ekikaleka ikyathokekana ithwe eribya banywani ba Yehova kandi isithuhikene? (b) Busana naki sithutholere thukasaghirira erisaba Yehova y’ekighanyiro?

6 Obuthahikana bwethu sibutholere bukathukakirya eribya banywani ba Yehova kutse erilholha embere erimukolera. Thalengekania oku kino: Yehova abere akathukolha mw’abanywani biwe, abya inianasi ngoku hanganayira ithwasobya. (Yn. 6:44) Kundi Nyamuhanga asi ndeke emibere yethu n’ebiri omwa mithima yethu, abya inianasi emitse y’obuthahikana eyanga thulyambya. Kandi abya inianasi ngoku hanganayira ithwathwa ebihano biwe. Aliwe ekyo sikithakakirya Yehova erithendi thwanza ng’abanywani biwe.

7 Olhwanzo lhw’olhwa sukuma Nyamuhanga erithuha ekihembo ky’obughuli bunene—ekihongwa kya Mughalha wiwe mwanzwa. (Yn. 3:16) Thwamasobya thukayisubamu n’erisaba Yehova y’ekighanyiro, ithunayikethere embanulho eyo, ambi ithwaminya ngoku obunywani bwethu nayu bukineho. (Abar. 7:24, 25; 1 Yn. 2:1, 2) Mbwino thunatholere ithwayowa nga sithwanga ghasirwa omwa kihongwa kundi thukayowa nga thwabiritsanda omwa bibi? Sithutholere nahake! Ithukendibya ng’abakaghana erinaba amaghetse okwa byalha kandi ibinakinire. Ambi ithwibuka ngoku nibya ekihongwa kiriho okwa bakolha nabi abakayisubamu. Hakiri ekihongwa eki kikathabyaho, kundi kikaleka ithwathoka eribya banywani ba Yehova nomwakine indi sithuhikene.—Soma 1 Timoteo 1:15.

8. Busana naki sithutholere thukayirekerania omwa bulemwa bwethu?

8 Ekyo sikirimanyisaya indi thutholere ithwayirekerania omwa bulemwa bwethu. Eribya banywani ba Nyamuhanga Yehova mwamuli erilengaho kutsibu erigherererya Nyamuhanga na Kristo, n’eribya ngoku banzire ithwabya. (Esy. 15:1-5) Kandi mwamuli n’erilengaho erikakirya emibere mibi y’obuthahikana, n’eriyighunzayomo kyamathokekana. Mbulha thwabatizibawa  lino-lino, kutse thwamabirighunza omwa kwenene mwa mughulhu muuli, thutholere ‘ithwakwama erihikana’ kutse erilholha embere erihengulhwa.—2 Kor. 13:11.

9. Thukaminya thuthi ngoku thwangana lholha embere eryambalha omundu muhya-muhya omwa ngebe yethu?

9 Thukayithagha erihira h’akaghalha kanene buthalhuhirira erithoka erihengulhwa n’eribya “bahya-bahya.” Omukwenda Paulo mw’ibukya abaramya balikyabu athi: “Muleke emibere eya kera eyabya yikabatsandya omwa syongumbu esikabatheba. Mubye bahya-bahya omwa mithima yenyu n’omwa malengekania wenyu. Mubye bandu bahya-bahya abahangikawa omwa kisosekanio kya Nyamuhanga omwa bithunganene n’omwa bibuyirire by’ekwenene.” (Efe. 4:22-24) Ekinywe ekiri omw’isako eri ekyahindulhawa mwa “mubye bandu bahya-bahya” kikakanganaya ngoku eryambalha omundu muhya-muhya siriribera murundi mughuma. Eki kikatsemesaya kutsibu, kundi kikathukakasaya ngoku nomuthwangabya ithwamaghunza mughulhu mungahi ithune mukolera Yehova, thwangana lholha embere eribya ithune mughenda thuk’uwania emibere yethu ng’Abakristayo eyikaleka omundu iniabya muhya-muhya. Ni kwenene, e Biblia yangana lholha embere erihindulha esyongebe syethu.

BUSANA NAKI SIKYOLHO?

10. Ni kyahi ekyathutholere ithwakolha erithoka erilholha embere erikolha esyombinduka omw’iwathikibwa ne Biblia kandi ni byahi ebya thwanga yibulya?

