Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Akaleberyo—ey’Erigha  |  Okwokubanza 2016

 OMWATSI W’OKWA KIDIPA | IBYA MW’OKWENENE!

Eribya mw’Okwenene Likinatholere?

Eribya mw’Okwenene Likinatholere?

Hitoshi abya akakolha okwa by’embaririra omwa kithongole kirebe omwa Japan. Babere bakakania okwa by’embaririra n’omwimaniri w’omubiiri wabu, mubabugha bathi Hitoshi ahire omwa ripoti y’eby’embaririra mw’amabehi. Hitoshi mwabasoborera athi obunya muthima-thima bwiwe sibwanga mulighira erikolha ekithe mw’okwenene ng’ekyo. Omw’imaniri wa Hitoshi mwamuhayira athi akendi bingwa, kandi kwenene mwabingwa.

Emyezi eyakwamako, Hitoshi mwahwa amani n’eriyibulha-bulha ng’anemwendi syabana owundi mubiiri. Ng’eky’erileberyako, abere akabulibwa bakanza erimuha omubiiri mulebe, Hitoshi mwabugha athi syanga kolha omubiiri owali mw’eribugha amabehi. Oyuwabya akamubulya mwamusubirya athi, “Ni bake abanga bugha ekya wamabugha ekyo!” Ab’oku Hitoshi n’abanywani biwe nomubanabya ibanemumubwira bathi alholhaye embere eribya mw’okwenene, mwatsuka eryasa mw’erithika-thika. Ng’eky’erileberyako, mwabugha athi, “Munabulha nga kinatholere eribya mw’okwenene busana n’erikirirya lyaghe.”

Ekyabya oku Hitoshi kikakanganaya ngoku si b’abandu abosi indi bangatsemera ekindu ky’eribya mw’okwenene. Nibya n’abandi bakanathwalha eribugha okwenene ng’iherya, kutsibu-tsibu omwa by’esuburu. Omukali mughuma omwa South Africa mwabugha athi: “Ngasiba omwa bandu abathe mw’okwenene, endambi yikanahika ibanza erinyiretha mw’omuthima oyo.”

Omubere w’eribugha amabehi akanyirire munabwire. Oyusomire eby’emibere y’abandu, iya Robert S. Feldman, ow’okwa Yunivasite eye Massachusetts Amherst, omw’isekulya liwe mwabana abandu bakulhu-bakulhu 60 okwa buli 100 ibakabya ibabiribugha amabehi hakiri ngendo nguma bamakania habw’esyodakika ikumi. Feldman akabugha athi: “Eki mukyaswekya kutsibu. Sithwabya thukaminya thuthi amabehi akanabughawa okwa lhulengo ng’olhu.” Kikaswekaya eribya abandu ibakapona owundi akabatheba, aliwe ibbwa kandi ibo ibakanatheba abandi!

Busana naki amabehi, obwibi, n’eyindi mibere y’erithendibya mw’okwenene yikanyirire munabwire? Emibere eyi yikahamba yithi okwa bandu? Kandi ekikulhu, thwanga yitheya thuthi okwa mibere mibi eyi?