Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Akaleberyo—ey’Erigha  |  Okwakabiri 2016

Ighira Okwa Baghombe ba Yehova Abathaleghulha

Ighira Okwa Baghombe ba Yehova Abathaleghulha

“Siwuli leghulha okwa bandu abathaleghulha.”ESY. 18:25.

ESYONYIMBO: 63, 43

1, 2. Dawudi mwakangania athi ku ni muthaleghulha oku Nyamuhanga? (Lebaya ekisasani ekiri okw’itsuka.)

OMWA kathi k’ekiro, Dawudi na Abisai bak’ombomba n’erilhaba omwa basirikali 3,000 abaghotsere. Ahakathi-kathi k’ekilhaliriro, bamasanga Omwami Saulo iniabirihwera omwa thulho. Alyahika omw’irungu lye Yudea ewosi eyi, akasondya Dawudi nuku amwithe. Omwa bihwe-hwe, Abisai akabugha athi: ‘Leka ngamutsimithe omw’ithumu erilhabira omo kithaka, ngendo nguma, singendi mutsimitha kabiri.’ Ekya Dawudi amusubamu kikaswekaya! “Sumuheraye; kusangwa nindi wangathoka erisumbira ebyalha biwe okw’oyo Omwami Mukulhu ayisogha, iniabya butsira musango kwehi? . . . Omwami mukulhu anyighanaye erihira ebyalha byaghe okw’oyo Omwami Mukulhu ayisogha!”1 Sam. 26:8-12.

2 Dawudi aby’asi ndeke ekya kikamanyisaya eribya muthaleghulha oku Nyamuhanga. Mwathanza erikolha Saulo ya nabi. Busana naki? Kundi Saulo asombolhawa na Nyamuhanga eribya mwami we Israeli. Abaghombe ba Yehova abathaleghulha bakasikaya abo akasombolha. Yehova anzire abandu biwe abosi ibabya bathaleghulha.Soma Esyonyimbo 18:25.

3. Abisai mwabya athi muthaleghulha oku Dawudi?

 3 Abisai iniasikirye Dawudi. Ekikakanganaya ekyo kya kino: Dawudi abere akanza eribisa kw’abirisingira na Batiseba, mwakolesya Yoabu mughalha wobu Abisai er’ithisya Uria mwira wa Batiseba omwa lhuhi. (2 Sam. 11:2-4, 14, 15; 1 Emy. 2:16) Abisai angabya imwaminya okwa mwatsi oyu, aliwe mwabya inianasikirye Dawudi ng’omwami oyuwasombolhawa na Nyamuhanga. Kandi, Abisai nomwanabya mukulhu w’amahe, mwathakolesya obuthoki obo erianza ayimiraye ekithumbi ky’obwami ekye Israeli. Omwakanya k’ekyo, mwatheya Dawudi oko baghobya n’esindi nzighu.2 Sam. 10:10; 20:6; 21:15-17.

4. (a) Dawudi mwabya athi ky’erileberyako ky’obuthaleghulha oku Nyamuhanga? (b) Ni bindi by’erileberyako byahi ebya thukendi kaniako?

4 Dawudi erighana er’itha Omwami Saulo mukyakangania ngoku ni mughombe muthaleghulha wa Yehova Nyamuhanga. Dawudi iniakine mulhwana, mwayalhwa n’embangyi, omulhume ow’akaghalha kanene Goliata, oyuwabya ‘akatsuma abalhwi ba Nyamuhanga oyuliho’! (1 Sam. 17:23, 26, 48-51) Omughulhu Dawudi abya mwami kandi amakolha amalholho manene-manene omuli obusingiri n’obwithi, mwaligha erikungwa n’omuminyereri Natana neryo amayisubamo. (2 Sam. 12:1-5, 13) Dawudi mwalholha embere eribya muthaleghulha oku Yehova Nyamuhanga n’omwa busyakulhu bwiwe. Ng’eky’erileberyako, mwahayo bindu bingyi eriwathikya okwa buhimbe bw’ehekalu ya Yehova Nyamuhanga. (1 Emy. 29:1-5) Ni kwenene Dawudi mwasobya kutsibu, aliwe kilhangirikire ndeke ngoku abya muthaleghulha oku Nyamuhanga. (Esy. 51:4, 10; 86:2) Omughulhu thukayalebaya eyindi myatsi eyihambire oku Dawudi n’eby’abandi ab’omwa buthuku bwiwe, thuthalengaho erisubirya okwa bibulyo bino: Ni buthaleghulha bwahi obwa thutholere ithwahira embere? Ithwe eribya bathaleghulha thutholere ithwabya na mibere yahi?

NI BUTHALEGHULHA BWAHI OBWA THUTHOLERE ITHWAHIRA EMBERE?

