Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Akaleberyo—ey’Erigha  |  Okwakabiri 2016

Gherereraya Abanywani ba Yehova

Gherereraya Abanywani ba Yehova

‘Omwami Mukulhu ni munywani w’abakamukenga.’ESY. 25:14.

ESYONYIMBO: 106, 118

1-3. (a) Thukaminya thuthi ngoku thwanganabya banywani ba Nyamuhanga? (b) Ni bandu bahi abathukendi kaniako?

MIRUNDI isathu e Biblia yikakanaya oku Abrahamu ng’omunywani wa Nyamuhanga. (2 Emy. 20:7; Isa. 41:8; Yak. 2:23) Erithwalira haghuma, omulhume muthaleghulha oyu n’iyo musa omwa Biblia oyukahulhawa athya. Mbwino thughunzerere thuthi Abrahamu musa yuwabya munywani wa Yehova? Eyihi, kundi e Biblia yikakanganaya ngoku obuli mundu anganabya munywani wa Nyamuhanga.

2 E Biblia yoswire mw’emyatsi ey’abalhume n’abakali abathaleghulha ababya bak’ubaha Yehova n’erimw’ikirirya neryo bamabya banywani biwe. (Soma Esyonyimbo 25:14.) Omukwenda Paulo mwakania okwa “ndeko nene y’abalhangiri,” ababya banywani ba Nyamuhanga. (Ebr. 12:1) Babya bandu b’emisindo yosi abali n’emibere eyuwene.

3 Thuthakania ndeke okwa basathu b’okwa banywani ba Yehova abakanibweko omwa Biblia. Thukendikania oku (1) Ruta, omukwakali muthaleghulha owe Moabu; (2) Hezekia, omwami oyuthunganene owe Yuda; na (3) Maria, mama wa Yesu omukali mwolho. Emibere banywaniramu Nyamuhanga yanga thweghesyaki?

 MWAKANGANIA OLHWANZO OLHUTHYUSA

4, 5. N’ithwamu lyahi erikalire eryo Ruta aby’atholere erikolha, kandi busana naki lyabya likalire? (Lebaya ekisasani ekiri okw’itsuka.)

4 Thathera akasasani abakwakali basathu ibane omwa nzira omw’irungu lye Moabu, n’erihunga irinemupepya esyongimba syabu. Abakali aba, ni Naomi n’abalyana biwe, Ruta na Oripa. Oripa iyo akabasubulhako, kundi amathwamu erisuba ewabu e Moabu. Naomi anzire ahike e Israeli, kundi y’ewabu. Ruta iyo akinawithe erithwamu likulhu kutsibu ery’atholere iniakolha. Atholere erilebya ng’akendi suba ewabu e Moabu kutse ng’akendi ghenda e Betelehemu na nyoko-byalha wiwe, Naomi.Ruta 1:1-8, 14.

5 Ruta angana lengekenie athi kundi ewabu ye Moabu, y’eyine na mama wiwe n’abandi b’okw’iyo, ibakendi muwathikya iyo ng’omukwakali oyukine mulere. Oku Ruta, emibere ye Moabu iy’emibere yiwe, omubughe wayu iw’omubughe wiwe, n’abandu bayo ibo bandu biwe. Naomi abya inianasi ngoku Ruta syang’eya ebyo bye Betelehemu. Neryo mwamubwira athi asighale e Moabu. Naomi mwasagha athi syanga banira mwalyana wiwe y’omulhume kutse ah’erikalha. Ruta angakolireki? Ruta abya mbaghane oku Oripa, oyuwasuba ‘okwa bandu biwe, n’okwa syonyamuhanga siwe.’ (Ruta 1:9-15) Mbwino Ruta mwan’anza erisuba okwa syonyamuhanga esy’ab’okw’iyo babya bakaramya? Eyihi.

6. (a) N’ithwamu lyahi eryuwene erya Ruta akolha? (b) Boazi amanyisayaki akabugha athi Ruta abirisondya obusaghiro omwa bipupa bya Yehova?