10 Thwamanza thuthi Ekinywe kya Nyamuhanga kibye ikine muthuhindulha, thutholere ithwahira h’akaghalha kanene. Aliwe busana naki ikyayithaghisya akaghalha kanene? Yehova amabya iniane mutsumulha akaghalha kethu, busana naki ikithakwama kyabya kyolho erikulha-kulhana bunyakirimu? Yehova syanga kwama kyathulhusya mw’amalengekania mabi neryo ithwabya isithwanga thasya yithagha erihira h’akaghalha eribya n’emibere eyuwene?

11-13. Ni kyahi ekikaleka Yehova inianza thuhire h’akaghalha erirwanisya obulemwa bwethu?

11 Thukabya thukathaghanirya okwa byosi ebiri omwa kyanya, thukalhangira Yehova iniawithe amaaka manene. Ng’eky’erileberyako, obuli sekendi eryuba likahulhukaya ekyakakalha n’ekihuhania kinene kutsibu. Nomwakine indi ekyakakalha n’akaghalha k’ekihuhania ekyo akakahika hano h’okwa kihugho ni kake buyira, kakabya ikakanatholere erileka engebe iyathokekana okwa kihugho. (Esy. 74:16; Isa. 40:26) Yehova akaha abaghombe biwe b’amaaka n’akaghalha okwa lhulengo olhutholere bakayithaghagho. (Isa. 40:29) Ni kwenene Nyamuhanga angananza iniathuha amaaka aw’erikakirya obulemwa bwethu bwosi ithwabya isithwanga sobya. Ekikaleka iniathakolha ekyo niki?

12 Yehova abirithuha olhuhembo lhunene kutsibu olhw’eriyithwiramu. Thukabya thwamayithwiramu erikolha erisonda lya Nyamuhanga n’erihira h’akaghalha omw’ikolha ekyo, thukakanganaya ku thwanzire Yehova ya kutsibu kandi ku thwanzire erimutsemesya. Kandi thukabya ithwamakangania ku thukasighika ehamuli yiwe y’erithabalha. Sitani abirihakanisya ehamuli ya Yehova ey’erithabalha, neryo thukabya thukayithwiramu n’eriyihayo kutsibu erisighikayo, kikatsemesaya kutsibu Thatha wethu w’elhubulha. (Yobu 2:3-5; Emi. 27:11) Aliriryo Yehova kw’athathuha akaghisa k’erilengaho ithw’ibene-bene erirwanisya emitse y’obuthahikana bwethu thukanza erimutsemesya, isihali oyuwanga bugha athi niyithwiramu liwe erisighika ehamuli ya Nyamuhanga y’erithabalha.

13 Ekyo ky’ekikaleka Yehova iniathubwira athi ‘thuyitsinge’ kutse erihira h’akaghalha erithoka eribya n’emibere ey’akanza. (Soma 2 Petero 1:5-7; Kol. 3:12) Anzire ithwahira h’akaghalha erikolesya ndeke amalengekania wethu n’eriyowa lyethu. (Abar. 8:5; 12:9) Thukabya thwabirihira h’akaghalha omw’ikolha ekyo, thukayowa ndeke thukaminya ngoku e Biblia yikinahindulha esyongebe syethu.

 LEKA EKINYWE KYA NYAMUHANGA KIBYE IKINEMUKUHINDULHA

14, 15. Thwanga kolhaki erikulha-kulhania emibere eya Yehova anzire? (Lebaya akasanduku “ E Biblia n’Erisaba Mubya Hindulha Esyongebe Syabu.”)

14 Thwanga kolhaki eribya n’emibere eyuwene n’eritsemesya Yehova? Eryongera okw’anza eryuwania emibere yethu thutholere ithwabya ithunemuhira h’akaghalha n’erighendera okwa busondoli bwa Nyamuhanga, kundi Abanya Roma 12:2 hakabugha hathi: ‘Simusosekanibawe n’emibere y’ekihugho kino, nikwa muleke Nyamuhanga abahindule n’eribaha obulengekania buhya-buhya. Muthya mwasyathoka eriminya erisonda lya Nyamuhanga. Erisonda eri ni ribuya, kandi likatsemesaya, kandi lihikene.’ Erilhabira omwa Kinywe kiwe n’omulimu wiwe abuyirire, Yehova akathuwathikaya eriminya erisonda liwe, n’erithuwathikya eririkolha, neryo ithwahindulha emibere yethu nuku thuberereraye erisonda liwe. Akaghalha akathwanga hiraho mwamuli erisoma e Biblia obuli kiro, erighanirya okwa Masako, n’erisaba erihebwa omulimu abuyirire. (Lk. 11:13; Gal. 5:22, 23) Thukendibya thunemughendera okwa busondoli bw’omulimu abuyirire wa Nyamuhanga n’erihambania amalengekania wethu n’awa Yehova ngoku ali omwa Kinywe kiwe, neryo amalengekania wethu, ebya thukabugha, n’ebya thukakolha ibikendyongera eritsemesya Nyamuhanga. Aliwe nomukyangabya kithya, ithukendibya ithunemulengaho eriyitheya okw’ikolha ebithuwene busana n’obulemwa bwethu.—Emi. 4:23.

