Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Akaleberyo—ey’Erigha  |  Okwakabiri 2016

 ERIYIKANIAKO

Yehova Abirinyithokesya Omwa Mubiiri Wiwe

Yehova Abirinyithokesya Omwa Mubiiri Wiwe

Munabwira omusirikali ngoku munaya omwa ngomo kundi munaghana eriyingirya omwa by’amalhwa. Munamubulya: “Obo kandi ebyo bya wukayanzubayamu?” Thwasubiranaya ebyo okwa simu bakathasya mbirikira engendo yakabiri ambu ng’ingire omwa mahe we Amerika.

NABUTHAWA 1926 omwa Crooksville, Ohio, e Amerika. Thatha na Mama isibatsomene eby’edini, aliwe ithwe bosi, abaana munani, ibakathubwira ambu ithwabya thukaghenda okwa kanisa. Iningaya somera omwa kanisa y’Abamethodist. Munabya ingahikya emyaka 14, omuhalimu w’ekanisa eyo mwanyiha ekisembo kundi munaghunza omwaka isihali ekiro nabulha okwa kanisa kwa Kyasande.

Margaret Walker (mwali wethu owakabiri erilhua okwa mali) yuwany’eghesaya ekwenene

Omwa biro ibyan’ebyo, omutaka wethu ya Margaret Walker, Omwema wa Yehova, mwatsuka eribungira mama n’erimukanirya okwa myatsi ye Biblia. Kiro kighuma, naghe munasa namahulikirira. Mama mwalengekania athi mbwino ngendi batabura, neryo amambwira athi ngasube eyihya. Aliwe iningabya inganemusyahulikirira bak’igha. Babere babirigha mirundi nga y’eyo, Margaret mwambulya athi, “Wunasi erina lya Nyamuhanga?” Munabugha indi, “Ekyo lero obuli mundu k’anakyasi—sin’iyo Nyamuhanga.” Neryo mwambwira athi, “Imaya e Biblia yawu wanasoma Esyonyimbo 83:18.” Munasomaho, namabana Nyamuhanga in’iyo Yehova. Aho munaghenda ingathibitha eriyabwira banywani baghe indi, “Munabwire wukendibya wukahika ewenyu, wimaye e Biblia yawu wusome Esyonyimbo 83:18, wukendi minya erina lya Nyamuhanga.” Ni bugha ambu munatsukiraho erithulira.

 Munigha e Biblia namabatizibwa omwa 1941. Buthuku buke-buke, munahabwa olhukwamirwa lhw’erisondolha erigha ly’ekitabu ery’ekithunga. Munahira omu mama n’abaana bethu mw’omuhwa w’eryasa okwa muhindano. Mubatsuka eryasa okwa mihindano y’erigha ly’ekitabu eryonabya ingasondolha. Aliwe thatha isyabitsomene.

ERIHAKANISIBWA EKA

Munahebwa esyongwamirwa nyingyi omwa kithunga, neryo munathonda eribikiro lyaghe ly’ebitabu. Kiro kighuma, thatha mwakangania ahali ebitabu byaghe n’eribugha athi: “Wamalhangira ebyosi birya? Singabyanzire omwa nyumba yaghe, kandi wughende nabyo.” Munaghenda namayapangisya hakuhi omwa tawuni eya Zanesville, Ohio, aliwe iningabya inganemusuba eka ingayahira omwa bandi abaliyo mw’omuhwa.

Thatha mwalengaho erithanga mama erighenda okwa mihindano. Okwa bundi buthuku mama iniakabya akaghenda okwa mihindano, thatha iniakayamuhurubana n’erimusubya omwa nyumba. Aliwe iniakalhaba omwa lhundi lhukyo n’erighenda okwa mihindano. Munabwira mama nyithi: “Suwutsomane. Akendi lhuha eribya akayakuhurubana.” Endambi muyahika, thatha amalhuha erimuthanga, neryo mama amatsuka erighenda okwa mihindano isihali toko.

Omwa 1943 muthwatsuka erithunga Esukuru y’Omubiiri w’Ekiteokrasi, namatsuka erilhabya ebipindi. Erihabulha eryonabya ngahebwa nabirilhabya ebipindi byaghe mulyuwania emibere yaghe y’erikanirya abandu.

