Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Ighira Okwa Mukangirirya Mukulhu

 ESURA 3

Oyuwakolha Ebindu Ebyosi

Oyuwakolha Ebindu Ebyosi

Nindi oyuwakolha ebindu ebyosi ebikahumulha?

NGANASI ekindu ekikaswekaya. Wunanzire iwakiminya?— Thasamalira ebyalha byawu. Kumba eminwe yawu. Thasongyano ekindu. Eminwe yawu yangana kolha ebindu bingyi, kandi yangana bikolha ndeke. Oyuwakolha ebyalha byawu nindi?—

Yan’oyuwakolha obunu bwethu, enyindo yethu, n’ameso wethu. Abya ini Nyamuhanga, Thatha w’Omukangirirya Mukulhu. Mbwino sikiri thutsemasaya kundi Nyamuhanga mwathuha ameso?— Akaleka ithwalhangira ebindu bingyi. Thwangana lhangira ebimole. Thwangana samalira ebithi bibisi n’ekyanya ekye bbulu. Nibya thwangana lhangira ebyana by’esyonyonyi ebikwire enzalha ng’ebiri omwa kisasani mwa hano. Omwa kwenene, kikatsemesaya eribya ithwangana lhangira ebindu ng’ebi, kwa bithe?—

Aliriryo nindi oyuwakolha ebindu ebi? Mbwino oyuwakolhabyo ni mundu ng’ithwe? Eyihi. Abandu bangana himba enyumba. Aliriryo sihali omundu oyuwanga kolha ebithi ebikalhasa. Abandu sibanga kolha ekyana ky’enyonyi, ebimole, kutse ekindi kindu kyosi-kyosi ekikahumulha. Wunalhue wasi ekyo?—

Nyamuhanga yuwakolha ebindu ebyosi ebi. Nyamuhanga mwahangika olhubulha n’ekihugho. Kandi mwahangika abandu. Mwahangika omulhume n’omukali ab’erimbere. Yesu, Omukangirirya Mukulhu, mwakangirirya eki.Matayo 19:4-6.

 Yesu mwaminya athi ngoku Nyamuhanga mwahangika omulhume n’omukali? Mbwino Yesu mwanalhangira Nyamuhanga akakolha eki?— Ee, mwalhangira. Yesu abya iniane na Nyamuhanga omughulhu Nyamuhanga ahangika omulhume n’omukali. Yesu yuwabya kihangikwa kya Nyamuhanga eky’erimbere. Yesu abya malaika, kandi abya ikere elhubulha na Thatha wiwe.

E Biblia yikathubwira yithi Nyamuhanga mwabugha athi: ‘Thuhangike omundu.’ (Enzuko 1:26) Wunasi Nyamuhanga ngabya akakania nandi?— Abya akakania na Mughalha wiwe. Abya akakania n’oyuwasa okwa kihugho enyuma waho, neryo amabya Yesu.

Mbwino ekyo sikiri tsemesaya? Thalengekania! Thwamahulikirira Yesu, thukabya ithwamakangiriribwa n’oyuwabya na Nyamuhanga omughulhu Nyamuhanga akolha ekihugho n’ebindi bindu ebyosi. Yesu mwigha bingyi akakolha na Thatha wiwe elhubulha. Kyakireka Yesu iniabya Mukangirirya Mukulhu!

 Wukalengekanaya Nyamuhanga syabya n’etseme busana n’eribya iyuwene athali ahangika Mughalha wiwe?— Eyihi, kwa bithe bithya. Neryo amabya inianabya n’etseme, ekyaleka iniahangika ebindi bindu ebikahumulha niki?— Mwakolha eki kundi ni Nyamuhanga ow’olhwanzo. Abya anzire abandi ibabyaho n’eritsemera engebe. Thutholere ithwasima Nyamuhanga kundi mwathuha engebe.

Obuli kindu ekya Nyamuhanga abirikolha kikakanganaya olhwanzo lhwiwe. Nyamuhanga mwakolha eryuba. Eryuba likathuha ekyakakalha n’ekihuhania. Kuhathabya eryuba, obuli kindu kyanga huhirire thuthuthu kandi sihangabere engebe okwa kihugho. Mbwino sikiri kutsemesaya kundi Nyamuhanga mwakolha eryuba?—

Kandi Nyamuhanga akaleka embulha iyawa. Okwa bundi buthuku siwuli tsemera embulha kundi yikaleka iwuthaya sathira eyihya iyine muwa. Aliriryo embulha yikaleka ebimole ibyalhasa. Neryo omughulhu thukalhangira ebimole ebyuwene, nindi oyo thutholere ithwaha ewasingya?— Ni Nyamuhanga. Kandi nindi oyo thwangaha ewasingya thukalya ebighuma n’ebyalya ebikasiha ndeke?— Thutholere ithwaha Nyamuhanga y’ewasingya kundi eryuba n’embulha yiwe byabikaleka ibyalhasa.

