“Na lino, wukalinda busana naki kwehi? Hangana, wubatizibawe.”—EMIBIRI 22:16.

ESYONYIMBO: 51, 135

1. Ni kyahi ekya babuthi Abakristayo bakanza erikakasya abaana babu bathali babatizibwa?

“MUHALHABA amezi ingane mubwira mama na thatha indi nganza eribatizibwa, nabu ibakabya ibanemunyikanirya kukyo. Banza ngalhangire ngoku erithwamu lyaghe si kindu ky’amasatha. Biro 31 Okwerikuminibiri, 1934, ekiro mukyahika ekya ngathe nang’ibirirwa omwa ngebe yaghe.” Blossom Brandt kw’abya akanirye athya okwa kiro athwamu eribatizibwa. Namunabwire, ababuthi banzire eriwathikya abaana babu erithwamu ndeke. Omwana amalinda isihali nzumwa eyikaleka, ikyangana tsandya obughuma bwiwe na Yehova. (Yakobo 4:17) Omwana athali abatizibwa, ababuthi b’amenge bakanza ibaminya omwana wabu ng’anayitheghekire eribya mwigha wa Kristo.

2. (a) Ni kitsibu kyahi eky’abandi balebererya b’omuthimbo babirilhangira? (b) Thukendi kania okuki omo mwatsi ono?

 2 Abandi balebererya b’omuthimbo babirilhangira ngoku abalere bangyi abakine balengwa n’abali omwa myaka 20 sibabatizibirwe, nomwakine indi bakulire omwa kwenene. Mughulhu mungyi, abalere aba bakaghenda okwa mihindano, ibaghenda omw’ithulira, n’eriyilhangira mwa Bema ba Yehova. Aliwe, busana n’esyonzumwa ndebe sibayihereyo oku Yehova n’eribatizibwa. Obundi ababuthi bakalengekanaya bathi abaana babu sibali batholera eribatizibwa. Omo mwatsi ono, thukendi kania okwa bindu bbini ebikaleka ababuthi ibathahira omwa baana babu mw’omuhwa w’eribatizibwa.

OMWANA WAGHE ANAMABIRIKULHA NDEKE?

3. Ni yilhalikirira lyahi erya ababuthi ba Blossom babya bawithe?

3 Ababuthi ba Blossom, abakanibweko omwa nungu y’erimbere, babya bakayilhalikirira ng’anamabirikulha okwa lhulengo lhw’eriyitheghererya eribatizibwa nga likamanyisayaki kandi ngoku ni rikulhu. Ababuthi bangaminya bathi omwana wabu ng’anamabiritholera eriyihayo oku Yehova?

4. Ekilhaghiro kya Yesu ekiri omu Matayo 28:19, 20 kyangawathikya kithi ababuthi munabwire?

4 Soma Matayo 28:19, 20. E Biblia siyiribugha yithi omundu atholere iniabatizibwa abirihikya emyaka mirebe. Aliwe ni kibuya ababuthi erilengekania kutsibu nga kikamanyisayaki eriyira abigha. Omwa Kigiriki, ekinywe “muyire abigha” ekiri omu Matayo 28:19 kikamanyisaya erikangirirya omundu iwune n’ekilhubirirwa ky’erimuwathikya eribya muthendekwa kutse mwigha. Omwigha y’omundu oyuk’igha n’eriyitheghererya ebya Yesu akangiriraya n’eryanza erimwowa. Neryo erilhua omwa bumekeke, ababuthi batholere ibakangirirya abaana babu ibane n’ekilhubirirwa ky’eribawathikya eriyihayo oku Yehova n’eribya bigha ba Kristo. Ni kwenene, esyomekeke sisyanga tholera eribatizibwa. Aliriryo, e Biblia yikakanganaya ngoku n’abaana balere bangana yitheghererya n’eryanza ekwenene ye Biblia.

5, 6. (a) Ebya Biblia yikabugha oku Timoteo bikaleka ithwaghunzerera thuthiki okw’ibatizibwa liwe? (b) Ni nzira yahi eyuwene eya babuthi b’amenge banga wathikiryamu abaana babu?

