Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Ighira Okwa Mukangirirya Mukulhu

 ESURA 7

Eribya Mwowa Likakutheghaya

Eribya Mwowa Likakutheghaya

MBWINO wangana tsema wamakolha ekindu kyosi-kyosi ekya wanzire? Hakanabya obuthuku iwayowa isiwanzire omundu wosi-wosi akakubwira eky’erikolha. Omw’okwenene, thambwira ekya wukalengekania.—

Busana naki wutholere iwahulikirira abandu bakulhu?

Aliriryo ni kyahi ekya wanzire? Kwenene nina ky’amenge erikolha ekyosi-kyosi ekya wanzire? Kutse mukalhwiririra ebibuya wamowa thatha wawu na mama wawu?— Nyamuhanga akabugha athi wutholere iwowa ababuthi bawu, busana n’ekyo hakathekawa eribya ihane enzumwa mbuya eyikaleka. Thulebaye enzumwa eyi nga ni yahi.

Wuwithe emyaka mingahi?— Wunasi thatha wawu nga withe emyaka mingahi?— Mama wawu kutse mukaka wawu kutse sukulhu wawu awithe emyaka mingahi?— Babiribyaho mughulhu muuli kwilhaba iwe. Omundu akabya anemwongera erikulha, akongera eriminya bingyi. Akowa emyatsi mingyi, inialhangira ebindu bingyi, kandi iniakolha ebindu bingyi obuli mwaka. Busana n’ekyo, abalere bangan’ighira okw’abakulhu.

Wunasi omwana omulere okw’iwe?— Wunasi emyatsi mingyi kwilhaba iyo?— Busana naki wasi bingyi kwilhaba iyo?— Kundi wuli mukulhu okw’iyo. Wamabirighunza buthuku  bunene iwune mwigha emyatsi mingyi kwilhaba oyukine mulere okw’iwe.

Nindi oyuwabiribyaho kwilhaba iwe kutse ingye kutse owundi mundu wosi-wosi?— Ni Yehova Nyamuhanga. Asi bingyi kutsibu kwilhaba iwe, kandi asi bingyi kwilhaba ingye. Amathubwira athi thukole ekindu kyosi-kyosi, thutholere ithwaminya ngoku kya kitholere erikolhwa, nomukyangabya ikikalire erikolha. Wunalhue wasi n’Omukangirirya Mukulhu ngoku mwanabana ikikalire eribya mwowa?—

Kiro kighuma Nyamuhanga mwabwira Yesu athi akole ekindu ekikalire. Yesu mwakihira omwa misabe, ngoku wamalhangira hano. Mwasaba athi: ‘Wamanza, wunyilhusaye kw’ekindu ekikalire eki.’ Yesu erisaba athya, akanganaya ngoku sikilhobire mughulhu wosi erikolha erisonda lya Nyamuhanga. Aliriryo Yesu mwaghunzerera omusabe wiwe wathi? Wunasi?—

Thuk’igha ki omw’isaba lya Yesu?

Yesu mwaghunzerera omusabe wiwe athi: ‘Nikwa erisonda lyawu butsira eryaghe, lyo likolhawe.’ (Luka 22:41, 42) Kwenene, abya anzire erisonda lya Nyamuhanga iryakolhwa butsira eriwe. Neryo mwalholha embere erikolha ekya Nyamuhanga abya anzire omwakanya k’erikolha ekyabya akalengekania athi kya kitholere.

Eki kikathweghesaya ki?— Kikathweghesaya ngoku thutholere mughulhu wosi erikolha ekya Nyamuhanga akabugha athi thukole, nomukyangabya nga kikalire. Aliriryo kikathasya thweghesaya ekindi kindu. Wunasi nga ni kyahi?— Kikathweghesaya ngoku Nyamuhanga na Yesu si mundu mughuma, ngoku abandi bandu bakabugha. Nyamuhanga Yehova ni mukulhu kandi asi bingyi kwilhaba Mughalha wiwe, Yesu.

Omughulhu thukowa Nyamuhanga, thukakanganaya ngoku thumwanzire. E Biblia yikabugha yithi: “Erianza Nyamuhanga ni kwama ebihano  biwe, kandi ebihano biwe sibikalire.” (1 Yoane 5:3) Busana n’ekyo, wangana kilhangira ngoku ithwe abosi thutholere ithwowa Nyamuhanga. Wanzire iwamwowa, kwa bithe?—

Thusukule e Biblia yethu thwanalebya ekya Nyamuhanga akabwira abaana athi bakole. Thukendi soma ekye Biblia yikabugha omwa Abanya Efeso sura 6, omulhondo owa 1, 2, n’owa 3. Hakabugha hathi: ‘Abaana, mwowe abathatha n’abakoyo wenyu busana n’Omukama, kusangwa kwa litholere lithya. Ekihano ky’erimbere ekiwithe erilhaghana lya Nyamuhanga kithi, Wusikaye thatha wawu na koyo wawu, emyatsi yawu yithoke eryuwene, na kandi iwathoka erighunza biro binene omwa kihugho.’

