Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Akaleberyo—ey’Erigha  |  Okwakathano 2016

 OMWATSI W’OKWA KIDIPA | OW’OKW’IWE AMAHOLHA

Abaholi Bakendi Syalhubuka!

Abaholi Bakendi Syalhubuka!

Wang’inibuka Gail oyuli okw’itsuka ly’emyatsi eno ngoku syalirengekanaya athi akendisyahwako obulighe bw’olhuholho lhwa mwira wiwe, Rob. Aliwe, analindirire kutsibu erisyalholha oku mwira wiwe omwa kihugho kihya-kihya ekyo Nyamuhanga abirilhagha. Akabugha athi: “Erisako erya nganzire kutsibu ly’erya Eribisulirwa 21:3, 4.” Likabugha lithi: ‘Nyamuhanga iyowene asyabya haguma nabo. Nikwa asyasangulha emisonia yosi okwa meso wabu. Kandi olhuholho silhwendisyaswabyaho, erisusumana kutse eririra, kutse eriaghalhwa. Emyatsi y’erimbere iyabirirenga.’

Gail akabugha athi: “Omulhaghe oyu akaghunza ebyosi. Omwa muthima waghe ngabya ingane mulengekania kutsibu okwa babiriholerwa kandi ibabya isibasi ngoku hane amaha w’erisyalholha okwa bandu babu.” Gail akaghendera okwa nyikirirya siwe omw’ikolha omubiiri w’eriyihayo ow’eribya muthuliri ow’omughulhu wosi, eribwira abandi okwa mulhaghe wa Nyamuhanga ngoku “olhuholho silhwendi syaswabyaho.”

Iwangana bugha wuthi ‘ekyo sikyanga thokekana!’ Aliwe thalengekania okwa ky’erileberyako kya Yobu. Abya alhwere kutsibu. (Yobu 2:7) Nomwakine indi Yobu mwayighomba eriholha, abya inianayikethere amaaka wa Nyamuhanga w’erisyamulhubukya iniathasyabana engebe okwa kihugho. Mwabugha omw’iyikethera athi: “Kumbe wanganyibisa omwa kulimu . . . Wangabirikira, naghe inakwithaba. Wanganzire omubiiri w’ebyalha byawu.” (Yobu 14:13, 15) Yobu abya inianasi ngoku Nyamuhanga wiwe angakandire erimulhubukya.

Nyamuhanga akisiya iniakolha ekyo—oku Yobu n’abandi bangyi—ekihugho kino kikabya paradiso. (Luka 23:42, 43) E Biblia yikahamaya okw’ekyo omwa Emibiri y’Abakwenda 24:15 yithi: “Hasyabya erilhubuka.” Yesu akathukakasaya athi: “Simusweke busana n’eki, kusangwa endambi yikasa, oko mughulhu oyo, abosi abali omwa masinda, basyowa omulenge wiwe, basyalhua omwa masinda wabo.” (Yoane 5:28, 29) Yobu akendi syalhangira omulhaghe oyu akabererera. Akendi syabya iniane n’amaha aw’erithasyabya ‘n’amaaka w’obulhwana bwiwe’ n’omubiri wiwe iniabya inianathendere “kwilhaba ow’omwana” kera na kera. (Yobu 33:24, 25) Ekyo ky’ekinemwendi syabya okwa bosi abakaligha n’erisima emitheghekere ya Nyamuhanga ey’olhukogho ey’erisyalhubukya abandu ibathasy’ikalha okwa kihugho.

Wamabya iwanaholerwe ow’okw’iwe, emyatsi eya thwamabirilebya eyi obundi siyanga ghunzaho obulighe bwawu bwosi obwa wulimu. Aliriryo wamaghanirya okwa milhaghe ya Nyamuhanga eyiri omwa Biblia, iwukendibana amaha w’okwenene n’akaghalha ak’erighuma.—1 Abanya Tesalonika 4:13.

Wunanzire iwathasy’igha bingyi ngoku wanga ghumira obulighe bw’eriholerwa? Kutse wukanayibulhaya nga ni “Busana naki Nyamuhanga akalekereraho obubi n’eriaghalhwa?” Kisi lebaya okwa muthahulha wethu owe Intaneti owa, jw.org, wanalhangira ngoku e Biblia yikaha eby’erisubirya ebikahumulikanaya kandi ebyuwene.

Thasyaminya Bingyi

AKALEBERYO

Omundu Amaholha Akayahi?

Abandu munani abalhubuka banakanibirweko omwa Biblia. Mubanabugha bathi banawithe ebyo babana omwa baholi?