Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Ighira Okwa Mukangirirya Mukulhu

 ESURA 20

Wukananza Iwabya w’Erimbere Mughulhu Wosi?

Wukananza Iwabya w’Erimbere Mughulhu Wosi?

WUNASI omundu wosi-wosi oyukanza iniabya w’embere mughulhu wosi?— Angana sukuma owundi mundu nuku abye w’erimbere okwa mulhondo. Wune wathalhangira ekyo kikabya?— Omukangirirya Mukulhu mwalhangira n’abandu abakulire bakanza emyanya y’embere-mbere. Kandi mwathanza ekyo. Thulebaye ekyabya kyabere.

Wune wathalhangira abandu abakanza eribya b’erimbere?

E Biblia yikathubwira yithi mubakokya Yesu y’okw’irya inene eryabya omw’eka y’Omufarisayo, oyuwabya mukulhu w’edini. Yesu abere abirihikayo, mwatsuka erithungerera ngoku abagheni bakasa n’erisombolha emyanya eyuwene. Neryo mwabwira abakokibawa b’omwatsi mulebe. Wunanzire eriowa gho?—

 Yesu mwabugha: ‘Omughulhu omundu akakubirikira okw’irya ery’eriherukya, si wikale okwa kithumbi ky’erisikibwa.’ Wunasi ekyaleka Yesu iniabugha ekyo?— Mwasoborera athi owundi mundu mukulhu anganabya iniabirikokibwa. Neryo, ngoku wamalhangira omwa kisasani kino, oyukakolha obugheni akasa n’eribugha athi: ‘Wusighire omundu oyu y’omwanya oyu, wughende wikale erya.’ Omugheni oyu iniakendi yowa athi?— Iniakendi hemuka kundi abandi bagheni abosi ibakendi muthungerera akasuba omw’omwanya ow’enyuma-nyuma.

Yesu abya akakangania ngoku si kyuwene erianza ebithumbi by’embere-mbere. Neryo mwabugha athi: ‘Omughulhu wukabirikirawa okw’irya ly’eriherukya, wughende wikale okwa kithumbi ky’enyuma-nyuma. Neryo oyukakukokaya anganasa iniakubwira athi, Munywani waghe, wase okwa kithumbi ekyuwene kwa hano. Neryo wasyasikibwa omw’ameso w’abagheni abosi omwa kithumbi ky’embere.’Luka 14:1, 7-11.

N’isomo lyahi erya Yesu akangiriraya omughulhu akanaya okw’abak’imaya ebithumbi ebyuwene, kutse eby’embere-mbere?

Wanamaminya enzumwa eyiri omw’omwatsi wa Yesu oyu?— Thuthaha eky’erileberyako erilebya nga wanamaminya enzumwa. Thalengekania ihali bandu bangyi abakanza eringira omwa bbasi. Iwune mwendi anguha nuku wubane ah’er’ikalha neryo omundu mukulhu anga ghenda inian’imene?— Ikine mwendi tsemesya Yesu wamakolha ekyo?—

Omundu angana bugha athi Yesu syali tsomana ebya thukakolha. Aliriryo nawu wun’ikirirye eki?— Omughulhu Yesu abya okw’irya inene omw’eka y’Omufarisayo, mwathungerera abandu bakasombolha ah’er’ikalha. Si wuli lengekanaya wuthi anganabya iniakinatsomene ebya thukakolha munabwire?— Neryo kundi lino Yesu ane elhubulha, ahathe erithika-thika ali omw’omwanya owuwene ow’erithuthungerera.

Kyangana letha ebitsibu omundu amalengesya eribya w’erimbere. Mughulhu mungyi hakabya obuhaka, neryo abandu ibahithana. Okwa bundi  buthuku eki kyanganabya omughulhu abaana bakaghenda omwa bbasi mwa haghuma. Bakabya bakana kyungulha bathya olhuyi, abaana bakanguha eribya b’erimbere. Bakanza ebithumbi ebyuwene, ebiri hakuhi n’amadirisa. Neryo ni kyahi ekyangabya busana n’eki?— Owundi inianganakwa okwa wundi kw’ekinigha.

Erianza eribya w’erimbere kyangana lhwiririra mw’ebitsibu bingyi. Nibya mukyaleka abigha ba Yesu ibakangalhukana. Ngoku thw’igha omwa Sura 6 ey’ekitabu kino, mubakuba obuhaka omukulhu omwakathi-kathi kabu nga nindi. Neryo ni kyahi ekya Yesu abyakolire?— Mwabahengulha. Aliriryo enyuma waho, mubakuba obuhaka kandi. Thulebaye ngoku bwatsuka.

