Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Akaleberyo  |  Na. 3 2017

 ABASOMI BETHU BAKABULHAYA . . .

Mbwino Abakristayo Banatholere ib’Ibuka Ekurismasi?

Mbwino Abakristayo Banatholere ib’Ibuka Ekurismasi?

Abandu bangyi erithimba omwa kihugho kyosi bikirirye bathi ekiro kikulhu ky’Ekurismasi ly’ery’ibuka amabuthwa wa Yesu Kristo. Aliwe wune wathayibulya ababya banywani ba Yesu ab’okwa ndungu, ng’abigha biwe n’abakwenda, nga banabya bak’ibuka Ekurismasi? Kandi wunasi ekya Biblia yikabugha okw’ibuka ebiro byamabuthwa? Eribana eby’erisubirya okwa bibulyo ebi kyangana thuwathikya eriminya Abakristayo nga banatholere ery’ibuka Ekurismasi.

Eky’erimbere, e Biblia siyiri kanaya okwa mubalha wosi-wosi ow’ery’ibuka amabuthwa wa Yesu kutse ow’owundi muramya wosi-wosi muthaleghulha wa Nyamuhanga. Amasako akakanaya okwa bandu babiri basa ab’ibuka ekiro ky’amabuthwa wabu. Abosi sibabya baramya ba Yehova Nyamuhanga w’okwenene, kandi okwa mibalha y’abosi babiri mukwabya ekindu ekithuwene. (Enzuko 40:20; Mariko 6:21) Erikwamana n’ekitabu Encyclopædia Britannica, Abakristayo ab’erimbere mubaghana “omurwa w’ekikafiri ow’ery’ibuka ebiro by’amabuthwa.”

Ni kiro kyahi ekya Yesu abuthawamu?

E Biblia siyiri kanganaya ekiro ekyonyine-nyine ekya Yesu abuthawamu. Ekitabu McClintock and Strong’s Cyclopedia kikabugha kithi: “Ekiro ekya Yesu abuthirawamu sikyangabanika omwa Ndaghano Nyihya-nyihya kutse, ahandi hosi-hosi. Omwa kwenene, Yesu kwanza athi abigha biwe babye bak’ibuka ekiro ky’amabuthwa wiwe, anga lhangire athi bakaminya ekiro ekyonyine-nyine eky’abuthawamu.

Ekyakabiri, sihali aho e Biblia yikakanganaya yithi Yesu kutse omw’igha wiwe wosi-wosi mw’ibuka Ekurismasi. Erikwamana n’ekitabu New Catholic Encyclopedia, ery’ibuka Ekurismasi lyatsuka erikanibwako omwa “kalenda ya Philocalus, Omunya Roma oyo omwatsi wiwe ni w’omw’omwaka owa 336 [E.K.].” Ahathe erithika-thika, yakanibawako e Biblia iyabirihwa erihandikwa, n’enyuma w’emyaka mingyi Yesu alibere okwa Kihugho. Ky’ekikaleka ekitabu, McClintock and Strong ikyabugha kithi:“ekiro kikulhu ky’Ekurismasi Nyamuhanga yuthakitsukisaya, kandi sikiri omwa Ndaghano Nyihya-nyihya.” *

Ni mukonga wahi owa Yesu abwira abigha biwe ery’ibuka?

Iyo ng’Omukangirirya Mukulhu, Yesu mwaha abigha biwe b’obusondoli okwa kya batholere ibakolha, kandi obusondoli obo bune omwa Biblia. Aliwe eky’ery’ibuka Ekurismasi sikiri omwa busondoli obo. Ngoku omuhalimu athe anganza abaana abo akakangiriraya bakakolha eby’athethababwira athi bakole, na Yesu nayu syalyanza omubere ow’erithendi ghendera okw’ikangirirya liwe n’eryanza erithomeka kw’ebindi.—2 Yoane 9.

Aliriryo, hane omukonga mukulhu ow’Abakristayo b’erimbere babya basi ndeke—Ery’ibuka olhuholho lhwa Yesu. Yesu iyuwene-wene mwabwira abigha biwe nga batholere ibibuka omukonga oyu wa mughulhu wahi kandi mw’abakangirirya nga banga kolhagho bathi. Obusondoli bw’erighenderako obu, n’ekiro ky’eryibuka olhuholho lhwiwe bine omwa Biblia.—Luka 22:7, 19; 1 Abanya Korinto 11:25.

Ngoku thwamabirilhangira, Ekurismasi ni kiro kikulhu ky’eryibuka amabuthwa, kandi Abakristayo b’erimbere mubathakwama omurwa w’ekikafiri oyo. Eryongera okw’ekyo, e Biblia siyiri kanganaya yithi Yesu kutse owundi mundu wosi-wosi mw’ibuka Ekurismasi. Busana n’esyonzumwa esi, Abakristayo bangyi erithimba omwa kihugho kyosi babirighunzerera bathi Abakristayo sibatholere ery’ibuka Ekurismasi.

^ enu. 6 Eriminya bingyi ebihambire okwa nzuko y’emirwa eyasibwe kutsibu eye Kurismasi, lebaya omwatsi “Abasomi Bethu Bakabulhaya . . . Ni Kwenene Yahi Eyihambire Okwa Kurismasi?” ow’ali omwa Watchtower eya Okwerikuminibiri 1, 2014, yine n’okwa Intaneti okwa www.jw.org.