Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Akaleberyo—ey’Erigha  |  Okwakani 2016

Erikolha omw’Ikirirya Likaleka Ithwasimwa na Nyamuhanga

Erikolha omw’Ikirirya Likaleka Ithwasimwa na Nyamuhanga

“Mubye mukagherererya ab’ikiriraya n’eriyiyinia n’eryangirira ebyo Nyamuhanga alhagha.”—EBR. 6:12.

ESYONYIMBO: 86, 54

1, 2. Yefuta na mwali wiwe mubabana kitsibuki?

ERILINDIRIRA n’erihangya-hangya ly’omusika mulyahwa akalhangira thatha wiwe akasubulha buholho akalhua okwa lhuhe. Omusika mwasa akathibitha eyiri thatha wiwe nuku amuramukaye n’eritsema nayu busana n’erisingura. Aliwe thatha wiwe omwakanya k’erihotholha n’eriimba nayu, mwayisathangirya kw’esyongyimba n’erilhaka omwa mulenge muuli athi: “Ilholho, mwali waghe! . . . Wuli mughuma w’oko bakanyitha obulighe.” Neryo Yefuta mwabugha ebinywe ebya hindulha engebe ya mwali wiwe, eribya isyangathasya thahibwa n’eributha abaana ngoku abya akalengekania. Aliwe, aho-n’aho, mwali wa Yefuta mwasubirya thatha wiwe yo ndeke n’erimubwira athi akole ngoku anabirilhagha Yehova. Eby’abugha mubyakangania kw’awithe erikirirya linene. Abya ayikethere ngoku ekyosi-kyosi ekya Yehova angathwamu kikamughasira. (Abat. 11:34-37) Neryo thatha wiwe mwamuyisyethera kundi mwaminya ngoku mwali wiwe eriligha iyuwene-wene erisighika erithwamu liwe nga thatha wiwe kikatsemesaya Yehova.

2 Yefuta na mwali wiwe oyuk’ubaha Nyamuhanga mubayikethera erithwamu lya Yehova, nomukyanabya ikibakalire  erikighenderako. Babya b’ikirirye ngoku sihali ekirengire erisimwa na Nyamuhanga.

3. Busana naki eky’erileberyako kya Yefuta na mwali wiwe kyangana thuwathikya munabwire?

3 Thunasi ngoku sikyolho mughulhu wosi eribya ithunayikethere Yehova. Okwenene kuli kuthi thutholere ithwahira h’akaghalha ‘erilhwira erikirirya’ lyethu. (Yuda 3) Erithoka erikolha ekyo, thulebaye ebitsibu ebyo Yefuta haghuma na mwali wiwe basingura. Mubasighalha bathi ibakinawithe erikirirya omu Yehova?

ERIKOLHA OMW’IKIRIRYA NOMUHANE AMATHEBO W’EKIHUHGO

4, 5. (a) Ni kilhaghiro kyahi ekyo Yehova aha Abaisraeli bakingira omwa Kihugho Ekyalhaghanisibawa? (b) Ngoku kiri omwa Esyonyimbo sura 106, obuthowa bw’Abaisraeli mubwalhwiririra mwaki?

4 Obuli kiro, Yefuta na mwali wiwe bangabya ibanabya bak’ibuka ebikalhwiririra omw’ithendi kangania erikirirya omu Yehova. Hakuhi emyaka nga 300 enyuma, Abaisraeli babya imubana lhaghirwa eriherya abaramya b’esindi nyamuhanga ababya bikere omwa Kihugho Ekyalhaghanisibawa. (Ebi. 7:1-4) Obuthowa bw’Abaisraeli mubwaleka ibagherererya emitse mibi y’Abanya Kanana, kyamaleka ibatsuka eriramya esyonyamuhanga sy’amabehi n’eritsuka erikolha ebithisirire.—Soma Esyonyimbo 106:34-39.

5 Erithendiowa Yehova eryo, mulyaleka iniabapona n’eribalhusya kw’obutheya bwiwe. (Abat. 2:1-3, 11-15; Esy. 106:40-43) Eki ka kyangabya imukyaleka ikyakalira ababya bak’ubaha Nyamuhanga erisighalha ibane bathaleghulha okw’iyo omwa myaka eyikalire eyo! Nomukyanabya kithya, e Biblia yikabugha yithi habya ihane abawithe erikirirya, abandu nga Yefuta na mwali wiwe, na Elkana, Hana, na Samweli. Abandu aba babya banzire ibasimwa na Nyamuhanga.—1 Sam. 1:20-28; 2:26.

