Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Akaleberyo—ey’Erigha  |  Okwakasathu 2018

Omwa Bakristayo​​—⁠Ni Kilhaghiro Eribatizibwa

Omwa Bakristayo​​—⁠Ni Kilhaghiro Eribatizibwa

“Omwatsi oyu ni kisosekanio ky’olhubatizo busana n’erilhama lyenyu.”—1 PETERO 3:21.

ESYONYIMBO: 52, 41

1, 2. (a) Abandi babuthi bakayowa bathi abaana babu bakanza eribatizibwa? (b) Busana naki abakanza eribatizibwa bakabulibawa nga babiriyihayo oku Yehova? (Lebaya ekisasani ekiri okw’itsuka.)

ABABUTHI ba Maria mubathungerera omwana wabu akahangana n’abandi abanzire eribatizibwa. Embuyi muyabulya ebibulyo bibiri. Maria mwasubirya omwa mulenge muuli. Enyuma waho, mwabatizibwa.

2 Ababuthi ba Maria mubatsema omwana wabu eribya iniabiriyihayo oku Yehova kandi amabatizibwa. Aliwe ekyo kithe kyabya, mama wa Maria mwanahangya-hangya. Iniakayibulhaya: ‘Mbwino Maria akine mulere okw’ibatizibwa? Anasi ngoku eriyihayo oku Yehova si mwatsi wa masatha? Mbwino athasyakulha okw’aho imwabatizibwa?’ Ababuthi bangyi bakayibulhaya ebibulyo ng’ebyo omwana wabu akabugha athi anzire eribatizibwa. (Omugambuli 5:5) Nibya, erithwamu likulhu erya omundu angathwamu ly’eriyihayo oku Yehova  n’eribatizibwa.—Lebaya akasanduko “ Wabiriyihayo oku Yehova?

3, 4. (a) Omukwenda Petero mwathukangirirya athi ngoku olhubatizo ni lhw’omughaso munene? (b) Busana naki Petero mwasosekania olhubatizo nga Noa erihimba obwathu?

3 Omukwenda Petero mwalinganisya eribatizibwa n’erihimba obwathu bwa Noa. Mwabugha athi: “Omwatsi oyo, ni kisosekanio ky’olhubatizo busana n’erilhama lyenyu.” (Soma 1 Petero 3:20, 21.) Obwathu mubwakangania ndeke-ndeke abandi ngoku Noa abya anzire erikolha erisonda lya Nyamuhanga n’omuthima wiwe wosi. Noa mwakolha buthaleghulha omubiiri owa Yehova amuha. Busana n’erikirirya lya Noa, Yehova mwamulhamya n’ab’eka yiwe okw’Ighunga ly’Amaghetse. Ni kyahi ekya Petero anza erithweghesya?

4 Abandu ibakabya bakalhangira obwathu, ibakaminya ngoku Noa abya awithe erikirirya omu Nyamuhanga. Abandu bakabya bakalhangira omundu akabatizibwa, bakaminya ngoku abiriyihayo oku Nyamuhanga busana n’erikirirya eryo awithe omu Kristo oyuwalhubukibawa. Nabu nga Noa, abakabatizibawa bakowa Nyamuhanga n’erikolha omubiiri owa Nyamuhanga abiribaha. Kandi ngoku Yehova analhamaya Noa okw’Ighunga ly’Amaghetse, akendi lhamya abaghombe biwe abathaleghulha ababatizibirwe akathoghothya ekihugho kibi kino. (Mariko 13:10; Eribisulirwa 7:9, 10) Ahathe erithika-thika, ni kikulhu eriyihayo oku Yehova n’eribatizibwa. Omo kwenene, omundu amalindirirya eribatizibwa, anganaherya akaghisa k’engebe y’erikotha.

5. Omwa mwatsi ono thukendi kania okuki?

5 Neryo kundi thwamabiriminya ngoku  olhubatizo si mwatsi w’amasatha, thutholere ithwabana eby’erisubirya okwa bibulyo bisathu bino: E Biblia yikabugha yithiki okwa lhubatizo? Ni kyahi ekya mundu atholere iniatsuka erikolha athali abatizibwa? Busana naki thutholere ithwabya ithun’ibukire ngoku olhubatizo ni kindu kikulhu thukakangirirya abaana bethu kutse omwigha we Biblia?

