Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Akaleberyo—ey’Erigha  |  Okwakathano 2016

 OMWATSI W’OKWA KIDIPA | OW’OKW’IWE AMAHOLHA

Erighumira Obulighe Obwa Wulimu

Erighumira Obulighe Obwa Wulimu

Ni bingyi ebikabughawa okwa mwatsi oyu. Aliwe sibugha indi ebyosi byangana wathikya. Ng’eky’erileberyako, abandi bangana kubwira bathi isiwalira kutse erilirikana. Kutse abandi ibabugha bathi wutholere ibbwa iwakangania ndeke ku wuli omwa bulighe. E Biblia iyo yikaha amalengekania awatholere, nibya awakalighawa n’erisekulya lya munabwire.

Omwa bindi bihanda omulhume erilira akabya isyathakangania obulhume. Aliwe ibbwa, hane ekyangaleka iwakwa esisoni esy’erilira, nibya n’omwa bandu? Abasomire eby’obwongo bakabugha bathi si kibi erithoghongya emisoni omwa bulighe. Kandi eririra lyangana humulikania, ekitsibu nomukyangabya kya bulitho bungahi. Aliwe eriyighuma-ghumya siryanga wathikya. E Biblia siyiri sighika eky’eribugha ambu omulhume syatholere akalira. Thalengekania oku Yesu. Nomwakine indi abya n’obuthoki bw’erilhubukya abaholi, mwalirira omwa bandu omughulhu munywani wiwe Lazaro aholha!—Yoane 11:33-35.

Erikwa ekiri nga kinigha kikanabya okwa bali omwa bulighe bw’eriholerwa, kutsibu-tsibu olhuholho olhwa lhuba-lhuba. Ni bingyi ebyanga hithania oyulyaholerawa, ng’omughulhu omundu oyo wunasikirye akabugha buthalengekania. Omulhume owe South Africa oyukahulhawa mwa Mike akabugha athi: “Nabya ngwithe myaka 14 thatha waghe akaholha. Okwa kiriro kya thatha, pasta w’Abapira mwabugha athi Nyamuhanga akayithagha abandu babuya, neryo ky’ekikaleka iniabathwalha lhuba. * Ebinywe ebyo mubyanyihithania kundi bwabya buthuku obwa thukayithaghiramu kutsibu thatha wethu. Hamabirilhaba myaka 63, aliwe ebinywe ebyo bikinanyilhumaya kw’omuthima.”

Ibbwa thwamayowa nga thuli kw’olhubanza? Kutsibu-tsibu olhuholho lhwamawa lhuba-lhuba, oyulyaholerawa inianganabera erilengekania athi, ‘Syangaholire ku nanakolha kino kutse kirya.’ Kutse obundi imumwanatoka ekiro mwabanangana athali aholha. Eki ikyangana leka iwabera eriyowa nabi.

Wamabera eriyowa nabi wuthya, isiwayihunira n’eriyowa ng’eryo. Aliwe, bwira omunywani wawu oyukendi kuhulikirira n’erikukakasya ngoku abangyi abakaholerawa bakanabya n’ebirengekanio ebithatholere ng’ebyo. E Biblia yikathw’ibukaya yithi: “Omwira akanza emighulhu yosi; n’omughalha wabu akabuthawa busana n’obulighe.”—Emisyo 17:17.

Wamaholerwa, omunywani oyulengethukireyo oyo wangabya nayu ni Yehova, Omuhangiki wethu. Mubwire ebyosi ebiri okwa muthima wawu kundi akutsomene. (1 Petero 5:7) Nibya, akalhaghanisaya athi abosi abakakolha ekyo akendi humulikania amalengekania n’eriyowa lyabu omwa “buholho bwa Nyamuhanga obulhabire amenge wosi.” (Abanya Filipi 4:6, 7) Kandi ambi iwalighira Nyamuhanga erikuwathikya erilhabira omwa Kinywe kiwe, e Biblia, ekikahumulikanaya. Handika amasako awakahumulikanaya. (Lebaya  akasanduko omwa mwatsi ono.) Nibya ikyanganabya kibuya erihambira awandi w’omwa muthwe. Eribya n’amasako w’erilengekaniako ng’ayo, kutsibu-tsibu ikikendi kuwathikya omwa kiro omughulhu wuli iwuwene kandi iwabiribulha othulho.—Isaya 57:15.

Lino-lino, omulhume w’emyaka 40 mwaholerwe mukali wiwe busana n’ekansa. Jack akabugha athi hakanayira iniabya omwa mbwera nene. Aliwe erisaba lyabirimuwathikya. Akabugha athi: “Omughulhu ngasaba Yehova, ngayowa isingakiri ingyuwene. Mughulhu mungyi namabiritsumbuka, othulho thukabulha. Ngabya nabirisoma n’erighanirya okwa Masako awakahumulikanaya, n’eribwira Yehova y’eriyowa lyaghe, ngathekana n’eriyowa buholho, ikyahumulikania amalengekania n’omuthima waghe neryo inabana othulho.”

Mama wa Vanessa mwalhwalha amaholha. Vanessa nayu erisaba mulyamuwathikya kutsibu. Akabugha athi, “Iningabya ingayowa nabi kutsibu, neryo iningalhakira erina lya Nyamuhanga omwa misoni. Yehova mwahulikirira emisabe yaghe kandi inakanyiha akaghalha ako nabya ingayithagha.”

Abasomire eby’erihumulikania abakaholerawa bakahabulha abali omwa bulighe ng’obo erisangira omwa mibiiri y’eriwathikya abandi. Eki kyangana letha etseme n’erikehya obulighe. (Emibiri 20:35) Abakristayo bangyi ababiriholerwa babiriyilhangirira ngoku eriwathikya abandi kikahumulikanaya.—2 Abanya Korinto 1:3, 4.

^ enu. 5 E Biblia siyirikangiriraya yithya. Iyo yikakanganaya ebindu bisathu ebikaleka abandu ibaholha.—Omugambuli 9:11; Yoane 8:44; Abanya Roma 5:12.