ERITHENDIBYA N’OLHUHANDI OMWA MUGHULHU W’OLHUHI

Obo bwabya ibw’obuthuku bw’Olhuhi olhw’Ekihugho Kyosi olhwakabiri. Omwa 1944, mubambirikira ambu ng’ingire omwa mahe. Munaghenda eyo bambirikira omwa kambu y’abasirikali e Fort Hayes omwa Columbus, Ohio, bamanyikolesya ebisasaizi, kandi nam’usulirirya n’ebipapura. Ingye munababwira indi sinang’ingira omwa busirikali. Mubanyileka namaghenda. Enyuma w’ebiro bike, omupolisi mwahika ewaghe n’erimbwira athi: “Corwin Robison, bamanyithuma erisyakuhamba.”

Enyuma w’esyowiki ibiri ingane omwa ngomo, omutsweri mwabugha athi: “Kulyabya in’ithwamu lyaghe, wangabere omwa ngomo engebe yawu yosi. Wunawithe eky’eribugha?” Munamusubirya indi: “Ow’Ekitsumbi, naghe ka mwangananyithwere ng’omusondoli w’edini. Obuli lhukyo ni rutare lhwaghe, kandi nga thulha engulhu yuwene y’Obwami okwa bandu bangyi.” Omuramuzi mwabwira abandi abasyahulikirira omusango oyu athi: “Simuli hanu habw’erithwamu omulhwana oyu nga ni musondoli w’edini kutse eyihi. Muli hanu erithwamu omundu oyu nga mwanaligha er’ingira omwa busirikali kutse eyi.” Omwa syodakika sike oku makumi asathu, mubathwamu bathi ngali kw’omusango. Omuramuzi mwathwamu athi ngabohawe ahabw’emyaka ithanu omwa ngomo e Ashland, Kentucky.

YEHOVA MWANYITHEYA OMWA NGOMO

Esyowiki ibiri esy’erimbere-mbere nabya omwa ngomo ye Columbus, Ohio, kandi ekiro ky’erimbere munathahulhuka omwa kasenge akabambiramu. Munasaba Yehova nyithi: “Sinangathoka erighunza emyaka ithanu omwa kasenge kanu. Singasi eky’erikolha.”

Engyakya, omutheya mwanyihulhukirya eyihya. Munaghenda ahali owundi munyangomo, ini muli, kandi ow’ekikuba kinene, neryo thwam’imana nayu  aho erilebya ebiri eyihya omw’idirisa. Mwanyibulya athi, “Bakubohereki ino nawu, Nyanguhi?” Munamusubirya indi, “Ngali Mwema wa Yehova.” Mwabugha athi, “Wuli Mwema wa Yehova? Neryo bakubohereki?” Munamubwira indi, “Abema ba Yehova sibaliyingiraya omwa nyuhi n’eritha bandu.” Amabugha athi, “Bakakuboha kundi wukaghana er’itha bandu. Kandi banemuboha abandi kundi bak’itha abandu. Obo ekyo kine mw’amenge?” Munamusubirya indi, “Eyihi, sikiri mw’amenge.”

Neryo mwabugha athi, “Omwa myaka 15 eyanaghunza omwa yindi ngomo, nabya inganemusoma okwa bitabu byenyu.” Munasaba indi, “Yehova, nyiwathikaye nga nywane omulhume oyu.” Erina liwe in’iyo Paul. Okwa ndambi eyo, mwabugha athi: “Abalhume aba bamakupuma, ambi iwalhaka. Iningendi kulhwirako.” Ekibuya, abanya ngomo 50 abathwabya thubohirwe nabu mubathanyikolha kwa kindu.

