Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Akaleberyo—ey’Erigha  |  Okwokubanza 2016

Omulimu wa Nyamuhanga Akathulira Ekirimu Kyethu

Omulimu wa Nyamuhanga Akathulira Ekirimu Kyethu

“Omulimu oyu wa Nyamuhanga akathulhagho haghuma n’ekirimu kyethu ku thuli baana ba Nyamuhanga.”ABAR. 8:16.

ESYONYIMBO: 109, 108

1-3. Ni byahi ebyaleka Pentekote ikyabya kiro ky’embaghane, kandi mubyaberererya bithi eby’Amasako abya iniabiribugha? (Lebaya ekisasani ekiri okw’itsuka.)

YABYA saha ng’isathu omwa ngyakya. Ekiro eki kyabya ky’embaghane okwa babya omwa Yerusalemu. Kundi eki kyabya kiro kikulhu, nakyo iyikabya ini sabato. Nga buli kiro, obuhere bw’obuli ngyakya-ngyakya bwangabya ibwabya ibwabirihebwa okwa hekalu. Etseme yabya nene ehosi omuhereri mukulhu akathegheka eriha obuhere bw’erihungya-hungya obw’amandu kutse emiggati ibiri eyiri mw’ekihamya eyikolire omwa ngano nyihya-nyihya. (Law. 23:15-20) Obuhere obu bwabya buhere bw’erirangirira eritsuka ly’erighesa engano. Eki kyabya kiro kya Pentekote omwaka owa 33 E.K.

2 Ebi byabere binemubya eyiri ehekalu, habya ihane ekindi, ibbwa ekikulhu kutsibu ekikayabya, butsira okwa hekalu, aliwe omwa kisenge ky’eyighulhu omwa yindi nyumba eyiri omwa tawuni eyo. Abakristayo nga 120 babya ibabirihindaniramu busana ‘n’eriyasaba.’ (Emib. 1:13-15) Ekyabya ikikayababyako kyabya iky’ekindu ekyabya kihambangene n’ebya muhereri mukulhu aby’akakolha okwa buli Pentekote, kandi kyaberereraya ebya  bughawa n’omuminyereri Yoeli emyaka nga 800 enyuma erihika okwa kiro ekyo. (Yoe. 2:28-32; Emib. 2:16-21) Ni kyahi ekyabya ikikayabya ekyangabere ky’omughaso munene kithya?

3 Soma Emibiri 2:2-4. Omulimu abuyirire wa Nyamuhanga muthibwa okwa ndeko y’Abakristayo ababya bahindene omwa kisenge ky’eyighulhu. (Emib. 1:8) Mubatsuka erikania n’erithulhughania ebikaswekaya ebya bayilhangirira n’eriyowira. Abandu bangyi abakasyahulikirira emyatsi eyi, omukwenda Petero mwabasoborera ekiryabya nga kikamanyisaya. Mwababwira athi: ‘Muleke ebibi, kandi obuli mughuma abatizibawe omwa lina lya Yesu Kristo busana n’eribuyirwa ebibi byenyu, neryo mwasyahebwa olhusunzo lhw’omulimu abuyirire.’ Okwa kiro ekyo, abandu hakuhi 3,000 mubaligha erikokibwa eryo, bamabatizibwa, kandi bamahebwa omulimu abuyirire owalhaghanisibawa.Emib. 2:37, 38, 41.

4. (a) Busana naki thutholere ithwatsomana ebyabya okwa Pentekote? (b) Ni kindi kindu kyahi kikulhu ekyangabya imukyabya okwa kiro ikyan’ekyo kera? (Lebaya omwatsi okwa muhindo.)

4 E Pentekote eya 33 E.K. yikathuhambako yithi? Si busana n’ebyabya okwa hekalu mwe Yerusalemu. Aliwe, kundi Yesu Kristo, ng’Omuhereri Mukulhu, mwabya iniamaberererya ebyabya bikakolhwa okwa kiro eki. [1] Omuhereri mukulhu iniakahongera Yehova y’emiggati ibiri eyabya yiwithe ekya yikimanira okwa kiro ekyo. Emiggati ibiri eyo eyiri mw’ekihamya yabya yik’imanira abahakabibwa abakalhusibawa omwa bandu b’ekibi n’eriyirwa mwa baghalha ba Nyamuhanga. Eritsuka-tsukana n’aho, “ab’erimbere,” ni bugha ambu abahakabibwa, mubaghenda bakasombolhwa nuku banga syaghenda elhubulha erithabalha omwa Bwami obukendi syaletha ebibuya bingyi okwa bandu. (Yak. 1:18; 1 Pet. 2:9) Busana n’ekyo mbulha thuli b’okw’abakendi syabya elhubulha na Yesu kutse okwa bakendi sy’ikalha okwa kihugho, ebyabya okwa kiro kye Pentekote bikathuhambako!

