Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Akaleberyo—ey’Erigha  |  Okwakabiri 2016

Kanganaya ku Wuli Muthaleghulha oku Yehova

Kanganaya ku Wuli Muthaleghulha oku Yehova

“Omwami Mukulhu asyabya ahakathi-kathi kaghe nawu, n’omwa kathi-kathi k’abaana baghe n’abaana bawu.”1 SAM. 20:42.

ESYONYIMBO: 125, 62

1, 2. Busana naki obunywani bwa Yonatana na Dawudi ni ky’erileberyako kibuya ekikakanganaya obuthaleghulha?

YONATANA angabya imwakukubalha busana n’obuthubaha bw’omulhwana Dawudi ak’imanira Goliata. Neryo Dawudi mwasa embere sya thatha wa Yonatana, Omwami Saulo we Israeli, iniane ‘n’omuthwe w’Omufilisitini oyo omo byalha biwe.’ (1 Sam. 17:57) Yonatana angabya imwanza Dawudi busana n’obuthubaha bwiwe. Mukyalhangirika ngoku Nyamuhanga abya na Dawudi, neryo “Yonatana mwanza Dawudi.” Erithwalira haghuma, “mubalhaghana kusangwa [Yonatana] mwanza [Dawudi] ngoko ayanzire omwa muthima.” (1 Sam. 18:1-3) Eritsuka n’aho, mwatheya obunywani bwiwe na Dawudi.

2 Yonatana mwabya inina munywani wa Dawudi nomwakine indi Dawudi yo Nyamuhanga abya iniabirisombolha eribya mwami we Israeli. Yonatana mwatsomana Dawudi ya kutsibu omughulhu Saulo abya akanza erimwitha. Yonatana mwalhaba omwa mbwarara ye Yudea, e Horesi, eriyaghumya munywani wiwe. Yonatana mwawathikya Dawudi omw’isikya “omuthima wiwe oku Nyamuhanga.” Yonatana  mwabugha athi: “Siwubahe; . . . ; wasyabya mwami wa Israeli, naghe nasyabya w’akabiri okw’iwe.”1 Sam. 23:16, 17.

3. Ni kyahi ekya Yonatana ahira embere kwilhaba eribya muthaleghulha oku Dawudi, kandi thukaminya ekyo kya thuthi? (Lebaya ekisasani ekiri okw’itsuka.)

3 Eribya muthaleghulha oko wundi ni mubere ow’anzirwe ehosi. Aliwe, ithwangana thalya enzumwa ngulhu thwamayighomba obuthaleghulha bwa Yonatana oku Dawudi ahathe erilengekania okwa buthaleghulha bwiwe oku Nyamuhanga. Ni kyahi ekyaleka Yonatana inialhangira Dawudi mwa munywani butsira nzighu? Kilhangirikire ngoku habya ihane ekyo Yonatana aby’asi ng’ekilengire iyo eriyibanira ekitsumbi. W’ibuke ngoku mwawathikya Dawudi erisikira omu Yehova. Kwesi, obuthaleghulha oku Nyamuhanga ky’ekyabya kindu ky’erimbere omwa muthima wa Yonatana. Kwenene, iyo eryanza eribya muthaleghulha oku Yehova ky’ekyaleka iniabya muthaleghulha oku Dawudi. Kandi abosi babiri mubaghendera okw’ilhaghana lyabo lino: “Omwami mukulhu asyabya omo kathi-kathi kaghe nawu, n’omo kathi-kathi k’abaana baghe n’abaana bawu, erisyahika kera na kera.”1 Sam. 20:42.

4. (a) Ni kyahi ekyanga thuha etseme y’okwenene n’eriyowa ndeke? (b) Omo mwatsi ono thukendi kania okuki?

4 Nethu ng’Abakristayo, sithuli kwama kya yighomba buyira obuthaleghulha bw’abandi; ithwe ithwibene-bene thuli bathaleghulha okwa b’eka yethu, abanywani, n’oku balikyethu omwa kithunga. (1 Tes. 2:10, 11) Aliwe ni buthaleghulha bwahi obutholere ibwabya embere omwa muthima wethu? Bw’obw’eribya bathaleghulha oku Oyuwathuha engebe! (Erib. 4:11) Eribya ithune bathaleghulha okw’iyo, kikathuha etseme y’ekwenene n’eriyowa ndeke. Aliwe erikangania ku thuli bathaleghulha okw’iyo, thutholere ithwamumakirira n’omughulhu thuli omwa bitsibu ebikalire. Omo mwatsi ono, thukendi lebya eky’erileberyako kya Yonatana nga kyanga thuwathikya kithi omwa mibere ini eyikalire eno: (1) thwamayowa oyuli n’obuthoki isyatholere erisikibwa, (2) thwamayisanga omwa mibere y’eribulha nga nindi oyo thutholere ithwakangania obuthaleghulha, (3) omughulhu thwamayitheghereribwa nabi, ne (4) thwamayowa ikyamathukalire eriberererya ekyo thwayilhagha.