Abakwenda, haghuma n’abandi, bane haghuma na Yesu bakaghenda omwa muyi we Yerusalemu omurundi w’erighunzerera. Yesu alhue iniane mubabwira omwatsi owahambire okw’Obwami bwiwe, neryo Yakobo na Yoane balhue ibane mulengekania okw’ithabalha  haghuma nayu ng’abami. Nibya babirinabwira mama wabu, Salome, okwa mwatsi oyu. (Matayo 27:56; Mariko 15:40) Neryo bakabya bane omwa nzira bakaghenda e Yerusalemu, Salome akasa eyiri Yesu, akakukama embere siwe, n’erimusaba ekya akayithagha.

Yesu akamubulhaya athi, “Ukasondaki kwehi?” Akasubiraya athi anzire Yesu inialighira abaghalha biwe er’ikalha hakuhi nayu omw’Obwami bwiwe, omughuma okwa lhuhandi lhwiwe lhw’amalya n’owundi okwa lhw’amalembe. Neryo ibbwa, abakwenda ikumi bakabya baminya ekya Yakobo na Yoane babiribwira mama wabu bathi asabe, wukalengekanaya kyamaleka ibayowa bathi?—

Salome akasaba Yesu yaki, n’ekikalhwiririramu niki?

Bakahithana kutsibu oku Yakobo na Yoane. Neryo Yesu akaha abakwenda biwe abosi b’erihano eryuwene. Yesu akababwira athi abathabali b’ekihugho banzire kutsibu eribya n’obuthoki bunene n’obukulhu. Bakanza  ibabya n’ekitsumbi ky’endatha ekyangaleka obuli mundu iniabaghondera. Aliriryo Yesu akabwira abakwenda biwe athi sibatholere bakabya bathya. Aliwe, athi: ‘Oyuwanzire eribya w’erimbere omwakathi-kathi kenyu asyabya mughombe wenyu.’ Thalengekania okw’ekyo!Matayo 20:20-28.

Wunasi omubiiri w’omughombe?— Akakolera abandi, butsira erianza abandi bamukolere. Akabya omw’omwanya ow’enyuma-nyuma, butsira ow’embere-mbere. Akakolha ng’omundu w’ahisi kutsibu, butsira ng’omundu w’endatha kutsibu. Kandi wibuke ngoku Yesu mwabugha athi oyuwanzire eribya w’erimbere atholere iniabya ng’omughombe kutse mukobe embere sy’abandi.

Neryo wukalengekanaya eki kikathweghesaya ki?— Mbwino omughombe angana kuba obuhaka na mukama wiwe nga nindi oyukend’ikalha okwa kithumbi ekyuwene? Kutse angana kuba nayu obuhaka oyukendi tsuka erirya nga nindi? Wukabugha wuthi ki?— Yesu mwasoborera athi omughombe akahira eriyisunza lya mukama wiwe ly’embere.Luka 17:7-10.

Busana n’ekyo, omwakanya k’eribya b’erimbere, ni kyahi ekya thutholere ithwa kolha?— Thutholere ithwabya ng’abaghombe embere sy’abandi. Kandi eki kikamanyisaya erihira ebiyithawa by’abandi by’embere. Kikamanyisaya erilhangira abandi mwa b’ekitsumbi okw’ithwe. Wangana lengekania nga ni nzira syahi esya thwanga kolesya erihira ebiyithawa by’abandi by’embere?— Busana naki iwuthasuba okwa lhupapura 40 n’olhwa 41 erithasyalebya esyonzira esya wanga kolesya erihira ebiyithawa by’abandi by’embere omw’ibakolera.

Wibuka ngoku Omukangirirya Mukulhu mwahira ebiyithawa by’abandi by’embere omw’ibakolera. Omw’igholho-gholho ery’erighunzerera iniane n’abakwenda biwe, nibya mwasunama neryo amanabya ebisandu byabu. Nethu thwamahira ebiyithawa by’abandi by’embere omw’ibakolera, ithukendi tsemesya Omukangirirya Mukulhu na Thatha wiwe, Yehova Nyamuhanga.

Thuthasyasoma eyindi milhondo eyiri omwa Biblia eyikathuhira mw’omuhwa ow’erihira ebiyithawa by’abandi by’embere: Luka 9:48; Abanya Roma 12:3; na Abanya Filipi 2:3, 4.