Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Akaleberyo—ey’Erigha  |  Okwakathano 2017

Siwuleke Olhwanzo Lhwawu Lhukaholhoka

Siwuleke Olhwanzo Lhwawu Lhukaholhoka

“Kandi kusangwa ebibi byasyakanya, olhwanzo lhw’abangyi lhwasyaholhoka.”​—MATAYO 24:12.

ESYONYIMBO: 60, 135

1, 2. (a) Ebinywe bya Yesu ebiri omu Matayo 24:12 mubyatsuka eribererera oku bahi? (b) Ekitabu ky’Emibiri y’Abakwenda kikakanganaya kithi ngoku abangyi b’okwa Bakristayo b’omwa kighonye ky’erimbere mubathalighira olhwanzo lhwabu eriholhoka? (Lebaya ekisasani ekiri okw’itsuka.)

OMUGHULHU Yesu abya okwa kihugho, mwasoborera ngoku abandu banga minyire “erihwererera ly’emighulhu.” Okwa bingyi ebyo alhaghulha, mwabya na kino: “Olhwanzo lhw’abangyi lhwasyaholhoka.” (Matayo 24:3, 12) Abayuda b’omwa kighonye ky’erimbere ibakayahulha mo bandu ba Nyamuhanga aliwe mubalighira olhwanzo lhwabu oku Nyamuhanga eriholhoka.

2 Aliwe Abakristayo bangyi okwa buthuku obo ku bathabya bathya. Ibo babya ibane mukolha n’omuhwa erithulha “engulhu yuwene ya Yesu” n’erikangania ku banzire Nyamuhanga, balikyabo, nibya n’oko babya isibali baminya ekwenene. Abakristayo aba ibo mubalhangira bathi olhwanzo lhwabu oku Yehova lhukabya ilhunaghumire. (Emibiri 2:44-47; 5:42) Aliwe eky’obulighe, hane abandi Bakristayo abalighira olhwanzo lhwabu eriholhoka. Ekyo thukakiminya thuthi?

3. Ni kyahi ekyangabya iky’ekyaleka olhwanzo lhw’abandi Bakristayo ilhwaholhoka?

 3 Yesu mwabwira Abakristayo be Efeso athi: ‘Simukinyanzire lino ng’erimbere.’ (Eribisulirwa 2:4) Abakristayo be Efeso bangabya imubaghendera okwa by’abandu ababya babathimbireko ababya banzire eby’eriyitsemesya. (Abanya Efeso 2:2, 3) E Efeso abya muyi w’obughuda bunene, kandi abandu bamo ibatsomene kutsibu eby’eriyitsemesya kwilhaba ekindi kindu kyosi-kyosi. N’abandi bangyi omwa Efeso ibanzire eby’obutswatswa, isibasikirye ebihano bya Nyamuhanga. Ibatsomene kutsibu eriyitsemesya kwilhaba eriyihayo omwa lhwanzo oku Nyamuhanga n’abandi.

4. (a) Olhwanzo lhwabiriholhoka lhuthi munabwire? (b) Ni miringo isathu yahi y’olhwanzo olhwa thutholere ithwabya ithunemughumya?

4 Ebinywe bya Yesu okwa lhwanzo eriholhoka bihambire n’okwa buthuku bwethu. Munabwire abandu bakayongera erithendi tsomana ebya Nyamuhanga. Omwakanya k’eriyikethera Nyamuhanga eribya iyukendi ghunzaho ebitsibu omwa kihugho, abangyi bakayikethera ebithongole by’abandu. Olhwanzo lhw’abandu lhuk’ongera eriholhoka. N’olhwanzo lhw’abaghombe ba Yehova nalhu lhwangana holhoka, ngoku kyanabya omwa kithunga kye Efeso. Neryo kwesi thuthakania okwa miringo isathu y’olhwanzo olhwa thutholere ithwabya ithunemughumya: (1) eryanza Yehova, (2) eryanza ekwenene ye Biblia, na (3) eryanza balikyethu.