5 Timoteo abya mwigha oyuwathwamu erikolera Yehova iniakine mulere. Omukwenda Paulo mwabugha athi Timoteo atsuka erigha ekwenene y’Ekinywe kya Nyamuhanga “eritsuka omo bwana.” Thatha wa Timoteo syabya akakolera Yehova, aliwe mama wiwe na mukaka wiwe mubamuwathikya eryanza Ekinywe kya Nyamuhanga. Ekyalhwiririramu, mwabya n’erikirirya erighumire. (2 Timoteo 1:5; 3:14, 15) Angabya iniabya iniakayahikaya myaka 20 kutse imwamatsuka eya 20, akatholera erihebwa esyonzunzo sy’embaghane omwa kithunga.—Emibiri 16:1-3.

6 Abaana sibasosene. Abosi sibalikanganaya erikulha oko myaka mighumerera. Abandi baana bakayitheghereraya ekwenene, ibathwamu ndeke, n’eryanza eribatizibwa ibakine balere. N’abandi banganatsuka erikulha ndeke imubabatizibwa. Ababuthi ab’amenge sibalihathikana abaana babu eribatizibwa. Omwakanya k’ekyo, bakawathikaya obuli mwana erikulha-kulhana iniana yithondwerye. Ababuthi bakatsema omwana wabu akakolesya ebiri omwa Emisyo  27:11. (Soma.) Aliwe batholere ibabya iban’ibukire ngoku ekilhubirirwa kyabu ly’eriwathikya abaana babu eribya bigha. Ban’ibukire ekyo, batholere ibayibulya, ‘Omwana waghe anasi ebikaghunza, eribya iniangana yihayo oku Nyamuhanga n’eribatizibwa?’

OMWANA WAGHE ANASI EBIKAGHUNZA?

7. Mbwino omundu atholere iniatsuka eriminya ebyosi ebya Biblia yikakangiriraya imwabatizibwa? Soborera.

Obuli mwigha wa Kristo atholere inialholha embere erigha nibya n’enyuma w’eribatizibwa

7 Ababuthi bakabya bakakangirirya abaana babu, bakabawathikaya eriminya ndeke ekwenene. Amenge aya iniakendi leka abaana ibayihayo oku Nyamuhanga. Aliwe ekyo sikirimanyisaya indi omwana atholere iniatsuka eriminya obuli kandu omwa ebya Biblia yikakangiriraya imwabatizibwa. Obuli mwigha wa Kristo atholere inialholha embere erigha nibya iniabiribatizibwa. (Soma Abanya Kolosai 1:9, 10.) Neryo kwesi omundu atholere iniatsuka eriminya bingahi imwabatizibwa?

8, 9. Ni kyahi ekyahika okwa mutheya w’engomo e Filipi, kandi kikathweghesayaki?

8 Ebyabya okw’eka nguma kera byangana wathikya ababuthi munabwire. (Emibiri 16:25-33) Omo mwaka wa 50, Paulo mwaghenda omwa tawuni ye Filipi okwa lhubungo lhwiwe lhwakabiri lhw’obumisyonare. Eyo, Paulo na Sila mubahangirirwa, bamahambwa, n’erihirwa omwa muliki. Omwa kiro, muhalhaba omusiki munene ow’akyungulha esyonyuyi syosi sy’engomo. Omutheya w’engomo mwalengekania athi abanya-ngomo abosi babiritswa, neryo mwanza eriyitha. Aliwe Paulo mwamuthanga. Neryo Paulo na Sila mubakangirirya omutheya w’engomo n’eka yiwe ekwenene eyihambire oku Yesu. Mub’ikirirya ebya b’igha oku Yesu n’eriminya ngoku ni kikulhu erimwowa. Neryo aho n’aho mubabatizibwa. Eki kyanga thweghesyaki?

9 Omutheya w’engomo angabya iniabya musirikali Omuroma oyuwabirilhuhukibwa okwa mubiiri. Abya isyasi Ekinywe kya Nyamuhanga. Neryo eribya Mukristayo, abya atholere erigha ekwenene ye Biblia ey’omusingyi, iniaminya ebya Yehova akayithagha okwa baghombe biwe, n’eryanza erighendera okw’ikangirirya lya Yesu. Eby’igha omwa buthuku buke obo mubyaleka inianza eribatizibwa. Atholere iniabya imwalholha embere erigha ebingyi enyuma w’eribatizibwa. Neryo wangakolhaki omwana wawu amakubwira athi anzire eribatizibwa kundi anzire Yehova kandi anzire erimwowa? Iwangana leka iniakania n’abasyakulhu nuku bathwemu ng’anatholere eribatizibwa. * (Lebaya omwatsi ahikwa.) Ng’abandi Bakristayo ababatizibirwe, nayu iniakendi lholha embere erigha bingyi oku Yehova omwa ngebe yiwe yosi, nibya erihika kera na kera.—Abanya Roma 11:33, 34.