6. Ni byahi ebikanyirire munabwire, kandi thutholere ithwakolhaki?

6 Nethu thuli omwa kihugho ekiri mw’abandu abawithe amalengekania n’emikolere eyiri ng’ey’Abanya Kanana abakera nabo bakanakulha-kulhanaya eby’emyatsi y’engyingo, eby’obwithi, n’omuthima w’eryanza ebindu. Nethu munabwire Yehova anemuthukunga, erithutheya okwa bindu ng’ebyo, ngoku anasangawa akunga Abaisraeli. Mbwino thunemwend’ighira okwa bisobyo by’Abaisraeli? (1 Kor. 10:6-11) Thutholere ithwayilhusya mw’amalengekania wosi-wosi awangabya mw’ey’ekihugho-hugho. (Abar. 12:2) Mbwino thunemulengaho kutsibu erikolha ekyo?

ERIKOLHA OMW’IKIRIRYA NOMUHANGABYA ERIKOLHWA NABI

7. (a) Ab’oku Yefuta mubamukolha bathi nabi? (b) Yefuta mwakolhaki?

7 Omwa biro bya Yefuta, obuthowa bw’Abaisraeli mubwaleka Abafilisitini n’Abaamoni ibabakolha mw’abakobe. (Abat. 10:7, 8) Aliwe, Yefuta mwathabana ebitsibu erilhua oko nzighu siwe nyisa; n’abaghalha babu n’abakulhu omwa Israeli mubamukolha nabi. Erihale n’obuha mubyaleka baghalha babu ibamuthibithako, n’erimulhusya kw’omwandu ogho ahebawa ng’omwana w’erimbere. (Abat. 11:1-3) Yefuta mwathalighira erikolhwa nabi eryo likatsandya emibere yiwe mibuya. Omwakanya k’erithuhulya, akaghana erisyawathikya abakulhu b’ekihanda bakamulhakira, mwaligha. (Abat. 11:4-11) Ni kyahi ekya wathikaya Yefuta erilhangirika athya ku ni mulhume w’obunyakirimu?

8, 9. (a) Ni misingyi yahi eyiri omwa Mighambo ya Musa eyangabya imuyawathikya Yefuta? (b) Ni kyahi ekya Yefuta abya atsomene kutsibu?

8 Kwenene Yefuta abya mulhwi mbangyi, aliwe kandi iniakayeghesaya okwa mibere eya Nyamuhanga abya akakolanganiramu n’abandu biwe. Yefuta eribya iniasi ndeke  ebihambire okwa Baisraeli mukyaleka iniaminya ekihikire n’ekiwire omwa meso wa Yehova. (Abat. 11:12-27) Emisingyi ya Nyamuhanga eyabya omwa Mighambo ya Musa y’eyaleka Yefuta iniabya n’emibere eyabya nayu n’omuthima mubuya. Mwaminya ngoku Yehova syalyanza abakabika ekinigha; aliwe ngoku akanza abandu biwe ibanzana. Kandi Emighambo muyakangirirya ngoku omundu syatholere akagheghena ebiyithawa by’abandi, nibya n’eby’oyumukwire “obusu.”—Soma Eriluayo 23:5; Abalawi 19:17, 18.

9 Eby’erileberyako by’abathaleghulha, nga Yozefu oyuwaghanyira baghalha babu—nomukine indi erimbere “mubamukwa obusu,” nabyo byangabya imubyawathikya Yefuta. (Enz. 37:4; 45:4, 5) Erighanirya okwa by’erileberyako ng’ebi kyangabya imukyawathikya Yefuta erithwamu erikolha ebikatsemesaya Yehova. Emibere y’abaghalha babu ahathe erithika-thika yangabya imuyamuhithania kutsibu, aliwe ekyo mukithamukakirya erikolera Yehova n’abandu biwe. (Abat. 11:9) Yefuta iniatsomene kutsibu erilhwira erina lya Yehova kwilhaba eriyilhwirako. Mwathwamu eribya n’erikirirya omu Yehova, kyamamulhwira mw’ebibuya n’okwa bandi.—Ebr. 11:32, 33.

10. Munabwire thwanga lighira thuthi emisingyi ya Nyamuhanga erithuwathikya ng’Abakristayo?

10 Thunemwendi gherererya eky’erileberyako kya Yefuta? Obundi mulikyethu mulebe abirikuhithania kutse erithukolha nabi. Kyamabya kithya, ambi isiwalighira ekitsibu ng’ekyo erikukakirya erighenda okwa mihindano kutse erikolera Yehova n’eribya bughuma ndeke n’ekithunga. Kandi thwangana gherererya Yefuta omw’ilighira ebihano bya Yehova bithuwathikaye erisingura eriyowa nabi lyethu, neryo ithwabya ky’erileberyako kibuya omwa kithunga.—Abar. 12:20, 21; Kol. 3:13.