Kandi ibbwa omundu amakubulya ekibulyo kino, ‘Nyamuhanga mwanakolha omundu n’ebisoro?’ Iwukendi subirya wuthi ki?— Kihikire eribugha wuthi: “Ee, Nyamuhanga mwakolha omundu n’ebisoro.” Ibbwa omundu amabya isyali ikiriraya athi Nyamuhanga yuwahangika abandu? Kandi ibbwa amakubwira athi abandu balhua omwa bisoro? E Biblia siyiri kangiriraya ekyo. Yikabugha yithi Nyamuhanga mwahangika ebyosi ebikahumulha.Enzuko 1:26-31.

Kundi hali oyuwahimba enyumba, nindi oyuwakolha ebimole, emithi, n’ebisoro?

Aliriryo omundu angana kubwira athi syali ikiriraya omu Nyamuhanga. Iwukendi bugha wuthi ki?— Busana naki iwutha mukangania enyumba, n’erimublya wuthi: “Nindi oyuwahimba enyumba erya?” Obuli mundu wosi anasi ngoku omundu mulebe mwahimbayo. Ahathe erithika-thika enyumba muyithayihimba!Abaebrania 3:4.

 Enyuma waho, kanganaya omundu oyo y’ekimole. Mubulhaye: “Nindi oyuwakolha eki?” Ngoku enyumba muyithayihimba, n’ekimole eki sikya yibuthukira. Omundu mulebe mwakolha kyo. Nyamuhanga yuwakolha kyo.

Bwira omundu oyo wuthi ahulikirire eriimba ly’ebinyonyi. Neryo mubulhaye: “Nindi oyuwakolha ebinyonyi n’eribikangirirya eriimba?” Ni Nyamuhanga. Nyamuhanga yuwahangika olhubulha n’ekihugho n’ebyosi ebirimu ebikahumulha! Yukaha ebindu by’engebe.

Nomwabine, omundu angana bugha athi akikiriraya eby’akalhangira bisa. Angana bugha athi: ‘Namathendi kilhangira, sinanga kikirirya.’ Busana n’ekyo, abandu balebe bakabugha bathi sibali ikiriraya omu Nyamuhanga kundi sibanga mulhangira.

Ni kwenene sithwanga lhangira Nyamuhanga. E Biblia yikabugha yithi: ‘Sihali omundu oyuwanga lhangira Nyamuhanga.’ Sihali omulhume, omukali, kutse omwana okwa kihugho oyuwanga lhangira Nyamuhanga. Busana n’ekyo, omundu syatholere akalengesya erikolha ekisosekanio kutse esanamu ya Nyamuhanga. Nibya Nyamuhanga akathubwira athi isithwakolha ekisosekanio kiwe. Kwesi, sikyanga tsemesya Nyamuhanga eribya n’ebindu ng’ebi omw’amanyumba wethu.Eriluayo 20:4, 5; 33:20; Yoane 1:18.

Aliriryo thwamabya isithwanga lhangira Nyamuhanga, thukaminya thuthi kwenene ngoku Nyamuhanga aneho? Thalengekania okwa kino. Wangana lhangira omuyagha?— Eyihi. Sihali oyuwanga lhangira omuyagha. Aliriryo wangana lhangira ebyo omuyagha akakolha. Wangana lhangira ebithi bikatsinga-tsinga omuyagha akahitha. Neryo iwaligha ngoku hane omuyagha.

Wukaminya wuthi ngoku hane omuyagha?

Wangana lhangira ebindu ebya Nyamuhanga abirikolha. Wukabya wukalhangira ekimole kutse ekinyonyi, wukabya iwamalhangira ekya Nyamuhanga abirikolha. Neryo wukaligha ngoku kwenene Nyamuhanga aneho.

Omundu angana kubulya athi, ‘Oyuwakolha eryuba n’ekihugho nindi?’ E Biblia yikabugha yithi: ‘Nyamuhanga mwahangika olhubulha n’ekihugho.’  (Enzuko 1:1) Kwenene, Nyamuhanga mwakolha ebindu ebyosi ebikathikaya ebi! Eki wukakilhangira wuthi?—

Sikiri swekaya eribya ithuwithe engebe? Thwangan’owa eriimba eryuwene ery’ebinyonyi. Thwangana lhangira ebimole n’ebindi bindu ebya Nyamuhanga abirihangika. Kandi thwanganalya ebyalya ebya Nyamuhanga abirithuhererya.

Busana n’ebindu ebyosi ebi, thutholere ithwaha Nyamuhanga y’ewasingya. Ekikulhu okwa byosi, thutholere ithwamusima busana n’erithuha engebe. Kwenene thwamabya ithukasima Nyamuhanga, ithukendi kolha ekindu kirebe. Ni kyahi?— Ithukendi hulikirira Nyamuhanga, kandi ithukendi kolha ebya akathubwira omwa Biblia. Omwa nzira eyi, ithukendi kangania ngoku thwanzire oyuwakolha ebindu byosi.

Thutholere ithwaha Nyamuhanga y’ewasingya busana n’ebyosi ebya abirikolha. Thuthi? Soma ebihandikire omwa Esyonyimbo 139:14; Yoane 4:23, 24; 1 Yoane 5:21; na Eribisulirwa 4:11.