Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Ighira Okwa Mukangirirya Mukulhu

 ESURA 23

Ekikaleka Abandu Ibalhwalha

Ekikaleka Abandu Ibalhwalha

WUNASI omundu wosi-wosi oyulhwere?— Obundi nawu wukana lhwalha. Wangana lhwalha ekihumira, kutse iwakwa omwanda. Abandi bandu balhwere kutsibu. Sibanga thoka n’erimana ahathe oyukabawathikaya. Eki kikabya abandu bakakekelhuha.

Obuli mundu akalhwalha. Wunasi ekikaleka abandu ibalhwalha, ibakekelhuha, n’eriholha?— Kiro kighuma mubalethera Yesu y’omulhume oyuwabya isyanga thoka erilyatha, neryo Yesu mwakangania ekikaleka abandu ibalhwalha n’eriholha. Leka ngatha kubwira nga byabya bithi.

Yesu abya omwa nyumba eyiri omwa muyi owali hakuhi n’engetse ye Galilaya. Ekingungu ky’abandu mukyasa erisyamulebya. Neryo abandu bangyi mubingira omwa nyumba, mwamabya isimukiri omwanya. Nibya n’omundu isyangathoka erihika hakuhi n’olhuyi. Nomwabine, abandu mubongera eryasa! Abandi abandu mubaletha omulhume oyubbasire kutse oyusanyarere. Abalhume bbani ba babya bamuhekire okw’akakingo.

Wunasi ekyaleka ibanza erilethera Yesu y’omulhume oyulhwere oyu?— Babya bikirirye bathi Yesu anga muwathikirye. Babya bakyasi ngoku Yesu anga mulhamirye. Wunasi ekya babya bakolire erilhangira bathi bakahikaya omulhume oyusanyarere oyu y’oku Yesu nomwakine indi omwa nyumba mwabya muswire abandu?—

Ekisasani ekya wamalhangira eki, kikakanganaya ekya babya bakolire. Erimbere, mubasambirya omulhume y’okwa lhuthwe. Lhwabya lhuthwe olhusanzalikene. Enyuma waho, mubathobolha mw’ekihuru.  Erighunzerera, mubalhabya omulhume oyulhwere y’omwa kihuru iniane okw’akakingo kiwe erimuhikya omwa kisenge mw’eyikwa. Ka babya bawithe erikirirya!

Abandu abosi ababya omwa nyumba mubakukubalha bakalhangira ekikabya. Mubandaghalirya omulhume oyulhwere y’omwa kathi-kathi kabu. Yesu mwana hithana akalhangira eky’abalhume abo bamakolha?— Eyihi nahake! Mwatsema akalhangira ngoku bawithe erikirirya. Mwabwira omulhume oyusanyarere athi: ‘Ebibi byawu byamabughirwa.’

Yesu mwabwira omulhume oyuwabya asanyarere athi akole ki?

Abandi bandu mubalengekania bathi Yesu syabya atholere eribugha ekyo. Sibabya bakalengekania bathi angana ghanyira ebibi. Neryo eribakangania ngoku angana ghanyira ebibi, mwabwira omulhume oyulhwere athi: ‘Hangana, wimaye engyingo yawu, wughende eka wenyu.’

 Yesu abere abiribugha ekyo, omulhume mwalhama! Mwabya isyakisanyarere. Lero lino mwathoka erimana n’erighenda isihali oyukamuwathikaya. Abandu abalhangira ekithiko-kithiko eki mubasweka. Sihabya n’omundu n’omughuma oyuwabya iniabiri thalhangira ekindu ekikathikaya ng’eki omwa ngebe yiwe! Mubapipa Yehova busana n’eribaha Omukangirirya Mukulhu oyu, oyuwabya akalhamya n’amakoni w’abandu.Mariko 2:1-12.

Ekithiko-thiko eki kikathweghesaya ki?

Ekithiko-thiko eki kikathweghesaya ki?— Kikathweghesaya ngoku Yesu awithe obuthoki obw’erighanyira ebibi n’erilhamya abandu abalhwere. Aliriryo kikathasya thweghesaya ekindi kindu kikulhu. Thukigha ngoku abandu bakalhwalha busana n’ekibi.