6 Kikabya Ruta ng’abya iniabiriminya oku Yehova Nyamuhanga, obundi erilhabira omu mwira wiwe kutse Naomi. Yehova syabya ng’esyonyamuhanga sye Moabu. Ruta mwaminya ngoku oyutholere eriramibwa ni Yehova. Aliwe erithaminya ekyo lyabya isiririghunza. Abya atholere iniakangania eky’imanireko. Mbwino angathwiremo erisombolha Yehova nga Nyamuhanga wiwe? Ruta mwathwamu ndeke. Mwabwira Naomi athi: “Abandu bawu basyabya bandu baghe; na Nyamuhanga wawu asyabya Nyamuhanga waghe.” (Ruta 1:16) Kikatsemesaya erilengekania okwa lhwanzo olhwa Ruta aby’awithire Naomi, aliwe ibbwa kutsibu-tsibu olhwanzo olhw’aby’awithire Yehova. N’enyuma waho, Boazi, omwinye rithaka mwakania ndeke oku Ruta busana n’erisondya obusaghiro omwa bipupa bya Yehova. (Soma Ruta 2:12.) Ekyo kikathwibukaya omughulhu ekyana ky’enyonyi kyanga yayibisa omwa bipupa by’ekinyonyi ky’obulhume eky’akaghalha. (Esy. 36:7; 91:1-4) Yehova kw’atheghaya athya Ruta. Mwamuhemba busana n’erikirirya liwe, kandi Ruta mwathayikubyabwomo busana n’erithwamu liwe.

7. Ni kyahi ekyanga wathikya abakasagha eriyihayo oku Yehova?

7 Abangyi bak’igha oku Yehova aliwe ibathika-thika erimukolha mwa busaghiro. Bakasagha eriyihayo okw’iyo n’eribya baghombe biwe ababatizibirwe. Wamabya iwukasagha eriyihayo oku Yehova, wune wath’ikalha ahisi wukayibulya nga ni busana naki? Obuli mundu okwa kihugho anawithe e nyamuhanga ey’akaramaya. (Yos. 24:15) Busana naki iwuthasondya obusaghiro omu Nyamuhanga mughuma musa oyutholere erikolerwa? Eriyihayo oku Yehova ni nzira nguma mbuya ey’erikanganiryamu ku thumw’ikirirye. Akendi kuwathikya eriberererya erithwamu lyawu eryo n’erighumira ebitsibu byosi-byosi ebyanga kuhikako. Ekyo kya Nyamuhanga akolera Ruta.

‘MWAMAKIRIRA OKU YEHOVA’—NOMWANAKULIRA OMWA MIBERE EYITHUWENE

8. Thakania Hezekia nga mwakulira omwa mibere eyiri yithi.

8 Erithendibya nga Ruta, omulhwana Hezekia abuthirawa omwa kihanda ekyabya kiyihereyo  oku Yehova. Aliriryo Abaisraeli abosi mubathaberererya eriyihayo eryo. Thatha wa Hezekia, Omwami Ahazi, ni mughuma w’okwa balemawa. Abya mubi kandi mwingirya obwami bwe Yuda omw’iramya esyosanamu, nibya n’erithendi kenga ehekalu ya Yehova eyabya e Yerusalemu. Ebya Hezekia alholhako omwa bwana bikitha buba, kundi mwalhangira abandi baghalha babu bakakwa olhubi, bakabahisya ibaneho ng’obuhere oko nyamuhanga y’amabehi!—2 Abam. 16:2-4, 10-17; 2 Emy. 28:1-3.

9, 10. (a) Ni kyahi ekyangalekire Hezekia iniahithana? (b) Busana naki sithutholere thukahithana oku Nyamuhanga? (c) Busana naki isithwalengekanaya thuthi ekya thwangabya omwa buthuku bw’embere kikasighikira okwa mibere y’omwethu?

9 Ebya Hezekia alholhako ibyangana lekire iniabya omundu oyuhithene oku Nyamuhanga n’eribya mubi nga thatha wiwe. Abandi ababirilhaba omwa bitsibu ebikalire babirilengekania bathi basingene ‘erihithana oko Mwami Mukulhu’ kutse okwa kithunga kiwe. (Emi. 19:3) Kandi abandi bakalengekanaya bathi eribya imubakulira omwa mibere mibi batholere ibabya babi, erikolha ebya babuthi babu babya bakakolha. (Eze. 18:2, 3) Mbwino amalengekania ng’aya anatholere?

10 Ebihambire okwa ngebe ya Hezekia bikaleka ithwabugha thuthi: Eyihi na hake! Sihali na nzumwa yosi-yosi eyihikire eyangaleka omundu iniahithana oku Yehova, kundi Yehova siyukaletha ebindu bibi ebikabya okwa bandu omwa kihugho kibi kino. (Yobu 34:10) Ni kwenene emibere y’ababuthi yikahamba kutsibu okwa baana babu, yibye mibuya kutse mibi. (Emi. 22:6; Kol. 3:21) Aliwe eki sikirimanyisaya kithi ekya mundu angabya omwa buthuku bw’embere kikasighikira okwa mibere y’omwabu. Yehova abiriha obuli mundu y’ekihembo ky’obughuli—amaaka w’erisombolha ebya thukendi kolha kandi nga thwanzire eribya bandu abali bathi. (Ebi. 30:19) Hezekia mwakolesya athi ekihembo ekyo?

