Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Akaleberyo—ey’Erigha  |  Okwakathano 2017

Eriwathikya Abaana ‘b’Ababunga’

Eriwathikya Abaana ‘b’Ababunga’

‘Sihali ekikanyitsemesaya ng’eriowa ngoku abaana baghe banemukwama ndeke omwatsi w’ekwenene.’​—3 YOANE 4.

ESYONYIMBO: 88, 41

1, 2. (a) Ni bitsibuki ebyo abaana abakahumira omwa bindi bihugho bakabana? (b) Ni bibulyo byahi ebya thukendi kaniako omo mwatsi ono?

JOSHUA akabugha athi: “Eritsuka omwa bulere, eka n’omwa kithunga, iningabugha omubughe w’ababuthi baghe isithuli thwasuba omwa kindi kihugho. Aliwe nabere natsuka esukuru eya thwahumira, munatsuka eryanza omubughe wayu. Myaka mike-mike, munatsuka eribugha omubughe oyo musa. Munabya isingakiyitheghereraya eby’omwa mihindano y’omwa mubughe w’ababuthi baghe, kandi namatsuka eriyowa nga singakiri w’okwa kihanda kyethu.” Ebiri ng’ebyo binemubya n’okwa bandi banene.

2 Munabwire, abandu abalhabire oku 240,000,000 sibikere omwa kihugho ekyo babuthirawamo. Wamabya iwuli mubuthi oyuwabirihumira omwa kindi kihugho, wanga wathikya wuthi abaana bawu eryanza Yehova n’eribawathikya ‘erikwama ndeke ekwenene’? (3 Yoane 4) N’abandi banga wathikya bathi?

ABABUTHI, MUHIREHO EKY’ERILEBERYAKO EKYUWENE

3, 4. (a) Ababuthi bangahiriraho bathi abaana babu eky’erileberyako ekyuwene? (b) Ni kyahi ekyo babuthi bathatholere erilindirira okwa baana babu?

3 Ababuthi, eky’erileberyako kyenyu ky’ekyanga wathikya abaana benyu eribya n’obughuma obuwene na Yehova  n’erisyabyaho kera na kera. Abaana benyu bakabya bakalhangira mukatsuka “erisonda Obwami,” nabu bak’igha eriyikethera Yehova omwa biyithawa byabu ebya buli kiro. (Matayo 6:33, 34) Omubiiri wawu w’erikolera Yehova hiragho embere omwakanya k’eryanza erithunga ebindu bingyi. Ibya omwa ngebe nyolho kandi yitheghaye okw’ibya mw’amabanza. Lhubirira eribya n’ebindu elhubulha, n’ibugha ambu, erisimwa na Yehova, omwakanya k’eryanza “erisimwa n’abandu.”​—Soma Mariko 10:21, 22; Yoane 12:43.

4 Isiwayingiraya omwa mibiiri minene eyanga leka iwabulha obuthuku bw’eribya n’abaana bawu. Ambi ibaminya ngoku wukabatsemera kutsibu omughulhu bakahira ebya Yehova by’embere kwilhaba eryanza ebitsumbi kutse esyosente. Yitheghaye okwa malengekania mabi aw’eribugha indi abaana batholere ibahira ababuthi babu b’omwa ngebe eyuwene. Wibuke ngoku “ababuthi bo batholere eribikira abaana babu.”​—2 Abanya Korinto 12:14.

ABABUTHI, MURWANISAYE EKITSIBU KY’OMUBUGHE

5. Busana naki ababuthi batholere ibabya ibanemukanirya abaana babu oku Yehova?

5 Ngoku kyana lhaghulhawa, abandu “abakalhua oko bihanda by’obuli mubughe” banemwasa omwa kithunga kya Yehova. (Zekaria 8:23) Aliwe abaana bawu bamabya isibaliyitheghereraya ndeke omubughe w’eka, ikyangana kalha eribakangirirya ekwenene. B’abigha be Biblia abamutholere imwatsomana kutsibu, kandi ibo ‘eriminya’ Yehova ikikendi leka ibasyabana engebe y’erikotha. (Yoane 17:3) Abaana bawu erithoka erigha erikangirirya lya Yehova, wutholere iwabya iwune mulikaniako ngendo nyingyi.​—Soma Eryibuka Ebihano 6:6, 7.