BIKABYA BITHI OMUNDU AKAHAKABIBWA?

5. Thukaminya thuthi ngoku abakahakabibawa abosi sibali hakabibawa omwa mibere mighumerera?

5 Kuwabya mughuma w’okw’abasa kw’ebiri nga birimi by’omuliro okwa mithwe yabu, isiwang’ibirirwe ekiro ekyo. Isiwanga thika-thika ngoku wabirihakabibwa n’omulimu abuyirire, na kwilhabirirya ibbwa wamabya iwabirithunga n’olhusunzo lhw’eribugha omubughe owa wuthalhue wasi. (Emib. 2:6-12) Aliwe ibbwa, mbwino abandi bahakabibwa abakwamako erihika munabwire mubanahakabibwa omwa mibere ng’ey’ab’erimbere 120? Eyihi. Abandi abosi ababya e Yerusalemu okwa kiro ekyo mubabya bahakabibwa babiribatizibwa. (Emib. 2:38) Ibo mubathasako ebiri nga birimi by’omuliro okwa mithwe yabu. Eryongera okw’ekyo, sibugha ambu abakahakabibawa abosi bakabya bahakabibwa bakabatizibwa. Abasamaria ibo babya bahakabibwa ihamabirilhaba buthuku balibatizibirwe. (Emib. 8:14-17) Okwa lhundi lhuhandi, Kornelio n’ab’eka yiwe basa b’abahakabibawa nibya isibali babatizibwa.Emib. 10:44-48.

6. Abahakabibwa abosi bakathungaki, kandi ikyabahambako kithi?

6 Kwesi abahakabibwa abosi sibali hakabibawa omwa mibere mighumerera. Abandi banganabya imubalhua ibaminya ngoku bali n’olhusunzo olhu, n’abandi imubaghenda bakaminya lyolho-lyolho. Aliwe, nomubakana hakabibawa omwa nzira muthina-muthina, abosi bakabya ibanawithe ekya mukwenda Paulo abugha kino: ‘Omughulhu mwowa omwatsi w’ekwenene, Nyamuhanga mwabaha omulimu abuyirire ogho alhagha, igho ni mutsimbo w’ekyo Nyamuhanga abirithulhagha.’ (Efe. 1:13, 14) Yehova akakolesaya  omulimu wiwe abuyirire erileka Omukristayo iniakakasya ndeke-ndeke ngoku Nyamuhanga abirimusombolha erisyaghenda elhubulha. Neryo omwa nzira eyi, omulimu abuyirire akabya “ng’omutsimbo,” kutse ng’ekindu ekikamukakasaya ngoku ni w’erisyaghenda elhubulha.Soma 2 Abanya Korinto 1:21, 22; 5:5.

7. Ni kyahi ekya buli muhakabibwa atholere iniakolha erisyabana ekihembo kiwe ky’erighenda elhubulha?

7 Mbwino Omukristayo erithunga omutsimbo w’obuhakabibwa oyu ni buthekwa-buthekwa akabya in w’erisyaghenda elhubulha? Eyihi. Akabya iniamathaminya ngoku amakokibwa erisyaya elhubulha. Aliwe iyo erisyathunga olhuhembo olho kutse erilhuherya kikasighikira okwa buthaleghulha bwiwe. Petero mwakania okw’ekyo athi: ‘Neryo balikyethu, mubye n’omuhwa w’erihangania ndeke eribirikirwa lyenyu, n’eriyisogha lyenyu, kusangwa mwamakwama muthya simwendi syathogha na kera. Nikwa mwasyabana ehamuli yosi y’eringira omwa Bwami bw’erikotha bw’Omukama n’Omulhamya wethu Yesu Kristo.’ (2 Pet. 1:10, 11) Kwesi obuli muhakabibwa atholere inialengaho kutsibu erisighalha iniane muthaleghulha, bithe bithya eribirikirwa elhubulha liwe irikendikwa busa.Ebr. 3:1; Erib. 2:10.