Abalere bangyi bakasa omwa kwenene nibya ibanalhuire omwa maka awathuwene (Lebaya enungu 9, 10)

11. Ni kyahi ekyaleka Hezekia iniabya mwami mubuya we Yuda?

11 Hezekia nomwanabya mughalha w’omwami mubi omwa bami bosi be Yuda, iyo mwabya mubuya kutsibu. (Soma 2 Abami 18:5, 6.) Ni kwenene emibere ya thatha wiwe yabya mibi, aliwe habya ihane abandi  ab’emibere mibuya ey’angagherererya. Okwa buthuku obo habya ihane abaminyereri, nga Isaya, Mika na Hosea. Omwami Hezekia angabya imwatsomana kutsibu ebyabya bikabuwa n’abalhume bathaleghulha ababya bakasondolhwa na Yehova abo, amaligha ebihano bya Yehova n’erihabulha liwe. Neryo Hezekia mwatsukiraho eryuwania ebya thatha wiwe abya iniabiritsandya. Ekyo mwakikolha omw’erya ehekalu, eriha obuhere busana n’amalholho w’abandu, n’erihiraho akaghalha kanene erithulhanga esyosanamu. (2 Emy. 29:1-11, 18-24; 31:1) Omughulhu abana ebitsibu ebikalire, ng’omughulhu omwami we Asuria ya Senakaribu anza eribambira e Yerusalemu, Hezekia mwakangania obuthubaha n’erikirirya linene. Mwayikethera ngoku Yehova yukendi balhamya kandi amaghumya abandu omwa by’abya akabugha n’erikolha. (2 Emy. 32:7, 8) Kandi enyuma waho, Hezekia abere akungwa okwa miyiheko, mwayikehya n’eriyisubamu. (2 Emy. 32:24-26) Kilhangirikire ngoku Hezekia mwathalighira emibere mibi ey’akuliramu yikamutsandya. Aliwe, iyo mwakangania ngoku ni munywani wa Yehova, n’eribya ky’erileberyako kibuya.

12. Nga Hezekia, munabwire abangyi babirikangania bathi ngoku ni banywani ba Yehova?

12 Kundi thuli omwa kihugho ekiri mw’obutsurumi kandi ekithe mw’olhwanzo, sikiri swekaya eribya abaana bangyi isibathabana akaghisa ak’erikulira omwa butheya bw’ababuthi ababatsomene. (2 Tim. 3:1-5) Aliriryo nomwakine indi munabwire Abakristayo bangyi balhuire omwa maka awathuwene, babiribya banywani ba Yehova. Nabu, nga Hezekia, babirikangania ngoku omundu isyayihambulhaya athi akakolha ebithuwene kundi kw’akulire athya. Nyamuhanga abirithuha ekihembo ky’eriyithwiramu, neryo thutholere ithwakikolesya eryamakirira Yehova n’erimulethera olhukengerwa n’erisikya, ngoku Hezekia anakolha.

MWABUGHA ATHI: “INGYE INDI MUGHOMBE W’OMUKAMA!”

13, 14. Busana naki omubiiri owa Maria ahebawa syabya mwolho, aliwe subirya athiki okwa bya Gabrieli abugha?

13 Myaka mingyi Hezekia iniabiriholha, omukali mulere omwolho owe Nazareti mwabya n’obunywani bw’embaghane na Yehova. Sihali wundi mundu oyuwabirihebwa omubiiri ow’ali ng’ow’ahebawa. Aby’atholere iniabya mukule, iniabutha, n’erikulya Omughalha ekyusa kya Nyamuhanga! Thalengekania okw’iyikethera eryo Yehova athunga omu Maria mwali wa Heli, erihika okw’imuha olhusunzo lhungaha n’olhu. Aliwe ibbwa Maria angabya imwayowa athi akahebwa olhusunzo olhu?

“Ingye indi mughombe w’omukama!” (Lebaya enungu 13, 14)

14 Ithwangana yisanga ithwabiri lengekania okwa lhusunzo lhw’embaghane olhwa Maria ahebawa, aliwe ithw’ibirirwa erihangya-hangya lya Maria. Omumalaika mwamubwira athi akendibya mukule isyathabana mulhume. Malaika Gabrieli mwathabugha athi  akendi ghenda ewobu Maria n’eriyababwira ekikendi leka iniaheka obukule. Banga lengekenie bathiki? Maria angabya imwalengekania n’oku Yozefu, oyuwabya iniakendi muthahya. Anga musoborere athi ngoku syathasingira kandi inina mukule? Kandi thalengekania n’okwa lhukwamirwa lhunene, olhw’erikulya, erilembera, n’erikangirirya Omughalha ekyusa ky’Owendatha kutsibu! Sithwanga minya ebyosi ebyabya bikalhaba omwa malengekania wa Maria, Gabrieli akakania nayu. Aliwe thunasi ngoku mwabugha athi: “Ingye indi mughombe w’omukama. Kinyibyeko ngoko wabiribugha.”Lk. 1:26-38.

