Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Ighira Okwa Mukangirirya Mukulhu

 ESURA 40

Ngoku Wanga Tsemesya Nyamuhanga

Ngoku Wanga Tsemesya Nyamuhanga

NI KYAHI ekya thwanga kolha eritsemesya Nyamuhanga? Mbwino thwangana muha ekindu kyosi-kyosi?— Yehova akabugha athi: ‘Esyonyama sy’omoli ni syaghe.’ Kandi akathasyabugha athi: ‘Ebitsipa ni byaghe n’esyamaghetse ni syaghe.’ (Esyonyimbo 24:1; 50:10; Hagai 2:8) Aliriryo, hane ekindu kirebe ekya thwangaha Nyamuhanga. Ni kyahi?—

Yehova akathuha akaghisa ak’erithwamu nga thukendi mukolera kutse eyihi. Syali thukaka athi thukole eby’anzire. Thulebaye ekyaleka Nyamuhanga iniathuhangika nuku thwanga thwamu nga thukendi mukolera kutse eyihi.

Wanganabya iwunasi erobboti nga niki. Ni kyuma ekikakolhawa erikolha ebyo oyukakikolha anzire ikyakolha. Busana n’ekyo, erobboti siyanga yithwiramu eky’erikolha. Yehova kwanza anga thukolire ng’esyorobboti. Anga thukolire athya nuku thukole eby’anzire bisa. Aliwe Nyamuhanga mwathakolha ekyo. Wunasi nga ni busana naki?— Ebindi bindu eby’abaana bakasathisaya biri ng’esyorobboti. Bakabya bakatsunda eripesa, neryo ibyakolha ebyo oyuwabikolha anzire ibyakolha. Wune wathalhangira ekindu ekiri ng’ekyo?— Mughulhu mungyi abandu bakatamawa erisathisya ebindu ebikolirwe  erikolha ekindu kighumerere. Nyamuhanga syanzire thukamukolera ng’esyorobboti. Yehova anzire ithwa mukolera kundi thumwanzire kandi kundi thwanzire ithwa mukenga.

Busana naki Nyamuhanga mwathathukolha ng’esyorobboti?

Wukalengekanaya Thatha wethu ow’elhubulha akayowa athi thukamukenga ithunanzire?— Thambwira, ebya wukakolha bikaleka ababuthi bawu ibayowa bathi?— E Biblia yikabugha yithi omughalha oyuwithe amenge ‘akatsemesya ise’ aliriryo omughalha mukiru ‘ni bulighe busana na nyinya.’ (Emisyo 10:1) Wune wathalhangira ngoku mama wawu na thatha wawu bakatsema wukakolha ebya bakakubwira bathi wukole?— Aliriryo bakayowa bathi wamathendi bowa?—

Wanga tsemesya wuthi Yehova n’ababuthi bawu?

Leka thuthalengekania oku Thatha wethu ow’elhubulha, Yehova. Akathubwira ngoku thwanga mutsemesya. Sukulha e Biblia yawu omwa Emisyo 27:11. Aho Nyamuhanga akathubwira athi: ‘Mughalha waghe [kutse, thwangana bugha thuthi, mwali waghe] wubye n’amenge, n’eritsemesya omuthima waghe, inathoka erisubirya oyukanyitsuma.’ Wunasi ekya kikamanyisaya eritsuma omundu?— Omundu angana kutsuma omw’ikusekerera n’omw’ibugha athi siwanga thoka erikolha ebya wukabugha wuthi wangana kolha. Sitani akatsuma athi Yehova?— Leka thulebaye.

Wam’ibuka, muthw’igha omwa Sura 8 ngoku Sitani akanza iniabya w’Erimbere kandi ngoku akanza obuli mundu wosi iniamughondera.  Sitani akabugha athi engebe y’erikotha nyisa eya Yehova akendi syaha abandu ya yikaleka ibaramya Yehova. Sitani abere abirileka Adamu na Eva bayisamambule oku Yehova, mwahakanisya Nyamuhanga. Mwabwira Nyamuhanga athi: ‘Ebindu ebya wukaha abandu bisa bya bikaleka ibakukolera. Imba akaghisa, nangana leka omundu wosi-wosi iniakughana.’

Adamu na Eva babere babirihalya, Sitani mwahakanisya athi Yehova?

Ni kwenene ebinywe ebi ebye nyine-nyine sibiri omwa Biblia. Aliriryo thukabya thukasoma oku Yobu, kikalhangirika ndeke-ndeke ngoku Sitani mwabwira Nyamuhanga y’ebinywe ebiri ng’ebi. Yobu eribya muthaleghulha oku Nyamuhanga kutse eyihi, w’abya mwatsi mukulhu embere sya Sitani kuthya na Yehova. Thusukule esura 1 n’eya 2 omwa syo Biblia syethu thwanalebya ekyabya.

