Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Ighira Okwa Mukangirirya Mukulhu

 ESURA 30

Ngoku Thwanga Rwanisya Eryubaha

Ngoku Thwanga Rwanisya Eryubaha

KIKANA kwolhobera erikolera Yehova?— Omukangirirya Mukulhu nayu mwathabugha athi kyangabere kyolho. Omw’ithumbi Yesu athe ithibwa, mwabwira abakwenda biwe athi: ‘Ekihugho kyamabakwa obusu muminya ko kyanyikwa obusu embere w’eribakwabo.’Yoane 15:18.

Petero mwayipanga athi syanga sighania Yesu, aliriryo Yesu mwabwira Petero athi anga muyighanire emirundi isathu omw’ithumbi eryo. Kandi ekyo kya Petero anabya akolire! (Matayo 26:31-35, 69-75) Ekindu ng’eki mukya thokekana kithi eribya?— Eki mukyabya kundi Petero mubaha, kuthya n’abandi bakwenda.

Wunasi ekyaleka abakwenda ibubaha?— Babya ibabirilemwa erikolha ekindu ky’omughaso munene. Erigha okwa kindu eki lyangana thuwathikya erikolera Yehova, abandi nomubanga thubwira bathiki kutse erithukolha kw’ekindu ekisosire kithi. Aliriryo eriminya omwatsi oyu wa ndeke, thutholere ithwatsuka eriminya ekyabyaho omw’ithumbi ly’erighunzerera Yesu iniane n’abakwenda biwe.

Erimbere, mubakolha omubalha ow’ekiro ky’Erikyuruka ibane haghuma. Eki kyabya kihulho eky’embaghane ekyabya kikabyaho obuli mwaka eryibuka ngoku abandu ba Nyamuhanga balhamibawa erilhua omwa bukobe mwe Misiri. Enyuma waho, Yesu mwatsukisya ekindi kihulho eky’embaghane iniane n’abakwenda biwe. Thukendi syakikaniako omwa sura eyikasa embere n’erisoborera ngoku ekihulho ekyo kikathuwathikaya eryibuka Yesu. Enyuma w’erirya ekihulho ekyo n’erihimba abakwenda biwe, Yesu mwabathwalha omw’irima lye Getesemane. Eki kyabya kitsweka ekyuwene ekya babya bakabera erighendamu.

 Bane omw’irima, Yesu mwabasigha akayasaba. Kandi mwabwira Petero, Yakobo, na Yoane athi basabe. Aliriryo mubayatho. Yesu mwabasighania mirundi isathu akayasaba, kandi emirundi isathu eyo akasubulha mweya Petero n’abandi ibanaghotsere! (Matayo 26:36-47) Wunasi ekyanga lekire ibabya ibanalholire n’erisaba?— Leka thukanaye okw’omwatsi oyu.

Busana naki Petero, Yakobo, na Yoane babya batholere ibabya ibanalholire?

Okwa ndambi ey’omubalha ow’Erikyuruka, Yuda Iskariota abya iniane na Yesu n’abandi bakwenda. Wibuke ngoku Yuda abya iniabiribya mwibi. Okwa ndambi eyo mwabya mughobya. Abya inianasi ekitsweka omw’irima lye Getesemane aho Yesu abya akabera eribya n’abakwenda biwe. Neryo Yuda mwaletha abasirikali erisyahamba Yesu. Babere babirihikaho, Yesu mwababulya: ‘Mukasondaya ndi kwehi?’

Abasirikali mubasubirya bathi: “Yesu.” Yesu mwathubaha, neryo mwasubirya athi: ‘N’ingye.’ Abasirikali mubasweka kutsibu bakalhangira obuthubaha bwa Yesu neryo kyamaleka ibasuba enyuma n’eriwa okwa kithaka. Neryo Yesu mwabugha athi: ‘Mwamabya in’ingye mukasondaya, muleke abakwenda baghe baghende.’Yoane 18:1-9.

Abasirikali babere babirihamba Yesu n’erimuboha, abakwenda mububaha n’erithibitha. Aliriryo Petero na Yoane mubanza eriminya ekikendibya nga ni kyahi, neryo mubabakwama enyuma. Erighunzerera, mubaletha Yesu y’ewa Kayafa, omuhereri mukulhu. Kundi omuhereri mukulhu abya asi Yoane, omutheya w’olhukyo mwamulighira haghuma na Petero eringira.

Abahereri mubabya ibabiriyisurokerya ewa Kayafa erikania okwa musango. Babya banzire Yesu in’ithibwa. Neryo mubaletha abema abakamukanaya kw’amabehi. Abandu mubamuswirya esyongumi n’amakofi. Ebyosi ebi bikabya, Petero abya iniane hakuhi.

