Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Ighira Okwa Mukangirirya Mukulhu

 ESURA 47

Ngoku Thwanga Minya e Harmagedoni kwa Yiri Hakuhi

Ngoku Thwanga Minya e Harmagedoni kwa Yiri Hakuhi

WUNASI ekiminyikalho nga niki?— Omwa Sura 46 muthukana soma okwa kiminyikalho ekya Nyamuhanga ahiraho erikangania ngoku syendi syaswathoghothya ekihugho ky’omw’amaghetse. Abakwenda nabu mubasaba Yesu y’ekiminyikalho ekyangalekire ibaminya ngoku abirisubulha kandi ngoku enduli y’ekihugho yiri hakuhi.Matayo 24:3.

Kundi Yesu angabere isyali lhangirawa iniane elhubulha, ekiminyikalho ekya abandu banga lhangire mukya yithaghisibwa erikangania ngoku abiritsuka erithabalha. Neryo Yesu mwakania okwa bindu ebya abigha biwe batholere ibalindirira okwa kihugho kwa hano. Ebindu ebi byangabere bikabya, kyanga kanganirye ngoku abirisubulha kandi ngoku abiritsuka erithabalha ng’Omwami elhubulha.

Erikangirirya abigha biwe ngoku ni kikulhu eribya ibanatheghirye,  Yesu mwababwira athi: ‘Mulebaye omuthi w’omuthini n’emithi yosi. Omughulhu yikathoghaya ebikoma byayo, wukalhangirayo n’eriminyerera omughulhu w’omwisi kwali hakuhi.’ Wanganaminya ngoku obuthuku bw’omwisi buli hakuhi. Kandi wanganaminya ngoku e Harmagedoni yiri hakuhi wukalhangira ebya Yesu akanayako bikabya.Luka 21:29, 30.

N’isomoki erya Yesu akangiriraya akakania okwa muthi w’omuthini?

Okwa lhupapura lhuno n’olhukakwamako, thukendi lebya ebisasani eby’ebindu ebya Yesu abugha athi byangabere bighuma by’okwa kiminyikalho  ekikakanganaya ngoku Obwami bwa Nyamuhanga buli hakuhi. Ebindu ebyosi bikendi syabya byabiribya, Kristo ng’Omuthabali ow’Obwami bwa Nyamuhanga akendi syathulhanga awandi mathabali awosi, ngoku thwasoma omwa Sura 46.

Busana n’ekyo, lebaya ndeke ebisasani ebiri okwa lhupapura 245 na 246, n’enyuma waho thukendi bikaniako. Omu Matayo 24:6-14 na Luka 21:9-11, wangana soma okwa ebya wamalhangira omwa bisasani ebi. Kandi wuminye ngoku obuli kisasani kune enamba. Enamba iyaneyo yikabanika okwa buli itsuka ly’akatsweka akakakanaya okwa kisasani ekyo. Hathya thulebaye ebingyi by’okwa kiminyikalho ekya Yesu aha nga bine mubererera munabwire.

(1) Yesu mwabugha athi: ‘Mwasyowa engulhu y’amalhwa n’olhombi lhw’amalhwa; ekihanda kyasyalhwa n’ekindi kihanda, n’obwami bwasyalhwa n’obundi bwami.’ Wune wowa engulhu y’amalhwa?— Olhuhi olhw’erimbere olhw’ekihugho kyosi lhwa tsuka 1914 erihika 1918, neryo Olhuhi olhw’Ekihugho Kyosi olhwa kabiri lhwamakwamako, eritsuka 1939 erihika 1945. Habya isihali hathabya olhuhi olhw’ekihugho kyosi! Lino esyonyuhi siri omwa kihugho kyosi. Kikabya nga kiri indi obuli kiro okwa tivi, okwa radio, n’omwa syombapura sy’amakuru, thukowa kutse erisoma okwa syonyuhi.

(2) Kandi Yesu mwabugha athi: ‘Hasyabya esyonzalha ehandi n’ehandi.’ Ngoku wunasi, sibugha indi obuli mundu awithe ebyalya ebikaghunza. Obuli kiro esyonkumi n’esyonkumi sy’abandu bakaholha kundi sibawithe byalya.