 OMWANA WAGHE ATHOLERE INIASOMA ESUKURU NYINGAHI?

10, 11. (a) Abandi babuthi bawithe malengekaniaki? (b) Ni kyahi ekyangatheya ndeke omwana?

10 Abandi babuthi bakalengekanaya bathi ikikendibya kibuya omwana wabu amabatizibwa iniamabirisoma ndeke n’eribana omubiiri owuwene. Ababuthi aba banganabya ibanawithe ebilhubirirwa ebyuwene, aliwe batholere ibayibulya: ‘Ekyo kinemwendi wathikya omwana waghe eribana etseme y’okwenene? Kikana lighirana n’ebya thuk’igha omwa Biblia? Yehova anzire ithwakolesya thuthi engebe yethu?’—Soma Omugambuli 12:1.

11 Ni kikulhu eribya ithun’ibukire ngoku ekihugho kino n’ebyosi ebirimo bikahakanisaya amalengekania wa Yehova n’ebya anzire. (Yakobo 4:7, 8; 1 Yoane 2:15-17; 5:19) Obughuma bwethu bwa hakuhi na Yehova kya kindu ekyangatheya ndeke omwana oku Sitani, ekihugho kino, n’amalengekania mabi w’ekihugho. Ababuthi bamahira esukuru n’omubiiri owuwene by’embere omwa ngebe, omwana iniangana lengekania athi ebindu ebiri omwa kihugho bilengire obughuma bwa hakuhi na Yehova. Eki ni ky’akabi. Ng’omubuthi w’olhwanzo, wanzire ekihugho kino ikyakangirirya omwana wawu ebyo kikalengekanaya indi by’ebyanga mulethera etseme? Enzira nguma nyisa ey’eribya ndeke n’eribana etseme y’okwenene, ly’erihira Yehova y’embere omwa ngebe.—Soma Esyonyimbo 1:2, 3.

IBBWA OMWANA WAGHE AMAKOLHA EKIBI?

12. Busana naki abandi babuthi bakalengekanaya bathi ni kibuya omwana wabu eritsuka erilinda imwabatizibwa?

12 Mwali wethu mughuma mwasoborera ekyaleka iniathanza mwali wiwe akabatizibwa. Mwabugha athi, “Ngayikwira n’esisoni eribugha indi enzumwa ngulhu yabya iy’endegheka y’erihighitha.” Nga mwali wethu oyo, abandi babuthi bakanayowa omwana ng’atholere iniatsuka erikulha ndeke omo myaka imwabatizibwa nuku syase akakolha esobya y’obukiru. (Enzuko 8:21; Emisyo 22:15) Ababuthi abo bangana lengekania  bathi omwana wabu syangahighithwa, kundi syabatizibirwe. Aliwe amalengekania ng’aya awithe kitsibuki?—Yakobo 1:22.

13. Omundu amabya isyabatizibirwe, mbwino kikamanyisaya kithi syali kw’olhubanza embere sya Yehova? Soborera.

13 Ni kwenene, ababuthi sibanganza omwana wabu akabatizibwa isyali atholere eriyihayo oku Yehova. Aliwe ibakendibya isibathakangania amenge ibo erilengekania bathi omwana oyuthabatizibirwe syangabya na lhubanza embere sya Yehova. Omwana akabya w’erisyalhuthonda embere sya Nyamuhanga omughulhu akaminya ebya Yehova akabugha athi bihikire n’ebithahikire. (Soma Yakobo 4:17.) Ababuthi b’amenge sibalighanaya omwana wabu eribatizibwa. Omwana nomwangabya ini mulere, bakamweghesaya eryanza ebya Yehova akabugha athi bihikire n’eripona ebya akabugha athi sibihikire, ngoku nabu bakana kolha. (Luka 6:40) Olhwanzo olho mwana wawu awithire Yehova lhukendi mutheya okw’ikolha erilholho erikalire, kundi iniakendyanza erikolha ekya Yehova akabugha athi kya kihikire.—Isaya 35:8.

