Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Akaleberyo—ey’Erigha  |  Okwomukagha 2016

Yehova Akakutheghaya

Yehova Akakutheghaya

NI KYAHI ekyanga leka ithwaligha ngoku ebinywe ebyo ni kwenene kandi ngoku Yehova akutsomene? Ekighuma okwa bikaleka ni kusangwa e Biblia iyoyene-yene yikakibugha omu 1 Petero 5:7 yithi: ‘Muhire erihangya-hangya lyenyu lyosi oku Nyamuhanga, kusangwa akabatheghaya.’ Wukaminyira okuki ngoku Yehova akutsomene?

NYAMUHANGA AKAHA ABANDU B’EBIYITHAWA BY’EKINYAMUBIRI

Yehova akathuhiriraho eky’erileberyako omw’ibya n’olhukeri kandi mwenge

Nyamuhanga awithe emibere mibuya, eyawanga yithagha omwa banywani bawu. Abakatsomanangana n’eriwathikania omwa biyithawa bakabya banywani kutsibu. Nawu ngoku wunakilhangire, obuli kiro, Yehova ni w’olhukeri kandi mwenge okwa bandu. Ng’eky’erileberyako: “Akahulhukaya eryuba liwe oko babi n’oko babuya, kandi akathuma embulha oko bathunganene n’oko bathathunganene.” (Mt. 5:45) Embulha n’omwisi biwithe mughasoki? Eryongera okwa mighaso mingyi yabyo, Nyamuhanga akakolesaya embulha n’omwisi eriha ‘abandu b’ebyalya n’eryusulya omwa mithima yabo mw’obutseme.’ (Emib. 14:17) Yehova akalhangira athi ekithaka kik’eraya ebyalya bingyi, kandi omwa kwenene thukatsema thwamalya ndeke.

Neryo ibbwa, busana naki abandu bangyi bane omwa nzalha? Kundi ekya bathabali b’ekihugho batsomene kutsibu ly’eribya n’obuthoki bw’erithabalha n’erigaga omwakanya k’eritsomana esyongebe sy’abandu. Yehova akisiya iniaghunza h’ekitsibu ekyo omw’ilhusyaho amathabali w’abandu n’erihira h’Obwami bw’elhubulha, obukendi syathabalhwa na Mughalha wiwe. Okwa buthuku obo, sihendi syabya abali omwa nzalha. Ekyo nomukithe kyabya, Yehova anemuwathikya abaghombe biwe abathaleghulha eribya ibanemubana  ekyanga bawathikya kinyamubiri. (Esy. 37:25) Ekyo mbwino sikiri kanganaya eritsomana liwe?

YEHOVA AKATHUHA OBUTHUKU BWIWE

Yehova akathuhiriraho eky’erileberyako omw’ithuha obuthuku bwiwe

Omunywani mubuya akabya iniane mukuha okwa buthuku bwiwe. Anganasa imwaghunza esyosaha imunemukania okwa bikabatsemesaya inywe bosi. Kandi omunywani mubuya akakuhulikirira ndeke wukamubwira ebitsibu byawu. Yehova nayu akanathuhulikirira athya? Ahathe erithika-thika! Akahulikirira emisabe yethu. Ky’ekikaleka e Biblia iyathubwira yithi ‘thuyitsingirire omw’isaba,’ nibya ‘n’erisaba butsira eriumbya.’—Abar. 12:12; 1 Tes. 5:17.

Ni buthuku bungahi obwa Yehova anganza iniaghunza akahulikirira emisabe yawu? Eky’erileberyako ekiri omwa Biblia kikathuha eky’erisubirya. Yesu abere athali asombolha abigha biwe, “mwasiba omwa kiro kyosi erisaba Nyamuhanga.” (Lk. 6:12) Omwa musabe oyo, Yesu angabya obundi imwahulha obuli mwigha y’okwa lina, eribugha okwa mibere yabu n’obulemwa bwabu, n’erisaba Thatha wiwe amuwathikaye akabasombolha. Ah’obuthuku bwakera, Yesu mwaminya ngoku abirisombolha abatholere ndeke eribya bakwenda biwe. Ng’Oyukasubiraya emisabe, Yehova akahulikirira emisabe yosi eyikalhua okwa muthima. (Esy. 65:2) Omundu nomwanga ghunza esyosaha nyingyi akasaba busana n’ebikamulyambaya, Yehova syalisamalira okwa saha.