OMUNDU AKAMINYA ATHI?

8, 9. (a) Busana naki kikakalira abangyi eriyitheghererya ekikabya omundu akahakabibwa? (b) Omundu akaminya athi ngoku amabirikirwa erisyaya elhubulha?

8 Okwa baghombe ba Yehova abangyi munabwire, kyangana bakalira eriyitheghererya omundu ng’akabya athi akahakabibwa. Kandi basingene, kundi sikirikyatha babyako. Erimbere Nyamuhanga ahangika abandu abosi ini b’erisyabya okwa kihugho kera na kera. (Enz. 1:28; Esy. 37:29) Eky’erisombolha abandi erighenda elhubulha eriyathabalha ng’abami n’abahereri kyasiramu bwase. Omundu akabya amahakabibwa, eki kikahindulha amalengekania wiwe, neryo iniabya n’amaha w’erisyaghenda elhubulha.Soma Abanya Efeso 1:18.

9 Aliwe ibbwa omundu akaminya athi ngoku ni w’erighenda elhubulha, ngoku abirihebwa omutsimbo ow’embaghane oyu? Eky’erisubirya kilhangirikire ndeke omwa binywe ebya Paulo ahandikira abahakabibwa e Roma abo Nyamuhanga abirikira “eribya baana biwe,” kutse ababuyirire biwe. Mwababwira athi: ‘Omulimu ogho Nyamuhanga abaha, syalibayira mo bakobe, syalileka mukubaha, nikwa akabayira mo baghalha ba Nyamuhanga, kandi omwa buthoki bw’omulimu thukabirikira thuthi: Thatha (Abba), Thatha! Omulimu wa Nyamuhanga akathulhagho haghuma n’ekirimu kyethu ko thuli baana ba Nyamuhanga.’ (Abar. 1:7; 8:15, 16) Omwa bikuhi, erilhabira omwa mulimu wiwe abuyirire, Nyamuhanga akakanganaya omundu oyo ngoku amabirikirwa erisyathabalha omwa Bwami.1 Tes. 2:12.

10. Yoane w’erimbere 2:27 hakamanyisayaki hakabugha hathi abahakabibwa sibaliyithagha erikangiriribwa na mundu?

10 Abo Nyamuhanga akaha erikokya ly’embaghane eri sibaliyithagha obundi bwema erilhua okwa wundi mundu indi bamabya bahakabibwa. Yehova akabya iniabiribakakasya ndeke omwa malengekania wabu n’omwa muthima. Omukwenda Yoane akabwira abahakabibwa abo athi: “Munasi ndeke omwatsi w’ekwenene.” Kandi athi: “Simuli n’obwagha bw’erikangiriribwa na mundu; kusangwa omulimu akabakangiriraya emyatsi yosi, n’emyatsi eyi ni kwenene, si y’amabehi.” (1 Yn. 2:20, 27) Eki sikirimanyisaya indi ibo sibaliyithagha erikangiriribwa ng’abandi. Aliwe ngoku sibaliyithagha erihamibwako na mundu indi babiribya bahakabibwa. Yehova akabya iniabirikolesya akaghalha kiwe, omulimu wiwe abuyirire, eribakakasya ngoku ni bahakabibwa!

 BAKATHASYA BUTHAWA KANDI

11, 12. Omuhakabibwa angana yibulya athiki, aliwe syali thika-thikira kyahi?

11 Omulimu abuyirire akabya abirikakasya omundu ngoku ni muhakabibwa, omuhakabibwa oyu akabana esyombinduka nyingyi. Yesu mwakania okwa kikabya omwa kathi k’omuhakabibwa ngoku akabya ‘iniamabuthwa kandi.’ [2] (Yn. 3:3, 5.) Mwongera erisoborera athi: “Isiwasweka kundi mungakubwira nyithi: Litholere imwabuthwa kandi. Erihunga likabuhirira aho lyanzire, nawu wukowa erihuha lyalyu, aliwe isiwasi eyo likalhua kutse eyo likaya. Kw’ali athya obuli mundu oyo mulimu akabutha.” (Yn. 3:7, 8) Eki kikakanganaya ngoku erisoborera oyuthe wathahakabibwa okw’ibirikirwa eri kikalire okw’iyo eriliyitheghererya ndeke.