5. Ekisobyo kya Abisai kikathweghesayaki?

5 Omughulhu Abisai ombombera omwa kambu ya Saulo, mwakangania obuthaleghulha omwa nzira eyithatholere. Omw’ibya muthaleghulha oku Dawudi, Abisai aby’anzire eritha Omwami Saulo, aliwe Dawudi mwamughania, kundi kyabya kibi “erisumbira ebyalha okw’oyo Omwami Mukulhu ayisogha.” (1 Sam. 26:8-11) Omwatsi oyu akathw’eghesaya erisomo likulhu: Nomwakine indi ni bingyi ebikathuyithagha kw’obuthaleghulha, thutholere ithwakolesya emisingyi ye Biblia eriminya ekitholere eribya embere.

6. Busana naki thutholere ithwayitheya nomwakine indi ni kya buhangiranwa erikangya obuthaleghulha okwa banywani n’ab’eka yethu?

6 Ni kwenene obuthaleghulha bukalhua okwa muthima, aliwe omuthima wethu ni muthebya. (Yer. 17:9) Neryo omuthaleghulha oku Nyamuhanga angana yisanga iniabiryanza abye muthaleghulha kutsibu okwa munywani kutse omuhughu oyune mukolha ebithuwene nibya. Kwilhabirirya omughulhu oyo thwanzire kutsibu akasighanaya ekwenene thutholere ithwabya ithun’ibukire ngoku Yehova y’ow’erimbere erikangania obuthaleghulha.Soma Matayo 22:37.

7. Mwali wethu mwakangya athi obuthaleghulha oku Nyamuhanga iniane omwa mibere eyikalire?

7 Ow’okwithwe amahighithwa omwa kithunga, ikyanga thubera kitsibu omwa mwatsi oyu. Eky’erileberyako ni mwali wethu Anne.  [1] Mama wiwe oyuwabya iniabirihighithwa omwa kithunga mwamutherera akasaba athi akanza erimubungira kundi athi abya akayowa nabi eribya isyakiri nabu. Erilemba-lemba eryo mulyitha Anne y’obulighe neryo amamulhagha athi akendi musubamu omw’imuhandikira ebaruha. Mwalebya emisingyi ye Biblia athali ahandika. (1 Kor. 5:11; 2 Yn. 9-11) Anne mwahandikira mama wiwe kandi omwa bwolho-bwolho amamubwira ngoku iyo yuwayithahulha okw’eka busana n’ekibi kiwe  n’erithendi yisubamu. Anne mwahandika athi: “Ekighuma kisa ekyanga kuwathikya erithekana okwa bulhumi, ly’erisuba oku Yehova.”Yak. 4:8.

8. Ni mibere yahi eyikendi thuwathikya eribya bathaleghulha oku Nyamuhanga?

8 Obuthaleghulha bw’abandi ab’omwa buthuku bwa Dawudi bukakanganaya emibere isathu eyanga thuwathikya eribya bathaleghulha oku Nyamuhanga. Emibere eyo mwamuli eriyikehya, olhukeri, n’obuthubaha. Thukanaye kuyo mughuma okwa mughuma.

ERIBYA MUTHALEGHULHA OKU NYAMUHANGA LIKAYITHAGHA ERIYIKEHYA

9. Ni kyahi ekyaleka Abeneri inianza er’itha Dawudi?

9 Abalhume babiri bangabya ibabya ibanasamalire Dawudi akakania na Saulo iniane n’omuthwe wa Goliata omwa byalha biwe. Omughuma ni Yonatana mughalha wa Saulo, oyuwakolha endaghane ey’erinywana Dawudi. Owundi abya ini Abeneri omukulhu w’abasirikali. (1 Sam. 17:57–18:3) Enyuma w’aho Abeneri mwasighika Saulo akanza eritha Dawudi. Dawudi mwahandika athi: “Abandu abakayiheka bakasonda erinyitha.” (Esy. 54:3; 1 Sam. 26:1-5) Yonatana abya athi wa mbaghane oku Abeneri? Nga Yonatana, Abeneri nayu abya inianasi ngoku Nyamuhanga abirisombolha Dawudi eribya mwami we Israeli. Saulo abere abiriholha, Abeneri angana yikehirye iniakangania obuthaleghulha oku Nyamuhanga omw’iwathikya Dawudi butsira mughalha wa Saulo ya Isiboseti. Aliwe Abeneri erikesya n’omuhweki w’Omwami Saulo, angabya inianza ahebawe Obwami.2 Sam. 2:8-10; 3:6-11

10. Ni kyahi ekyaleka Abusaloma iniathabya muthaleghulha oku Nyamuhanga?

10 Erithendi yikehya mulyaleka mughalha wa Dawudi ya Abusaloma iniathabya muthaleghulha oku Nyamuhanga. Nawu wuthalebya, “Abusaloma mwayikokotherya egali, n’esyosabayiri, n’abalhume makumi athanu erithibitha embere siwe”! (2 Sam. 15:1) Kandi amathebererya n’abandu athi n’iyo basighike. Nga Abeneri, Abusaloma mwanza er’itha Dawudi, nomw’anabya asi ngoku Yehova abirisombolha Dawudi eribya mwami we Israeli.2 Sam. 15:13, 14; 17:1-4.