ABANDI BANGANA WATHIKYA

14. Abasyakulhu bangasighika bathi ebya babuthi bakakolha?

14 Abasyakulhu bangana sighika ebya babuthi banemukolha omw’ikania ndeke okw’ibya n’ebilhubirirwa omwa mubiiri wa Yehova. Mwali wethu mughuma mwibuka ngoku Mughalha wethu Russell mwakania nayu inianawithe emyaka mukagha. Mwabugha athi, “Mwaghunza dakika 15 inianemukania naghe okwa bilhubirirwa byaghe by’obunyakirimu.” Mumwalhwiririraki? Enyuma waho, mwali wethu oyo mwabya mutemburi, kandi mwaghunza emyaka eyilhabire omu 70 iniane mutemburi! Omo kwenene, ebinywe ebyuwene n’ebikahimba byangana hamba okwa ngebe y’omundu. (Emisyo 25:11) Kandi abasyakulhu bangana saba ababuthi n’abaana eriwathikya okwa mibiiri y’okwa Kisenge ky’Obwami. Ibanganaha abaana b’emibiiri  eyitholere emyaka yabu kandi eya bangana thoka.

15. Abandi omwa kithunga bangawathikya bathi abalere?

15 Abandi omwa kithunga bangawathikya bathi? Omw’itsomana abalere omwa nzira eyitholere. Ng’eky’erileberyako, wanganalebya ebikakanganaya ngoku abalere banemuyithunda hakuhi na Yehova. Mbwino omwana mwakasubiraya ndeke omwa mihindano, kutse alhue awithe ekitsweka omwa mihindano y’ahakathi-kathi k’eyenga? Mwakana thulira okwa sukuru, kutse mwakana kolha ekihikire akalengwako erikolha ekithahikire? Kyamabya iky’ekyo, isiwalindiriraya erimusima! Thwangana hira h’ekilhubirirwa ky’erikania n’abalere emihindano yithe yatsuka kandi yikahwa. Thwamakolha ekyo, abaana ibakendiyowa nabu ibali omwa “ndeko nene.”—Esyonyimbo 35:18.

WATHIKAYA OMWANA WAWU ERIKULHA-KULHANA ERIHIKA OKW’IBATIZIBWA

16, 17. (a) Busana naki ni kikulhu abaana eribatizibwa? (b) Ni tseme yahi eya babuthi Abakristayo bangabya nayu? (Lebaya ekisasani ekiri okw’itsuka.)

16 Ababuthi erikangirirya abaana eryanza Yehova ni kighuma ky’okwa syonzunzo ngulhu-ngulhu esya babuthi bawithe. (Esyonyimbo 127:3; Abanya Efeso 6:4) Omwa kihanda kye Israeli, abaana ibakabuthawa ibanahebirweyo oku Yehova. Aliwe kwa bithe bithya okwa baana bethu. Ababuthi erithabya ibanzire Yehova n’ekwenene, sikirimanyisaya kithi n’abaana babu bakendyanzayo. Eritsuka okw’ibuthwa ly’omwana, ababuthi batholere ibakolha mwa kilhubirirwa kyabu erimuwathikya eribya mwigha, eriyihayo oku Nyamuhanga n’eribatizibwa. Hane ekirengire ekyo? Omundu eriyihayo, eribatizibwa, n’eribya muthaleghulha oku Yehova ikikendisyaleka inialhama okwa bulighe bunene.—Matayo 24:13.

Ababuthi batholere ibabya n’ekilhubirirwa ky’eriwathikya omwana wabu eribya mwigha (Lebaya enungu 16, 17)

17 Blossom Brandt abere akanza eribatizibwa, ababuthi biwe mubanza erikakasya ng’anatholere. Babere baminya, mubasighika erithwamu liwe. Blossom akasoborera ekya thatha wiwe akolha omwa kiro athali abatizibwa: “Mwabugha athi ithwe bosi thukukame, neryo amasaba. Mwabwira Yehova ngoku atsemire mwali wiwe erithwamu eriyihayo okw’Iyo.” Enyuma w’emyaka eyilhabire omu 60, Blossom mwabugha athi: “Wanganalhangira ngoku, omo myaka yosi, singendisy’ibirirwa erithumbi eryo!” Ababuthi, nenyu mubye n’etseme n’eriyowa ndeke mukalhangira abaana benyu bakayihayo oku Yehova n’eribatizibwa.

^ enu. 9 Ababuthi bangana kanirania n’omwana wabu okwa mwatsi ow’angawathikya owali omwa Questions Young People Ask—Answers That Work, Volume 2, olhupapura 304-310. Kandi lebaya na “Akasanduko Ak’ebibulyo” omwa Omubiiri Wethu w’Obwami, Okwakani 2011, Olhupapura 2.