Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Akaleberyo—ey’Erigha  |  Okwakabiri 2016

 ERILHUA OMWA BYA THUBIKIRE

Ematoka Eyiri kw’Emizindalo Muyaminywa n’Abandu Bangyi

Ematoka Eyiri kw’Emizindalo Muyaminywa n’Abandu Bangyi

“Hali ematoka nguma eyiri kw’emizindalo eyikakolesibawa omwa mubiiri w’Omukama e Brazil, kandi yasibwe n’abandu bangyi, ‘ematoka eye Watch Tower eyiri kw’emizindalo.’”—Nathaniel A. Yuille, omwa 1938.

OMWA myaka ya 1930 omubiiri w’Obwami e Brazil mwaghenda lyolho. Neryo omwa 1935, abatemburi babiri, Nathaniel na Maud Yuille mubahandikira Joseph F. Rutherford, oyuwabya imanire omubiiri w’erithulira okwa buthuku obo. Mubayihayo erikolha omubiiri kandi mubahandika bathi “ibakendi ghenda ahosi-hosi.”

Nathaniel, abya awithe myaka 62, kandi abya injiniya oyuwabirihumulibwa. Abya inianabere mw’imaniri w’omubiiri omwa kithunga ky’Abema ba Yehova omwa San Francisco, California, e Amerika. Omwa kithunga ekyo, mwatheghekania omubiiri w’erithulira n’erikolesya ebyuma by’emirenge omw’ithulha engulhu yuwene. Ebyosi ebyo, n’omuthima wiwe w’eriyihayo mubyamuwathikya akahebwa olhukwamirwa lhuhyaka olhw’eribya mughombe w’omuthahulha omwa kihugho kinene ekye Brazil, kandi ekiri mw’emibughe mingyi!

Nathaniel na Maud mubahika e Brazil omwa 1936, ibane n’owundi mutemburi kandi omuhinduli, ya Antonio P. Andrade. Mubasa n’ebindu by’obughuli—esyoturunu 35 n’ematoka eyiri kw’emizindalo. E Brazil, erihanga eryakathanu omwa bunene omwa kihugho kyosi, lyabya mw’abathuliri b’Obwami 60 basa! Aliwe ebyuma by’emirenge ebi byanga bawathikirye erihikya omwatsi w’okwa syomiliyoni sy’abandu omwa myaka mike buyira.

Mulikyethu Yuille na mukali wiwe babere baghunza kwezi kughuma omwa Brazil, ekyaghanda ky’omuthahulha mukyathegheka olhuhindano lhw’omubiiri, olhw’erimbere e Brazil, olhwabya omwa tawuni eye São Paulo (okwa lhuhindano olhu, balikyethu ibakaghenda n’omw’ithulira). Neryo ematoka eyiri kw’emizindalo obundi Maud iyukafughayo, muyatsukiraho erikolha, yikarangirira omukania w’abandu bosi, kyamaleka abandu 110 ibasa okwa lhuhindano! Endegheka  y’olhuhindano olhu muyahira omwa bathuliri mw’omuhwa, bamanza erikanyirirya omubiiri wabu. Mubigha ngoku bangathulira omw’ikolesya ebitabu n’esyo testimony cards, n’emirenge eyiri okwa turunu omwa Lhusungu, Olhujamani, Olhuhangariani, Olhupolish, Olhusipanishi n’enyuma waho omwa Lhuportigizi.

Ematoka eyiri kw’emizindalo muyahikya okwa bandu bangyi kw’engulhu yuwene omwa Brazil

Emihindano eminene-minene ey’omubiiri eyabya omwa São Paulo, Rio de Janeiro, ne Curitiba omwa 1937, muyaleka omubiiri w’erithulira iniathasy’ongera. Abalyasa okwa lhuhindano ibakabya bakathulira nyumba okwa nyumba n’ematoka eyiri kw’emizindalo iyikabya iyinemulhabamu. José Maglovsky, oyuwabya mwana okwa buthuku obo, mwahandika bino abirikulha: “Ithukahira ebitabu byethu by’okwa kameza, n’omwatsi owali okwa kanda omwa matoka eyiri kw’emizindalo iniakabya ak’owika, ithukakanaya n’abandu abalyasyalebaya nga yamabyaki.”

