Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Ighira Okwa Mukangirirya Mukulhu

 ESURA 48

Wangan’ikalha Omwa Kihugho Ekihya eky’Obuholho

Wangan’ikalha Omwa Kihugho Ekihya eky’Obuholho

NYAMUHANGA mwahira Adamu na Eva omw’irima lye Edeni. Nomwakine indi mubayisamambulha n’eriholha, Nyamuhanga abirileka ikya thokekana okw’abaana babu, nethu imwathune, erisyabyaho kera na kera omwa Paradiso. E Biblia yikalhaghanisaya yithi: ‘Abathunganene basyikalha omwa kihugho mwa buholho, n’erisighalyakyo kera na kera.’Esyonyimbo 37:29.

E Biblia yikakanaya okwa ‘lhubulha lhuhya-lhuhya n’ekihugho kihya-kihya.’ (Isaya 65:17; 2 Petero 3:13) ‘Olhubulha’ olhwa munabwire, w’amathabali w’abandu awaliho lino, aliriryo Yesu Kristo n’abakathabalha nayu elhubulha b’abakendi syabya ‘lhubulha lhuhya-lhuhya.’ Ka kikendi syatsemesya omughulhu olhubulha lhuhya-lhuhya, ni bugha mbu obuthabali bwa Nyamuhanga obuthunganene obw’obuholho, erisyathabalha ekihugho kyosi!

Ibbwa kwesi, ‘ekihugho kihya-kihya’ niki?— B’abandu abakendi syabya ibanzire Yehova. Wunasi, omughulhu e Biblia yikakanaya okwa ‘ekihugho,’ okwa bundi buthuku yikabya iyikamanyisaya abandu, butsira ekithaka. (Enzuko 11:1; Esyonyimbo 66:4; 96:1) Busana n’ekyo, abakakolha ekihugho kihya-kihya bakendi syikalha okwa kihugho kwa hano.

Ekihugho eky’abandu babi ekiriho munabwire kikendi syabya isikikiriho. Wibuke ngoku Erighunga ly’amaghetse ery’omwa buthuku bwa Noa mulyathoghothya ekihugho eky’abandu babi. Kandi, ngoku thwabirigha, ekihugho kibi kino kikendi thoghothibwa okwa Harmagedoni. Lino thulebaye emibere nga yikendi syabya yithi omwa kihugho kihya-kihya kya Nyamuhanga e Harmagedoni yalihwere.

 Wunanzire erisyabya omwa Paradiso omwa kihugho kya Nyamuhanga ekihya-kihya eky’obuholho?— Sihali omuthambiri oyuwanga leka ithwabyaho erihika kera na kera. Sihali omubatsi owanga leka ithuthaholha. Enzira nguma nyisa eyangaleka ithwabyaho kera na kera ly’eriyithunda hakuhi na Nyamuhanga. N’Omukangirirya Mukulhu akathubwira ngoku thwanga kolha ekyo.

Thw’imaye esyo Biblia syethu thwanasukulha Yoane sura 17, omulhondo 3. Thukabana omwa mulhondo oyo mw’ebinywe eby’Omukangirirya Mukulhu bino: ‘Neryo eyi ni ngebe y’erikotha, abandu bakuminye, iwe Nyamuhanga mughuma w’ekwenene, n’eriminya Yesu Kristo, oyo wathuma.’

Neryo ni kyahi ekya Yesu abugha athi thutholere ithwakolha nuku thwanga syabyaho kera na kera?— Eky’erimbere, thutholere ithwaminya Thatha wethu ow’elhubulha, Yehova, kuthya na Mughalha wiwe, oyuwahayo engebe yiwe busana nethu. Eki kikamanyisaya kithi thutholere ithw’igha e Biblia. Ekitabu kino, Ighira Okwa Mukangirirya Mukulhu, kine muthuwathikya erikolha ekyo.

Aliriryo erigha oku Yehova kikendi thuwathikya kithi erithoka erisyabyaho kera na kera?— Ngoku thukanayithagha ebyalya buli kiro, kwa kinatholere kithya erigha oku Yehova buli kiro. E Biblia yikabugha yithi: ‘Omundu siendi syabyaho busana n’obundu ibubwene, nikwa busana n’obuli kinywe ekikalhua omwa buno bwa Nyamuhanga.’Matayo 4:4.

Kandi thutholere ithw’igha oku Yesu Kristo kundi Nyamuhanga mwathuma Mughalha wiwe erisangulha ebibi byethu. E Biblia yikabugha yithi: ‘Erilhama siriri omwa wundi mundu.’ Kandi yikathasyabugha yithi: ‘Oyukikiriraya Omughalha awithe engebe y’erikotha.’ (Emibiri 4:12; Yoane 3:36) Kikamanyisaya ki ‘erikirirya’ Yesu?— Kikamanyisaya kithi thukaligha Yesu n’eriminya ngoku thuthe thwangabyaho kera na kera ahathe iyo. Thun’ikirirye ekyo?— Thwam’ikirirya ekyo, ithukendi lholha embere erigha okwa Mukangirirya Mukulhu obuli kiro, kandi ithukendi kolha eby’akabugha.

 Enzira mbuya ey’erighira okwa Mukangirirya Mukulhu ly’erisoma ekitabu kino mirundi mingyi n’erilebya ebisasani ebyosi n’eribilengekaniako. Lebaya nga wangana subirya okwa bibulyo ebihambire okwa bisasani ebi. Kandi, soma ekitabu kino haghuma na mama wawu kutse thatha wawu. Wamabya isiwuli n’ababuthi bawu, kisome haghuma n’abandi abakulire kutse n’abandi baana. Sikyanga tsemesya wamawathikya abandi erighira okwa Mukangirirya Mukulhu ebya batholere ibakolha nuku banga syabyaho kera na kera omwa kihugho kya Nyamuhanga ekihya-kihya?—

E Biblia yikathubwira yithi: ‘Ekihugho kya syahwa.’ Aliriryo e Biblia yikasoborera ngoku thwangabyaho kera na kera omwa kihugho kihya-kihya kya Nyamuhanga. Yikabugha yithi: ‘Oyukakolha erisonda lya Nyamuhanga asyakotha kera na kera.’ (1 Yoane 2:17) Neryo thwanga thoka thuthi erisyabyaho kera na kera omwa kihugho kihya-kihya kya Nyamuhanga?— Inga, ly’erigha oku Yehova na Mughalha wiwe mwanzwa, Yesu. Aliriryo kandi thutholere ithwahira ebya thuk’igha by’omwa mikolere. Erigha ekitabu kino ka likuwathikaye erikolha ebindu ebi.