Wanamalhangira, Nyamuhanga Yehova iyuwene-wene ya kakubwira athi wowe thatha wawu na mama wawu. Kikamanyisaya ki ‘eribowa’? Kikamanyisaya kithi wutholere iwabasikya. Kandi Nyamuhanga akalhaghanisaya athi wamowa ababuthi bawu, ‘emyatsi yawu iyikendi thoka eryuwana.’

Leka nga thakubwire omwatsi owahambire okw’abandu abalhamibawa busana n’eribya bowa. Abandu aba babyaho kera omwa muyi munene owe Yerusalemu. Abandu bangyi ababya omwa muyi mubatha hulikirira Nyamuhanga, busana n’ekyo Yesu mwababwira athi Nyamuhanga akendi thoghothya omuyi wabu oyo. Kandi Yesu mwababwira ngoku banga lhama bamakolha ebibuya. Mwabugha athi: ‘Omughulhu mukalhangira e Yerusalemu iyinathimbirweko abasirikali, neryo imwaminya erihera lye Yerusalemu ko lyamahika hakuhi. Okwa mughulhu oyo abali e Yerusalemu basaghire okwa bithwe.’Luka 21:20-22.

Eriowa ekihano kya Yesu mulyalhamya lithi abandu?

Ngoku Yesu abugha, abasirikali mubasyathimba okwa muyi we Yerusalemu. Abasirikali be Roma mubaghothera gho. Enyuma waho, ahabw’enzumwa ndebe, abasirikali mubasubayo. Abandu bangyi mubalengekania bathi sihakiri butsibu. Neryo mubathalhua omwa muyi. Aliriryo ni kyahi ekya Yesu asangawa iniabiribabwira athi bakole?— Wanga kolire ki kuwabya e Yerusalemu?— Ababya bikirirye Yesu mubasighania emiyi yabu bamathibitha omwa bithwe ebiri hali okwa Yerusalemu.

 Omwaka w’erimbere mwahwa, e Yerusalemu isiyathabana ekitsibu kyosi-kyosi. Owakabiri amahwa isihathabanika ekindu kyosi-kyosi. N’owakasathu amahwa isihathabya ki. Abandu bangabya imubalengekania bathi abathibitha babya bakiru. Aliriryo, omw’omwaka owakani, abasirikali abe Roma mubasubulha. Kandi mubaghothera e Yerusalemu eyosi. Lero kyabya isikyanga thasyathokekana erilhua omwa muyi. Neryo abasirikali mubathoghothya gho. Abandu bangyi ababya omwa muyi mubakwa, abasighalha mubabathwalha ng’abanya ngomo.

Kandi ibbwa abowa ebya Yesu abugha?— Mubalhama. Sibabya hakuhi ne Yerusalemu. Busana n’ekyo mubathakwa ki. Eribya bowa mulyabatheya.

Wamabya mwowa, ekyo kine mwendi kutheya?— Ababuthi bawu bangana kubwira bathi isiwasathira omwa nzira kutse omwa lhusi. Busana naki bakakubwira ekyo?— Kundi ematoka yangana kutomera kutse  olhusi ilhwa kusendya. Aliriryo hangana yira iwalengekania: ‘Esaha eno siyiri esyomatoka. Sihali ekikendibya. Abandi bana bakana sathira omwa nzira kutse omwa lhusi, sindi nathalhangira ekikababyako.’

Busana naki wutholere iwabya mwowa nomuwangabya isiwathalhangira akabi?

Abandu bangyi ababya omwa Yerusalemu ku balengekanaya bathya. Abasirikali abe Roma babere babirisubayo, muhabya nga sihakiri obutsibu. Mubalhangira abandi ibane omwa muyi. Busana n’ekyo mubathanza erilhua mugho. Babya ibabirikungwa, aliriryo mubathahulikirira. Ekyabya kyalhwiririremu, mubaherya esyongebe syabu.

Thulebaye ekindi ky’erileberyako. Wune wathasatha omwa busungu?— Kyanganabya nga kikatsemesaya wukalhangira omuliro wukakya akasungu. Aliriryo erisatha omwa busungu mwangana lhwiririra akabi. Enyumba yosi yanganahya, nawu iwaholha!

Wibuke ngoku sikiri ghunza eribya mwowa ahabw’obuthuku bulebe busa. Aliriryo wamabya mwowa mughulhu wosi, ekyo ekikendi kutheya. Kandi nindi oyukakubwira athi, ‘Abaana, mwowe ababuthi benyu’?— Ni Nyamuhanga. Kandi wibuke ngoku akabugha ekyo kundi akwanzire.

Lino soma amasako ano awakakanganaya omughaso ow’eribya mwowa: Emisyo 23:22; Omugambuli 12:13; Isaya 48:17, 18; na Abanya Kolosai 3:20.