Abaana benyu b’abigha be Biblia abo mutholere imwatsomana kutsibu

6. Abaana bawu banga ghasirwa bathi bam’igha omubughe wawu? (Lebaya ekisasani ekiri okw’itsuka.)

6 Abaana bawu obundi bakendigha omubughe muhyaka w’okwa sukuru n’okwa bandi bakakania. Aliwe ibakendiminya omubughe wawu wukakania nabu mughulhu wosi. Abaana bawu bamabya ibanasi omubughe wawu, ikikendi bolhobera erikania nawu n’erikubwira eriyowa lyabu. Aliwe hane n’eyindi mighaso. Abaana bawu bamabya bakabugha omubughe owalhabire oku mughuma, kikuwanaya amaaka wabu w’erilengekania kandi ikyabawathikya eriyitheghererya abandi bandu. Kyangana baha n’akaghisa k’erikolha bingyi omw’ithulira. Carolina, oyo ababuthi biwe bahumira omwa kindi kihugho akabugha athi: “Eribya omwa kithunga ky’owundi mubughe kyabirinyitsemesya. Kandi kikatsemesaya eriwathikya eyiri obuyithawa bunene.”

7. Wanga kolhaki omw’eka yenyu mwamabya imuli ekitsibu ky’omubughe?

7 Aliwe, abaana b’abakahumira omwa kindi kihugho bakabya babirigha emibere n’omubughe w’ekihugho ekyo, hanganayira ibabya isibakyanzire kutse isibanga thasyathoka erikolesya omubughe w’ababuthi babu. Ababuthi, abaana benyu bamabya ikubali bathya, mbwino simwanga lengaho erigha hakiri bike omwa mubughe w’eya muli? Ikikendibya kyolho inywe ng’Abakristayo erikulya abaana benyu bo ndeke mwamayitheghererya ebya bakakanayako kutsibu, ebya bakayitsemesayamo,  n’ebya bakasoma okwa sukuru, kandi n’erikania n’abahalimu babu. Ni kwenene erigha owundi mubughe kikayithagha obuthuku, akaghalha, n’eriyikehya. Aliwe kitholere. Ng’eky’erileberyako, omwana wawu amabya mutsiha, mbwino isiwendi lengaho erigha omubughe w’abatsiha nuku wanga thoka erikanirania nayu? Kwa kinatholere kithya n’okwa mwana oyuwabirikulira omwa wundi mubughe, kwa bithe? *​—Lebaya omwatsi ahikwa.

8. Wangawathikya wuthi abaana bawu wamabya isiwasi ndeke omubughe ogho babiribeghera?

8 Ikyangana kalha kutsibu okwa babuthi ababirihumira omwa kindi kihugho eribugha ndeke-ndeke omubughe ogho abaana babu babiritsuka eribugha. Eki ikyangana leka ikyakalira ababuthi eriwathikya abaana babu eriyitheghererya “Amasako Abuyirire.” (2 Timoteo 3:15) Eyo nomuyangabya iy’emibere eya wulimu, iwangana bawathikya eriminya n’eryanza Yehova. Omusyakulhu w’ekithunga oyuk’ahulhawa mwa Shan akabugha athi; “Mama wethu oyuwathukulhaya iyuwene mukyamukalira erigha ndeke omubughe ogho thwabya thukayitheghererya ndeke, kandi ingye na bali bethu isithwasi ndeke omubughe wiwe. Aliwe ithukabya thukalhangira akayeghesya e Biblia, akasaba, n’erikolha kutsibu omw’isondolha eriramya ly’eka obuli yenga, muthwalhangira ngoku eriminya Yehova kya kikulhu.”

9. Ababuthi banga wathikya bathi abaana babu kyamayithaghisya erikolesya emibughe ibiri?

9 Abandi baana, ikyangana yithaghisya eribakangirirya oku Yehova omwa mibughe ibiri, kundi bakakolesaya okwa sukuru kw’owundi mubughe, n’eka ibakolesya owundi. Neryo busana n’ekyo, abandi babuthi bakathwamu erikolesya ebitabu, n’esyovidiyo omwa mibughe ibiri eyo. Ekyo kikakanganaya ngoku ababuthi ababirihumira ehandi batholere ibahira h’akaghalha erithoka eriwathikya abaana babu eriyithunda hakuhi na Yehova.