ERIYIHAYO LIKAKANGANAYA ERIKIRIRYA LYETHU

11, 12. Ni yilhagha lyahi erya Yefuta akolha, kandi ekyo kyamanyisayaki?

11 Yefuta mwaminya ngoku Nyamuhanga yuwanga muwathikya erilhamya Abaisraeli okwa Baamoni. Mwalhagha Yehova athi amamuwathikya akakinda, oyuwanga tsuka erihulhuka omwa nyumba yiwe erisyamuthangirira iniakendi muha Yehova mwa “buhere bw’eriokererya.” (Abat. 11:30, 31) Obuhere obo bwendi kolhwa buthi?

12 Erihonga abandu n’inye embere sya Yehova. Neryo kikalhangirika ngoku Yefuta syamanyisaya erikera omundu ng’ekihongwa. (Ebi. 18:9, 10) Omwa mighambo ya Musa, oyukahayo obuhere bw’eriokererya, iniakaha Yehova y’ekihongwa ekyosi, neryo kwesi Yefuta amanyisaya erihayo omundu oyukendi kolha omubiiri wa Nyamuhanga musa. Omundu oyo iniakolera eyabya ehema omwa ngebe yiwe yosi. Yehova mwahulikirira Yefuta kandi amamuthokesya erisingura n’erikinda ndeke esyonzighu. (Abat. 11:32, 33) Aliwe ibbwa nindi oyuwanga hebirwe Nyamuhanga mwa “buhere bw’eriokererya”?

13, 14. Ebinywe bya Yefuta ebiri omu Abatsweri 11:35 bikabisulhaki okw’ikirirya liwe?

13 Wibuke emibere eyabyaho eyikanibweko okw’itsuka ly’omwatsi ono. Omughulhu Yefuta asubulha okwa lhuhe, mwali wiwe omwanzwa, oyo abya iy’anawithe musa, yuwabya w’erimbere eriyamuthangirira! Aha bya kalira ibbwa h’aho. Mbwino Yefuta anemwendi berererya eriyilhagha liwe n’erihayo mwali wiwe nuku ayakolere eyiri ehema ebiro byosi by’engebe yiwe?

14 Aho kandi, emisingyi ya Nyamuhanga yangabya imuyawathikya Yefuta erithwamu ekitholere. Angabya imw’ibuka ebinywe ebiri omwa Eriluayo 23:19, ebyabya bikalhaghira abandu ba Nyamuhanga eriha Yehova y’ekyuwene kutsibu. Kandi Omughambo  iniakakanganaya ngoku omundu amalhahirya, iniathekirwe erithuha. Akabugha athi: “Omughulhu omundu akalhahiraya oko Mwami Mukulhu . . . , asyaberererya ekinywe kiwe; asyakolha ng’ebyosi ebyalhua omwa bunu bwiwe.” (Emig. 30:2) Ng’omuthaleghulha Hana obundi oyuwabyaho omwa buthuku bwa Yefuta kw’akolha, Yefuta nayu abya atholere eriberererya eriyilhagha liwe, inianasi ngoku kikendi muhambako haghuma na mwali wiwe. Abya isyawithe wundi mwana; iniawithe mwali wiwe musa, iyuwangamubuthira omwitsikulhu oyuwangalya omwandu n’erileka erina liwe ilithabulirana omwa Israeli. (Abat. 11:34) Nomwabine bithya, Abatsweri 11:35 hakaghunzerera n’ebinywe bya Yefuta bino: “Nabirithanda obuno bwaghe oko Mwami Mukulhu; isindithoka erisuba enyuma.” Eriyihayo liwe, erihika n’okw’iyilhusya kw’ekyanawithe mulyaleka Yehova iniamusima n’erimutsumulha. Nawu wangana thwiremu wuthya?

15. Abangyi omw’ithwe babiriyilhaghaki, kandi thwangabya thuthi n’erikirirya?

15 Thwabere thukayihayo oku Yehova, muthwayilhagha ngoku thukendi kolha erisonda liwe n’omuthima wosi. Thwabya ithunasi ngoku eriberererya eriyilhagha eryo hane ebya thwangana thwamu eriyithalyako. Aliwe ibbwa, eriyihayo lyethu likalhangirika ndeke omughulhu thukasabawa erikolha omubiiri owathukabya nga sithwanzire. Thukabya thukayihayo thuthya n’erikolera Nyamuhanga y’emibiiri eyikabya nga siyiri okwa lhulengo lhwethu, thukabya ithwamakangania ngoku thuwithe erikirirya. Emighisa eyikalhwiririramu yilengire kutsibu ebya thwanga yithalyako. (Mal. 3:10) Kandi ibbwa mwali wa Yefuta?

