Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Akaleberyo—ey’Erigha  |  Okwomunani 2016

Ebibulyo Erilhua Omwa Basomi

Ebibulyo Erilhua Omwa Basomi

Busana naki esyonzighu sya Yesu musyalhanda okwa mwatsi w’erinaba okwa byalha?

Omwatsi oyu ni mughuma w’okwa myatsi mingyi eyaleka esyonzighu sya Yesu isyamukaniako nabi n’okwa bigha biwe. Emighambo ya Musa muyabugha ebyangaleka omundu iniabya mutsandirya ng’ebikalhua omwa mubiri, ebihagha, n’erithulha okwa kinda ky’omundu kutse eky’ekisoro. Kandi imuli amahano ngoku omundu angathasy’era. Eki ikyangana kolhwa omw’ihera obuhere, erinaba, kutse eritsatsangwako amaghetse.—Law., esura 11-15; Emig., esura 19.

Abakangirirya b’Abayuda nabu ibbwa mubayongerera kw’ebindi bilhaghiro. Hane erisekulya erikabugha lithi abakangirirya aba mubahiraho ebindi bilhaghiro okwa byangayira omundu mwa mutsandirya kandi ng’angasighalirya athi abandi obutsandirya. Kandi mubahiraho n’ebilhaghiro nga ni bindu byahi ebyangabya bitsandirya kutse ebithe byangabya bitsandirya n’erihiraho emirwa eyo abandu batholere ibakolha nuku bathasyahenaya kandi.

Esyonzighu sya Yesu musyamubulya sithya: “Busana naki abigha bawu sibekwama emighambo y’abakulhu, nikwa bakalya omo byalha bithowene kwehi?” (Mk. 7:5) Abafarisayo abo sibakanaya okwa buyonzo obwa buli kiro, ng’omundu erinaba okwa byalha akayalya. Babya ibabirihiraho omurwa w’eritsuka eryutha okwa byalha byabu kw’amaghetse bathe batsuka erirya. Erisekulya eriri ahighulhu likathasyabugha lithya: “Kandi omuwatho iniakahirawa okwa bindu ebitholere erikolesibwa eryutha okwa byalha kw’amaghetse, nga ni maghetse wahi awatholere eryuthwa okwa byalha, oyutholere eryutha w’oko, kandi n’ahatholere erisubulirya.”

Erisubirya lya Yesu okwa bilhaghiro by’abandu ebi siryabya likalire. Mwabwira abasondoli b’edini y’Ekiyuda ab’omwa kighonye ky’erimbere athi: “Isaya mwaminyerera ndeke busana nenyu inywe bathebya, ngoku kisakire kithi, ‘Abandu aba bakanyisikaya omwa minywa yabu, nikwa emithima yabu yiri hali okw’ingye [Yehova]. Nikwa bakanyiramaya buyira, ibakakangiriraya ebihano by’abandu ng’erikangirirya lya Nyamuhanga.’ Yesu mwabugha athi, ‘Mukasighanaya ebihano bya Nyamuhanga, imwakwama emitsye y’abandu.”Mk. 7:6-8.