EKYA BIBLIA YIKABUGHA OKWA LHUBATIZO

6, 7. (a) Olhubatizo lhwa Yoane lhwamanyisayaki? (b) Ni lhubatizo lhwandi olhwabya mbaghane okwa lhw’abandi abosi, kandi busana naki?

6 Omwa Biblia, omundu w’erimbere eribatizya abandi ni Yoane Mubatizya. (Matayo 3:1-6) Ni kyahi ekyaleka abandu ibasa ey’ali bathi ababatizaye? Bakolha ekyo erikangania ku babiriyisubamu, ni bugha ambu, mubaligha ngoku babya ibabirithwa Emighambo ya Musa neryo mubayikubya bwomo. Aliwe eribatizya likulhu kutsibu erya Yoane akolha lyabya likamanyisya ekindi kindu ky’embaghane. Yoane mwathunga ekitsumbi kinene ky’eribatizya Yesu, Omughalha oyuhikene wa Nyamuhanga. (Matayo 3:13-17) Yesu abya isyali athakolha ekibi. Syabya akayithagha eriyisubamu. (1 Petero 2:22) Neryo busana naki Yesu mwabatizibwa? Erikangania ngoku anayitheghekire erikolha erisonda lya Nyamuhanga omwa ngebe yiwe.—Abaebrania 10:7.

7 Yesu abere abiritsuka erithulira, abigha biwe mubatsuka eribatizya abandi. (Yoane 3:22; 4:1, 2) Abandu abo nabu mubabatizibwa kundi babya ibabiriyisubamu busana n’erithwa Emighambo ya Musa. Aliwe Yesu abere abiriholha n’erilhubuka, ababya bakanza eribya bigha biwe babya batholere ibabatizibwa busana n’eyindi nzumwa.

8. (a) Yesu abere abirilhubuka, ni kihano kyahi ekyo aha? (b) Busana naki Abakristayo batholere ibabatizibwa?

8 Omo mwaka wa 33, Yesu imwanamalhubuka, mwakania n’abandu abalhabire omu 500, abalhume, abakali, obundi n’abaana. Obu bwangabya ibw’obuthuku abugha athi: “Neryo mughende, muyire abigha oko bihanda byosi; mubatizayebo omwa lina ly’Ise, n’ery’Omughalha, n’ery’omulimu abuyirire. Mukangirirayebo bakole ebyosi ebyo nabiribahana.” (Matayo 28:19, 20; 1  Abanya Korinto 15:6) Yesu mwahana abakamukwama athi bayire abigha. Owosi-wosi oyukanza eribya mwigha wiwe, kutse eriheka “engomo” yiwe, atholere iniabatizibwa. (Matayo 11:29, 30) Erikolera Nyamuhanga omwa nzira eyikamutsemesaya, omundu atholere inialigha ngoku Nyamuhanga akakolesaya Yesu eriberererya erisonda Liwe. Neryo, omundu oyo iniangana batizibwa inianalighirwe na Nyamuhanga. E Biblia yikathubwira bingyi ebikakanganaya ngoku abigha ba Yesu abakera mubaminya ngoku olhubatizo ni kindu kikulhu. Mubathalengekania bathi batholere ibalinda neryo ibasyabatizibwa ihamabirilhaba buthuku.—Emibiri 2:41; 9:18; 16:14, 15, 32, 33.

ISIWALINDIRIRAYA ERIBATIZIBWA

9, 10. Eribatizibwa ly’omulhume owe Etiopia n’erya Saulo lyanga thweghesyaki?

9 Soma Emibiri 8:35, 36. Omulhume owe Etiopia oyuwabya iniabiriligha erikirirya ly’Abayuda abya iniakaghenda ewiwe akalhua okw’iramya okwa hekalu e Yerusalemu. Omulaika wa Yehova mwathuma Filipo eriyamuthulira, neryo Filipo mwamukangirirya “engulhu yuwene ya Yesu.” Omulhume owe Etiopia mwakolhaki?  Mwalhangira ngoku ni kikulhu eriligha Yesu ng’Omukama, kandi mwanza erikolha ebya Yehova akayithagha okwa Bakristayo. Neryo aho n’aho mwabatizibwa.