Thwanga kangania thuthi erikirirya eriri ng’erya Yefuta na mwali wiwe? (Lebaya enungu 16, 17)

16. Mwali wa Yefuta mwathwamu athiki okw’iyilhagha lya thatha wiwe? (Lebaya ekisasani ekiri okw’itsuka.)

16 Kyangabya isi kyabya kyolho mwali wa Yefuta eriligha ebyanga mubyako busana n’eriyilhagha lya thatha wiwe. Lyabya mbaghane okwa lya Hana, oyuwayilhagha erihayo mughalha wiwe eriyakolera okwa hekalu ng’Omunaziri. (1 Sam. 1:11) Omunaziri iyo iniakathahaya n’eribya n’amaka. Aliwe mwali wa Yefuta iyo abya w’eribya “buhere  bw’eriokererya”; abya w’eriyithalya okwa butseme ng’obo. (Abat. 11:37-40) Kundi thatha wiwe abya mukulhu kandi musondoli w’amani omwa Israeli, obundi angathahibwe n’omulhume oyuwene kutsibu omwa kihugho ekyo. Aliriryo ibbwa abya iniakayabya mukoli w’emibiiri eyiri ehema. Omusika oyu iyo ibbwa mwathwamu athi? Mwakangania ngoku akahira omubiiri wa Yehova w’embere akabugha athi: “Thatha waghe, wabirikumbulira obunu bwawu oko Mwami Mukulhu; wungolere ng’ebyalhua omwa buno bwawu.” (Abat. 11:36) Mwayithalya okw’iyisunza liwe ly’obuhangiranwa ery’eribya n’omulhume n’eributha abaana nuku akulha-kulhanaye eriramya ly’okwenene. Nethu thwanga gherererya thuthi omuthima wiwe w’eriyihayo?  

17. (a) Thwanga gherererya thuthi Yefuta na mwali wiwe? (b) Ebinywe ebiri omu Abaebrania 6:10-12 bikakuhiramu bithi omuhwa w’eriyihayo?

17 Esyongumi sy’Abakristayo abakine balere, imwamuli abalhume n’abakali, babiriyihayo erithendi thahya lhuba kutse eributha abaana nuku banga kolera Yehova ya kutsibu. N’abakulire nabu banganabya ibane muhayo endambi yabu eyo bangabere ibakaghunza n’abaana babu n’abitsikulhu babu nuku bathoke erisangira omwa buhimbe bw’amanyumba w’ekithunga kya Yehova kutse erithoka erighenda okwa Sukuru y’Abathuliri b’Obwami n’eriyakolera omwa myanya eyiri mw’obuyithawa bunene. Abandi bakahira h’obuthuku nuku basangire omw’ithererera ly’embaghane okwa buthuku bw’Eryibuka. Eriyihayo erikalhua okwa muthima ng’eri likaleka Yehova oyuthendi syibirirwa omubiiri n’olhwanzo olhwa bakamukanganaya, iniatsema kutsibu. (Soma Abaebrania 6:10-12.) Mbwino nawu kinathokekene erithasyongera eriyihayo nuku wanga thasyakolera Yehova ya bingyi?

EBYA THWAM’IGHA

18, 19. Omwatsi owali omwa Biblia owahambire oku Yefuta na mwali wiwe amathweghesyaki, kandi thwanga bagherererya thuthi?

18 Nomwakine indi Yefuta mwabana bitsibu bingyi, mwalighira Yehova amusondole akathwamu. Mwaghana amathebo w’ekihugho awabya muthimbireko. Abandi erimukolha nabi mukithatsekya erithwamu liwe ery’erikangania erikirirya omu Yehova. Eriyihayo liwe n’erya mwali wiwe erikalhua okwa muthima mulyamulethera emighisa, kundi Yehova mwakolesya abosi babiri erikulha-kulhania eriramya ly’okwenene. Okwa buthuku abandu babya bakasighania ebihano bya Nyamuhanga, Yefuta na mwali wiwe ibo mubamakirirabyo.

19 E Biblia yikathubwira yithi “thubye thukagherererya ab’ikiriraya n’eriyiyinia n’eryangirira ebyo Nyamuhanga alhagha.” (Ebr. 6:12) Kwesi nethu thubye nga Yefuta na mwali wiwe, omw’ighendera okwa musingyi owa kanganibwe omwa ngebe yabu ono: Erikolha omw’ikirirya likaleka ithwasimwa na Nyamuhanga.