Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Ighira Okwa Mukangirirya Mukulhu

 ESURA 22

Busana Naki Sithutholere Thukabiha?

Busana Naki Sithutholere Thukabiha?

THUTHABUGHA thuthi omwana-mutho amabwira mama wiwe athi: “Ku ngane mwendyasa indya esaha y’erilhua okwa sukuru yikahika.” Aliriryo iniasiba eyo akasatha n’abanywani biwe, neryo iniasa n’eribwira mama wiwe athi: “Omusomesya mwakaleka ingasiba okwa sukuru.” Kina hikire iyo eribugha athya?—

Omulhwana oyu akolire kibi ki?

Kutse obundi omulhwana iniabwira thatha wiwe athi: “Mundasambira omupira w’omwa nyumba.” Kandi ibbwa amabya imwakanakikolha? Mbwino kyanganabya kibi amabugha athi mwathakikolha?—

Omukangirirya Mukulhu mwathubwira ekya thutholere ithwakolha. Mwabugha athi: ‘Muleke Inga yenyu yibye Inga, n’Eyihi yibye Eyihi, ebirengire ebi ni by’omubi.’ (Matayo 5:37) Yesu amanyisaya ki akabugha ebi?— Amanyisaya athi thukole ebya thukabugha.

Omwa Biblia mune omwatsi owakakanganaya ngoku ni kikulhu eribugha ekwenene. Ahambire okw’abandu babiri ababugha bathi ni bigha ba Yesu. Thulebaye ekyabya.

 Habere hathe hahwa amezi abiri Yesu aliholire, abandu bangyi erilhua omwa bitsweka by’ehali mubasa e Yerusalemu okwa mukonga mukulhu ow’Abayuda owakahulhawa mwa Pentekote. Omukwenda Petero akaha omukania owuwene akabwira abandu ebihambire okwa Yesu, oyo Yehova alhubukaya. Oyu w’omurundi w’erimbere abandu bangyi abakasa e Yerusalemu eriowa oku Yesu. Bakanza eriminya bingyi ebihambire oku Yesu. Neryo ni kyahi ekya bakakolha?

Bakaghunza y’obuthuku bunene kwilhaba obwa balhue bakalengekania. Aliriryo, hamabya hahwa buthuku bulebe, esyosente sy’abandi syamahwa, neryo bamayithagha obuwathikya nuku banga ghulha eby’erirya. Abigha abali e Yerusalemu bakanza eriwathikya abagheni. Neryo, abangyi b’okw’ibo bamaghulya ebindu ebya bawitheko n’eriletha esyosente eyiri abakwenda ba Yesu. Neryo abakwenda bamaha abakayithagha obuwathikya b’esyosente.

Anania na mukali wiwe, Safira, abaghuma b’okwa Kithunga ky’Ekikrisitayo ekye Yerusalemu, bakaghulhaya ekithaka kyabu. Sihali oyuwamababwira athi bakighulhaye. N’ibo bakayithwiramu. Aliriryo sibali kolha eki kundi banzire abigha ba Yesu abahya-bahya. Erithwalira  haghuma, Anania na Safira bakanza abandu balengekanaye bathi ni babuya kwilhaba ngoku bali. Neryo bakathwamu eribugha bathi bakendi hayo esyosente esyosi eriwathikya abandi. Aliriryo bakendi hayo embindi ya kusyo n’eribugha bathi bamahayo esyosi. Eki wukakilhangira wuthi?—

Neryo Anania akasa eyiri abakwenda n’eribaha esyosente. Nomwabine, Nyamuhanga analhangire ngoku syathahayo esyosi. Neryo Nyamuhanga akabisulira omukwenda Petero ngoku Anania syathakania ekwenene.

Ni mabehi wahi awa Anania akabwira Petero?

Neryo Petero akabugha athi: ‘Anania, busana naki wamalighira Sitani erileka iwakolha eki? Ekithaka kilhue kyawu. Sihalhue oyulyakukaka athi wukighulhaye. Kandi nibya wulyendibya wabirikighulya, wulyendi thwamu ngoku wanga kolesya esyosente. Aliriryo ekikaleka iwayiringirirania nga wabirihayo esyosente esyosi kandi nibya iwaherayo embindi yasyo niki? Busana n’eki, siwathathutheba, aliriryo wamatheba Nyamuhanga.’