10 Ekindi ky’erileberyako y’omulhume Omuyuda iya Saulo. Ekihanda kyosi ky’Abayuda kyabya ikyabirihebwayo oku Nyamuhanga, aliwe Yehova mwaghana Abayuda kundi mubathamwowa. Saulo abya ikirirye athi Abayuda bakinakolera Nyamuhanga omwa nzira eyihikire, neryo mw’endererya Abakristayo. Aliwe kiro kighuma, Yesu iyuwene-wene, oyo Saulo abya akalengekania athi akinaholire, kwesi iniabirilhubuka, kandi iniane elhubulha, mwakania na Saulo. Saulo mwakolhaki? Mwaligha obuwathikya erilhua oko mwigha iya Anania. E Biblia yikabugha yithi: “Neryo mwahangana mwabatizibwa.” (Emibiri 9:17, 18; Abanya Galatia 1:14) Enyuma waho mwaminywa ng’omukwenda Paulo. Wanamalhangira ngoku abere akanaminya ngoku Nyamuhanga akakolesaya Yesu eriberererya erisonda Liwe, Saulo mwabatizibwa aho n’aho.—Soma Emibiri 22:12-16.

Abigha be Biblia bakasima eriminya ekwenene n’erianza eribatizibwa

11. (a) Munabwire, ni kyahi ekikaleka abigha be Biblia ibathwamu eribatizibwa? (b) Thukayowa thuthi omundu akabatizibwa?

11 Namunabwire, kwa bine bithya, okwa bigha bangyi be Biblia abalere n’abakulhu. Kundi banzire kandi bakayikethera ebya Biblia yikabugha, bakanza eriyihayo oku Yehova n’eribatizibwa. Omo kwenene, omukania w’olhubatizo kikabya kitsweka ky’embaghane okwa mihindano emike-mike n’eminene-minene. Abema ba Yehova bakatsema abigha be Biblia bakaligha ekwenene n’erithwamu eribatizibwa. N’ababuthi bakatsema abaana babu bakakolha ekiri ng’ekyo. Omo mwaka w’omubiiri owa 2017, abahyaka abalhabire omu 284,000 mubabatizibirwe erikangania ngoku babirihayo esyongebe syabu oku Yehova. (Emibiri 13:48) Ahathe erithika-thika, mubaminya ngoku kikayithaghisibawa omwa Bakristayo eribatizibwa. Aliwe ni kyahi ekya babya bakolire bathe babatizibwa?

12. Abigha be Biblia batholere ibatsuka erikolhaki bathe babatizibwa?

12 Abigha be Biblia bakabya bathe babatizibwa, batholere ibigha ekwenene eyihambire oku Nyamuhanga, ekighendererwa kiwe busana n’abandu n’ekihugho, n’eky’akolha busana n’erilhamya abandu. (1 Timoteo 2:3-6) Neryo batholere ibakulha-kulhania erikirirya, erikendi bawathikya erikenga ebihano bya Nyamuhanga n’erileka erikolha eby’aponire. (Emibiri 3:19) Eki ni kikulhu, kundi Yehova syanga ligha eriyihayo ly’omundu oyukabera erikolha eby’aponire. (1 Abanya Korinto 6:9, 10) Aliwe hakine n’ebindi. Abanzire eriyihayo oku Yehova batholere mughulhu wosi ibahindana n’erithulira engulhu yuwene n’erikangirirya abandi. Eki kikayithaghisibawa oko wosi-wosi oyukanza erikwama Kristo. (Emibiri 1:8) Omwigha atholere iniatsuka erikolha ebyosi ebi. Neryo iniangana yihayo oku Yehova omwa musabe wiwe iniane iyuwene neryo iniabatizibwa.

 KOLHA ERIBATIZIBWA MWA KILHUBIRIRWA KYA BIGHA

Wukabya wukakangirirya abandi, wukana sondekanaya akaghisa k’eribawathikya eriyitheghererya ngoku olhubatizo ni kikulhu? (Lebaya enungu 13)

13. Thukakangirirya abandi, busana naki thutholere ithwabya ithun’ibukire ngoku batholere ibabatizibwa eribya Bakristayo ab’okwenene?

13 Thukabya thukawathikya abaana bethu kutse abandi bigha be Biblia erikolha ebikayithaghisibawa ebi, thutholere ithwibuka ngoku abakwamire Yesu omo kwenene batholere ibabatizibwa. Neryo okwa ndambi eyitholere isithwendi sagha eribabwira ngoku eriyihayo n’eribatizibwa ni kindu kikulhu. Thwanzire abaana bethu n’abandi bigha be Biblia eribya ibane mukulha-kulhana n’eribatizibwa!