THWAMAYOWA OYULI N’OBUTHOKI ISYATHOLERE ERISIKIBWA

5. Busana naki mukyakalira Abaisraeli eribya bathaleghulha oku Nyamuhanga iya Saulo inina mwami?

5 Nomwakine indi Nyamuhanga abya iniabirisombolha Saulo, thatha wa Yonatana eribya mwami, endambi muyahika amabya muthowa neryo Yehova amamughana. (1 Sam. 15:17-23) Kundi Nyamuhanga mwathalhuaho ak’iha Saulo y’okwa kithumbi, emibere yiwe mibi muyabya kitsibu okw’ab’abya akathabalhako n’abosi ab’abya akakolangana nabu. Mubabana ekitsibu eky’eribya bathaleghulha oku Nyamuhanga kundi omwami oyuwabya okwa kithumbi ky’obwami kya Yehova, mwabya mubi.1 Emy. 29:23.

6. Ni kyahi ekikakanganaya ngoku Yonatana mwabya inina muthaleghulha oku Yehova?

6 Yonatana iyo mwabya muthaleghulha oku Yehova, thatha wiwe akatsuka erikangania obuthowa. (1 Sam. 13:13, 14) Omuminyereri Samweli abya iniabiribugha athi: “Omwami Mukulhu siendi syasighania abandu biwe, busana n’erina liwe linene.” (1 Sam. 12:22) Yonatana mwakangania ngoku ikirirye eki omughulhu Abafilisitini bangyi kutsibu ibane n’esyogali sy’amalhwa 30,000 basyalhwa n’Abaisraeli. Saulo iyo iniawithe abasirikali 600 basa—kandi iyo na Yonatana iba bawithe eby’erilhwamu! Aliwe Yonatana mw’ingira omwa kambu y’Abafilisitini iniane n’oyukamuhekera ebindu biwe by’amalhwa musa. Yonatana mwabugha athi: “Sihali eky’erikakirya Omwami Mukulhu erilhamya omo bangyi kutse omo bake.” Abaisraeli babiri aba mub’itha abalhume 20 ababya bakatheya. Neryo “ekithaka mukyasukana,  muhabya omusiki n’erithithimana linene” erikalhua oku Nyamuhanga. Omwa buba bunene, Abafilisitini mubabindukirana bam’ithana. Yonatana eriyikethera Nyamuhanga, mulyaletha erisingura.1 Sam. 13:5, 15, 22; 14:1, 2, 6, 14, 15, 20.

7. Yonatana mwathwalha thatha wiwe y’athi?

7 N’omughulhu obughuma bwa Saulo na Nyamuhanga bwatsuka eritsanda, Yonatana mwabya iniakinakolangana na thatha wiwe kyamathendithwa ekihano kya Nyamuhanga. Ng’eky’erileberyako, mwaghenda na thatha wiwe bakayalhwira abandu ba Nyamuhanga.1 Sam. 31:1, 2.

8, 9. Thukabya thuthi bathaleghulha oku Nyamuhanga thwamasikya abali n’obuthoki?

8 Nga Yonatana, nethu thwanganabya bathaleghulha oku Yehova omw’ighondera abali n’obuthoki, nomubangabya nga sibatholere erisikibwa. Ng’eky’erileberyako omundu omwa gavumente nomwangabya mulibathangania, thukamusikaya kundi thukaha “ab’ehamuli” b’ekitsumbi kyabu ekibatholere. (Soma Abanya Roma 13:1, 2.) Kandi ithukendibya ithwamakangya obuthaleghulha oku Yehova thwamakenga n’abakaha obuthoki omwa kithunga.1 Kor. 11:3; Ebr. 13:17.