NYAMUHANGA ANAYITHEGHEKIRE ERIGHANYIRA

Yehova akathuhiriraho eky’erileberyako eribya inianayitheghekire erighanyira

Bikabya bikahika okw’ighanyira, kikanakalira n’abanywene kutsibu. N’ababiribya banywani habw’omughulhu muuli bakanathwa obunywani busana n’erilemwa erighanyira. Yehova iyo kw’athe athya. E Biblia yikabwira obuli omundu erimusaba ekighanyiro erilhua okwa muthima, kusangwa “asyamubuyira ndeke.” (Isa. 55:6, 7) Ni kyahi ekikaleka Nyamuhanga iniathughanyira?

Enzumwa lhw’olhwanzo lhwa Nyamuhanga olhulengethukireyo. Anzire abandu bo kutsibu erihika okw’ihayo Mughalha wiwe, Yesu, erilhamya abandu okwa kibi n’ebitsibu ebya kikalethera abandu. (Yn. 3:16) Nibya embanulho eyo yikaberereraya bingyi kwilhaba aho. Erilhabira omwa  kihongwa kya Kristo, Nyamuhanga akaghanyira ndeke abo anzire. Omukwenda Yoane mwahandika athi: “Thwamakangya kwenene, ebibi byethu, Nyamuhanga syalireghulha, kandi akakolha ekithunganene. Asyathubuyira ebibi byethu.” (1 Yn. 1:9) Busana n’erighanyirwa na Yehova, abandu bangana sighalha omwa bunywani nayu, kandi eki kikathukanganaya ngoku Nyamuhanga akutsomene.

AKAKUWATHIKAYA WUKAMUYITHAGHA

Yehova akathuhiriraho eky’erileberyako erithuwathikya thukamuyithagha

Omunywani w’okwenene akawathikaya abandi bamayithagha obuwathikya. Mbwino Yehova nayu akanakolha ekyo? Ekinywe kiwe kithi: “Nomo [omughombe wa Nyamuhanga] angathogha, siendi syasighalhaho, kusangwa Omwami Mukulhu akamuhamba okwa byalha.” (Esy. 37:24) Yehova ‘akahamba abaghombe biwe okwa byalha’ omwa nzira nyingyi. Thalebya eky’erileberyako kino erilhua okwa kitsinga eky’omwa Caribbean ekye St. Croix.

Omusika mwabana akahathikano erilhua omwa b’akasoma nabu kundi mwaghana eritherera ebendera y’esaruti busana n’edini yiwe. Abere abirisaba Yehova y’obuwathikya, mwathwamu erimanira ekitsibu ekyo. Ekindi kiro omwa kilasi, omwa ripoti yiwe, mwakania okw’itherera ebendera y’esaruti. Omw’ikolesya ekitabu Esyangano sye Biblia, mwasoborera ngoku omwatsi owahambire oku Sadiraki, Mesaki, na Abedenego w’aleka iniathwamu athya. Mwabugha athi, “Yehova mwatheya Abaebrania basathu abo kundi mubaghana eriramya esanamu.” Enyuma waho mwaha ababyaho b’ekitabu ekyo. Abandi ikumi na mughuma abo akasoma nabu mubasaba ekitabu ekyo. Omusika oyu abere abiriminya ngoku Yehova yulyamuha akaghalha n’amenge w’erithulira okwa mwatsi owalithohire oyo, mwatsema kutsibu.

Wamabya nga wukathika-thikira Yehova erikutsomana, ghaniraya okwa Masako nga Esyonyimbo 34:17-19; 55:22; na 145:18, 19. Bulhaya Abema ba Yehova abamabirighunza buthuku bunene Yehova ng’abiri batsomana athi. Kandi wamayithagha obuwathikya bwa Nyamuhanga, musabe okwa mwatsi oyo. Wukendi yilhangirira ngoku Yehova “akakutheghaya.”