Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Akaleberyo  |  Na. 3 2017

Amalengekania Awatholere Okwa Bisobyo

Amalengekania Awatholere Okwa Bisobyo

Don na Margaret * mubatsema mwali wabu n’eka yiwe bakababungira. Mwali wiwe abere akayaghenda, Margaret, oyuwabya asomerere eby’obutsumbe aliwe iniabirihumulibwa okwa mubiiri oyu, mwabatsumbira amakuroni n’echizi (cheese), ebyalya ebyo abitsikulhu biwe babiri banzire kutsibu.

Obuli mundu inian’ikire, Margaret mwaletha ebyalya n’eribitheka okwa meza. Mwakunulha, amaswekya akalhangira omwa kibbakuli imuli emboka y’echizi nyisa! Margaret abya iniabiribirirwa erihira mw’amakuroni! *

Mbulha wuwithe myaka mingahi kutse wasi bingahi, ithwe bosi thukasobaya. Lyanganabya iry’eribugha buthalengekania kutse erikolha ekindu okwa buthuku obuthatholere, kutse obundi erigheghena ekindu kutse erik’ibirirwa. Busana naki thukasobaya? Thwanga ghumira thuthi ebisobyo byethu? Mbwino thwangana biyihighulhako? Eribya n’amalengekania awatholere okwa bisobyo kikendi thuwathikya erisubirya ebibulyo ebi.

EBISOBYO​—AMALENGEKANIA WETHU N’AWA NYAMUHANGA

Thwamakolha ekindu kya ndeke, thukatsema thukasimwa kandi ithwayowa irilhue lithutholere. Thwamasobya, nomuthwangabya isithulya kighenderera kutse abandi isibatha kiminya, mbwino naho sithwanga ligha ku thwabirisobya? Erithoka erikolha ekyo thukayithagha eriyikehya.

Thwamayilengekaniako kutsibu, ithwangananza erigheghena ekisobyo kyethu, ithwatsweba abandi, kutse nibya ithwayighana. Emibere ng’eyo mughulhu mungyi mukalhwiririra ebitsibu. Ekitsibu ikyangana ghana erihwa, n’abandi ithwabatswebera bbule. Nomwakine indi thwangana thoka eribisa ebisobyo byethu lino, thutholere ithwabya ithun’ibukire ngoku, “obuli mundu asyakangania Nyamuhanga ebyo akolha.”—Abanya Roma 14:12.

Nyamuhanga awithe amalengekania awatholere okwa bisobyo. Omwa kitabu ky’Esyonyimbo, Nyamuhanga akakanibawako nga “ow’erighanyira n’olhwanzo”; “syalihaya ebiro byosi, syali hithana ebiro byosi.” Anasi ngoku abandu sibahikene kandi akayitheghereraya erilemererwa lyethu, “ak’ibuka ngoku thuli lhuthuthu.”—Esyonyimbo 103:8, 9, 14.

Eryongera okw’ekyo, nga thatha w’erighanyira, Nyamuhanga anzire ithwe baana biwe, ithwalhangira ebisobyo ng’iyo. (Esyonyimbo 130:3) Omwa lhwanzo, Ekinywe kiwe kikaha erihabulha n’obusondoli bungyi erithuwathikya erighumira ebisobyo byethu n’eby’abandi.

NGOKU THWANGA GHUMIRA EBISOBYO

Mughulhu mungyi, omundu akabya amasobya, akanatsandaya obuthuku omw’ilengekania kutsibu akasondya ow’eritsweba kutse eryanza eryuwanirirya eky’alyabugha kutse eky’alyakolha. Aliwe, ebya wulyabugha byamahithania owundi, wutholere iwamusaba ekighanyiro, imw’uwania emyatsi, kandi imwasighalha imune banywani. Wune wathakolha ekindu ekithahikire neryo ikyaletha ebitsibu  okw’iwe n’okwa owundi mundu? Omwakanya k’eriyitsweba kutse eritsweba abandi, busana naki iwuthakolha ekya wanga thoka eryuwania emyatsi? Erihathikana wuthi s’iwe wulyakikolha, ikikendi leka ibyakalha n’ekitsibu ikyayongera. Aliwe, ighira okwa bisobyo byawu, uwanaya emyatsi, n’erilholha embere erikolha ekitholere.