12 Aliwe, ababiribirikirwa omwa mibere eyi ibangana yibulya: ‘Busana naki ingasombolhwa? Busana naki ingye, butsira owundi?’ Omundu iniangana yowa nibya nga sy’atholere. Aliwe sibali thika-thika ibo eribya ibabiribirikirwa. Omwa mithima yabu muli etseme n’erisima. Bakayowa nga Petero, omughulhu abugha athi: “Thupipe Nyamuhanga ye Thatha w’Omukama wethu Yesu Kristo, busana n’erighanyira liwe linene, abirithasya thubutha kandi n’erithuha engebe eyiri n’amaha busana n’erilhubuka lya Yesu Kristo okwa baholi. Neryo thukalindirira eribana emighisa mibuya [“omwandu,” NW] eya Nyamuhanga akabikira abandu biwe. Abiribabikira emighisa eyo elhubulha, aho yithehonda kutse eritsanda kutse erikeha.” (1 Pet. 1:3, 4) Omuhakabibwa akabya akasoma ebinywe ebyo, akalhua iniaminya ndeke-ndeke ngoku ebinywe ebyo ni byiwe erilhua oku Thatha wiwe w’elhubulha.

13. Amalengekania w’omundu akahinduka athi akabya muhakabibwa, kandi eki kikalethawaki?

13 Omughulhu babya bathe babirikirwa, abahakabibwa banabya n’amaha w’erisyabya okwa kihugho. Ibakakandira omughulhu Yehova akendi sy’erya ekihugho, kandi nabu ibanzire erisyasangira omwa mighisa eyi. Obundi ibakanathera akasasani ibanemw’angirira abanze babu bakalhubuka. Babya balindirire erisy’ikalha omwa manyumba agho bakayihimbira n’erirya ebighuma by’okwa mithi eyo bakayiherera. (Isa. 65:21-23) Busana naki amaha aya mwahinduka? Sibugha ambu endambi muyahika bamabya isibakitsemera amaha ayo. Mubathahindulha amalengekania wabu busana n’ebitsibu birebe kutse erisulhusutha omwa menge. Sibugha ambu mubayowa isibanga thasyatsemera erisy’ikalha okwa kihugho kera na kera; kutse busana n’eryanza eriminya elhubulha nga yiri yithi. Aliwe, amaha wabu ahinduka busana n’omulimu abuyirire wa Nyamuhanga eribakoleramu n’eribakokya.

14. Abahakabibwa bakayowa bathi okwa ngebe yabu y’eribya okwa kihugho?

14 Mbwino thughunzerere thuthi abahakabibwa bakanza ibaholha? Omw’isondolibwa n’omulimu abuyirire, Paulo mwabugha athi: ‘Omughulhu thukine omwa hema y’eno, thukasimba, ithukanubibawa, kundi sithwanzire erireka omubiri w’eno, nikwa thwanzire eribana omubiri w’elhubulha, nuku omubiri w’engebe asube omo mwanya w’omubiri ow’akaholha.’ (2 Kor. 5:4) Sibugha ambu balhuhire engebe y’eno, neryo ambu banzire bahole lhuba. Aliwe, banzire ibakolesya obuli kiro ky’engebe yabu omw’ikolera Yehova ibane haghuma na banywani babu n’ab’okw’ibo. Aliwe mbulha ni kyahi ekya bakakolha, sibawithe ku banga lhusya amalengekania w’okwa lhuhembo lhubuyanga olho balindirire.1 Kor. 15:53; 2 Pet. 1:4; 1 Yn. 3:2, 3; Erib. 20:6.

WUNE WABIRIKIRWA?

15. Ni byahi ebithekanganaya indi omundu ni muhakabibwa?

15 Obundi wunemubulha nawu Nyamuhanga ng’abirikubirikira elhubulha. Wamabya  iwunemuyowa wuthi obundi wabiribirikirwa, thalengekania okwa bibulyo bikulhu bino: Mbwino wunawithe ndeke omuhwa w’erithulira? Wune mundu oyukasoma Ekinywa kya Nyamuhanga n’eryanza eriyitheghererya emyatsi yiwe ey’omwa kathi? (1 Kor. 2:10) Wune walhangira Yehova akatsumulha omubiiri wawu w’erithulira omwa mibere y’embaghane? Wukanayowa iwanzire kutsibu erikolha erisonda lya Yehova? Wukanayowa ini lhukwamirwa lhwawu eriwathikya abandi bunyakirimu? Wanabiriyilhangirira obuwathikya bwa Yehova omwa ngebe yawu? Wamasubirya okwa bibulyo ebi ahathe erithika-thika wuthi ee, mbwino obo ikyamamanyisya kithi wabiribirikirwa erighenda elhubulha? Eyihi, kwa bithe bithya. Busana naki? Kundi ebyo sibiribya okwa babirikirwe elhubulha basa. Omulimu wa Yehova akakolera omwa bakendi sy’ikalha okwa kihugho n’abakendi syaghenda elhubulha okwa lhulengo lhughuma. Erithwalira haghuma, wamabya iwunemuyibulya nawu nga wune w’okwa bahakabibwa, ekyo kisa-kisa kikakanganaya ngoku siwuli. Ababiribirikirwa na Yehova sibalibulha nga banabirikirwe kutse eyihi! Bakaminya!