11. Thwanga ghasirwa thuthi omwa bya Biblia yikakanaya oku Abeneri, Abusaloma, na Baruku?

11 Eky’erileberyako kya Abeneri n’ekya Abusaloma, bikakanganaya ndeke-ndeke ngoku erianza ebitsumbi kyanganaleka omundu iniathabya muthaleghulha oku Nyamuhanga. Omo kwenene, oyune mughombe muthaleghulha wa Yehova syatholere akabya n’omubere mubi oyu. Aliriryo, n’eriyighomba eribya mugaga kutse eribana emibiiri y’ebitsumbi omwa kihugho kino kyangana hamba nabi  okwa bunyakirimu bw’Omukristayo. Habw’esyonzumwa esithakanganibwe, omuhandiki w’omuminyereri Yeremia ya Baruku mwalengemeribwa. Yehova mwabwira Baruku athi: “Lebaya, ekyo nabirihimba ngahimbulhakyo, n’ekyo nahera ngakulhakyo, ekyo, ky’ekihugho kyosi. Nikwa iwe ukayisondera emyatsi minene-minene kwehi. Susondayeyo.” (Yer. 45:4, 5) Baruku mwaligha erihabulhwa eryo. Ni ky’amenge erighendera okwa binywe ebi thunalindirire erihwaho ly’ekihugho kibi kino!

12. Kanganaya ekyangaleka ithuthabya bathaleghulha oku Nyamuhanga ithunakwamirire esyongumbu syethu.

12 Mughalha wethu Daniel, owe Mexico, mwayithagha erithwamu ng’atholere eribya muthaleghulha oku Nyamuhanga kutse erikwamirira esyongumbu siwe. Mwanza erithahya omusika oyuthe Mwema wa Yehova. Daniel athi: “Munabya ingane mumuhandikira nibya ingabiritsuka n’obutemburi. Aliwe munayikehya neryo namabwira omusyakulhu ekitsibu ekyo ngalimu. Mwanyikangania ngoku eribya muthaleghulha oku Yehova ngatholere ingaleka eribya ingahandikira omusika oyo. Enyuma w’erisaba n’eririra kutsibu, munakolha kw’anabugha. Habere hathe halhaba buthuku, etseme yaghe omw’ithulira muyongera.” Enyuma w’aho Daniel mwathahya mwali wethu Omukristayo ow’emibere mibuya, kandi lino ni mulebererya w’omuthimbo.

ERIBYA BATHALEGHULHA OKU NYAMUHANGA LIKALEKA ITHWABYA N’OLHUKERI

Wamaminya ngoku mulikyethu abirikolha ekibi ekikalire, wunemwendi muwathikya eribana obuwathikya bw’obunyakirimu? (Lebaya enungu 14)

13. Natana mwakangania athi obuthaleghulha oku Nyamuhanga n’oku Dawudi omughulhu Dawudi asobaya?

13 Okwa bundi buthuku eribya bathaleghulha oku Yehova kyangana hamba okwa buthaleghulha obwa thwanga thungira abandu. Omuminyereri Natana mwabya iniane muthaleghulha oku Dawudi kandi iniane muthaleghulha oku Nyamuhanga. Natana mwaminya ngoku Dawudi abirisingira n’er’ithisya mwira w’omukali omwa lhuhi. Yehova abere akathuma Natana eriyatsumanga Dawudi, omwa buthubaha omuminyereri oyu mwakikolha nomwakine indi abya iniane muthaleghulha oku Dawudi. Natana mwakunga Dawudi omwa menge n’omwa lhukeri. Eriwathikya Dawudi alhangire kw’abirihalya kutsibu, Natana mwakolesya eky’erileberyako ky’omugaga oyuwakera akabuli k’omunakwa. Dawudi abere akangya erihithana liwe okwa ky’omulhume akolha, Natana mwamubwira athi: “Omulhume oyo n’iwe!” Dawudi mwakenga!2 Sam. 12:1-7, 13.