Abandu ibakabatizibirawa omwa lhusi, neryo abalhue bak’ogha ibalhuamu, ibayotha okwa mwisi kw’emusike. Obu ka bwabya buthuku obuwene erithulha engulhu mbuya omw’ikolesya ematoka eyiri kw’emizindalo! Omukania w’olhubatizo iniak’owika ndeke omwa mizindalo mughalha wethu Rutherford akalhabyagho. Abandu ibakathimba okwa matoka, ibahulikirira omukania iniane muhindulhwa omwa Lhuportigizi. Abakabatizibawa ibakalubbawa n’eradio iyinemwimba esyonyimbo sy’Obwami omwa Lhupolishi. N’abalikyethu abaliho ibakabya ibanemw’imba omwa mibughe muthina-muthina. E Yearbook eya 1938 yikabugha yithi: “Ikik’ibukaya omundu ngoku okwa Pentekote obuli mundu abya akayitheghererya omwa mubughe wiwe.

Emihindano eyi iyikabya yikahwa, obuli Kyasande, yawire-siyithawa, emikania eyiseghemere okwa Biblia eyikabughira okwa matoka eyiri kw’emizindalo iyikabya iyinemuhika okwa bandu aha bakahumulira, eya b’ikere, n’omwa makolero awali omwa São Paulo n’esyotawuni esiri hakuhi-hakuhi. Obuli kwezi, ematoka eyiri kw’emizindalo iyikabya iyinemuya eyikere abahagha 3,000 esyokilomita 97 erilhua omwa tawuni ye São Paulo. Endambi muyahika yamabya ekithunga. Balikyethu aba nomubanabya n’obulhwere obukalire ng’obu, mubasaba ehamuli ey’eriya eyikere abandi bahagha, bamabathwalira omwatsi we Biblia owakahumulikanaya.

Omwaka wa 1938 akayahwa, emyatsi y’Obwami eyiri okwa syokanda muyahulhuka omwa Lhuportigizi. Okwa kiro ky’Eryibuka Abaholi, ematoka eyiri kw’emizindalo iyikathimba omwa malimbo iyinemubuya emyatsi ng’eno, “Abaholi Balihayi?,” “Yehova,” na “Eby’obughuda,” erihikyayo okwa baliri abalhabire omu 40,000!

Abakulhu b’amadini mubahithana, bamapona busana n’erithulhughania ly’obuthubaha ly’ekwenene ye Biblia kandi ibakabya ibane mutsotsererya abanya gavumente bathi bakakiraya ematoka eyo. Mwali wethu, muka Yuille, ak’ibuka kiro kighuma omukulhu w’edini akasorokya abandu bangyi, athi bathimbe okwa matoka eyiri kw’emizindalo n’erikakiryayo. Aliwe omukulhu w’etawuni n’abakulhu b’abapolisi mubahikaho bamahulikirira endegheka yosi. Omukulhu w’etawuni mwaheka okwa bitabu ebiseghemere okwa Biblia. Ekiro ekyo muhathabya toko yosi-yosi. Nomuhanabya erihakanisya, e Yearbook eya 1940 mumwasira eripoti eyihambire oku Brazil eya bugha yithi omwaka owa 1939 “w’omwaka owuwana kutsibu erikolera Omuthabali Mukulhu n’erithulhughania erina liwe.”

Omwa kwenene, ematoka eye Watch Tower eyiri kw’emizindalo muyabya yahika e Brazil, muyakolha omubiiri munene omw’ithulira. Muyawathikya kutsibu erihikya okwa bandu kw’omwatsi w’Obwami. Nomwakine indi ematoka eyo muyaghulibwa omwa 1941, esyongumi n’esyongumi sy’Abema ba Yehova babirilholha embere eribwira ab’emithima myolho engulhu yuwene omwa mwanya munene ow’erithuliramu e Brazil.Erilhua omwa bya thubikire e Brazil.