Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Akaleberyo—ey’Erigha  |  Okwomunani 2016

Sondaya Ekindu Ekilengire Ehoro

Sondaya Ekindu Ekilengire Ehoro

Wune wathabana akabwe k’ehoro? Ni bake kutsibu ababiribanayo. Aliwe ibbwa hane ekilengire ehoro ekya bandu bangyi kutsibu babiribana. W’amenge awakalhua oku Nyamuhanga, kundi “sialithoka erighulhwa omo syamaghetsi” kutse ehoro.Yobu 28:12, 15.

OMWA mibere mirebe, abakasoma n’erisekulya ebye Biblia n’omuhwa bali ng’abakasondaya ahali ehoro. Abasomi be Biblia abo, batholere ibakolha kutsibu n’eribya ikubane musekulya Amasako nuku babane mw’amenge w’obughuli bunene. Neryo omo mwatsi oyu, ni kyahi ekya thwang’igha thwamalebya esyonzira isathu esihambire okwa mibere ehoro yikabanikiramu?

IWABANA AKABWE K’EHORO!

Thalengekania iwunemulhaba okwa musike w’olhusi neryo iwalhangira akabwe ikanemukangabasania. Neryo wukakasongya iwalhangira ini kabwe k’ehoro. Iwukendi tsema kutsibu. Kanganabya kandu kake n’okwa muthwe w’akasungu k’ekibiriti, aliwe ini k’obughuli n’okwa diyamondi eyuwene. Iwukendi yisanga iwabirithasyarondyaho ndeke nga hanemwendi thasyabanika ehindi hibwe.

Kwabine bithya n’okwa kiro Abema ba Yehova bakuhikako bamakukangania amaha awali omwa Biblia. Obundi wukinibukire ndeke ekiro wabana erina lya Nyamuhanga, Yehova, ly’omwa Biblia. Muwabya ng’oyuwabana ehoro. (Esy. 83:18) Kutse obundi omughulhu waminya ngoku wanganabya munywani wa Yehova. (Yak. 2:23) Aho muwalhua iwaminya ngoku wabiribana ekirengire ehoro! Wangabya imuwanza erithasyabana ehindi hibwe hy’obughuli ehy’obunyakirimu.

IWATHASYABANA EHINDI!

Ehiseghe hike-hike kutsibu hy’ehoro hikana yikumira okwa misike y’esyonyusi. Omwa mezi make buyira, abakasondaya ehoro bamahiraho akaghalha, bakanabana omwa syonyusi ng’esyo mw’ehoro nene, eyangana ghulha emithwalho y’esyodola.

Wabere wukatsuka erigha e Biblia n’Abema ba Yehova, wangabya imuyowa ng’oyukasondaya ehoro omwa kinombe ekya yiswiremu. Wabere wunemughenda wukaghanirya okwa Masako, kyangabya imukyongera okwa bya wasi, wamakulha bunyakirimu. Wabere waghanirya ndeke okwa syongangirirya sy’ekwenene ye Biblia esya wigha, muwaminya ngoku wanga yithunda hakuhi na Yehova n’eriyibika omo lhwanzo lhwiwe iwunalindirire engebe y’erikotha.Yak. 4:8; Yuda 20, 21.

Ng’oyukasondaya ehoro kw’akanahira h’akaghalha eribanayo, nawu wukana hira h’akaghalha erigha eby’obughuli eby’ekwenene ye Biblia?

Ngoku oyukasondaya ehoro akanahira h’akaghalha, nawu wangabya imuwahiraho akaghalha erisondya eby’obughuli eby’obunyakirimu. Wabere w’igha emisingyi mikulhu-mikulhu y’ekwenene ye Biblia, neryo  obundi mukyaleka wamathwamu erilhaba omwa biika ebyanga kukolya okw’iyihayo n’eribatizibwa.Mt. 28:19, 20.

LHOLHA EMBERE ERISONDYA!

Oyukasondaya hanganayira iniabana olhukuka olhuli mw’ehiseghe hike buyira hy’ehoro. N’esindi nguka sikanabya mw’ehoro nene, neryo ikyayithaghisya erilhuthulhanga nuku balhusaye mw’ehoro eyo. Omw’ithasamalira buyira, iwangana ghana eriminya olhukuka ngoku muli ehoro. Busana naki? Kundi ng’olhukuka lhw’esyokilo 1000 olhwasibwe ng’olhuswire mw’ehoro lhwanganabya mw’ehoro y’esyoguramu ng’ikumi buyira! Nomwabine, okw’oyukasondaya ehoro, aho akabya inianasi ku syalinubira busa.

Kuthya, kikayithagha erihira h’akaghalha n’enyuma w’erigha emyatsi y’omusingyi eyihambire oku Kristo. (Ebr. 6:1, 2) Wutholere iwakolha kutsibu n’eribya ng’oyukathakulha omw’iyeghesya lyawu lye Biblia nuku wubane amasomo mahya-mahya n’eby’erighenderako. Neryo kwesi, wangakolhaki erilhangira wuthi wukabya iwunemughasirwa omw’igha lyawu lye Biblia nomuwangabya iwamabirighunza emyaka iwunemusoma Amasako?

Lholha embere n’omuhwa w’erigha. Ibya n’ekilhubirirwa ky’eriyitheghererya omwatsi omwa buuli bwagho. Lholha embere erihiraho akaghalha, neryo wukendi bana eby’obughuli omwa Masako, eby’obusondoli n’Amenge awakalhua oku Nyamuhanga. (Abar. 11:33) Eryongera eriminya ndeke Amasako, kolesaya ebya thukakolesaya omw’isekulya ebya thuwithe ebiri omwa mubughe wawu. Omwa lyolho-lyolho, minya enzira eyawukanza erikwama n’eby’erisubirya okwa bibulyo byawu okwa myatsi ye Biblia. Bulhaya abandi okwa Masako n’emyatsi ey’abiribawathikya n’eribahimba. Bwira abandi okwa bya kutsemesirye omw’igha lyawu lye Biblia.

Aliwe ekyo siwuli kikolha wuthi wangaminywa ng’oyuwasi binene. Omukwenda Paulo mwahabulha athi “eriminya likaletha eriyiheka.” (1 Kor. 8:1) Neryo busana n’ekyo, wulengeho kutsibu eriyikehya n’erighuma omw’ikirirya. Eribya n’eriramya ly’eka buthumbya, n’eriyeghesya e Biblia eryawu ng’omundu, bikendi kuwathikya erighendera okwa misingyi ya Yehova kandi iwanza n’eriwathikya abandi. Kandi ibbwa ekikulhu, iwukendi tsema kundi wabiriyibanira ekirengire ehoro.Emi. 3:13, 14.