Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Ighira Okwa Mukangirirya Mukulhu

 ESURA 35

Thwangana Lhubukibwa!

Thwangana Lhubukibwa!

THWAMAHOLHA, Nyamuhanga anemwendi syanza erithulhubukya, ni bugha mbu, erithasya thuha engebe?— Yobu, omulhume mubuya abya ikirirye ngoku Nyamuhanga anzire erikolha ekyo. Neryo omughulhu Yobu alengekanaya athi akisiya iniaholha, mwabwira Nyamuhanga athi: ‘Wasyabirikira, naghe nasyakwithaba.’ Yobu mwabugha athi Yehova Nyamuhanga anganzire kutsibu erimulhubukya.Yobu 14:14, 15.

Yesu ali nga Thatha wiwe, Nyamuhanga Yehova. Yesu anzire iniathuwathikya. Omulhume oyukwire ebihagha abere akabwira Yesu athi, ‘Wamabya wunanzire, wangana thoka erinyilhamya,’ Yesu mwasubirya athi: ‘Nyanzire.’ Neryo mwalhamya ebihagha eby’omulhume oyo.Mariko 1:40-42.

Yehova mwakangania athi ngoku anzire abalere?

Yesu mw’ighira oku Thatha wiwe erianza abaana. Mirundi ibiri omwa buthuku bwa kera, Yehova mwakolesya abaghombe biwe erilhubukya abaana balere. Eliya mwalemba-lemba Yehova erilhubukya mughalha w’omukali oyuwakolera Eliya y’ebibuya. Neryo Yehova mwakikolha. Kandi Yehova mwakolesya omughombe  wiwe Eliya erilhubukya omwana w’obulhume.1 Abami 17:17-24; 2 Abami 4:32-37.

Mbwino sikiri kutsemesaya eriminya ngoku Yehova athwanzire athya?— Akathulengekanayako omughulhu thuliho, kandi akathwibuka thwamaholha. Yesu mwabugha athi nibya Thatha wiwe akalhangira abaholire abanzire nga baneho! (Luka 20:38) E Biblia yikabugha yithi ‘sihali olhuholho, kutse engebe, sihali emyatsi eyiriho, kutse emyatsi eyikendi syasa eyanga thoka erithughabulha okw’olhwanzo lhwa Nyamuhanga.’Abanya Roma 8:38, 39.

Omughulhu Yesu abya okwa kihugho, mwakangania ngoku Yehova akatsomana abaana balere. Wibuke ngoku Yesu mwabana obuthuku obw’eribwira abaana ebihambire oku Nyamuhanga. Aliriryo wunasi ngoku Nyamuhanga mwaha Yesu y’amaaka aw’erisubya abaana balere abaholire?— Thukanaye okwa buthuku Yesu alhubukaya omwana ow’emyaka 12, oyuwabya mwali w’omulhume oyukahulhawa mwa Yairo.

Yairo ikere na mukali wiwe n’omwana wabu mughuma hakuhi n’Engetse eye Galilaya. Kiro kighuma omwana-mutho akathoha, neryo Yairo akalhangira ngoku akayaholha. Akatsuka erilengekania oku Yesu, omulhume ow’eriswekya oyo Yairo abiriowa ngoku angana lhamya abandu. Neryo Yairo akayamusondaya. Akabana Yesu iniane okwa musike ow’Engetse eye Galilaya, iniane mukangirirya abandu bangyi.

Yairo akayihathathanaya omwa kingungu ky’abandu n’eriyakukama embere sya Yesu. Akabwira Yesu athi: ‘Mwali waghe mulere alhwere kutsibu-tsibu. Wune mwendyasa erisyamuwathikya? Nga kulemba-lemba indi wase.’ Aho n’aho, Yesu akaghenda na Yairo. Endeko y’abandu abalyasyalebaya Omukangirirya Mukulhu nabu bakabakwama. Aliriryo bakabya babirighenda akaghendo, abalhume balebe bakalhua ewa Yairo n’erimubwira bathi: ‘Mwali wawu abiriholha. Wukina swalhuhaya omukangirirya ya busana naki kwehi?’

Yesu amowa abalhume bakabugha ebinywe ebi. Anasi ngoku Yairo ali n’obulighe bunene busana n’eriholerwa omwana wiwe  mughuma musa. Neryo akamubwira athi: ‘Siwubahe, wikiriraye Nyamuhanga lisa. Mwali wawu akendibya ndeke.’ Neryo bakongera erighenda erihika okwa nyumba ya Yairo. Bakasanga abanywani ab’eka eyo ibane mulira. Bali n’obulighe kundi munywani wabu mulere abiriholha. Aliriryo Yesu akababwira athi: ‘Muleke eririra. Omwana-mutho syaholire, nikwa aghotsere.’

