Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Akaleberyo—ey’Erigha  |  Okwakathano 2017

Etseme y’Eriolhobya Engebe

Etseme y’Eriolhobya Engebe

DANIEL NA MIRIAM bathahanaya omwa Kwomwenda 2000 neryo bamabya omwa ngebe eyuwene e Barcelona, e Spain. Daniel akabugha athi: “Emibiiri eyo thwabya thukakolha muyathuthokesya eribya thukalira omwa syohuteri esy’omulembe, eribungira omwa bindi bihugho, n’eryambalha esyongyimba sy’obughuli. Kandi ithukabya ithunemusangira ndeke n’omwa mubiiri w’erithulira.” Aliwe muhabanika embinduka.

Okwa lhuhindano lhw’ebiro bisathu olhwabya 2006, Daniel mwowa ekibulyo ekyabya omwa mukania, kithi: “Mbwino thune mukolha n’akaghalha kosi eriwathikya “abakisiya ibakerwa” nuku banga kwama enzira eyikakolhaya okwa ngebe y’erikotha?” (Emisyo 24:11) Omwa mukania, mukyasoborerwa ngoku thuwithe olhukwamirwa lhw’erithulha engulhu ye Biblia kundi yo yiri mw’omulhamu w’abandu. (Emibiri 20:26, 27) Daniel akabugha athi, “Munayowa Yehova nga n’ingye akakanaya naghe.” Kandi omukania mwakangania ngoku etseme enene thukabanayo omughulhu thukakolha bingyi omwa mubiiri wa Yehova. Daniel mwaligha ekyo ku ni kwenene kundi iniakalhangira mukali wiwe Miriam iniatsemire kundi iyo abya inianemukolha obutemburi.

Omukania oyu mwahamba oku Daniel kwa kutsibu erihika okw’ithwamu erikolha embinduka nene omwa ngebe yiwe. Mwakehya okwa mibiiri yiwe, amatsuka obutemburi, n’erilengekania okwa tseme eyo banga thunga bana Miriam bamayawathikya eyiri obuyithawa bw’abathuliri.

EBITSIBU ERIMBERE​—N’ENYUMA W’AHO OMWATSI MUBUYA

Omwa Kwakathano 2007, Daniel na Miriam mubasaba erileka emibiiri yabu neryo bamaghenda e Panama. Babya imubana bungirayo kera. Eyo babya ibakendibya bakathulira byabya bizinga ebye Bocas del Toro Archipelago omwa ngetse nene ye Caribbean. Abanene abikereyo ni Baguaymi. Daniel na Miriam mubalengekania bathi bakendi ghunza e Panama y’amezi munani busana n’esyosente esyo babya nasyo.

Ibakakolesaya esyogali n’amathu okwa bizinga. Bakin’ibukire ekiro ky’erimbere bakaghenda olhughendo lhw’esyokilomita 30 okwa gali omwa bweruka kandi omwisi ini munene. Daniel mwalhuha kutsibu, amathimbako n’olhususu. Nomwabine bithya, abandu bayo abasibwe ng’aba Guaymi abo babya bakahikako ibakabakokaya, kutsibu-tsibu omughulhu Daniel na Miriam bigha binywe birebe omwa mubughe wabu. Enyuma w’obuthuku buke mubathunga abigha be Biblia 23.

Mubyabya bithi esyosente esyo babya nasyo syabirihwa? Daniel athi: “Ithukanza n’eririra thukalengekania okw’isuba e Spain. Muthwapona erithasigha abigha bethu be Biblia.” Aliwe, habere halhaba kwezi kughuma, mubabana omwatsi mubuya. Miriam akabugha athi: “Muthwabwirwa indi thukendibya batemburi b’embaghane. Muthwatsema eribya isithwendisuba eka!”

EKIKALEKA IBATSEMA KUTSIBU

Busana n’esyombinduka esyabya omwa kithunga, Daniel na Miriam mub’imanibwa okw’ikolha ng’abatemburi b’embaghane omwa 2015. Aho lero bangakolire bathi? Mubayikethera omulhaghe owali omwa Esyonyimbo 37:5: “Wuyihe oko Mwami Mukulhu, wuyikethereye, nayu asyakuwathikya.” Mubabana omubiiri owangabawathikya eribana ebiyithawa byabu bakakolha obutemburi bw’omughulhu wosi, kandi lino bane muwathikya omwa kithunga ekiri e Veraguas, omwa Panama.

Daniel akabugha athi: “Thuthe thwahongoka e Spain, thwabya isithwasi nga thwangana thoka eribya omwa ngebe nyolho. Thwabirithoka, kandi sihali ekya thubulirwe.” Ni kyahi ekikabatsemesaya kutsibu? Bathi: “Eriwathikya abakayikehaya erigha oku Yehova kikathulethera etseme nene kutsibu!