Nabya omwa Bema ba Yehova ababohawa busana n’erighana eby’ekipolitiki e Ashland, Kentucky

Omughulhu abakulhu b’engomo banyihumiraya omwa ngomo ye Ashland, mun’eyayo baghalha bethu abakulire bunyakirimu. Eribya nabo mukyanyiwathikya haghuma n’abandi erighuma bunyakirimu. Obuli mundu ibakamuha obusomi bwe Biblia bw’obuli yenga, kandi ithukathegheka ebibulyo n’eby’erisubirya omw’ihindana eryo thwabya thukathunga. Kandi ithuwithe n’oyukathughabira ah’erithulira. Ithukakesaya omwa lhusenge lhunene olhuthimbire mw’esyongyingo. Oyukathughabira ah’erithulira iniakambwira athi: “Robison, n’iwe wukendi kolha okwa ngyingo erya n’erya. Esyongyingo esyo bwa bulhambu bwawu. Wulhangire wuthi obuli oyukasako wukamuthulira athali ghenda.” Obuyithondeke bw’erithulira lyethu ibw’obo.

EBYO NABANA NABIRILHUA OMWA NGOMO

Olhuhi olhw’Ekihugho Kyosi olhwakabiri mulhwahwa omwa 1945, aliwe munabya ingane omwa ngomo habw’obuthuku bulebe. Iningabya ingane mukwa obulighe busana n’eka yethu kundi thatha abya iniabirimbwira athi, “Iwe namabirikuthoka, abandi ibakendyolhoba.” Nabere nalhua omwa ngomo munatsema busana n’ebya n’eghaya. Thatha nomwanabya inianemuthuhakanisya kutsibu, mun’eya omusanju okwa b’omw’eka yethu ibabiritsuka erihindana na mwali wethu mughuma iniabiribatizibwa.

Thukaghenda omw’ithulira na Demetrius Papageorge, mughalha wethu omuhakabibwa oyuwatsuka erikolera Yehova omwa 1913

E Korea yabere yabya olhuhi omwa 1950, olhwabya lhuhambire n’okwa Banya Amerika, mubanyibirikira omurundi wakabiri e Fort Hayes bathi ngingire omwa mahe. Babere babirinyilengesya nga nanganathoka, omusirikali mwanyibwira athi, “Wuli mughuma w’okwa balyakolha ndeke omwa gurupu yawu.”  Munamubwira nyithi, “Ekyo kyuwene, aliwe sinend’ingira omwa busirikali.” Munamubwira ebinywe ebiri omwa 2 Timoteo 2:3 nyithi, “Ingye nabiribya musirikali wa Kristo.” Abere abirihuna ndambi, mwabugha athi, “Wangana ghenda.”

Enyuma w’obuthuku buke, munaghenda omwa muhindano ow’abanzire erighenda okwa Beteli okwa lhuhindano olhwabya e Cincinnati, Ohio. Mughalha wethu Milton Henschel mwathubwira athi omundu amabya iniananzire erikolha kutsibu emibiiri y’Obwami, ekithunga ikikendi mukolesya okwa Beteli. Mun’usulirirya efomu, bamanyibirikira, neryo munaghenda okwa Beteli eye Brooklyn omwa Kwomunani 1954. Nahathya ngakine okwa Beteli.

Sindi nathabulha omubiiri w’erikolha okwa Beteli. Ahabw’emyaka mingyi, iningakolha okwa byuma ebikahuhaya amaghetse ebiri omw’ikolero ly’ebitabu n’omwa nyumba y’esyofisi, nabya makanika, kandi ininga subaya esyokofuro. Kandi munakolera n’okwa bisenge by’emihindano eminene-minene omwa New York City.

Ingane musugha ebyuma ebikahuhaya amaghetse ebiri omwa nyumba y’esyofisi omwa Beteli ye Brooklyn

Nabirianza esyondegheka sy’okwa Beteli, ng’eriramya ly’obuli ngyakya n’erigha ly’Akaleberyo haghuma n’erisangira omwa mubiiri w’erithulira n’abalikyethu omwa kithunga. Wukabya wamathakilhangira, esyondegheka ng’esi isitholere isyabya omwa buli eka y’Omwema wa Yehova. Ababuthi n’abaana bamabya bak’ighira haghuma erisako lya buli kiro, eribera erikolha Eriramya ly’Eka, erisangira ndeke omwa mihindano n’omw’ithulha engulhu yuwene, eka yosi iyikendi kulha bunyakirimu.