ERYANZA YEHOVA

5. Busana naki thutholere ithwanza Nyamuhanga?

5 Nindi oyo thutholere ithwanza kutsibu? Yesu mwabugha athi: “Wanze Omukama Nyamuhanga wawu n’omuthima wawu wosi, n’ekirimu kyawu kyosi n’obulengekania bwawu bwosi. Ekihano kikulhu n’eky’erimbere ky’ekyo.” (Matayo 22:37, 38) Eryanza Nyamuhanga likaleka ithwaghendera okwa bihano biwe, ithwayiyinia, n’eripona ekibi. (Soma Esyonyimbo 97:10.) Aliwe Sitani n’ekihugho kiwe bakalengaho eritsekya n’erighunzaho olhwanzo olhwa thuwithire Nyamuhanga.

6. Olhwanzo lhw’abandu oku Nyamuhanga lhwamaholhoka, mukalhwiririraki?

6 Abandu b’ekihugho, olhwanzo babirilhuhamba buthuli. Omwakanya k’eryanza Nyamuhanga, abandu bangyi bayanzire. (2 Timoteo 3:2) Batsomene ‘esyongumbu sy’omubiri, esyongumbu sy’ameso, n’emiyiheko y’abandu’ kutse erihalisya. (1 Yoane 2:16) Omukwenda Paulo mwakunga okwa kyanga lhwiririra omwanza erihira eby’eriyitsemesya by’embere. Mwabugha athi: “Obulengekania obukakwama omubiri bukaletha olhuholho.” Busana naki? Kundi abakakolha ekyo bakabya ibamabya nzighu sya Nyamuhanga. (Abanya Roma 8:6, 7) Abandu abakahweraya esyongebe syabu omw’ikwamirira eby’esyosente n’eryanza eryughuthya esyongumbu syabu sy’omubiri omwa busingiri, mughulhu mungyi bakawa omwa bitsibu n’erinubira busa.​—1 Abanya Korinto 6:18; 1 Timoteo 6:9, 10.

7. Ni wandi malengekania wahi aw’akabi awanga hamba nabi n’okwa Bakristayo munabwire?

7 Abandu bangyi abakabugha bathi Nyamuhanga syaliyo, n’abakabugha bathi ebindu byayibuthukira bakalengaho kutsibu eribwira abandu ambu isibanza Nyamuhanga kutse nibya n’erilengekania bathi aneyo. Ebya bakabugha bikaleka ikyabya indi bukabya ini bukiru kutse obuthasoma omundu eriligha athi hane Omuhangiki. Eryongera okw’ekyo, abandu bangyi basikirye abanya seyansi kwilhaba Omuhangiki. (Abanya Roma 1:25) N’Omukristayo iniangana thebibwa omwa malengekania ayo. Obughuma bwethu na Yehova ibwangana tseka, n’olhwanzo olhwa thumuwithire ilhwangana keha.​—Abaebrania 3:12.

8. (a) Ni byahi ebyanga ghunza omwa baghombe ba Yehova mw’amani? (b) Esyonyimbo sura eya 136 yikathughumaya yithi?

 8 Kundi thuli omwa mughulhu mubi wa Sitani, ni binene ebyanga leka ithwayowa ithwamahwa amani. (1 Yoane 5:19) Aliwe thwamalighira obuli kandu erithulhumya kw’omuthima, erikirirya lyethu iryangana sebebera n’olhwanzo olhwa thuwithire Yehova ilhwaholhoka. Ng’eky’erileberyako, ithwangana bana ebitsibu-tsibu busana n’erikulha omo myaka, ithwatseka omwa maghalha, kutse erithunga ebitsibu by’esyosente. Kutse ithwangana yowa ithuli omwa bulighe busana n’eribya isithukithoka erikolha ebya thwanzire erikolha. Ithwangana yowa nabi kundi ebindu birebe omwa ngebe sibithabya ngoku thwabya thukalengekania. Nomuthwanga bana ebitsibu ebiri bithi, sithutholere thukalengekania thuthi Yehova abirithulekerania. Thalengekania okwa binywe ebikahumulikanaya bino ebiri omwa Esyonyimbo 136:23: “Mwathathwibirirwa omughulhu thwakindawa, olhwanzo lhwiwe olhuthyusa lhukakotha.” Thuwithe eriyikethera linene ngoku Yehova ‘akahulikirira erisaba lyethu’ kandi akalisubiraya.​—Esyonyimbo 116:1; 136:24-26.

