Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Ighira Okwa Mukangirirya Mukulhu

 ESURA 16

Eky’omughaso Munene Ni Kyahi?

Eky’omughaso Munene Ni Kyahi?

Omulhume oyu abya awithe kitsibu ki?

KIRO kighuma omulhume mwasyalebya Yesu. Abya inianasi ngoku Yesu abya awithe amenge manene kutsibu, neryo mwabwira Yesu athi: ‘Mukangirirya, wubwire mughalha wethu wuthi thughabane ebindu ebya awithe.’ Omulhume abya anzire inimya okwa bindu ebyo.

Kuwabya in’iwe Yesu, wanga subirye wuthi ki?— Yesu mwalhangira ngoku omulhume awithe ekitsibu. Aliriryo si bugha indi abya akayithagha ebindu bya mughalha wabu. Ekitsibu kiwe syabya asi ekindu ky’omughaso munene omwa ngebe.

Thulengekanaye okwa kino. Ni kyahi ekyathutholere ithwalhangira mw’eky’omughaso munene? Ly’eribya n’ebindu eby’erisathisya ebyuwene, esyongyimba nyihya-nyihya kutse ebindi bindu ng’ebi?— Eyihi, hane ekindu eky’omughaso munene kutsibu. Kandi eyi y’enzumwa eya Yesu anza erikangirirya. Neryo mwaya olhughano olhuhambire okwa mulhume oyuw’ibirirawa Nyamuhanga. Wunanzire eriowa lho?—

Omulhume ono abya mughuda kutsibu. Abya awithe amalima n’ebighona. Ebirimwa ebya ahera mubyahetha kutsibu. Syabya awithe omwanya omwa bighona biwe ah’eribika eby’eraya. Neryo anga kolire ki? Mwayibwira athi: ‘Ngendi himbulha ebighona byaghe, inahimbabyo mwa binene-binene. Neryo nasyabika ebyalya byaghe n’ebindu byaghe omwa bighona bihya-bihya ebi.’

 Omulhume omughuda mwalengekania athi eki ky’ekindu ekitholere erikolhwa. Mwalengekania athi ni ky’amenge eriyibikira ebindu binene. Mwayibwira athi: ‘Ngawithe ebindu binene busana n’emyaka mingyi. Lino nangana humulha. Ngend’irya, ingapulya, ingayitsemesya.’ Aliriryo amalengekania aw’omulhume omughuda oyu syabya ahikire. Wunasi nga ni busana naki?— Abya akayilengekaniako iyuwene n’etseme yiwe. Mw’ibirirwa Nyamuhanga.

Omulhume ow’ebindu oyu akalengekanaya okuki?

Neryo Nyamuhanga mwabwira omulhume w’ebindu athi: ‘Iwe mukiru. Wukendi holha munabwire. Nindi oyukendimya ebindu ebya wabiribika?’ Omulhume ow’ebindu oyu angana kolesirye ebindu biwe ebi abiriholha?— Eyihi, owundi mundu angabimirye. Yesu mwabugha athi: ‘Omundu oyukayibikira ebindu kwali athya, nikwa si mughuda embere sya Nyamuhanga.’Luka 12:13-21.

Siwanzire eribya ng’omulhume ow’ebindu oyu, kwa bithe?— Ekilhubirirwa kiwe kikulhu lyabya iry’eribana ebindu by’omubiri. Ekyo kyabya kindu ky’obukiru. Mughulhu wosi abya anzire eribana bindu bingyi. Aliriryo ‘syabya mughuda embere sya Nyamuhanga.’

 Abandu bangyi bali ng’omulhume w’ebindu oyo. Bakabera erianza eryongera okwa bya bawithe. Aliriryo eki kyangana lhwiririra mw’ebitsibu binene. Ng’eky’erileberyako, mbwino wunawithe ebindu eby’erisathisya?— Ni bindu byahi eby’erisathisya ebya wuwithe? Mbwire.— Kandi ibbwa omughuma w’okw’abanywani bawu amabya iniawithe omupira kutse edole kutse ebindi bindu eby’erisathisya kandi iwe isiwubiwithe? Mbwino kyanganabya kibuya erihathikana ababuthi bawu wuthi bakughulirebyo?—

Obundi buthuku ekindu ky’erisathisya kyanganabya nga ni ky’omughaso munene. Aliriryo kikasosa kithi habirihwa obuthuku?— Kikakulha. Kyangana sambukalha, neryo iwabya isi wukikyanzire. Omwa kwenene wuwithe ekindu eky’obughuli bunene ekilengire ebindu by’erisathisya. Wunasi nga ni kyahi?—

Ni kindu ki ekya wuwithe ekirengire ebindu by’erisathisya?