WUTHOLERE IWABYA OMWA KITHUNGA EKIKAKOLESAYA MUBUGHE WAHI?

10. (a) Nindi oyutholere iniathwamu okwa kithunga ky’eribyamu? (b) Ab’imaniri b’amaka batholere ibatsuka erikolhaki bathe bathwamu?

10 Abakahumira omwa bindi bihugho, haali okwa balikyabo abakabugha omubughe wabu, batholere ibabya omwa kithunga ekikakolesaya omubughe w’eya bamahumira. (Esyonyimbo 146:9) Aliwe omwa bulhambu obo hakuhi, mwamabya imune ekithunga ekikakolesaya omubughe wabu, omulhume ng’omuthwe w’eka atholere iniathwamu nga ni kithunga ky’omubughe wahi ekikendi ghasira ab’eka yiwe. Atholere iniatsuka erikilengekaniako buuli n’erikihira omwa misabe. Atholere iniakihanulhako na mukali wiwe n’abaana. (1 Abanya Korinto 11:3) Ni byahi eby’atholere iniatsuka erilengekaniako? Ni misingyi yahi ye Biblia eyanga muwathikya erithwamu ndeke?

Omuthwe w’eka atholere iniathwamu nga ni kithunga kyahi ekikendi ghasira ab’eka yiwe

11, 12. (a) Omubughe akahamba athi okwa baana erighasirwa omwa mihindano? (b) Ni kyahi ekikanaleka abandi baana ibabya isibanzire erigha omubughe w’ababuthi babu?

11 Ababuthi batholere ibalengekania ndeke  okwa kyanga ghasira abaana babu. Ebya thuk’igha okwa mihindano bisa, sibirighunza, erithoka eriwathikya abaana eriyitheghererya ndeke ekwenene ye Biblia. Thalengekania oku kino: Abaana bangana ghasirwa omw’ithabya okwa mihindano eyiri omwa mubughe ogho bakayitheghereraya ndeke. Aliwe ekyo sikyangabya abaana bamabya isibaliyitheghereraya ndeke omubughe. (Soma 1 Abanya Korinto 14:9, 11.) Kandi sikirimanyisaya indi omubughe w’ababuthi b’omwana w’anemwendi syabya musa iwangana muhika okwa muthima. (Emibiri 2:8) Kandi kwenene, abandi baana bangan’igha erisubirya, erilhabya ebitsweka n’emikania omwa mubughe w’ababuthi babu, aliwe ibabya isibathalhusyayo ndeke eriyowa lyabu.

12 Kandi n’ekindi, ebikahamba okwa muthima w’omwana ni binene, isiw’omubughe musa. Kubyabya byabere bithya oku Joshua, oyulyakanibawako okw’itsuka. Mwali wabu ye Esther, akabugha athi: “Okwa baana balere, omubughe w’ababuthi, emibere y’ewabu, n’edini, ebyosi bikabahambako.” Abaana bamabiryanza kutsibu emibere y’eyabikere, ibangana ghana erigha n’omubughe w’ababuthi kutse n’edini yabu. Ababuthi abo banga kolhaki?

13, 14. (a) Busana naki mughalha wethu na mukali wiwe ababya ibabirihumira omwa kindi kihugho mubathwamu erisuba omwa kithunga ekikakolesaya omubughe w’eyo? (b) Ababuthi mubakolhaki erithoka erighumya obughuma bwabu na Yehova?

13 Ababuthi Abakristayo bakahira ebyanga ghasira abaana babu by’embere kwilhaba ibo ebya banzire. (1 Abanya Korinto 10:24) Samuel, thatha wa Joshua bana Esther, akabugha athi: “Ingye na mukali waghe muthwalengaho erilhangira abaana bethu nga bakatsemera eby’obunyakirimu omwa mubughe wahi. Muthwasaba Yehova erithuha amenge. Muthwalhangira isibalighasirawa ndeke omwa mihindano y’omubughe wethu. Neryo muthwathwamu erihumira omwa kithunga ky’omubughe w’eyathwikere, nomwakine indi ithwe sithwabya thwanzire. Ithwe bosi haghuma, ithukaghenda okwa mihindano n’omw’ithulira. Ithukana kokaya n’abanywani erisyabya nethu okw’irya n’erisatha haghuma. Ebyosi ebi mubyawathikya abaana bethu eriminya balikyethu ba ndeke n’eriminya Yehova, butsira nga Nyamuhanga buyira, aliwe nga Thatha wabu kandi munywani wabu. Muthwalhangira ekyo iky’ekirengire ibo erigha omubughe wethu.”