Enzira nguma y’eribya muthaleghulha oku Yehova, ly’erisikya oyo thuli nayu omwa butheke oyuthikirirye (Lebaya enungu 9)

9 Olga [1] owe La Paz, Bolivia, mwabya muthaleghulha oku Nyamuhanga omw’isikya mwira wiwe nibya n’omwa mibere eyikalire. Ahabw’emyaka mingyi, mwira wiwe mwamukangya obutsururu busana n’erithabya Mwema wa Yehova. Iniakamuhithanaya, iniamutsuma, iniamuhuna, n’erihaya athi akendi mw’ihako abaana n’erimuleka. Aliwe Olga mwathathuha ekibi ky’omwa kibi. Mwalengaho kutsibu eribya mukali w’esyongeso omw’ibya akatsumbira mwira wiwe y’ebyalya, erisugha esyongyimba siwe n’eka. (Abar. 12:17) Mwira wiwe iniakabya amabya w’erighenda okwa mubalha w’abanya lhughanda kutse abanywani, iniakaghenda nayu kyamathokena. Ng’eky’erileberyako, mwira wiwe abere akaghenda okwa kiriro kya thatha wiwe omwa yindi tawuni, Olga mwathegheka abaana n’ebyosi ebikayithaghisibawa omwa lhughendo. Babere baghenda omwa kanisa, mwalinda mwira wiwe y’okwa lhukyo erihika aho bahulhukira. Enyuma w’emyaka mingyi, mwira wa Olga mwatsuka eryolhoba omuthima busana n’erimusikya n’erighumisirizya liwe. Hathya akamuthwalha okwa mihindano, n’erimuhira mw’omuhwa athi ayahindane, hakanayira nibya nayu iniahindana.1 Pet. 3:1.

 THWAMABULHA NGA NINDI OYO THUTHOLERE ERIKANGYA OBUTHALEGHULHA

10. Yonatana mwaminya athi oyo atholere erikangania obuthaleghulha?

10 Kundi Saulo abya anzire eritha Dawudi, obuthaleghulha bwa Yonatana mubwalengwako. Yonatana nomwanabya iniabirilhaghana na Dawudi, abya inianemughodera thatha wiwe. Aliwe abya inianasi ngoku Yehova ali bughuma na Dawudi butsira Saulo. Yonatana mwalhangira athi eribya muthaleghulha oku Dawudi ly’eritholere iryabya embere omwakanya ka Saulo. Mwabwira Dawudi athi abisame kandi amamukaniako ndeke eyiri Saulo.Soma 1 Samweli 19:1-6.

11, 12. Erianza Nyamuhanga likathuwathikaya lithi erithwamu eribya bathaleghulha okw’iyo?

11 Obuthaleghulha oku Nyamuhanga mubwawathikya mwali wethu Alice owe Australia erithwamu eky’erikolha hakabya ebindi ebikayithagha obuthaleghulha. Abere akatsuka erigha e Biblia, iniakabwira ab’okw’iyo b’emyatsi mibuya eyo ak’igha. Endambi muyahika, Alice amababwira ngoku iyo siendi thasyabya akasangira nabu omwa Krisimasi. Mwabasoborera ebikaleka, bamamuhulikirira aliwe erighunzerera bamamuhithanako kutsibu. Mubayowa ng’amayighana eka yabu. Alice akabugha athi: “Erighunzerera mama mwabugha athi amanyighana. Munayowa nabi kutsibu, kundi inganzire eka yethu ya kutsibu. Nomubyanabya bithya, munathwamu erihira Yehova na Mughalha wiwe b’embere, namabatizibwa okwa lhuhindano olhwakwamako.”Mt. 10:37.

12 Thwamathendi yitheya, eryanza kutsibu erihanga, esukuru kutse etimu ndebe, lyangana tsekya obuthaleghulha bwethu oku Nyamuhanga. Ng’eky’erileberyako, Henry anzire erisatha omusathu we chess. Esukuru yiwe iyikabera erisinga omwa musathu oyo, neryo mwanza nayu ahireho akaghalha kanene. Akabugha athi: “Omwa lyolho-lyolho munatsuka eritsomana esukuru kwilhaba obuthaleghulha bwaghe oku Nyamuhanga. Munatsuka erisatha omusathu oyu okwa syowikendi, kyamakubathirya omubiiri waghe w’Obwami. Munathwamu erilhua omwa timu eyo.”Mt. 6:33.