14. Wangabya wuthi muthaleghulha oku Yehova n’okwa banywani bawu kutse ab’okw’iwe?

14 Omubere w’olhukeri angana kuwathikya hamabya bingyi ebikakuyithaghako obuthaleghulha. Ng’eky’erileberyako, wanganabya iwunasi ndeke-ndeke ngoku omw’ikirirya mulikyethu  abirikolha ekibi ekikalire. Iwayowa isiwanga thulhagho kutsibu-tsibu amabya muhughu kutse munywani wawu. Aliwe iwunasi ngoku wamahuna, iwukendibya iwamaleghulha oku Nyamuhanga. Ahathe n’eribulya, obuthaleghulha oku Yehova bwa wutholere iwahira embere. Neryo nga Natana, wubye n’olhukeri aliwe iwunasikire. Bwira omunywani kutse omuhughu ayasabe abasyakulhu b’obuwathikya. Obuthuku obutholere bwamalhaba isyathakolha ekyo, obuthaleghulha oku Nyamuhanga ibukendi leka iwe iwayabwira abasyakulhu. Wamakolha wuthya iwamabya muthaleghulha oku Nyamuhanga n’erikangania omunywani kutse omuhughu y’olhukeri, kundi abasyakulhu bakalengaho erihengulha omundu ng’oyo omwa bwolho.Soma Abalawi 5:1; Abanya Galatia 6:1.

ERIBYA BATHALEGHULHA OKU NYAMUHANGA KIKAYITHAGHA OBUTHUBAHA

15, 16. Busana naki Husai ayithagha obuthubaha erithoka erikangania obuthaleghulha oku Nyamuhanga?

15 Husai mwayithagha obuthubaha erithoka eribya muthaleghulha oku Nyamuhanga. Husai abya munywani muthaleghulha w’Omwami Dawudi. Aliwe, obuthaleghulha bwiwe oku Dawudi mubwalengwako omughulhu mughalha wa Dawudi, Abusaloma iba emithima y’abandu bangyi n’eryanza eriyihambira e Yerusalemu n’ekithumbi ky’obwami. (2 Sam. 15:13; 16:15) Dawudi mwathibitha, amalhua omwa muyi, aliwe Husai angakolireki? Mbwino angasubire okwa lhuhandi lhwa Abusaloma kutse angalholire embere iniane muthaleghulha oko mwami omusyakulhu oyuwabya iniabirithibitha? Husai mwathwamu eribya muthaleghulha oku Dawudi, bam’eghania okwa Kithwa ky’Emizeituni.2 Sam. 15:30, 32.

16 Dawudi mwabwira Husai athi asube e Yerusalemu, n’eriyabya nga ni munywani wa Abusaloma, nuku angaya buzya-buzya erihana lya Ahitofeli. Husai mwatsama engebe yiwe, amakangania obuthaleghulha oku Yehova n’erikolha ekya Dawudi amusaba. Ngoku Dawudi anabya iniabirikihira omwa musabe, erihano lya Husai omuthubaha mulyaleka ebya Ahitofeli ibithakolha.2 Sam. 15:31; 17:14.

17. Busana naki thukayithagha obuthubaha eribya bathaleghulha?

17 Thukayithagha obuthubaha erithoka eribya bathaleghulha oku Yehova. Abangyi omw’ithwe babirikangania obuthubaha omw’irwanisya akahathikano k’abahughu, ab’okwa mibiiri, kutse ab’obuthoki erithoka erikangania obuthaleghulha oku Nyamuhanga. Ng’eky’erileberyako, eritsuka omwa bwana, Taro owe Japan, inianzire eribya akowa ababuthi biwe. Ekyo iniakakikolha ahathe erikakwa. Aby’anzire ababuthi biwe batseme. Neryo omughulhu bamuhakanisaya busana n’eribya akabya n’Abema ba Yehova, mukyamukalira kutsibu eribabwira ngoku iyo abirithwamu eribya akaghenda okwa mihindano y’Abema ba Yehova. Taro athi: “Mubahithana kutsibu indi muhalhaba myaka mingyi ibabiribugha bathi ambi isinabahikerera okwa buthalha. Munasaba obuthubaha bw’erighendera okw’ithwamu lyaghe. Lino babiryolhoba, hathya ngababungira kutsibu.”Soma Emisyo 29:25.

18. Wamaghasirwa wuthi omwa mwatsi ono?

18 Nga Dawudi, Yonatana, Natana, na Husai, ambi ithwayibanira ebibuya ebikalhua omw’ibya bathaleghulha oku Yehova. Aliwe kandi thw’ighire okwa kya leka Abeneri na Abusaloma ibalemwa erikangania obuthaleghulha. Ahathe erithika-thika thwanzire ithwamakirira Yehova, nga Dawudi. Ithwe ng’abandu abathahikene sithwangabya thuthe thasobya. Aliwe, thwangana kangania ngoku obuthaleghulha bwethu oku Yehova kya kindu ekiri embere omwa mithima yethu.

^ [1] (enungu 7) Awandi mena abirihindulhwa.