14 Samuel kandi athi: “Nethu erithoka eribya ithunaghumire bunyakirimu, ingye na mukali waghe ithukahindana n’okwa mihindano y’omubughe wethu. Mughulhu wosi ithukakolha kutsibu, kandi ithukalhuha. Aliwe thukasima Yehova busana n’eritsumulha akaghalha kethu n’eriyihayo lyethu. Hathya, abaana bethu basathu abosi banemukolera Yehova omwa mubiiri w’omughulhu wosi.”

EKYA BALERE BANGA KOLHA

15. Ni kyahi ekyaleka mwali wethu Kristina iniayowa iniakendibya n’omuhwa ndeke amakolera Yehova omwa kithunga ekikakolesaya omubughe w’eyo bahumira?

15 Abaana bakabya bakakulha, ibangana lhangira eky’olhobire iry’erikolera Yehova omwa kithunga ekikakolesaya omubughe ogho bakayitheghereraya ndeke. Kyamabya kithya, ababuthi isibayowa bathi abaana bamabaghana. Kristina akabugha athi; “Ingasi bike-bike omwa mubughe w’ababuthi baghe, neryo eby’omwa mihindano ibikanyikalira eribiyitheghererya. Nabere nahikya myaka 12, munahindana okwa lhuhindano olhwabya omwa mubughe ogho thukakolesaya okwa sukuru. Ekyo ky’ekiro naminya ngoku ebya  ng’igha y’ekwenene! Ekindi ekya ngwathikaya w’omughulhu natsuka erisaba omwa mubughe ogho thukakolesaya okwa sukuru. Iningayowa inamakanirya Yehova erilhua omwa muthima!” (Emibiri 2:11, 41) Kristina abere akahikya emyaka 18, mwathwamu erikania n’ababuthi biwe okwa mwatsi oyo, neryo amathwamu erisuba omwa kithunga ekikakolesaya omubughe oyo. Akabugha athi: “Erigha oku Yehova omwa mubughe waghe w’esukuru mukyambira mw’omuhwa w’erikolha bingyi.” Buthuku buke enyuma w’aho, Kristina mwabya mutemburi w’omughulhu wosi kandi atsemire.

16. Busana naki Nadia atsemire busana n’eribya imwalholha embere omwa kithunga ky’omubughe w’ababuthi biwe?

16 Abalere, mbwino mukayowa imwanzire eribya omwa kithunga ekikolesaya omubughe w’eyo mwabirihumira? Kyamabya ikwakiri kithya, ambi iwayibulya nga ni busana naki. Mbwino erisuba omwa kithunga ekyo wukayowa iry’erikendi kuwathikya eriyithunda hakuhi na Yehova? (Yakobo 4:8) Kutse mbwino wukathanza eriyihighulha okwa babuthi bawu nuku sibalhangire obuli kya wukakolha kutse mbwino siwanzire n’erilengaho erigha ndeke omubughe wenyu? Nadia, oyuli hathya okwa Beteli akabugha athi; “Ingye n’abandi baana bethu, thwabere thwahika omwa myaka yethu y’obunyethu, muthwanza erisuba omwa kithunga ekikakolesaya omubughe w’eyo thwahumira.” Aliwe ababuthi biwe babya ibanasi ngoku ekyo sikyendi wathikya abaana babu bunyakirimu. Akabugha athi, “Hathya thukasima kundi ababuthi bethu mubahira h’akaghalha erithukangirirya omubughe wabu n’erithuleka omwa kithunga ekikakolesaya omubughe oyo. Ekyo kyabirithuwathikya omwa ngebe n’erileka ithwathoka eriwathikya abandi eriminya Yehova.”

NGOKU ABANDI BALIKYETHU BANGA WATHIKYA

17. (a) Ni bahi abo Yehova ahere olhukwamirwa lhw’erilembera abaana? (b) Ababuthi banga bana bathi obuwathikya bw’erikangirirya abaana babu b’ekwenene?