Ikyangana wathikya erisondya Amasako n’emyatsi omwa bitabu byethu eyihambire okwa kitsibu kyawu iwasomayo ndeke (Lebaya enungu 15)

15 Eryongera okw’isoma e Biblia buli kiro, thutholere ithw’igha Ekinywe kya Nyamuhanga n’ebitabu byethu by’Ekikristayo nuku thwangathoka erigherererya emibere mibuya ya Yehova. Abandi babirilhangira ikikawathikaya erisondya n’eribya ibane musoma amasako malebe n’emyatsi eyikasira omwa Kaleberyo kutse e Awake! eyanga bawathikya eribya n’emibere y’Ekikristayo kutse eyanga bawathikya erirwanisya erilemererwa lirebe.

16. Busana naki sithutholere thukahwa amani thwamabya isithuthakolha esyombinduka lhuba-lhuba?

16 Wamayowa nga wamathwalha buthuku erikulha-kulhana, ambi iw’ibuka ngoku erikulha-kulhana ng’eryo likaghenda lyolho. Emibere eyo Nyamuhanga anzire siyiryasira murundi mughuma. Thutholere ithwabya n’omubere w’erighumisirizya thunemulindirira e Biblia erithukolha kw’esyombinduka omwa ngebe yethu. Okw’ithatsuka, ithwanga yithagha erihira h’akaghalha kanene erithoka erikolha ekikalighawa omwa Masako. Aliwe omwa lyolho-lyolho, amalengekania wethu akendibya anemughenda akahambana n’awa Nyamuhanga iwukendi lhangira ikirimukwolhobera erilengekania n’erikolha ebikatsemesaya Nyamuhanga.—Esy. 37:31; Emi. 23:12; Gal. 5:16, 17.

 IBYA IWUN’IBUKIRE EBYA THULINDIRIRE

17. Thwama lholha embere ithune bathaleghulha oku Yehova, ithukendi lindirira lhusunzo lhwahi?

17 Abaghombe ba Yehova abathaleghulha, endambi yikendi hika ibabana olhusunzo lhw’erimukolera kera na kera ibanahikene. Okwa buthuku obo, erikangania emibere eyo Nyamuhanga anzire sikyendi syakalha, aliwe thukendi syabya thukakikolha omwa tseme. Aliwe ekyo kine aho, thukasima kutsibu busana n’embanulho, kundi yikaleka na munabwire ithwaramya Nyamuhanga wethu. Ekyo thukakikolha thwamalighira Ekinywa kya Nyamuhanga eribya ikinemuthubindulha nomwakine indi sithuhikene.

18, 19. Ni kyahi ekikaleka ithwaminya ngoku e Biblia yinawithe obuthoki bw’eribya iyinemuhindulha esyongebe syethu?

18 Kevin, oyulyakanibawako okw’itsuka, mwakolha kutsibu erithoka erikakirya ekinigha kiwe. Mwaghanirya okwa misingyi ye Biblia n’erikolesyayo, kandi mwaligha obuwathikya n’erihabulha ly’Abakristayo balikyethu. Habere halhaba myaka nga yeyo, Kevin mwabya iniamabirikolha esyombinduka nyingyi. Erighunzerera mwatholera erikolha ng’omughombe omuwathikya, kandi eno ni myaka 20 iniabiribya musyakulhu w’ekithunga. Nomwabine, akalhangira iniakina tholere eriyitheya okw’isubira emitse mibi.

19 Eky’erileberyako kya Kevin kikakanganaya ngoku e Biblia yikawathikaya abandu ba Nyamuhanga eribya ibanemukolha esyombinduka esitholere. Busana n’ekyo, isithwalhuhirira erilighira e Biblia eribya iyinemuthuhindulha n’erileka ithwabya n’obughuma obw’ahakuhi na Yehova. (Esy. 25:14) Thukendibya thunemulhangira Yehova akatsumulha akaghalha akathukahiraho, thukendi minya ndeke-ndeke ngoku kithokekene e Biblia eribya iyinemuhindulha engebe yethu.—Esy. 34:8.

^ [1] (enungu 1) Awandi mena abiri hindulhwa.