Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Ighira Okwa Mukangirirya Mukulhu

 ESURA 38

Ekyangaleka Ithwanza Yesu

Ekyangaleka Ithwanza Yesu

THATHERA akasasani iwune omw’obwathu obukadikira. Iwune mwendianza omundu akusabule?— Kandi ibbwa omundu amathwamu erihayo engebe yiwe busana n’erianza erikusabulha?— Ekyo kya Yesu Kristo abya akolire. Ngoku thw’igha omwa Sura 37, mwahayo engebe yiwe ng’embanulho nuku thulhamibawe.

Erithwalira haghuma, Yesu syali thusabulha omw’amaghetse. Akathusabulha kutse erithulhamya okuki? Wun’ibukire nga ni kyahi?— Ly’erithulhamya okwa kibi n’olhuholho ebya thwasighalhaya oku Adamu. Nomwakine indi abandu babirikolha ebindu bibi kutsibu, nabu Yesu mwabaholera. Wangana tsama engebe yawu erianza erilhamya abandu ng’aba?—

E Biblia yikabugha yithi: ‘Likalire busana n’omundu eriholera omundu oyuthunganene, nikwa, kwa muhwa omundu angana handa omuthima eriholera omundu mubuya.’ Nomwabine, e Biblia yikasoborera yithi Yesu ‘mwaholera abakolha-nabi.’ Nibya mwamuli n’abandu abathakolera Nyamuhanga! E Biblia yikathasyongera eribugha yithi: ‘Omughulhu thwabya thukine bakolha-nabi, Kristo mwathuholera.’Abanya Roma 5:6-8.

Wunasi omundu oyuwabya iniabirikolha ebindu bibi kutsibu athe abya mukwenda?— Omukwenda oyo mwahandika athi: ‘Kristo Yesu mwasa omwa kihugho busana n’erilhamya abakolha-nabi. Naghe indi mukolha-nabi kwilhaba abosi.’ Omukwenda oyuwabugha ebinywe ebi abya ini Paulo. Mwabugha athi abya ‘mukiru erimbere’ kandi athi iniakasiba omwa “myatsi mibi.”1 Timoteo 1:15; Tito 3:3.

Thalengekania Nyamuhanga ngabya awithe olhwanzo lhungahi akathuma Mughalha wiwe eriholera abandu abali bathya! Kisi sukulha e  Biblia yawu omu Yoane sura 3, omulhondo 16, wanga soma okw’eki. Hakabugha hathi: ‘Nyamuhanga mwanza ekihugho [ni bugha indi, abandu abikere okwa kihugho] ky’athya kyaleka iniaha Mughalha wiwe, ekyusa kiwe, neryo oyukamw’ikiriraya syahere nikwa abye n’engebe y’erikotha.’

Yesu mwaghalhwa athi akahayo engebe yiwe?

Yesu mwakangania ngoku athwanzire nga Thatha wiwe. Wangan’ibuka ngoku omwa Sura 30 ey’ekitabu kino, muthw’igha ngoku Yesu mwaghalhwa omw’ithumbi erya bamuhambiramu. Mubamuthwalha ewa Omuhereri Mukulhu Kayafa, eyo bakaniraya okwa musango wiwe. Mubaletha abema ab’amabehi abakendi hangirira Yesu, n’abandi mubamuswirya esyongumi. Eyi y’endambi eya Petero aghanira mwa Yesu. Hathya, thuthabya nga thuneho ebi bikakoleka.

Obuthuku bwamabirikya. Yesu syatha ghotsera omw’ithumbi lyosi. Kundi sibathabana ekyanga leka Yesu iniatswerwa, omwa byalhuba abahereri bakamuthwalha omw’ibughiro likulhu ery’Abayuda, erithasyakania okwa musango oyu. Bane omw’ibughiro, bakathasya hangirira Yesu bathi abirihalya oku Nyamuhanga.

Neryo abahereri bakabugha bathi Yesu abohawe, n’erimuthwalha ewa Pilato, omuthabali we Roma. Bakabwira Pilato bathi: ‘Yesu akahakanisaya obuthabali. Atholere in’ithibwa.’ Aliriryo Pilato akalhangira ngoku abahereri bakabugha amabehi. Neryo akababwira athi: ‘Singa thabana okw’omundu oyu kw’ekibi. Ngendi muboholha.’ Aliriryo abahereri n’abandi bakabugha omwa mulenge munene bathi: ‘Eyihi! Ithawe!’

