Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Ighira Okwa Mukangirirya Mukulhu

 ESURA 29

Amagheni Awosi Akanatsemesaya Nyamuhanga?

Amagheni Awosi Akanatsemesaya Nyamuhanga?

Ekyaleka Nyamuhanga iniatsemera obugheni obu niki?

WUNANZIRE amagheni?— Anganabya mw’ebitsange binene. Wukalengekanaya Omukangirirya Mukulhu angananza thughende omw’amagheni?— Nayu mwanaghenda omwa bugheni omughulhu omundu mulebe aherukaya, n’abaghuma b’okw’abigha biwe mubaghenda nayu. Yehova ni “Nyamuhanga oyutsemire,” busana n’ekyo, akatsema thukatsanga haghuma n’abandi okw’amagheni awuwene.1 Timoteo 1:11, NW; Yoane 2:1-11.

Omwatsi owali okwa lhupapura 29 olhw’ekitabu kino akathubwira athi Yehova mwathulha omwa Ngetse y’Engulha mw’enzira nuku Abaisraeli banga lhabamu. Wanam’ibuka wukasoma omwatsi oyu?— Enyuma waho, abandu mubimba n’erihotholha n’eriha Yehova y’ewasingya. Mubwabya ng’obugheni. Abandu mubatsema kutsibu, kandi thwangana kiminya ndeke-ndeke ngoku Nyamuhanga nayu mwatsema.Eriluayo 15:1, 20, 21.

Habere habirilhaba emyaka nga 40, Abaisraeli mubaghenda okwa bundi bugheni bunene. Lero lino abandu ababakokaya sibabya bakaramya Yehova. Erithwalira haghuma, nibya abandu ababakokaya ibakaramaya esindi nyamuhanga kandi ibakakolha emyatsi y’engyingo n’abathe bakali babu kutse bira babu. Wukalengekanaya kyanabya  kibuya erighenda okwa bugheni ng’obu?— Eki mukithatsemesya Yehova, kandi mwasuyira Abaisraeli.Emiganzo 25:1-9; 1 Abanya Korinto 10:8.

Kandi e Biblia yikakanaya okw’amagheni abiri aw’eryibuka ebiro by’amabuthwa. Mbwino obugheni bughuma b’okw’amagheni aya bwabya bw’eryibuka amabuthwa aw’Omukangirirya Mukulhu?— Eyihi. Amagheni aya abya w’abalhume abathabya bakaramya Yehova. Obugheni bughuma bwabya bw’eryibuka amabuthwa w’Omwami Herode Antipa. Abya muthabali owe disitrikiti eya Galilaya omughulhu Yesu abya ikereyo.

Omwami Herode mwakolha ebindu bibi bingyi. Mwasaghulha mughalha wabu ya mukali wiwe. Erina ly’omukali oyo iya Herodia. Omughombe wa Nyamuhanga ya Yoane Omubatizya mwabwira Herode athi sikyabya kibuya erikolha ekindu ng’ekyo. Eki mukyaleka Herode iniahithana. Neryo mwalhangira athi Yoane akahirawa omwa muliki.Luka 3:19, 20.

Yoane abere ane omwa muliki, ekiro mukyahika eky’eryibuka amabuthwa wa Herode. Herode mwakolha obugheni bunene. Mwakokya abandu bangyi ab’ekitsumbi. Abosi mubalya n’erinywa n’eriyitsemesya. Neryo mwali wa Herodia mwasa n’eribahotholera. Abosi mubatsemera erihotholha liwe indi Omwami Herode mwanza erimuha ekihembo eky’embaghane. Mwabwira omumbesa athi: ‘Nasyakuha ekindu kyosi-kyosi ekya wanzire, nomukyangabya olhuhandi lhw’obwami bwaghe.’

 Ni kyahi ekya angasabire? Angasabire esyosente? esyongyimba esyuwene? erimuhimbira ekikali? Omwana-mutho syabya asi ekya angasaba. Neryo mwaghenda eyiri mama wiwe, Herodia, n’erimubulya athi: ‘Ngasabe ki kwehi?’

Wuminye ngoku Herodia abya aponire Yoane Mubatizya ya kutsibu. Neryo mwabwira mwali wiwe athi asabe omuthwe wa Yoane. Omwana mutho mwasuba eyiri omwami n’erimubwira athi: ‘Nyanzire iwamba lino omuthwe wa Yoane Mubatizya okwa kibindi.’

Omwami Herode syabya anzire ak’itha Yoane kundi Yoane abya mulhume mubuya. Aliriryo Herode abya iniabiriyilhagha, mwasagha erihemuka embere sy’abandu ababyaho amahendulha amalengekania wiwe. Neryo mwathuma omusirikali wiwe y’omwa muliki eriyathwa omuthwe wa Yoane. Habere hahwa akathambi kake omusirikali mwasubulha. Abya inianahekire omuthwe wa Yoane okwa kibindi, neryo mwaha gho omwana-mutho. N’omwana-mutho mwaha gho mama wiwe.Mariko 6:17-29.