Aliwe owundi mundu amasobya, kikathw’olhobera erikangania ku thwamapona. Kwesi ka kyangabya kibuya erighendera okw’ihabulha lya Yesu Kristo lino: “Ebyosi ebyo mwanzire abandu ibabakolera, nenyu mukolerebo muthya.” (Matayo 7:12) Wamasobya, nibya n’ekisobyo kike, ahathe erithika-thika wukanza abandi ibakughanyira kutse nibya ib’ibirirwa n’ebisobyo byawu. Neryo busana naki nawu iwuthalengaho erikangania abandi b’olhukeri ng’olho?—Abanya Efeso 4:32.

EMISINGYI EYANGA WATHIKYA ERIKEHYA EBISOBYO

Edikisyanare nguma yikasoborera yithi ebisobyo bikasa busana “n’erilengekanirya omwa mundu mw’ebithahikire, erithendi yitheghererya omwatsi gho ndeke, kutse erithendi tsomana.” Thutholere ithwabya ithunasi ngoku okwa ndambi yosi-yosi obuli mundu angana yisanga iniabirikangania emibere ng’eyi. Aliwe, ebisobyo byangana keha thwamaghendera okwa misingyi eyiri omwa Masako.

Omughuma w’okwa misingyi eyo ali omwa Emisyo 18:13, ahakabugha hathi: “Oyukasubiraya athaliowa, ni bukiru n’esisoni busana nayu.” Omwa kwenene, erihulikirira n’erilebya ndeke ekya wukayasubiraya, ikikendi kuwathikya okw’ithendi bugha lhuba-lhuba kutse erihithana. Ebikalhwiririra omw’ihulikirira ndeke byangana leka iwuthalengekanirya omwa mundu mw’ebithahikire—n’eriyihighulha okw’isobya.

Owundi musingyi we Biblia akabugha athi: “Kyamathokekana, okwa lhuhandi lhwenyu, mubye n’obuholho okwa bandu bosi.” (Abanya Roma 12:18) Lengaho kutsibu erilhangira wuthi hakabya ihane obuholho n’obughuma. Wukakolha n’abandi, kanganaya eritsomana n’erisikya kandi lengaho eribasima n’eribahimba. Omwa mibere ng’eyi, kyangan’olhoba eribirirwa kutse erithendi kwamirira ebiryabughawa n’erikolhwa omwa buthalengekania, kandi n’ebisobyo ebikalire mwangana bighunzaho ndeke omwa buholho.

Lhangira wuthi esobya yawu yikayira ekya yikakw’eghesaya. Omwakanya k’erisondekania eby’eriyihambulyamu, lhangira aka mo kaghisa ak’erikulha-kulhania emibere eyuwene. Mbwino wukayithagha erithasyongera erikangania omubere w’erighumisirizya, olhukeri, kutse eriyikakirya? Kandi ibbwa obwolho, obuholho, n’olhwanzo? (Abanya Galatia 5:22, 23) Busana n’ebi, iwangana minya eky’erikolha ekiri ng’ekyo kyamabya. Nibya iwunatsomene, lengaho erithendi lengekania kutsibu okwa kisobyo. Eribya iwunatsemire kyangana kehya eriyowa nabi.

THWANGANA GHASIRWA OMW’IBYA N’AMALENGEKANIA AWATHOLERE

Eribya n’amalengekania awatholere okwa bisobyo kikendi thuwathikya eribighumira. Ithukendibya n’obuholho ahabwethu kandi haghuma n’abandi. Thwamalengaho erighira okwa bisobyo byethu, ithukendibya n’amenge kandi ithwanzwa. Isithwendihwa amani kutse eriyilengekaniako nabi. Eriminya ngoku n’abandi bane mughumira ebisobyo byabu kikendi leka ithwabya bughuma nabu. Ekikulhu kutsibu, thwangana ghasirwa omw’igha erigherererya olhwanzo lhwa Nyamuhanga n’erighanyira liwe.—Abanya Kolosai 3:13.

Mbwino ekisobyo kya Margaret, ekikanibweko okw’itsuka, mukyana tsandya olhubungo olho? Eyihi nahake. Obuli mundu mwakiyitheghererya, kutsibu-tsibu Margaret, neryo amatsemera ebyalya—omuthe amakuroni! Habere halhaba myaka mirebe, abitsikulhu ba Margaret nabo mubabwira abaana babu okwa kyabya eki n’eribabwira ngoku bak’ibuka eritsema erya babya bakabya nalyo bakabungira mukaka wabo. Kundi nibya, syakighenderera!

^ enu. 2 Amena abirihindulhwa.

^ enu. 3 Ebyalya ebi bitholere ibyabya ini makuroni awatsumbire ikunuthire emboka y’echizi.