Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Ighira Okwa Mukangirirya Mukulhu

 ESURA 19

Nina Kibuya Erilhwa?

Nina Kibuya Erilhwa?

WUNASI abalhwana kutse abasika abakayipanga-panga n’eriyithwalha nga bawithe akaghalha?— Wangananza erisiba nabu? Kutse iwukendi anza erisiba n’omundu ow’olhukeri n’oyukanza obuholho?— Omukangirirya Mukulhu mwabugha athi: ‘Obutseme buli okw’abakahira h’obuholho, kusangwa Nyamuhanga asyahulhabo mw’abaana biwe.’—Matayo 5:9.

Aliriryo okwa bundi buthuku abandu bangana kolha ebindu ebikathuhithanaya, kwa bithe?— Busana n’ekyo thwangananza erithuhulya. Eki mukyanabya okw’abigha ba Yesu omughulhu babya ibane na Yesu bakaghenda e Yerusalemu. Leka nga thakubwira ekyabya.

Babere babighenda kaghendu, Yesu mwabugha athi abake b’okw’abigha biwe babye embere eriyasondya ah’erilhuhukira omwa kyalu ekye Samaria. Aliriryo abandu b’eyo mubathanza bakabya omwa kyalu ekyo, kundi Abasamaria babya bawithe edini ey’embaghane. Kandi sibabya banzire omundu wosi-wosi akaghenda omwa muyi we Yerusalemu eriyaramya.

Yakobo na Yoane mubanza erikolera Abasamaria baki bakanza erithuhulya?

 Ekyo ku kyakubyako, ni kyahi ekya wanga kolire? Wangana kwire ekinigha? Mbwino wanga nzire erithuhulya?— Ekyo kya abigha biwe, Yakobo na Yoane banza erikolha. Mubabugha na Yesu bathi: ‘Wanzire ithwabirikira omuliro alhue elhubulha n’erithoghothyabo?’ Sikiri swekaya Yesu eribya imwabahulha mw’Abaghalha b’Omulhumo! Aliriryo Yesu mwababwira athi sikyabya kitholere erikolha abandi bandu bo bathya.Luka 9:51-56; Mariko 3:17.

Ni kwenene abandu bangana thukolha nabi okwa bundi buthuku. Abandi baana banganabya isibanzire thukasatha okwa misathu yabu. Bangana bugha bathi: “Sithukwanzire hano.” Ekindu ng’eki kyamabya, ikyangana leka ithwa yowa nabi, kwa bithe? Ithwangananza erikolha ekindu erianza erithuhulya. Aliriryo thunatholere ithwakolha eki?—

Imaya e Biblia, thwanasukulha Emisyo sura 24, omulhondo 29. Hakasomawa hathya: ‘Siwubughe wuthi, ngendi mukolha ngoku anyikolha. Nasyahemba omundu erikwamana n’omubiiri wiwe.’

Ekyo kikamanyisaya ki?— Kikamanyisaya kithi sithutholere thukalengesya erithuhulya. Sithutholere thukakolha omundu ya nabi kundi mwathukolha nabi. Kandi ibbwa omundu amanza wulhwe nayu? Angananza erikuhithania omw’ikulhuka awandi mena. Angana kusekerera n’eribugha athi wukasagha. Kandi ibbwa amabugha athi wuli kihuha. Wutholere iwakolha ki? Wuna tholere iwatsuka amalhwa?—

Kandi, thulebaye ekye Biblia yikabugha. Sukulha Matayo sura 5, omulhondo 39. Aho Yesu akabugha athi: ‘Siwukisaye oyukakukolera nabi; nikwa oyukakuswiraya okwa lithema lyawu ly’amalya, wumubindukiraye n’erindi.’ Wukalengekanaya Yesu amanyisaya ki akabugha ebinywe ebi? Mbwino amanyisaya athi omundu amakuswirya engumi okwa lhuhandi lhughuma lhw’obusu bwawu, wutholere iwamubindukirya olhundi lhuhandi?—

Eyihi, ekyo sikya Yesu amanyisaya. Eriha omundu y’erikofi sikiri ng’erimuha engumi. Liri ng’erikughumirya. Omundu angana thuha erikofi erianza thulhwe nayu. Akabya iniakanza thuhithane.  Kandi thwamahithana neryo thukamusukuma, ekyangabya ni kyahi?— Ithwangana tsuka amalhwa.