Obundi bugheni obw’eryibuka amabuthwa obwe Biblia yikathubwirako nabu bwabya bubi. Bwabya bw’omwami we Misiri. N’omwa bugheni obu, omwami mwalhaghira athi omuthwe w’omundu athwibawe. N’enyuma waho, mwahanika omundu oyu nuku esyonyonyi simulye! (Enzuko  40:19-22) Wukalengekanaya Nyamuhanga mwanatsemera amagheni abiri aya?— Wangana ghendire omw’amagheni ng’aya?—

Ni kyahi ekyabya kyabere okwa bugheni bwa Herode obw’eryibuka amabuthwa wiwe?

Thunasi ngoku ebyosi ebisakangire omwa Biblia biwithe ekighendererwa. Yikathubwira okw’amagheni abiri masa aw’eryibuka amabuthwa. Kandi omw’amagheni awosi abiri aya, ebindu bibi mubyakolhwa. Neryo, wanga bugha wuthi ni kyahi ekya Nyamuhanga akathubwira okw’amagheni aw’eryibuka amabuthwa? Mbwino Nyamuhanga ananzire ithwa yisyandira ekiro ky’amabuthwa wethu?—

Ni kwenene, omw’amagheni ng’aya munabwire, sibalithwa omuthwe w’omundu. Aliriryo omwatsi ow’eriyisyandira ekiro ky’amabuthwa atsukawa n’abandu abathabya bakaramya Nyamuhanga ow’ekwenene. Ekitabu Catholic Encyclopedia kikakanaya okw’amagheni aw’eryibuka ekiro ky’amabuthwa awakanibweko omwa Biblia kithi: “Abakolha nabi basa . . . babakayisyandira ekiro ekya babuthawamu.” Mbwino thwanzire ithwabya ng’ibo?—

Kandi ibbwa Omukangirirya Mukulhu? Mwanakolha obugheni obw’eryibuka amabuthwa wiwe?— Eyihi, e Biblia siyiri kanaya omwatsi wosi-wosi owahambire okwa bugheni obw’amabuthwa wa Yesu. Erithwalira haghuma, abigha ba Yesu abakera mubathakolha obugheni obw’eryibuka amabuthwa wiwe. Wunasi ekyaleka abandu enyuma waho ibathwamu eryibuka amabuthwa wa Yesu omwa Desemba 25?—

Mubasombolha ekiro eki kundi, ngoku ekitabu World Book Encyclopedia kikabugha, “Abandu be Roma babya ibane mukibuka ng’ekiro Kikulhu ekya nyamuhanga w’obulime ya Saturn, eriyisyandira amabuthwa w’eryuba.” Neryo abandu mubathwamu eriyisyandira amabuthwa wa Yesu okwa kiro ekya abakafiri babya bakayisyandira ekiro kikulhu kyabu!

Wunasi nga ni busana naki sikyangabya indi Yesu mwabuthwa omwa Desemba?— Kundi e Biblia yikabugha yithi omughulhu Yesu abuthawa, abalisya babya ibane omwa lhulisiryo omwa kiro. (Luka 2:8-12) Sibangabere eyihya kundi Desemba ni kwezi kw’embeho nene n’embulha.

Busana naki sikyangabya kithi Yesu abuthawa Desemba 25?

Abandu banene banasi ngoku e Krisimasi si kiro kya mabuthwa wa Yesu. Nibya banakyasi ngoku okwa kiro ekyo abakafiri babya bawithe eriyisyandira erithabya likatsemesya Nyamuhanga. Nomwabine bithya abandu  bakakwama kya yisyandira e Krisimasi. Ibo bakakwama ky’eriyisyandira omwakanya k’eriminya amalengekania wa Nyamuhanga okw’omwatsi oyu. Aliriryo thwanzire ithwa tsemesya Yehova, kwa bithe?—

Neryo omughulhu thukakolha amagheni, thutholere ithwalhangira thuthi ni magheni awuwene omw’ameso wa Yehova. Thwangana kolha gho okwa buthuku bwosi-bwosi omw’omwaka. Sithutholere thukalindirira ekiro ky’embaghane. Thwangana tsumba ebyalya muthina-muthina n’erisatha emisathu. Wunanzire erikolha ekyo?— Wangana kania n’ababuthi bawu neryo imwathegheka erikolha akagheni. Eki ikikendi tsemesya, kwa bithe?— Aliriryo muthe mwathegheka akagheni, mutholere imwalhangira muthi kakendi tsemesya Nyamuhanga.

Ni kyahi ekya thwanga kolha erilhangira thuthi amagheni wethu akatsemesaya Nyamuhanga?

Kandi omughaso ow’erikolha mughulhu wosi ebikatsemesaya Nyamuhanga akanganibwe omwa Emisyo 12:2; Yoane 8:29; Abanya Roma 12:2; na 1 Yoane 3:22.