9. Ni kyahi ekyaha Paulo y’akaghalha k’erithendi leghulha omw’anza Nyamuhanga?

9 Omukwenda Paulo iniakaghaniraya kutsibu okwa mibere Yehova abya akamuwathikiryamu, kandi ekyo mukyaleka iniasighalha inianaghumire. Mwahandika athi: “Omwami Mukulhu ni muwathikya waghe; singendi syubaha! Ko abandu banganyikolhaki kwehi?” (Abaebrania 13:6) Eriyikethera eryo Paulo abya awithe omu Yehova mulyamuwathikya erighumira ebitsibu by’engebe. Paulo iniakabya amabya omwa mibere eyikalire, isyalileghulha okw’iyikethera Yehova. Nibya n’omughulhu abya akabya omwa ngomo, iniakaghumaya balikyabo omw’ibahandikira esyobaruha esikabaghumaya. (Abanya Efeso 4:1; Abanya Filipi 1:7; Filemono 1) Paulo nomwanabana ebitsibu ebiri bithi, mwalholha embere eryanza Yehova. Mwayikethera “Nyamuhanga w’erikirania lyosi, oyukathukiranaya omo malighe wethu wosi.” (2 Abanya Korinto 1:3, 4) Thwanga gherererya thuthi Paulo?

Anza Yehova (Lebaya enungu 10)

10. Thwanga ghumya thuthi olhwanzo lhwethu oku Yehova?

 10 Paulo mwasoborera ekindu kighuma ekyanga thuwathikya erighumya olhwanzo lhwethu oku Nyamuhanga, omw’ihandika athi: “Musabe butsira eryumbya.” Enyuma w’aho, kandi mwahandika athi: ‘Muyitsingirire omw’isaba.’ (1 Abanya Tesalonika 5:17; Abanya Roma 12:12) Busana naki omusabe akathuthunda hakuhi na Nyamuhanga? Thukabya thukasaba, thukabya ithukakanaya na Yehova. Eki kikaleka ithwabya bughuma nayu. (Esyonyimbo 86:3) Thukabya thwamabwira Thatha wethu w’elhubulha y’ebiri okwa muthima, ekyo kikathuthunda hakuhi nayu. (Esyonyimbo 65:2) Kandi, olhwanzo olho thuwithire Yehova lhuk’ongera thukalhangira akasubirya emisabe yethu. Thuwithe eriyikethera ngoku “Omwami Mukulhu ali hakuhi okwa bosi abakamubirikira.” (Esyonyimbo 145:18) Eriyikethera ngoku Yehova athwanzire kandi ngoku akathusighika ikikendi thuwathikya erighumira ebitsibu ebya thwangabana lino n’omwa buthuku obukasa.

ERYANZA EKWENENE YE BIBLIA

11, 12. Thwang’ongera thuthi olhwanzo olhwa thuwithire ekwenene ye Biblia?