Kundi ithwe abosi thukalhwalha, mbwino kikamanyisaya kithi ithwe abosi thuli bakolha nabi?— Ee, e Biblia yikabugha yithi ithwe abosi muthwa buthwa n’ekibi. Wunasi eributhwa n’ekibi nga likamanyisaya ki?— Likamanyisaya lithi thukabuthawa isithuhikene. Okwa bundi buthuku thukayisanga ithwabiri sobya isithwanzire. Wunasi ngoku ithwe abosi thwa thunga ekibi?—

Muthwabya mw’ekibi kundi omulhume w’erimbere, Adamu, mwathakenga Nyamuhanga. Mwahalya omughulhu athwa ekihano kya Nyamuhanga. Kandi ithwe abosi muthwasighalya ekibi kya Adamu. Wunasi ngoku thwasighalhaya ekibi kiwe eki? Leka nga kusoborere omwa mibere eyanga leka iwayitheghererya.

Ithwe abosi muthwabya thuthi bandu b’ekibi?

Obundi wabirilhangira omundu akakolha emiggati omw’akanyungu. Ni kyahi ekyangabya okwa miggati akanyungu akakakolha yo kamabya  ikayihinyire? Wunasi?— Eriyihinya eryo irikendi banika okwa miggati eyosi eya wukakolha omw’akanyungu ako, kwa bithe?—

Adamu abya ng’akanyungu ako, nethu thuli ng’emiggati. Abere abirithwa ekihano kya Nyamuhanga mwaherya erihikana liwe. Mwabya ng’akanyungu akayihinyire, kutse akaminyikalho kabi. Neryo omughulhu angabuthire abaana, bangabere bathi?— Abaana biwe abosi bangabere n’akaminyikalho ikan’ako ak’obuthahikana.

Abaana banene sibali buthawa n’obuthahikana obwa wangalhangira. Sibabulirwe kw’okuboko kutse okughulhu. Aliriryo obuthahikana obwa bawithe ni bunene kutsibu indi bukaleka ibalhwalha, n’erighunzerera ibaholha.

Ngoku thunasi, abandi bandu bakalhwalha mirundi mingyi kwilhaba abandi. Busana naki eki kiri kithya? Mbwino kikamanyisaya kithi bakabuthawa n’ekibi ekirengire eky’abandi?— Eyihi, ithwe abosi thukabuthawa n’ekibi kighuma. Ithwe abosi thukabuthawa isithuhikene. Busana n’ekyo, obuli mundu angana hambwa obulhwere bulebe. N’abandu abakalengaho erighendera okwa bihano bya Nyamuhanga ebyosi kandi isibali kolha ebindu bibi bangana lhwalha.

Thukendisyabya n’engebe eyiri yithi ekibi kyabirihwaho?

Ibbwa kwesi, ekikaleka abandi bandu ibalhwalha kutsibu kwilhaba abandi niki?— Hali esyonzumwa nyingyi. Banganabya isibawithe ebyalya ebikaghunza. Kutse banganalya ebyalya ebithatholere. Banganalya ebindu ebisihirire kutsibu ng’esyopipi n’esyokeki. Eyindi nzumwa yiri yithi abandi bangana ghan’ikesya lhuba neryo ikyaleka ibathabana othulho othukaghunza. Kutse abandi bangana wirwa embulha nene. Emibiri y’abandi ni mitseke, kandi siyanga thoka erirwanisya amalhwere, nomubanga lengaho eriyilabirira.

 Hane mwendi syabya obuthuku isithwanga thasyalhwalha? Thune mwendi syabya isithukiwithe ekibi?— Erithasubya amalengekania w’enyuma, ni kyahi ekya Yesu akolera omulhume oyuwabya asanyarere?— Yesu mwaghanyira ebibi biwe n’erimulhamya. Omwa nzira eyo, Yesu mwakangania eby’akendi syakolera abandu abosi abakalengaho erikolha ebitholere.

Thwamakangania ngoku sithwanzire erikolha erilholho kandi ngoku thuponire ebithuwene, Yesu iniakendi syathulhamya. Omwa buthuku obukayasa, akendisya thulhusya omwa buthahikana obwa thuwithe lino. Akendisya kolha eki ng’Omwami w’Obwami bwa Nyamuhanga. Ekibi sikyendi syathuhwamo aho n’aho. Kikendi syaghenda kikathuhwamo lyolho-lyolho. Neryo ekibi kikendi syabya kyabirithuhwamo, sithwendi syaswalhwalha. Thukendisyabya n’engebe eyihikene. Oyu ka kendi syabya mughisa munene!

Eribana owundi mwatsi owakakanganaya ngoku ekibi kikahamba okw’obuli mundu, soma Yobu 14:4; Esyonyimbo 51:5; Abanya Roma 3:23; 5:12; na 6:23.

Thasyaminya Bingyi

Ekitabu Kyaghe eky’Esyangano sye Biblia

Olhughano 96: Yesu Akalhamaya Abalhwere