14. Busana naki sithutholere thukahathikana omundu eribatizibwa?

14 Aliwe, omundu wosi-wosi syatholere akahathikana, kutse erikaka omwana kutse omwigha we Biblia eribatizibwa. Yehova syali thukaka erimukolera. (1 Yoane 4:8) Thukakangirirya abandi, thutholere ithwabawathikya eriyitheghererya ngoku ni kikulhu erikulha-kulhania obughuma bwabu na Yehova. Neryo, omwigha we Biblia amasima ekwenene eyihambire oku Nyamuhanga kandi akanza erikolha ebyosi ebya Bakristayo batholere ibakolha, iniakendianza eribatizibwa.—2 Abanya Korinto 5:14, 15.

15, 16. (a) Mbwino omundu atholere iniatsuka erihikya myaka mirebe imwa batizibwa? Soborera. (b) Busana naki omwigha we Biblia atholere iniabatizibwa ng’Omwema wa Yehova nomwangabya iniabiribatizibwa omwa yindi dini?

15 Sihali emyaka mirebe y’eribatizibirwako. Sithusosene, abandi bigha be Biblia bakanakulha-kulhana lhuba kwilhaba abandi. Abangyi bakabatizibawa ibakine balere kandi ibakulha inina batheleghulha oku Yehova. N’abandi bakaminya ekwenene ye  Biblia ibanakulire neryo ibabatizibwa. Abandi bakabya ibawithe emyaka eyilhabire omu 100!

16 Omukali mughuma oyuwigha e Biblia abya iniabiribatizibwa omwa madini malebe. Ky’ekyaleka iniabulya omukangirirya wiwe we Biblia nayu ng’anganathasyabatizibwa. Omukangirirya wiwe mwamukangania amasako we Biblia awasubiraya ekibulyo kiwe. Omukali oyu abere abiriyitheghererya ekya Biblia yikabugha, mwabatizibwa, nomwakine indi abya iniakayahikaya emyaka nga 80. Thuk’ighaki okwa ky’erileberyako eki? Yehova iniakendi ligha eribatizibwa lyethu ithunalyaminya ekwenene eyihambire okw’isonda liwe. Neryo nomuthwangabya imuthwabatizibwa omwa yindi dini, thutholere ithwabatizibwa ng’Abema ba Yehova.—Soma Emibiri 19:3-5.

17. Ni kyahi ekya mundu atholere inialengekaniako ekiro ky’eribatizibwa liwe?

17 Ekiro omundu akabatizibawa kikabya kiro ky’obutseme. Kandi ni buthuku bw’erilengekania kutsibu eriyihayo n’eribatizibwa nga kikamanyisayaki. Si mubiiri mwolho erikolha ebyosi ebikayithaghisibawa oko Mukristayo w’okwenene. Abigha ba Yesu sibatholere bakabyaho “busana nabo ibobene, nikwa babyeho busana n’oyo waholerabo, kandi mwalhubukibwa busana nabu.”—2 Abanya Korinto 5:15; Matayo 16:24.

18. Ni bibulyo byahi ebya thukendi kaniako omwa mwatsi ow’akakwamako?

18 Ngoku thwanamabirilhangira omo mwatsi ono, erithwamu eribya Mukristayo w’okwenene si mwatsi wa masatha. Ky’ekyaleka mama wa Maria iniayibulya ebibulyo ebiri okw’itsuka ly’omwatsi ono. Wamabya iwuli mubuthi, iwangana yibulya: ‘Omwana waghe anamabiritholera eribatizibwa? Omwana waghe anasi ebikaghunza ebihambire oku Yehova eribya inianganayihayo okw’iyo? Mbwino omwana waghe atholere iniatsuka erisoma ndeke n’eribana omubiiri owuwene imwa batizibwa? Ibbwa omwana waghe amakolha erilholho erikalire abiribatizibwa?’ Ebibulyo ebi thukendi syabikaniako omwa mwatsi owakakwamako kandi thukendi syalebya ngoku ababuthi Abakristayo bangabya n’amalengekania awatholere okwa lhubatizo.