Wulhangire omwa sura 1 ngoku Sitani nayu akasa abamalaika bakasyahindana embere sya Yehova elhubulha. Neryo Yehova akabulhaya Sitani athi: ‘Wukalhua hayi kwehi?’ Sitani akasubiraya athi alhue iniane muthimba-thimba omwa kihugho. Neryo Yehova  akabulhaya athi: ‘Wanabiri lhangira Yobu ngoku akanyikolera kandi ngoku athakolha ekibi?’Yobu 1:6-8.

Aho n’aho Sitani akalhua iniayihambulya athi, ‘Yobu akakuramaya kundi syawithe ekitsibu kyosi-kyosi. Wamathendi mutheya n’erilekeraho erimutsumulha, iniakendi kutsuma embere sy’obusu bwawu.’ Neryo Yehova akasubiraya athi: ‘Kale, Sitani, wangana kolha ekyosi-kyosi ekya wanzire, aliwe si wuhuthalhaye Yobu.’Yobu 1:9-12.

Ni kyahi ekya Sitani akakolha?— Akalhangira athi abandu bak’iba esyonde n’esyopunda sya Yobu n’er’itha abalisya basyo. Neryo akarabyo kakabalhuka, er’itha esyombuli n’abakasilisaya. Enyuma waho, abandu bakasy’iba esyongamiya n’er’itha abakasithegheya. Erighunzerera, Sitani akaleka ihahitha ekiyagha kinene ekikatheraya enyumba eyiri mw’abaana ba Yobu ikumi, n’er’itha abosi. Ebyosi ebi nomubyanamabya, Yobu akalholha embere erikolera Yehova.Yobu 1:13-22.

Yehova akabya akathasyalhangira Sitani, Yehova akamubwira ngoku Yobu akine muthaleghulha. Sitani akayihambulhaya athi: ‘Wamanyilighira erihuthalya Yobu, iniakendi kutsuma embere sy’obusu bwawu.’ Neryo Yehova akaleka Sitani ahuthalhaye omubiri wa Yobu aliriryo akamukunga athi sy’ithe Yobu.

Yobu mwayiyinirya ki, kandi busana naki eki mukya tsemesya Nyamuhanga?

 Sitani akalethera Yobu y’obulhwere obukaleka omubiri wiwe owosi iniahutangika kw’ebimatha. Ebimatha ebi bikabeha kutsibu erileka abandu ibathanza eribya hakuhi nayu. Nibya na mukali wiwe akabugha athi: ‘Wutsume Nyamuhanga wuhole.’ N’abakabya nga ni banywani ba Yobu bakasyamulebaya n’erileka inayowa nabi bakamubwira bathi akathekawa eribya iniabirikolha ebibi ebikaleka iniaghalhwa kutsibu athya. Aliriryo Sitani nomwanamaghalya Yobu y’athya, Yobu akalholha embere erikolera Yehova omwa buthaleghulha.Yobu 2:1-13; 7:5; 19:13-20.

Wukalengekanaya obuthaleghulha bwa Yobu mubwaleka Yehova iniayowa athi?— Mubwaleka Yehova iniatsema kundi mwabwira Sitani athi: ‘Thungerera Yobu! Akanyikolera kundi anzire erinyikolera.’ Wune mwendibya nga Yobu, omundu oyo Yehova anga kangania ng’eky’erileberyako ekikakanganaya Sitani ngoku ni mubehi?— Kwenene, thuwithe olhusunzo olhw’eriha eky’erisubirya okwa ebya Sitani akabugha athi angana leka omundu wosi-wosi inialeka erikolera Yehova. Erithwalira haghuma Yesu nayu mwalhangira ini lhusunzo.

Omukangirirya Mukulhu mwathalighira Sitani akaleka akakolha ekibi kyosi-kyosi. Thalengekania eky’erileberyako kiwe nga mukya tsemesya Thatha wiwe ya kithi! Yehova iniangana kangania Yesu n’erisubirya Sitani athi: ‘Thungerera Mughalha waghe! Abiribya iniane muthaleghulha okw’ingye kundi anyanzire!’ Kandi thalengekania okwa butseme obwa Yesu angabya iniawithe busana n’eritsemesya Thatha wiwe. Busana n’etseme eyo, Yesu mwayiyinirya olhuholho okwa muthi w’eriaghalya.Abaebrania 12:2.

Wunanzire eribya ng’Omukangirirya Mukulhu neryo wanga tsemesya Yehova?— Kwesi wulhole embere eriminya ebya Yehova anzire iwakolha, kandi wumutsemesaye omw’ikolhabyo!

Soma ebya Yesu akolha eritsemesya Nyamuhanga nethu ebya thwanga kolha, omwa Emisyo 23:22-25; Yoane 5:30; 6:38; 8:28; na 2 Yoane 4.