Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Akaleberyo—ey’Erigha  |  Okwakabiri 2016

Lholha Embere Erikolera Yehova Iwunatsemire

Lholha Embere Erikolera Yehova Iwunatsemire

THALENGEKANIA okwa kiro watsema kutsibu omwa ngebe yawu. Mbwino ky’ekiro walunga kutse ky’ekiro mwabutha omwana wenyu w’erimbere? Kutse mbwino ky’ekiro wakanganaya ngoku wabiriyihayo oku Yehova wukabatizibwa? Ekiro wabatizibawa kyanganabya iky’ekiro ky’omughaso munene kandi ekya kutsemesaya kutsibu. Kandi n’abikirirya balikyenyu bangabya imubatsema kutsibu bakalhangira wukakangania abangyi ku wanzire Nyamuhanga n’omuthima wawu wosi, ekirimu kyawu kyosi, obulengekania bwawu bwosi, n’amaaka wawu wosi!Mk. 12:30.

Ahathe erithika-thika, wangabya iwabiribana etseme omw’ikolera Yehova eritsuka ekiro wabatizibawa. Aliriryo, abandi bathuliri sibakitsemire nga kera. Ekyabere niki? Mbwino hane ekyanga thuwathikya erilholha embere erikolera Yehova ithunatsemire?

EKYABIRILEKA OBUTSEME BW’ABANDI IBWAHWA

Engulhu y’Obwami iyo yikathulethera etseme nene, kundi Yehova abirilhaghanisya athi Obwami bwiwe bukisiya ibwaghunzaho omughulhu mubi ono n’eriletha ekihugho Kiwe kihya-kihya. Kandi nibya, Zefania 1:14 hakathukakasaya hathi: “Ekiro kinene ky’Omwami Mukulhu kiri hakuhi, kiri hakuhi kandi kikasa lhuba.” Aliwe, thukabya thwamayowa nga thwamabirilinda kutsibu, kyangana leka ithwahwako obutseme obwa thwabya nabu, neryo omuhwa wethu omwa mubiiri wa Nyamuhanga iniakeha.Emi. 13:12.

Eribya haghuma n’abandu ba Nyamuhanga kikathuwathikaya erikolera Yehova ithunatsemire. Erithwalira haghuma, emibere mibuya ey’abaghombe ba Yehova yanganabya iyeyaleka ithwasa omw’iramya ly’okwenene n’erileka ithwatsuka erikolera Yehova ithunatsemire. (1 Pet. 2:12) Ni kyahi ekyangabya Omukrisitayo mulikyethu amasuyirwa busana n’erithwa ebihano bya Nyamuhanga? Omwa mibere ng’eyi, abandi abasa omwa kwenene busana n’emibere ey’erikenga Nyamuhanga eya bandu ba Yehova bawithe, ibanganahwa amani n’erihwako obutseme bwabu.

Amathebo w’ekisubure awali omwa kihugho kya Sitani nawu angana thughunza kw’etseme yethu. Sitani akakolesaya ekihugho kiwe erithwanzisya ebindu ebya thutheyithagha nibya. Aliwe, ni kibuya eribya ithun’ibukire ebinywe bya Yesu bino: “Sihali mundu oyuwanga thoka erikolera abakama babiri; kusangwa asyakwa omughuma y’obusu, n’erianza owundi, kutse asyabeghera oko mughuma iniapona owundi. Simwangathoka erikolera Nyamuhanga n’ebindu.”  (Mt. 6:24) Sithwanga kolera Yehova ithunatsemire kandi okwa ndambi iyaneyo ithunemukolha kutsibu eribana eby’ekihugho kino.

‘ERITSEMERA OMU NYAMUHANGA W’ERILHAMA LYETHU’

Erikolera Yehova, si muheke okwa bamwanzire. (1 Yn. 5:3) Wibuke ngoku Yesu mwabugha athi: “Mwase okw’ingye inywe bosi ko mukanuba n’eriheka ebirithohire, ngendi balhuhukya. Mwimaye engomo yaghe muhekeyo, mw’ighire okw’ingye, kusangwa indi mwolho-mwolho n’ow’omuthima ahehere; nenyu mwasyabana erilhuhuka omwa mithima yenyu.” (Mt. 11:28-30) Erimya engomo y’erikwama Kristo likahumulikanaya n’eriletha obutseme. Kandi omwa kwenene thuwithe bingyi ebikaleka ithwabana obutseme omwa mubiiri wa Yehova. Thulebaye esyonzumwa isathu esyangaleka ‘ithwatsemera omu Nyamuhanga w’erilhama lyethu.’Hab. 3:18.

Thukakolera oyuwathuha engebe, Nyamuhanga oyutsemire. (Emib. 17:28; 1 Tim. 1:11, NW) Thunasi ndeke-ndeke ngoku thuliho busana n’Omuhangiki wethu. Neryo thukalholha embere erimukolera ithunatsemire mbulha thwamaghunza myaka mingahi aha thukabatizibirwa.

Héctor akathoka eribya inianatsemire omw’ibya inian’ibukire amaha wiwe w’Obwami n’eribya n’omuhwa

Eky’erileberyako ni Héctor, oyuwaghunza myaka 40 iniane mukolera Yehova ng’omulebererya oyukabalhama. ‘N’omwa bukulhu,’ akinalholha embere. (Esy. 92:12-14) Obulhwere bwa mukali wiwe bukaleka iniathakolha bingyi omwa mubiiri wa Nyamuhanga, aliwe si bwathamughunzako etseme. Akabugha athi: “Nomwakine indi kik’itha obulighe erilhangira mukali waghe ak’ongera eritseka, kandi n’erimuthwanira siryolho, singatha lighira ekyo erinyighunzako etseme y’erikolera Nyamuhanga w’okwenene. Eriminya ngoku Yehova oyuwathuhangika inianawithe ekighendererwa, yuwanyiha engebe, ni nzumwa ngulhu eyikaleka inamwanza n’erimukolera n’omuthima wosi. Ngalengaho kutsibu eribya ingane omw’ithulira, n’erihira amaha w’Obwami w’embere omwa bulengekania bwaghe nuku ngabye inganatsemire.”