(3) Yesu mwongera athi: ‘Hasyabya esyondwalha ehosi.’ Esyondwalha ng’esi sikitha abandu bangyi. Obulhwere obukalire obw’ekihinzi ekikahulhawa mwa Spanish flu mubwitha abandu abahikire esyomiliyoni 20 omwa mwaka mughuma. Omwa buthuku buno abandu abalhabire aba obundi akabonde kakendi bitha. Kandi hane obulhwere obw’ekansa, obw’omuthima, n’awandi malhwere aw’akitha esyonkumi n’esyonkumi sy’abandu obuli mwaka.

 (4) Yesu mwabugha ekindi kindu ky’okwa kiminyikalho athi: ‘Hasyabya emisiki ehandi n’ehandi.’ Wunasi omusiki nga niki?— Omusiki akasuka-sukanaya ekithaka. Amanyumba akathera, kandi mughulhu mungyi akaleka abandu ibakwa. Erilhua 1914, habiribya emisiki mingyi obuli mwaka. Wune wowa engulhu ey’emisiki?—

(5) Yesu mwabugha athi ekindi kindu eky’okwa kiminyikalho kyangabere ‘erikanyirira ly’ebibi.’ Kyakikaleka ihabya obwibi bungyi n’obwithi. Abandu ehosi-hosi bakubaha bathi omundu angana thulha amanyumba wabu n’eribiba. Sihali hathabya erithwa ebihano n’obwithi omwa kihugho kyosi ngoku biri lino.

(6) Yesu mwahulha ekindu kikulhu eky’okwa kiminyikalho akabugha athi: ‘Engulhu yuwene y’obwami eyi yasyatsuka erithulhughanibwa omwa kihugho kyosi busana n’eriminyisya ebihanda byosi, neryo enduli yasyahika.’ (Matayo 24:14) Wamaligha ‘engulhu yuwene eyi,’ wutholere iwabwira y’abandi. Omwa nzira eyi, iwangana sangira omw’iberererya ekitsweka ky’okwa kiminyikalho eki.

Abandi bandu bangana bugha bathi ebindu ebya Yesu alhaghulha byanabyaho erilhua kera. Aliriryo ebindu ebyosi ebi sibiri byathabya ngoku bikabya lino omwa bitsweka bingyi eby’ekihugho kandi ebyosi ibyabya okwa ndambi nguma. Neryo wanamaminya ekiminyikalho nga niki?— Kikamanyisaya kithi thukabya thukalhangira ebyosi ebi bikabya, kikakanganaya kithi ekihugho kihya-kihya kya Nyamuhanga kikisiya ikyasuba omw’omwanya w’ekihugho kibi kino.

Yesu abere akaha ekiminyikalho eki, mwathasyakania okwa buthuku bw’embaghane omw’omwaka. Mwabugha athi: ‘Musabe Nyamuhanga muthi erisagha lyenyu siribye okwa mughulhu w’eritsuku.’ (Matayo 24:20) Wukalengekanaya amanyisaya ki?—

Ni kyahi ekyangabya omundu amabya w’eribalha okwa kitsinduli ekikabya omwa buthuku bw’eritsuku, ni bugha mbu obw’embeho nene, obuthuku kyangabya ikikalire erighenda?— Amabalha, iniakendibya  iniabiriaghalhwa kutsibu. Sikyangabya ky’obulighe ekitsinduli ng’eki kyam’itha omundu kundi mwakayisulhusuthaya omwa yindi mibiiri erileka iniathatsuka olhughendo lhwiwe lhwa lhuba?—

Omughulhu Yesu akanaya okw’ithibitha omwa buthuku bw’eritsuku, akangiriraya isomo ki?

Wana malhangira enzumwa eya Yesu akanganaya akakania okw’ithibitha lhuba eritsuku lithe lya tsuka?— Abya akathubwira athi kundi thunasi e Harmagedoni kwa yiri hakuhi, thutholere ithwa kangania omwa byalhuba ngoku thwanzire Nyamuhanga omw’imukolera. Thwama lindirirya, obuthuku ibwangana hwayo isithuli thwakolha ekindu kyosi-kyosi. Neryo ithukendibya ng’abandu ab’omwa buthuku bw’Eribogha ly’amaghetse abahulikirira erikunga lya Noa aliriryo bamaghana eringira omw’obwathu.

Omwa sura eyikakwamako, thukendi syakania okwa bikendi syabya olhuhi lhunene olhwa Harmagedoni lhwahwa. Thukendi sy’igha okwa ebya Nyamuhanga atheghekere abosi abamwanzire n’erimukolera lino.

Amasako awandi awakakanganaya ngoku e Harmagedoni yiri hakuhi wano: 2 Timoteo 3:1-5 na 2 Petero 3:3, 4.