Y’engebe yawu. Engebe yawu ni y’omughaso munene kundi wuthe nayu sihali ekya wangakolha. Aliriryo engebe yawu yiseghemere okw’ikolha ebikatsemesaya Nyamuhanga, kwa bithe?— Busana n’ekyo, sithubye ng’omundu w’ebindu omukiru oyuw’ibirirawa Nyamuhanga.

Si b’abaana basa abanga kolha ebindu by’obukiru ng’omundu w’ebindu oyo. N’abandu bangyi abakulire bangana kolha ekyo. Abandi b’okw’ibo  bakanza ibabana bindu bingyi kutsibu. Banganabya ibanawithe eby’erirya, eby’eryambalha, n’ah’erikesya. Aliriryo ibanza eribana ebilhabire okw’ebyo. Ibanza esyongyimba nyingyi. Kandi bakanza esyonyumba nene-nene. Eribana ebindu ebi kikayithaghisaya esyosente. Neryo bakakolha kutsibu eribana syosente nyingyi. Kandi bakabya bane mwongera eribana esyosente nyingyi, kwa bakan’ongera bathya erianza eribana esilhabire aho.

Abandi bandu abakulire bakasulhusutha kutsibu bakasondya esyosente, ikyaleka ibabulha n’obuthuku obw’eribya haghuma n’eka yabu. Kandi sibawithire Nyamuhanga y’obuthuku. Esyosente syabu esi syangana baha engebe?— Eyihi, si syanga bahayo. Bangana kolesya esyosente syabu babiriholha?— Eyihi, kundi abaholire sibanga thoka erikolha kindu kyosi-kyosi.Omugambuli 9:5, 10.

Mbwino eki kikamanyisaya kithi eribya n’esyosente ni kibi?— Eyihi. Thwangana kolesya esyosente thukaghulha eby’erirya n’eby’eryambalha. E Biblia yikabugha yithi esyosente ni butheya. (Omugambuli 7:12) Aliriryo thwamanza esyosente sya kutsibu ithukendi bana ebitsibu ebikalire. Ithukendibya ng’omulhume w’ebindu omukiru oyuwayibikira ebindu kandi isi mughuda embere sya Nyamuhanga.

Kikamanyisayaki eribya mughuda embere sya Nyamuhanga?— Kikamanyisaya erihira Nyamuhanga y’embere omwa syongebe syethu. Abandi bandu bakabugha bathi bikirirye Nyamuhanga. Bakalengekanaya bathi erikwama ky’ikirirya lisa kya kikayithaghisibawa. Aliriryo, nina baghuda embere sya Nyamuhanga?— Eyihi, bali ng’omulhume w’ebindu oyuw’ibirirawa Nyamuhanga.

Yesu mwath’ibirirwa Thatha wiwe ow’elhubulha. Mwathalengesya erisondya esyosente nyingyi. Kandi syabya awithe bindu bingyi eby’omubiri. Yesu abya inianasi eky’omughaso munene omwa ngebe. Wunakyasi nga ni kyahi?— Ly’eribya mughuda embere sya Nyamuhanga.

Ni kyahi eky’omughaso munene eky’omwana oyu akakolha?

Thambwira, thwangabya thuthi baghuda embere sya Nyamuhanga?— Thwanganabya baghuda embere sya Nyamuhanga omw’ikolha ebikamutsemesaya. Yesu mwabugha athi: ‘Ngakolha ebiro byosi ebikamutsemesaya.’ (Yoane 8:29) Nyamuhanga akatsema thukakolha ebyanzire ithwa kolha.  Lino thambwira, ni bindu byahi ebya wanga kolha eritsemesya Nyamuhanga?— Ee, wangana soma e Biblia, iwaghenda okwa mihindano y’Ekikrisitayo, iwasaba Nyamuhanga, n’eriwathikya abandi erimw’ighako. Omwa kwenene, ebyo by’ebindu by’omughaso munene omwa ngebe.

Kundi Yesu abya mughuda embere sya Nyamuhanga, Yehova mwamutheya. Mwamuha ekihembo eky’eribyaho kera na kera. Nethu thwamabya nga Yesu, Yehova iniakendi thwanza n’erithutheya. Kwesi, thubye nga Yesu butsira ng’omulhume w’ebindu oyuw’ibirirawa Nyamuhanga.

Hano hane awandi masako awakakanganaya ngoku thwangabya n’amalengekania awuwene awahambire okwa bindu by’omubiri: Emisyo 23:4; 28:20; 1 Timoteo 6:6-10; na Abaebrania 13:5.