Oyu si mwatsi w’amasatha. Anania akabiha! Syali kolha eby’akabugha athi akakolha. Akayiringiranaya ngane mubikolha. E Biblia yikathubwira ekikakwamako. Yikabugha yithi: ‘Anania akabya owa ebinywe bya Petero ebi, akawa ahisi n’eriholha.’ Nyamuhanga akitha Anania! Enyuma waho, bakamuhekera eyihya n’eriyamutsika.

Ni kyahi ekikahika okwa Anania busana n’erithulha amabehi?

 Hakabya hahwa saha isathu, mukali wiwe, Safira, akasa. Syasi ekyabere okwa mwira wiwe. Neryo Petero akamubulhaya: ‘Esyosente esya mulyathuha syasinalyalhua okwa kithaka ekya mulyaghulhaya?’

Safira akasubamu athi: ‘Ee, syanesyo.’ Aliriryo ekyo akabugha ni mabehi! Mubabisa okwa syosente esiryalhua okwa kithaka. Neryo Nyamuhanga akitha na Safira.Emibiri 5:1-11.

Ni kyahi ekya thutholere ithw’ighira okwa kyabya kyabere okwa Anania na Safira?— Kikathweghesaya ngoku Nyamuhanga syalianza ababehi. Akanza ithwa thulha ekwenene mughulhu wosi. Aliriryo abandu bangyi bakabugha bathi sikibi eribugha amabehi. Wukalengekanaya abandu aba banahikire?— Wunalhue wasi ngoku amalhwere wosi, obulhumi, n’olhuholho ngoku byasa okwa kihugho busana n’eribiha?—

Yesu mwabugha athi nindi oyuwatsuka eribiha, n’ekyabya kyalhwiririremu ni kyahi?

Wibuke ngoku Diabolo mwatheba omukali w’erimbere, Eva. Mwamubwira athi syendi syaholha amathendyowa Nyamuhanga n’erirya okwa kighuma ekya Nyamuhanga amubwira athi isyalya. Eva mwikirirya Diabolo neryo amalya ekighuma. Mwathebererya na Adamu, nayu amalya. Neryo abosi mubabya bakolha nabi, n’abaana babu abosi banga buthirwe ini bakolha-nabi. Neryo kundi abaana ba Adamu mubabya bakolha-nabi, abosi mubaghalhwa n’eriholha. Ebitsibu ebyosi ebi byatsuka bithi?— Amabehi ya nzuko yabyo.

Kwesi ky’ekyaleka Yesu iniabugha athi Diabolo “ni mubehi kandi n’ise w’amabehi!” Yuwabya w’erimbere eribugha amabehi. Omundu amabugha amabehi, akabya iniakakolha ekya Diabolo akolha erimbere. Thutholere ithwa lengekania okw’eki thwamalengwako erianza erithulha amabehi.Yoane 8:44.

Ni mughulhu wahi wanga lengwako eribiha?

 Ni mughulhu wahi wanga yowa iwukanza erithulha amabehi?— Mw’omughulhu wabirisobya?—Nomuwangabya isiwulyakighenderera, wangana thulha eglasi kutse ekindu kirebe. Bamakubulya nga nindi oyulyakithulha, iwune mwendi bugha wuthi ni mughalha wenyu kutse mwali wenyu? Kutse wunatholere eriyiringirirania nga siwasi ekyabere?—Kandi ibbwa wamabya iwulhue wutholere iwakolha omubiiri wawu ow’esukuru ow’erikolera eka aliriryo imuwuthaghunza gho? Wunatholere iwabugha wuthi muwukaghunza owosi nibya isi wuthaghunza gho?— Thutholere ithwibuka Anania na Safira. Mubathabugha ekwenene eyosi. Kandi Nyamuhanga mwakangania ngoku ekyo ni kibi ekikalire ak’ithabo.

Neryo nomuthwanga kolha ekindu ekisosire kithi, mughulhu wosi, ithukendi leka emyatsi iyakalha thwamabiha, kandi nibya thutholere ithwa thulha ekwenene yosi. E Biblia yikabugha yithi: ‘Bugha eby’ekwenene.’ Kandi yithi: “Muleke eribihirana.” Yehova akakanaya ekwenene mughulhu wosi, kandi akanza nethu ikuthwa kolha thuthya.Abanya Efeso 4:25; Abanya Kolosai 3:9.

Thutholere ithwa bugha ekwenene mughulhu wosi. Eyo y’enzumwa eyiri omwa Eriluayo 20:16; Emisyo 6:16-19; 12:19; 14:5; 16:6; na Abaebrania 4:13.