15. Busana naki erikirirya lya Maria lyabya lya mbaghane?

15 Eki sikirikanganaya ngoku Maria aby’awithe erikirirya lya mbaghane? Omughombe w’obukali iniakaghendera okwa bya mukama wiwe. Neryo Maria mwayihira omwa byalha bya Mukama wiwe, Yehova. Aby’anzire erikolha ekyosi-kyosi eky’akendi muyithaghako. Erikirirya ng’eryo alihahi? Omundu syalibuthawa n’erikirirya. Likathokekana busana n’akaghalha aka wukahiraho n’eritsumulhwa na Nyamuhanga. (Gal. 5:22; Efe. 2:8) Mbwino hane ebikakanganaya ngoku Maria mwahiraho akaghalha erighumya erikirirya liwe? Bineho. Thaghanirya okwa mibere ahulikiriramu n’erisubirya akabwirwa.

16. Ni kyahi ekikakanganaya ngoku Maria aby’akahulikirira ndeke?

16 Erihulikirira lya Maria. E Biblia yikahabulha yithi ambi ‘ithwowa lhuba’ aliwe ‘isithwabugha lhuba.’ (Yak. 1:19) Maria anabya muhulikiriri mubuya? Angabya ikwabya athya. Mirundi ibiri ekitabu kya Luka kikakanganaya ngoku mwahulikirira ndeke emyatsi ey’eby’obunyakirimu, kandi ngoku enyuma waho mwabya iniane mughanirya kuyo. Omughulhu Yesu abuthawa, abalisya mubahika oku Maria bamamubwira ebya bamalaika babugha. Enyuma w’emyaka 12, Yesu nomwanabya iniakine mulere, mwabugha ekindu kikulhu omwa myatsi y’obunyakirimu. Emyatsi eyosi eyo, Maria mwahulikirirayo, am’ibuka n’erighanirya kuyo kwa buuli.Soma Luka 2:16-19, 49, 51.

17. Thuk’ighaki okwa mibere y’erikania lya Maria?

17 Emikanirye ya Maria. Omwa Biblia simuli bingyi ebya Maria akanaya. Omukania muuli wa Maria ali omu Luka 1:46-55. Ebinywe ebyo bikakanganaya ngoku Maria abya asi ndeke Amasako. Eby’abugha bikabya nga bihambene n’ebighuma by’okwa byabya omwa musabe wa Hana, mama w’omuminyereri Samweli. (1 Sam. 2:1-10) Maria mwakania okwa Masako nga 20 omwa mukania wiwe. Akabya ng’abya mukali oyuthe saghirira erikania okwa by’obunyakirimu. Maria iniakabugha butsira buba emyatsi mibuya eyiri omwa muthima wiwe, owabya oswire mw’emyatsi y’ekwenene eyo aby’ak’igha erilhua oku Yehova Nyamuhanga, Omunywani wiwe mukulhu.

18. Thwanga gherererya erikirirya lya Maria omu nzira syahi?

18 Nga Maria, nethu thukana yisanga Yehova iniabirithuha emibiiri eyikabya nga yikalire. Nethu thubye ng’iyo, eriyolhobeka omwa byalha bya Yehova, ithunayikethere ngoku akendi thuwathikya. Thwangana gherererya Maria omw’ibya thukahulikirira ndeke ebya thukigha oku Yehova n’ebighendererwa biwe, erighanirya okwa myatsi y’obunyakirimu, n’eribwira abandi ithunatsemire okwa bya thwabirigha.Esy. 77:11, 12; Lk. 8:18; Abar. 10:15.

19. Thwamagherererya ababya n’erikirirya abali omwa Biblia, ithukendi syabanaki?

19 Nindi oyuwangabugha athi Ruta, Hezekia, na Maria sibabya banywani ba Nyamuhanga, nga Abrahamu? Ibo haghuma n’abosi abali omwa “ndeko nene y’abalhangiri” n’abandi bathaleghulha bangyi, babiribya n’omughisa w’eribya banywani ba Nyamuhanga. Thulhole embere erigherererya ababya n’erikirirya aba. (Ebr. 6:11, 12) Thwamakolha ekyo, ithukendi syabana olhuhembo lhunene—erisyabya banywani ba Yehova kera na kera!