17 Yehova abiriha ababuthi b’olhukwamirwa lhw’erikangirirya abaana babu b’ekwenene. Mwathalhuhererya abo sukulhu n’abo mukaka wabu kutse owundi wosi-wosi. (Soma Emisyo 1:8; 31:10, 27, 28.) Nomwabine bithya, ababuthi abathasi omubughe w’eyo babirihumira ibangana yithagha obuwathikya erithoka erihika okwa mithima y’abaana babu. Ababuthi ng’abo bamasaba obuwathikya bw’erikangirirya, sikirimanyisaya indi bakasagha olhukwamirwa lhwabu. Aliwe ekyo ni kighuma ky’okw’ibya ibakanza erikulyabo “omw’ikangirirya ly’omukama.” (Abanya Efeso 6:4) Ng’eky’erileberyako, ababuthi abo ibangana bulya abasyakulhu b’ekithunga b’amenge w’erisondolha eriramya ly’eka n’eribawathikya eribanira abaana babu abanywani abuwene.

Ababuthi n’abaana abosi bakaghasirawa omw’isangira haghuma n’ekithunga (Lebaya enungu 18, 19)

18, 19. (a) Abandi Bakristayo banga wathikya bathi abalere? (b) Ni kyahi ekyo babuthi batholere ibabya ibanemukolha?

18 Erithoka eriwathikya abaana babu, okwa bundi buthuku, ababuthi ibanganabya ibanemukokya esindi ka eribya nabu omw’iramya lyabu ly’eka. Kandi, abaana bakan’ighira okwa bandi Bakristayo omughulhu bakaghenda nabu omw’ithulira kutse erikolha ebindi bindu byo haghuma. (Emisyo 27:17) Shan, oyulyakanibawako kera akabugha athi; “Nahathya ngakin’ibuka balikyethu abanyikuba okwa kikuba kyabu. Ibakabya bakangwathikya omughulhu ngawithe omukania omwa sukuru, ining’igha bingyi. Kandi ininga tsemera eriyitsemesya eryathwabya thukasangiramu haghuma.”

 19 Aliwe balikyethu abo ababuthi bakasombolha eriwathikya abaana babu, batholere ibabya ibanemuhira omwa baana abo mw’omuhwa w’erisikya ababuthi babu. Ibangana kolha ekyo omw’ibya ibane mukania ndeke okwa babuthi n’erithendi yithwalha ibbwa nga n’ibo bamabya n’olhukwamirwa lhw’eribalembera. Kandi balikyethu abakawathikaya batholere ibayitheya okwa mibere eyo abali omwa kithunga n’abathe mukyo banga lhangira ng’eyithuwene. (1 Petero 2:12) Nomwakine indi ababuthi bangana saba abandi eribawathikya, lhukabya ilhukine lhukwamirwa lhwabu erikangirirya abaana babu b’ekwenene ye Biblia. Batholere ibalhangira bathi bakabya ibanemulebererya obuwathikya obwa baana babu bakathunga okwa bandi Bakristayo.

20. Ababuthi banga wathikya bathi abaana babu eribya baghombe ba Yehova bathaleghulha?

20 Ababuthi, musabe Yehova y’obuwathikya, kandi mulengeho ngoku mwanga thoka. (Soma 2 Emyatsi y’Emigulu 15:7.) Hira obunywani bw’omwana wawu na Yehova bw’embere kwilhaba ebya wanzire. Kolha ekyosi-kyosi erilhangira wuthi Ekinywe kya Nyamuhanga kikahika okwa muthima w’omwana wawu. Ambi iwabya iwunawithe amaha ngoku omwana wawu akendi syakolera Yehova. Abaana bawu bamaghendera okwa Kinywe kya Nyamuhanga n’eky’erileberyako kyawu kibuya, iwukendi yowa ng’omukwenda Yoane, oyuwabugha bino okwa baana biwe b’obunyakirimu, athi: ‘Sihali ekikanyitsemesaya ng’eriowa ngoku abaana baghe banemukwama ndeke omwatsi w’ekwenene.’​—3 Yoane 4.

^ enu. 7 Lebaya omwatsi owa “Wangan’igha Owundi Mubughe!” omwa Awake! ey’Okwakasathu 2007, olhupapura 10-12.