Aliriryo Yesu syabya anzire abigha biwe bakalhwa. Busana n’ekyo, mwabugha athi omundu amathuha erikofi, isithwa musubulirayalyo. Sithutholere thukahithana neryo thukatsuka amalhwa. Thwamakolha ekyo, thukabya ithukakanganaya thuthi sithuli mbaghane okwa mundu oyulya tsuka amalhwa.

Hamabanika obutsumbu-tsumbu, wukalengekanaya ni kindu kyahi ekibuya ekya thwanga kolha?— Ly’erikwama kya lhuaho. Owundi mundu angana kusukuma n’erikukuna mirundi mingyi. Aliriryo enyuma waho angana lekeraho. Wamayilhuiraho, sikiri manyisaya kithi wuli mutseke. Kikamanyisaya kithi wuwithe akaghalha ak’erikolha ekihikire.

Ni kyahi ekya thutholere erikolha omundu amanza erilhwa nethu?

 Aliriryo ibbwa wamathwamu erilhwa neryo wukasinga? Ni kyahi ekyangabya?— Omundu oyuwulyaswiraya iniangana subulha n’abanywani biwe. Nibya ibangana kuhuthalya omwa muhamba kutse ibakuswirya omw’omwigho. Neryo, wanamalhangira ekyaleka Yesu iniabugha athi isithwalhwa?—

Ni kyahi ekya thutholere ithwa kolha thwa malhangira abandi ibane mulhwa? Thuna tholere ithwa sighika omughuma w’okw’ibo?— E Biblia yikathubwira ekitholere erikolhwa. Sukulha Emisyo sura 26, omulhondo 17. Hakabugha hathi: ‘Oyukalhaba n’eriyilhuhya omw’amalhwa awathe wiwe, ali ng’oyukahamba amathwe w’embwa.’

Eriyitsungira omw’amalhwa w’abandi liri lithi ng’omundu oyukahamba amathwe w’embwa? Lyangana leka iwahuthalha, busana n’ekyo, isi wakolha ekyo!

Ni kyahi ekyangabya wamahamba amathwe w’embwa? Embwa iyikendi yowa nabi, neryo iyalhaka, kwa bithe? Embwa yikabya yine mwanza eriyinyukulha, kwa wukana ongera wuthya erihamba kutsibu amathwa wayu, nayu iyongera eriowa obulhumi. Wamalhwikayo, iyangana kulhuma kutsibu. Aliriryo ibbwa wune mwendibya iwuna hambire amathwe wayu ahabw’omughulhu muuli?—

Ekyo ky’ekitsibu ekya thwangabyamu thwama yitsungira omw’amalhwa w’abandi. Thwanganabya isithwasi oyulyatsuka amalhwa kutse ekikaleka ibalhwa. Omundu oyukaswiribawa anganabya imwakiba oyukamuswiraya. Thwama muwathikya, ithukendibya ithukawathikaya omwibi. Ekyo sikyangabya kibuya, kwa bithe?

Busana n’ekyo, wamalhangira abandu abakalhwa iwukendi kolha ki?— Bamabya ibali  okwa sukuru, iwangana nguha eriyabwira omusomesya. Kandi bamabya isibali hakuhi n’esukuru, iwangana bwira omundu mukulhu oyuli hakuhi. Ee, abandi bandu n’omubanganza erilhwa, thutholere ithwabya bandu b’obuholho.

Ni kyahi ekya wutholere erikolha wamalhangira abakalhwa?

Abigha ba Yesu ab’ekwenene bakakolha ekyosi-kyosi ekya bangathoka erilhangira bathi sibali yingiraya omw’amalhwa. Omwa nzira eyi thukakanganaya ngoku thuwithe akaghalha ak’erikolha ekihikire. E Biblia yikabugha yithi omwigha wa Yesu ‘syatholere erineghena, nikwa abye mubuya okwa bosi.’2 Timoteo 2:24.

Hathya thulebaye awandi mahano awuwene awakendi thuwathikya erithendi yingirya omw’amalhwa: Abanya Roma 12:17-21 na 1 Petero 3:10, 11.