Enyuma waho, Pilato akathasyalengaho eribwira abandu athi akalhwika Yesu. Aliriryo abahereri bakatsotsomereraya ekingungu ky’abandu bathi kibirikire kithi: ‘Wamaboholha omundu oyu, nawu iwukendibya iwukahanisaya obuthabali!’ Ithawe! Ekingungu kikongera erithera ebyughungu. Wunasi ekya Pilato akakolha?—

Eki kikaleka Pilato inialigha. Erimbere, akalhaghira athi Yesu aswiribawa. N’enyuma waho akamuhambaya abasirikali nuku bamwithe. Bakamwambalhaya embitha ey’amahwa n’erimusekerera omw’imunamira.  Neryo bakahekaya Yesu y’omuthi munene, erimuthwalha eyihya sy’omuyi ahakahulhawa mwa Gologota. Eyo, bakamukongomerera okwa muthi. Neryo bakasingika omuthi owabalya mukongomererako. Anemulhua mw’omusasi. Obulhumi ni bunene kutsibu.

Yesu syali holha aho n’aho. Akabya inianahanikirwe okwa muthi. Abahereri bakulhu bakamusekerera. N’abalhabi bakabugha bathi: ‘Wamabya iwuli mughalha wa Nyamuhanga, kima okwa muthi ow’eriaghalya!’ Aliriryo Yesu anasi ekya Thatha wiwe amuthuma erisyakolha. Anasi ngoku atholere iniahayo engebe yiwe eyihikene nuku thwanga bana akaghisa ak’eribana engebe y’erikotha. Erighunzerera, sikabya sikahika saha mwenda omw’ithungyi eryo, Yesu akalhakira Thatha  wiwe n’eriholha.Matayo 26:36–27:50; Mariko 15:1; Luka 22:39–23:46; Yoane 18:1–19:30.

Yesu kabya wa mbaghane oku Adamu! Adamu mwathakangania Nyamuhanga y’olhwanzo. Mwathakenga Nyamuhanga. Nibya nethu Adamu mwathathukangania olhwanzo. Kundi mwahalya, ithwe abosi thwabiributhirwa omwa kibi. Aliriryo Yesu mwakangania Nyamuhanga y’olhwanzo haghuma nethu. Iniakakenga Nyamuhanga mughulhu wosi. Kandi mwahayo engebe yiwe nuku anga lhusya h’akabi aka Adamu athwingirayamu.

Ni kyahi ekya thwanga kolha erikangania ngoku thwanzire Yesu?

Wukana sima ekindu kibuyanga ekya Yesu akolha?— Wukabya wukasaba Nyamuhanga, wukana musingaya busana n’erithuha Mughalha wiwe?— Omukwenda Paulo mwasima ebya Kristo amukolera. Paulo mwasakanga athi Mughalha wa Nyamuhanga ‘mwanyanza n’eriyihayo busana naghe.’ (Abanya Galatia 2:20) Yesu mwakuholera naghe kuthya. Mwahayo engebe yiwe nuku thwanga bana engebe ey’erikotha! Ahathe erithika-thika eyi ni nzumwa nkulhu eyanga leka ithwanza Yesu.

Omukwenda Paulo mwasakangira Abakrisitayo ababya omwa muyi we Korinto athi: ‘Olhwanzo lhwa Kristo lhukathuthabalhako.’ Olhwanzo lhwa Kristo lhukathuthabalhako lhuthi? Wukabugha wuthi ki?— Thahulikirira erisubirya lya Paulo: ‘Kristo mwaholha busana n’abosi, neryo abakabyaho sibabyeho busana nabo ibobene, nikwa babyeho busana n’oyuwaholerabo.’2 Abanya Korinto 5:14, 15.

 Wangana lengekania okwa syonzira esya wangakolesya erikangania ngoku wanzire Kristo?— Enzira nguma ly’eribwira abandi okwa ebya wabirigha oku Kristo. Kutse lengekanaya okwa kino: Wanganabya iwune iwuwene neryo mama wawu na thatha wawu ibathalhangira ebya wukakolha, kutse owundi mundu wosi-wosi iniathakulhangira. Iwune mwendi lebya esyondegheka esy’etivi kutse erilebya ebindu by’okwa Intaneti ebya wunasi ngoku bithe byanga tsemesya Yesu?— Wibuke ngoku Yesu lino ane elhubulha, kandi angana lhangira ebyosi ebya thukakolha!

Nindi oyuwanga lhangira ebyosi ebya thukakolha?

Eyindi nzumwa eyanga leka ithwanza Yesu yiri yithi thwanzire erigherererya Yehova. Yesu mwabugha athi: ‘Thatha waghe anyanzire.’ Wunasi ekikaleka inianza Yesu, nethu ekyanga leka ithwamwanza?— Kundi Yesu abyanzire eriholha nuku erisonda lya Nyamuhanga lyanga kolhwa. (Yoane 10:17) Kwesi thukole ekye Biblia yikathubwira kino: ‘Kusangwa muli baana banze ba Nyamuhanga mumugherereraye. Mukole ebyosi omw’olhwanzo, ngoku Kristo athwanza, kandi mwaha engebe yiwe busana nethu.’Abanya Efeso 5:1, 2.

Eryongera erisima Yesu n’ebya athukolera, kisi soma Yoane 3:35; 15:9, 10; na 1 Yoane 5:11, 12.