13. Obuthaleghulha oku Nyamuhanga bwanga thuwathikya buthi erirwanisya ebitsibu by’amaka?

13 Kyangana kalha omw’eka bikahika okw’oyutholere eritsuka erikanganibwa obuthaleghulha. Nga Ken akabugha athi: “Inganzire eribya inganemubungira mama waghe omukekulhu, nayu eribya inianemw’ikalha nethu. Aliwe mama waghe na mukali waghe mubathahambangana. Erimbere mukyanyibera kitsibu kundi isinanga thoka eritsemesya owundi ngathethahithania owundi. Neryo munalhangira ngoku omwa mibere ng’eyi, mukali waghe iya ngatholere erihira embere. Neryo omwa menge munahira h’emibere eyo angana ghenda-ghendania nayu.” Obuthaleghulha oku Nyamuhanga n’erisikya Ekinywe kiwe mubyaha Ken y’obuthubaha bw’erisoborera mukali wiwe ekikaleka mama wiwe iniabya iniatholere eritsomanwa, amasoborera na mama wiwe ekikaleka iniabya iniatholere erisikya mukali wiwe.Soma Enzuko 2:24; 1 Abanya Korinto 13:4, 5.

THWAMAYITHEGHERERIWA NABI

14. Saulo mwakolha Yonatana yathi nabi?

14 Obuthaleghulha bwethu oku Yehova bwangana lengwako oyuwithe obuthoki amathuyitheghererya nabi. Yonatana angabya imwabana ekitsibu ekiri ng’ekyo. Omwami Saulo, oyuwahakabibawa na Nyamuhanga, abya inianasi okwa bunywani bwa mughalha wiwe na Dawudi, aliwe isyasi ekikaleka. Omw’ihithana linene mwakaramira Yonatana. Aliwe Yonatana mwathathuhulya. Mwathaleghulha oku Yehova kutse oku Dawudi oyuwabya iniakayabya mwami we Israeli.1 Sam. 20:30-41.

15. Mulikyethu amathukolha nabi, thutholere ithwakolhaki?

15 Munabwire, obundi isithwanga kolhwa nabi thuthya omwa kithunga kya Yehova. Aliriryo abakasondolha nabu sibahikene, neryo  bangana thuyitheghererya nabi. (1 Sam. 1:13-17) Thwama yitheghereribwa nabi, ambi isithwa leghulha oku Yehova.

THWAMAYOWA IKITHUKALIRE ERIBERERERYA EKYO THWAYILHAGHA

16. Thutholere ithwabya bathaleghulha oku Nyamuhanga omwa mibere yahi ahathe eriyitsomana ithwibene?

16 Saulo mwanza Yonatana ayitsomane. (1 Sam. 20:31) Aliryo eribya muthaleghulha oku Nyamuhanga, mukyaleka Yonatana inianywana Dawudi omwakanya k’eriyisonderya obwami. Nethu thwangana gherererya omubere wa Yonatana ow’erithendibya n’omuthima w’eriyitsomana thwam’ibuka ngoku oyo Yehova akaligha “akakolha ebyosi ebyo akalhagha, nomubyanga mwaghalya.” (Esy. 15:4) Yonatana ‘mwakolha ebyosi ebyo alhagha’ Dawudi; nethu sithutholere thukayisubako. Ng’eky’erileberyako endaghano y’esuburu yamakalha eriberererya ku thwayilhagha, obuthaleghulha oku Nyamuhanga n’erisikya e Biblia ikikendi leka ithwaberererya eriyilhagha lyethu. Kandi ibbwa obutheke bwenyu bwamabya mw’ebitsibu ebya wuthabya wulengekenie? Erianza Nyamuhanga irikendi leka ithuthaleghulha oko mwanze wethu.Soma Malaki 2:13-16.

Eriberererya eriyilhagha lyethu omwa by’esuburu kyangana lenga okwa buthaleghulha bwethu oku Nyamuhanga n’erisikya e Biblia (Lebaya enungu 16)

17. Ebyo thwam’igha byamakuwathikya bithi?

17 Thukabya thukaghanirya okwa ky’erileberyako kya Yonatana, mbwino sikirileka thukanza erigherererya obuthaleghulha bwiwe oku Nyamuhanga? Thuleke erilhwira ebyethu bisa. Kandi nga Yonatana, thubye bathaleghulha oku Yehova omw’ithendi leghulha okwa bandu biwe, nibya n’abanga thuhithania. Thwamabya bathaleghulha oku Yehova n’omwa mibere eyikalire, thukatsemesaya omuthima wiwe—kandi ekyo ikyaleka ithwayowa ndeke kutsibu. (Emi. 27:11) Thwamabya bathaleghulha oku Yehova, ithukendi lhangira ngoku akakolera abosi abamwanzire b’ebibuya bingyi. Omwa mwatsi owakakwamako, thukendi syakania okwa bya thukigha omw’ilebya abaleghulha n’abathaleghulha omwa buthuku bwa Dawudi.

^ [1] (enungu 9) Awandi mena abirihindulhwa.