11 Ithwe ng’Abakristayo, thwanzire ekwenene. Omwa Kinywe kya Nyamuhanga mwa thukabana ekwenene. Yesu mwabugha na Thatha wiwe athi: “Ekinywe kyawu ni mwatsi w’ekwenene.” (Yoane 17:17) Erithoka eryanza ekwenene ye Biblia, thutholere ithwaminya ebiri muyo. (Abanya Kolosai 1:10) Aliwe siky’ekyo kisa. Thalebya ekya omuhandiki w’Esyonyimbo esura eya 119 akabugha athi thutholere ithwakolha. (Soma Esyonyimbo 119:97-100.) Ekiro ekyosi, thutholere ithwabya ithunemughanirya, kutse erilengekania buuli okwa bya thukasoma omwa Biblia. Thukendibya thunemughanirya ngoku thwanga ghasirwa omw’ighendera okwa kwenene ye biblia omwa ngebe, ithukendi yongera eryanzayo.

12 Omuhandiki w’esyonyimbo kandi athi: “Amahamulho wawu akasiha ndeke omwa buno bwaghe, asihire kwilhaba obuki!” (Esyonyimbo 119:103) Ebitabu ebiseghemere okwa Biblia ebya kithunga kya Yehova kikahulhukaya, biri ng’ebyalya ebisihire. Thukabya thukalya ebyalya ebya thwanzire, thukanza ithwabirya ithunayithondwerye. Ekyo kyo thunatholere ithwakolha thukayeghesya ebye Biblia. Thwamakolha ekyo, neryo aho ithukendyanza “ebinywe by’eritsemesya” eby’ekwenene, kandi ikikendi thwolhobera eryibuka ebya thukasoma n’eribikolesya eriwathikya abandi.​—Omugambuli 12:10.

13. Ni kyahi ekya wathikaya Yeremia eryanza ekwenene y’Ekinywe kya Nyamuhanga? Ekyo mukyamuhambako kithi?

13 Omuminyereri Yeremia abya anzire ekwenene eyiri omwa binywe bya Nyamuhanga. Mwabugha athi: “Ebinywe byawu mubyabanika, naghe munalyabyo. N’ebinywe byawu mubyabya butseme busana naghe, n’eritsanga ly’omuthima waghe. Kusangwa ngahulhawa omwa lina lyawu, iwe mwami Mukulhu Nyamuhanga w’emilhondo.” (Yeremia 15:16) Yeremia mwaghanirya buuli okwa binywe bya Nyamuhanga, neryo mwabyanza. Mwalhangira ini lhusunzo er’imanira Yehova n’erithulhughania omwatsi wiwe. Thwamanza ekwenene ye Biblia, ithukendi lhangira ngoku ni lhusunzo eribya Bema ba Yehova n’eribya ithukathulha omwatsi w’Obwami omwa biro bino by’enyuma-nyuma.

Anza ekwenene ye Biblia (Lebaya enungu 14)

14. Ni kindi kyahi ekya thwanga kolha nuku thwongere eryanza ekwenene ye Biblia?

14 Ni kindi kyahi ekikendi thuwathikya eryongera eryanza ekwenene ye Biblia? Thutholere ithwabya isithulyusa okwa mihindano yethu y’ekithunga, kundi eyo yathukakangiriribawa na Yehova. Erigha e Biblia erilhabira omwa Kaleberyo obuli yenga y’enguma y’okwa syonzira  ngulhu-ngulhu sy’erikangiriribwa lyethu. Thwamanza erighasirwa ndeke omwa muhindano oyu, thutholere ithwasangwa thwathegheka lhuba. Ng’eky’erileberyako, ithwangana lhangira thuthi thukasoma amasako awosi awalimu. Ebiro bino, abandu ibangana hira egazeti y’Akaleberyo okwa masimu kutse okwa syotabbuleti kundu yine omwa mibughe mingyi okwa jw.org n’omwa JW Library. Ebindi ebikasomerawa okwa byuma ng’esyotabuleti bikanaleka iwasoma erisako omw’irithulhako buyira. Aliwe, thukalhangira thuthi thukasoma obuli mwatsi owali omwa gazeti. Thwamasoma amasako gho ndeke n’erighanirya kugho, olhwanzo lhwethu busana n’ekwenene ye Biblia ilhukendyongera.​—Soma Esyonyimbo 1:2.