Nabiribya n’abanywani bangyi okwa Beteli n’omwa kithunga kyethu. Abandi babya bahakabibwa kandi babirihebwa olhuhembo lhwabu olhw’erighenda elhubulha. N’abandi sibabya bahakabibwa. Aliwe abaghombe ba Yehova abosi—imwamuli n’abanya Beteli—sibahikene. Hamabya erithendi yitheghererangania okw’ingye na mulikyethu, ngalengaho erisondekania obuholho. Ngalengekanaya oku Matayo 5:23, 24 kandi nga thwanga ghunzaho thuthi erithendi yitheghererangania ng’eryo. Sikyolho erisaba ekighanyiro, kandi kwenene mughulhu mungyi ekitsibu kikahwa namabirisaba ekighanyiro.

EBIBUYA EBYABIRILHWIRIRIRA OMWA MUBIIRI WAGHE

Busana n’emyaka yaghe, hathya kinyikalire erighenda nyumba okwa nyumba, aliwe singatha lhuhirira. Nabir’igha bike omwa Lhuchaina lhwe Mandarin  kandi ngatsemera erikania n’Abachaina okwa nzira. Hakanayira inaghaba esyogazeti 30 kutse 40.

Inganemuthulira Abachaina e Brooklyn, New York

Nanakolire n’erisubayo okwa mundu oyuli e Chaina! Kiro kighuma, omusika inianemuthererera ehindu ehy’erihira kw’ebighuma mwanyisekera. Naghe munamusekera namamuha egazeti y’Akaleberyo ne Awake! omwa Lhuchaina. Mwasimya n’erimbwira athi erina liwe n’iyo Katie. Erilhwiririra naho, Katie iniakabya akanyilhangira, iniakasa eyangali ithwakania. Munamukangirirya amena w’ebighuma omwa Lhusungu. Iningabugha inianemunyisubamu. Iningamusoborera n’okwa biri omwa Biblia, kandi mwaligha ekitabu e Biblia Yikakangiriraya. Enyuma w’esyoyenga ndebe, munamubulha.

Enyuma w’emyezi nga mirebe, mun’eya owundi musika ihan’aho, nayu amaligha esyogazeti esyo namuha. Eyenga eyakwamako, mwanyiha esimu yiwe, amabugha athi, “Kanaya n’oyuli e Chaina ono.” Munabugha indi, “Ka singawithe oyo ngasi e Chaina.” Aliwe mwahathikana, neryo mun’imya esimu n’eribugha indi, “Halo, ono ni Robison.” Neryo omundu amanyisubirya athi, “Robby, ono ni Katie. Hathya ngali e Chaina.” Naghe indi, “wuthi e Chaina?” Na Katie athi, “Aa. Robby, wanamaminya omusika oyuwamakuha esimu oyo? Ni mwali wethu. Muwanyikangirirya ebindu bingyi ebyuwene. Kisi nayu wumukangirirayebyo.” Munabugha indi, “Katie, ngendi lengaho. Wasingya erinyibwira aho wuli.” Enyuma w’aho munakania na mwali w’obu Katie omurundi w’erighunzerera. Ahosi-hosi aho basika babiri abo bangabya ibali, ngambwa bakathabya ibanemwigha oku Yehova.

Namabirighunza myaka 73 ingane mukolera Yehova buthaleghulha. Ngamusima kundi mwangwathikya erithoka erithendibya na lhuhandi omwa by’amalhwa n’eribya muthaleghulha ingane omwa ngomo. Kandi, baghalha bethu na bali bethu bakabugha bathi mubasika busana n’obuthubaha obo nabya nabu, omughulhu thatha athuhakanisaya kutsibu. Erighunzerera, mama n’abandi baana bethu mukagha mubabatizibwa. Endambi muyahika na thatha am’olhoba, mwaholha iniabiritsuka eryasa okwa mihindano.

Lyamabya inin’isonda lya Nyamuhanga, abaana bethu n’abandi banywani baghe bakendi syalhubuka omwa kihugho kihya-kihya. Thalengekania nga bukendi syabya butseme bungahi thukaramya Yehova emighulhu yosi ithune n’abathwanzire! *

^ enu. 32 Omwatsi ono abere anemutheghekwa, mughalha wethu, Corwin Robison mwaholha iniane muthaleghulha oku Yehova.