Omwana-mutho omughombe, omutheya w’olhukyo oyuwalighira Petero na Yoane eringira, mwaminyerera Petero. Omwana-mutho oyo mwabugha athi: ‘Nawu wabya na Yesu!’ Aliriryo Petero mwayighana athi syasi Yesu. Habere hahwa akathambi owundi mwana-mutho mwaminyerera  Petero n’eribwira ababyaho athi: “Omundu oyu abya na Yesu.” Kandi Petero mwayighana athi syamwasi. Habere hakathasyahwa akandi kathambi abandu mubalhangira Petero n’eribugha bathi: ‘Kwenene nawu wuli mughuma w’okw’ibo.’ Omurundi owakasathu Petero mwayighana, athi: “Sinyasi omundu oyo!” Nibya Petero mwalhahirya athi akabugha ekwenene, neryo Yesu mwabinduka n’erimusamalira.Matayo 26:57-75; Luka 22:54-62; Yoane 18:15-27.

Busana naki Petero mubaha kutsibu erihika n’okwa kiika eky’eriyighana Yesu?

Wunasi ekyaleka Petero iniabiha?— Ee, kundi mubaha. Aliriryo ni kyahi ekyaleka inubaha? Ni kyahi ekya alemawa erikolha ekyanga muwathikirye eribya muthubaha? Thalengekania okwa kino. Ni kyahi ekya Yesu abya iniabirikolha nuku abye muthubaha?— Abya iniabirisaba Nyamuhanga, na Nyamuhanga mwamuwathikya eribya muthubaha. Kandi wibuke ngoku Yesu abya iniabiribwira Petero y’emirundi isathu athi asabe n’eribya inianalholire n’eritheya. Aliriryo ni kyahi ekyabya kyabere?—

Emirundi eyosi isathu eyi, Petero mwaghotsera. Mwathasaba, kandi mwathabya inianatheghirye. Neryo mwawibwako isya yitsulirye  bakahamba Yesu. Enyuma waho bane mukania okwa musango, Petero mubaha akalhangira Yesu akaswiribwa n’erihira h’emitheghekere ey’erimwitha. Aliriryo, esyosaha nge enyuma, Yesu abya iniabiribwira abakwenda biwe athi ni kyahi ekyanga bahikireko?— Yesu mwababwira athi ngoku ekihugho kimuponire, nabu kyanga baponire kithya.

Wanga yisanga wuthi omwa mibere eyiri ng’eya Petero?

Lino thulengekanaye okwa kindu ekyanga thuhikako ekiri ng’ekya hika oku Petero. Thuthabugha thuthi wuli omwa kitebe omuli abaana abakakanaya nabi okw’abandu abath’imba olhwimbo lhw’erihanga kutse abatha yisyandira e Krismasi. Neryo ibbwa wanga kolha ki  omundu amakubulya: “Ni kwenene simulyimba olhwimbo lhw’erihanga?” Kutse abandi ibabugha: “Thukowa ambu nibya simwasi e Krismasi!” Iwune mwendi ubaha eribabwira ekwenene?— Iwune mwendi lengesya eribiha, ngoku Petero akolha?—

Enyuma waho, Petero mwayikubya bwomo busana n’eriyighana Yesu. Abere abiriminya ekisobyo ekya akolire, mwahulhuka n’eriyalira. Inga, mwasuba oku Yesu. (Luka 22:32) Lino lengekanaya okwa kino. Ni kyahi ekyanga thuwathikya erithendi ubaha kutsibu nuku sithubughe nga Petero kwa bugha?— Wibuke ngoku Petero mwalemwa erisaba n’eribya inianatheghirye. Busana n’ekyo, ni kyahi ekya wanga bugha wuthi kya thutholere ithwakolha eribya bigha b’Omukangirirya Mukulhu?—

Ahathe erithika-thika thutholere ithwasaba Yehova y’obuwathikya. Yesu abere akasaba, wunasi ekya Nyamuhanga abya amukolere?— Mwathuma malaika erighumya Yesu. (Luka 22:43) Mbwino abamalaika ba Nyamuhanga bangana thuwathikya?— E Biblia yikabugha yithi: ‘Omumalaika w’Omwami Mukulhu akatheghaya abakamubaha, akalhamayabo.’ (Esyonyimbo 34:7) Aliriryo eribana obuwathikya bwa Nyamuhanga, erisaba siriri ghunza. Wunasi nga ni kindi kindu kyahi ekya thutholere ithwa kolha?— Yesu mwabwira abigha biwe athi babye ibanalholire n’eritheya. Wukalengekanaya ni kyahi ekyanga thuwathikya erikolha ekyo?—

Thutholere ithwa hulikirira ndeke ebya thukakangiriribawa okwa mihindano yethu ey’Ekikrisitayo n’erikwama-kwamania ebya thukasoma omwa Biblia. Kandi thutholere ithwasaba Yehova mughulhu wosi n’erimusaba thuthi athuwathikaye thukamukolera. Thwamakolha ebyo, ithukendi bana obuwathikya obw’erirwanisya eryubaha. Neryo ithukendi tsema thukabana akaghisa ak’eribwira abandi omwatsi owahambire okwa Mukangirirya Mukulhu na Thatha wiwe.

Amasako ano angana thuwathikya nuku eryubaha abandu sirileke thukathendi kolha ekihikire: Emisyo 29:25; Yeremia 26:12-15, 20-24; na Yoane 12:42, 43.