ERYANZA BALIKYETHU

15, 16. (a) Erikwamana na Yoane 13:34, 35, Yesu mwathuha kihano kyahi? (b) Olhwanzo olhwa thuwithire Nyamuhanga ne Biblia lhuhambene lhuthi n’olhwa thuwithire balikyethu?

15 Omw’igholho-gholho Yesu athali aholha, mwabwira abigha biwe athi: “Ngabaha ekihano kihya-kihya nyithi; mwanzane. Ngoku nabiribanza, nenyu mwanzane muthya. Neryo mwamabya n’olhwanzo, omughuma busana n’owundi, abandu bosi basyaminya ku muli bigha baghe.”​—Yoane 13:34, 35.

16 Eryanza baghalha bethu na bali bethu kihambene n’eryanza Yehova. Thwamabya isithwanzire Nyamuhanga, obo isithwanganza n’abalikyethu. Kandi thwamabya isithwanzire balikyethu, isithwanganza Nyamuhanga. Omukwenda Yoane mwahandika athi: “Omundu amabugha athi nyanzire Nyamuhanga, kandi iniakakwa mulikyabu y’obusu, ini mubehi. Kusangwa oyuthanzire mulikyabu oyo abirilholhako, syangathoka eryanza Nyamuhanga oyo athe athalholhako.” (1 Yoane 4:20) Kandi olhwanzo olhwa thuwithire Yehova n’abalikyethu lhuhambene n’olhwanzo olho thuwithire e Biblia. Busana naki? Kundi thwamanza ebya thuk’igha omwa Biblia, ithukendyanza erighendera okwa kya yikathulhaghira yithi thwanze Nyamuhanga n’abalikyethu.​—1 Petero 1:22; 1 Yoane 4:21.

Kanganaya balikyethu b’olhwanzo (Lebaya enungu 17)

17. Ni byahi ebya thwanga kolha erikangania abandi b’olhwanzo?

 17 Soma 1 Abanya Tesalonika 4:9, 10. Ni byahi ebilhangirikire ebya thwanga kolha erikangania olhwanzo okwa balikyethu omwa kithunga? Obundi mughalha wethu kutse mwali wethu oyukekelhuhire akayithagha obuwathikya erithoka eryasa okwa mihindano n’erisuba eka. Omukwakali iniangana yithagha erimukokotherya akandu omwa nyumba yiwe. (Yakobo 1:27) Baghalha bethu na bali bethu ababbunikire omuthima, kutse abawithe ebindi bitsibu bakayithagha erihumulikanibwa. (Emisyo 12:25; Abanya Kolosai 4:11) Thukakanganaya “abali omwa kithunga ky’abikirirye” b’olhwanzo omwa bya thukabugha n’erikolha.​—Abanya Galatia 6:10.

18. Ni kyahi ekikendi thuwathikya erihira h’obuholho n’abalikyethu?

18 E Biblia muyabugha yithi “omwa biro by’enyuma-nyuma” eby’omughulhu mubi ono, mukyalhaghulhwa indi abandu bangyi bakendi syayanza n’eribya b’omururu. (2 Timoteo 3:1, 2) Ithwe ng’Abakristayo, thutholere ithwabya ithunemuhiraho akaghalha kanene erithoka eribya ithunemw’ongera olhwanzo lhwethu busana na Yehova, Ekinywe kiwe, n’abandi. Kundi sithuhikene, ihangana yira ithwasoberania. Aliwe kundi thwanzene, ithukendi lengaho omwa byalhuba kandi omwa bwolho-bwolho erihira h’obuholho. (Abanya Efeso 4:32; Abanya Kolosai 3:14) Kisi isithwalighira olhwanzo lhwethu lhukaholhoka! Aliwe, muyire thulhole embere eryanza Yehova ya kutsibu, Ekinywe kiwe, n’abalikyethu.