16. Thukaminya thuthi ngoku sikirimanyisaya indi abosi abasondolhawa n’omulimu abuyirire bakendi syaghenda elhubulha?

16 Omwa Masako mune abalhume b’erikirirya abakolesibawa n’omulimu abuyirire; aliwe kandi isibabya n’amaha w’erisyaghenda elhubulha. Yoane Mubatizya ni mughuma w’okw’ibo. Yesu mwakania ndeke oku Yoane, aliwe mwabugha athi syali okwa bali omwa Bwami bw’elhubulha. (Mt. 11:10, 11) Dawudi nayu iniakasondolhawa n’omulimu abuyirire. (1 Sam. 16:13) Iniawithe obunyakirimu obughumire kandi nibya omulimu abuyirire mwamusondolha erihandika ebindi bitsweka birebe omw Biblia. (Mk. 12:36) Aliwe okwa Pentekote, Petero mwabugha athi “Dawudi mwatha hethukira elhubulha.” (Emib. 2:34) Omulimu abuyirire mwakolera kutsibu omwa bandu aba, aliwe mwathabaha obwema obukakanganaya ngoku babirisombolhwa erisyikalha elhubulha. Ekyo sikirimanyisaya kithi sibabya batholere kutse babya n’erikirirya like. Kikakanganaya ngoku Yehova akendi syabalhubukya ibikalha okwa kihugho paradiso.Yn. 5:28, 29; Emib. 24:15.

17, 18. (a) Abaghombe ba Nyamuhanga bangyi bawithe mahaki munabwire? (b) Ni bibulyo byahi ebya thukendi syakaniako omwa mwatsi owakakwamako?

17 Munabwire, abaghombe bangyi ba Nyamuhanga sibawithe amaha w’erisyaghenda elhubulha. Bawithe amaha awali ng’awa Dawudi, Yoane Mubatizya, n’abandi balhume n’abakali abathaleghulha aba kera. Nga Abrahamu, nabu bakalindirira erisyikalha okwa kihugho omw’isi sy’obuthabali bw’Obwami. (Ebr. 11:10) Omwa buthuku bw’enyuma-nyuma buno, okwa kihugho kuli emisighalira ey’okwa bakendi syaghenda elhubulha. (Erib. 12:17) Eki kikamanyisaya ngoku abangyi b’okwa 144,000 babiriholha ibane bathaleghulha.

18 Neryo abawithe amaha w’erisyabya okwa kihugho, batholere ibalhangira bathi abakabugha bathi bawithe amaha w’erisyaghenda elhubulha? Omwa kithunga kyenyu mwamabanika oyukalya okwa biminyisyo by’Ekihulho ky’Omukama ky’Erigholho-gholho, wutholere iwamulhangira wuthi? Erikanya ly’omughanzo w’abakabugha bathi babiribya bahakabibwa anatholere iniakw’itha obuba? Omwatsi owakakwamako akendisya subirya okwa bibulyo ebyo.

^ [1] (enungu 4) Ebiro bye Pentekote byanganabya ibyabya bikahambana n’ekiro emighambo yahebawa okwa kithwe Sinai. (Eri. 19:1) Kyamabya ikwakiri kithya, obo kwesi ngoku Musa anakolesibawa eryingirya Abaisraeli omwa ndaghano y’Emighambo, na Yesu Kristo abya iniam’ingirya ekihanda kihya-kihya, e Israeli y’obunyakirimu, omwa ndaghane nyihya-nyihya okwa kiro ekyo.

^ [2] (enungu 11) Eryanza erithasyaminya bingyi okw’ibuthwa kandi, lebaya e Watchtower, ey’Okwakani 1, 2009, olhup. 3-11.