Yesu akabya abugha eki, abandu bakatsuka eriseka lhukukunia, kundi banasi ngoku omwana-mutho abiriholha. Neryo ibbwa, wukalengekanaya ni kyahi ekikaleka Yesu iniabugha athi aghotsere?— Wukalengekanaya ni kyahi ekya akanza eryeghesya abandu?— Anzire ibaminya ngoku eriholha liri ng’othulho othw’amalengulira. Akanza baminye ngoku erilhabira omwa buthoki bwa Nyamuhanga, kyolhobire iyo erisubya omundu oyuholire ngoku kikana thwolhobera eribukya omundu y’omwa thulho.

Yesu erilhubukya mwali wa Yairo kikathweghesaya ki?

Yesu akabwira obuli mundu athi alhue omwa nyumba kwihaho abakwenda biwe, Petero, Yakobo, na Yoane, thatha na mama w’omwana-mutho. Neryo akaghenda aha balhalirye omwana. Akahamba okwa byalha biwe n’eribugha athi: ‘Mwama-mutho, hangana!’ Aho n’aho akahangana n’eritsuka erilyatha! Thatha wiwe na mama wiwe bali n’obutseme bunene.Mariko 5:21-24, 35-43; Luka 8:40-42, 49-56.

 Hathya thalengekania okwa kino. Yesu amabya imwasubya omwana-mutho oyu, angana subya n’abandi?— Wukalengekanaya kwenene anemwendi kolha eki omwa buthuku obukasa?— Ee. Yesu iyuwene-wene mwabugha athi: ‘Endambi yikasa, okwa mughulhu oyo, abosi abali omw’amasinda basyowa omulenge waghe n’erilhua mugho.’Yoane 5:28, 29.

Wukalengekanaya Yesu ananzire erilhubukya abandu?— Ekindi eky’erileberyako ekiri omwa Biblia kikathuwathikaya erisubirya okwa kibulyo ekyo. Ekindu ekyabya kiro kighuma hakuhi n’omuyi owe Naini kikakanganaya ngoku Yesu akayowa erikwamana n’abandu abakalira bamaholirwa.

Omukali ane n’abandu abakayatsika omwana wiwe erilhua e Naini. Mwira wiwe abya iniabiriholha, kandi lino n’omwana wiwe mughuma musa abiriholha. Kali n’obulighe bunene! Abandu bangyi abe Naini banakwamire abahekire ekinda eriyakitsika eyihya sy’omuyi. Omukali ane mulira, kandi abandu sibawithe ekya banga kolha erimuhumulikania.

Okwa kiro eki, Yesu n’abigha bigha bamabya ibakasa omwa muyi owe Naini. Hakuhi n’olhukyo olhw’omuyi oyo, bakasangana abandu bangyi bakayatsika mughalha w’omukali. Yesu akabya alhangira omukali oyukalira, akamukwira obulighe bunene. Obulighe bunene obwa omukali alimu bukaleka Yesu nayu iniakwa obulighe. Anzire erimuwathikya.

Omwa mulenge ow’olhukeri n’owaghumire owanga leka omukali iniahulikirira, Yesu akabugha athi: ‘Siwulire.’ Emibere yiwe n’eky’akakolha bikaleka abandu ibamuthungerera ndeke. Yesu akabya aseghera hakuhi n’ekinda, abandu abosi bangabya ibakabulha eky’akayakolha nga ni kyahi. Yesu akalhaghira athi: ‘Mulhwana, ngakubwira nyithi, Hangana!’ Aho n’aho, akikalha! Neryo akatsuka eribugha.Luka 7:11-17.

 Thalengekania omukali nga mwayowa athi! Wanga yowa wuthi omwanze wawu amasuba?— Mbwino eki sikiri kanganaya ngoku Yesu kwenene anzire abandu kandi ngoku anzire eribawathikya?— Thalengekania ngoku kikendi syatsemesya omwa kihugho kihya-kihya kya Nyamuhanga thukangirira abandu abakalhubuka!2 Petero 3:13; Eribisulirwa 21:3, 4.

Erilhubuka ery’omwana mughuma musa ow’omukali oyu likakanganaya ki?

Okwa buthuku obo, abaghuma ab’okw’abandu abakendi syalhubukibwa bakendisyabya ib’abandu abathwabya thwasi, imwamuli n’abaana. Thukendi syabaminyirera ngoku Yairo aminya mwali wiwe Yesu akamulhubukya. Abandi bakendisya ib’abandu abaholha kera-kera. Aliriryo Nyamuhanga syendi syabibirirwa kundi baholha kera.

Sikiri thutsemesaya eriminya ngoku Yehova Nyamuhanga na Mughalha wiwe, Yesu, bathwanzire kutsibu bathya?— Banzire ithwabyaho, butsira ahabw’emyaka mike misa, aliriryo erihika kera na kera!

Erikwamana n’amaha awuwenenga awali omwa Biblia awathuwithe busana n’abakaholha, kisi soma Isaya 25:8; Emibiri 24:15; na 1 Abanya Korinto 15:20-22.