Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Akaleberyo—ey’Erigha  |  Okwokubanza 2016

 OMWATSI W’OKWA KIDIPA | IBYA MW’OKWENENE!

Ngoku Erithendibya mw’Okwenene Likakuhambako

Ngoku Erithendibya mw’Okwenene Likakuhambako

“Mughulhu wosi hakabya ihane ebitsibu ebikayithagha eribugha amabehi make imubyahwaho.”—Samantha, owe South Africa athya.

Wukanalighirana n’ekya Samantha abugha eki? Ng’iyo, obuli mundu abiriyisanga omwa mibere eyikalire. Ekya thwanga thwamu erikolha hamabanika ekyangaleka ithwanza eribugha amabehi, ikikendi kangania nga ni kyahi ekya thwanzire. Ng’eky’erileberyako, thwamabya n’omubere w’erisagha erihemuka, ithwangana yisanga ithwabirikolesya amabehi thukanza eriyilhusya kw’ekihemu. Aliwe okwenene kukabya kukaminywa, amabehi awathulhawa akalhua mw’ebitsibu. Thalengekania oku bino.

ERITHENDIBYA MW’OKWENENE LIK’ITHA OBUYISIWA

Obunywani bukabya ihali eriyisighangana. Abandu babiri bakabya bamayisighangana, bakayowa buholho n’erithendi yilhalikirirana. Aliwe obuyisiwa sibuly’asira kiro kighuma. Obuyisiwa bukasa abandu bakabya ibanemusiba haghuma, eribwirana okwenene, n’eritsomanangana. Aliwe n’ekindu kighuma kisa ekithe mw’okwenene kyangan’itha obuyisiwa obo. Kandi bamabirikw’iha mw’obuyisiwa, kikayithagha kaghalha kanene erithasyakuyisigha.

Wune wathathebwa n’omundu oyo wulhue wasi ng’omunywani wawu kutsibu? Kyamabya ikyana kubereko, muwayowa wuthi? Obundu muwapona n’eriyowa iwamakolhwa nabi. Kandi ikwa byanganabya bithya. Ahathe erithika-thika erithendibya mw’okwenene likatsandaya obunywani obuwene.

ERITHENDIBYA MW’OKWENENE LIKASIGHALIRA

Profesa w’eby’esuburu okwa Yunivasite ye California, iya Robert Innes, akabugha athi “erithendibya mw’okwenene ni mutse owakasighalira.” Kwesi erithendibya mw’okwenene lyangana linganisibwa n’akahuka k’obulhwere—wamabya wukasiba n’oyuthe mw’okwenene ikikendyolhoba iyo “erikusighalirya” omutse mubi oyu.

Wangayitheya wuthi okwa kithegho ky’erithendibya mw’okwenene? E Biblia y’eyanga kuwathikya. Thuthalebya emisingyi mike eyiri omwa Biblia.