Yehova abirithuha embanulho eyikaleka ikyathokekana eribya n’etseme. Kwenene, “Nyamuhanga mwanza ekihugho ky’athya, kyaleka iniaha Mughalha wiwe, Ekyusa kiwe, neryo oyukamwikiriraya syahere, nikwa abye n’engebe y’erikotha.” (Yn. 3:16) Ni kwenene ebibi byethu ibikendi ghanyirwa kandi ithwabana engebe y’erikotha thwam’ikirirya omwa kihongwa ky’embanulho eyo Nyamuhanga athuha. Eyi ka ni nzumwa mbuya eyangaleka ithwasima Nyamuhanga! Kandi erisima lyethu busana n’embanulho ambi iryaleka ithwakolera Yehova ithunatsemire!

Jesús mw’olhobya engebe yiwe kandi mwakolera Yehova habw’emyaka mingyi inianatsemire

Mughalha wethu e Mexico oyukahulhawa mwa Jesús, akabugha athi: “Nabya mukobe w’omubiiri waghe, ihakanayira inakolha habw’esyosaha nyingyi nibya isi bugha ambu nga kakawa. Ininga kikolha  busana n’erithanza eribana sente nyingyi. Neryo mun’igha oku Yehova kandi ngoku mwahayo Mughalha wiwe mwanzwa busana n’abandu. Munanza kutsibu erimukolera. Neryo munayihayo oku Yehova, kandi nomunanabya inabirikolera ekithongole ekya nabyamu habw’emyaka 28, munaleka omubiiri oyo, namathwamu erikolha omubiiri w’erithulira ow’omughulhu wosi.” Aho hahatsuka etseme eyo nabiribana omwa mubiiri wa Yehova habw’emyaka mingyi.

Ebikalhwiririramu bikaletha obutseme, butsira obulighe. Wukan’ibuka engebe yawu ngayabya yithi wuthe waminya Yehova? Omukwenda Paulo mw’ibukya Abakristayo abe Roma ngoku babya “bakobe b’ebibi” aliwe ngoku hathya ni “bakobe b’erithunganene.” Babya ibakakanganaya “emighendere mibuya” eyikakolhaya okwa ngebe y’erikotha. (Abar. 6:17-22) Nethu thukakanganaya emibere eyuwene omwa ngebe, eyithemo amalighe awakalethawa n’obutswatswa kutse obutsurumi. Eki ka kikatsemesaya!

“Emyaka y’obutseme omwa ngebe yaghe yosi y’eyo namathaghunza omwa mubiiri wa Yehova.”—Jaime

Thalengekania oku Jaime, omulhwi w’esyontomi, oyuwabya ikirirye athi sihali Nyamuhanga kandi athi ebindu byayibuthukira. Jaime mwatsuka erihindana okwa mihindano y’Abema ba Yehova neryo amatsemera olhwanzo olhwa bamukanganaya. Jaime erithoka erisighania emibere yiwe, mwasaba Yehova y’obuwathikya bw’erikirirya ngoku hane Nyamuhanga. Jaime akabugha athi: “Lyolho-lyolho munaminya ngoku hane Nyamuhanga w’olhwanzo kandi Thatha w’olhukogho. Erighendera okwa bihano bya Yehova kyabirinyitheya. Ku ngatha hindulha emibere yaghe obundi ambi nabir’ithibwa, ng’abandi banywani baghe abo thwabya nabo omwa misathu y’esyontomi. Emyaka y’obutseme omwa ngebe yaghe yosi y’eyo namathaghunza omwa mubiiri wa Yehova.”

ISIWALHUHA!

Wukalengekanaya thutholere ithwayowa thuthi thunemulindirira erihwaho ly’omughulhu mubi ono? Wibuke ngoku thukabiba “omw’isonda ly’omulimu” kandi ngoku thukendisya hulhulha “engebe y’erikotha.” Neryo kwesi “sithulhuhe erikolha ebibuya kusangwa okwa mughulhu atholere thwasyahulhulha thwamathendi leghulha.” (Gal. 6:8, 9) Omwa buwathikya bwa Yehova, thuyiyinaye, erikolha kutsibu eribya n’emibere mibuya eyikayithayisibawa erithoka erilhama okwa bulighe bunene, n’erilholha embere erikolera Yehova ithunatsemire nomuthwanga bana ebitsibu.Erib. 7:9, 13, 14; Yak. 1:2-4.

Thuyikethere ngoku eriyiyinia lyethu likendisya hembwa, kundi Nyamuhanga anasi ebyo thukamukolera n’olhwanzo olhwa thumuwithire n’erina liwe. Thwamalholha embere erikolera Yehova ithunatsemire, ithukendibya ng’omuhandiki w’esyonyimbo Dawudi, oyuwabugha athi: “Ngahira Omwami Mukulhu embere syaghe oko mighulhu yosi. Kusangwa ali okwa byalha byaghe by’amali singendi syathundwa. Neryo omuthima mwatsema n’ekirimu kyaghe kikatsanga, kandi omubiri waghe asyabya n’obuholho.”Esy. 16:8, 9.