Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Ighira Okwa Mukangirirya Mukulhu

 ESURA 10

Yesu Awithe Amaaka Kwilhaba Esyombinga

Yesu Awithe Amaaka Kwilhaba Esyombinga

WUN’IBUKIRE ekyaleka omughuma w’okw’abamalaika ba Nyamuhanga iniabya Sitani Diabolo?— Esyongumbu siwe nyibi esy’erianza eriramibwa sy’esyaleka iniayighabulha oku Nyamuhanga. Mbwino abandi bamalaika mubana yiyunga oku Sitani?— Ee. E Biblia yikabahulha ‘mw’abamalaika ba Sitani,’ kutse esyombinga.Eribisulirwa 12:9.

Abamalaika babi aba, kutse esyombinga, ban’ikirirye Nyamuhanga?— ‘Esyombinga sikikiriraya sithi Nyamuhanga aneho,’ e Biblia yithya. (Yakobo 2:19) Aliriryo, lino sikubaha. Sikubaha kundi sinasi ngoku Nyamuhanga akendi syasisuyira busana n’ebindu bibi ebya syabirikolha. Ni bibi byahi ebya syabirikolha?—

E Biblia yikabugha yithi abamalaika aba mubasighania obwikalho bwabu obuwene obw’elhubulha neryo bamasa okwa kihugho eribya ng’abandu. Mubakolha eki kundi babya banzire erikolha emyatsi y’engyingo n’abakali babuya ababya okwa kihugho. (Enzuko 6:1, 2;  Yuda 6) Ni byahi ebya wasi ebihambire okwa myatsi y’engyingo?—

Emyatsi ey’engyingo mw’omughulhu omulhume n’omukali bakasangangana omwa mibere ey’embaghane. Enyuma waho omukali anganabya mukule. Aliriryo abamalaika sibabya batholere bakakolha eki. Nyamuhanga akanza omulhume n’omukali abathahenie ibabakolha emyatsi eyi. Omwa nzira eyi, omwana amabuthwa, omulhume na mukali wiwe bangana mulembera.

Ni kibi kyahi ekya abamalaika aba bakolha?

Abamalaika babere babiryambalha emibiri y’abandu n’erikolha emyatsi y’engyingo n’abakali ab’okwa kihugho, abaana babu mubakulha n’eribya bilhume by’emikaka. Babya batsururu, kandi ibakaghalhaya abandu. Busana n’ekyo, Nyamuhanga mwaletha erighunga linene ly’amaghetse erithoghothya ebilhume ebyo n’abandu babi abosi. Aliriryo Nyamuhanga mwabwira Noa athi ahimbe obwathu bunene, erilhamya abandu bake abakolha ebithunganene. Omukangirirya Mukulhu mwabugha athi ebyabyaho omwa biro by’Erighunga ly’amaghetse bitholere eryibukwa.Enzuko 6:3, 4, 13, 14; Luka 17:26, 27.

Erighunga ly’amaghetse lyabere likahika, wunasi eky’abamalaika ababi bakolha?— Mubalhusya emibiri y’abandu eya babya ibabiryambalha, neryo bamasuba elhubulha. Aliwe sibanga  thasyabere bamalaika ba Nyamuhanga, neryo mubabya bamalaika ba Sitani, kutse esyombinga. Kandi ni kyahi ekyabya kyahikire okw’abaana babu, Abanefili?— Erighunga ly’amaghetse mulyabitha. Kuthya n’abandi bandu abosi abathowa Nyamuhanga.

Busana naki okwa kihugho kuli emilyambo mingyi kwilhaba kera?

Erilhua okwa buthuku bw’Erighunga ly’amaghetse, Nyamuhanga syali athasyalighira esyombinga eryambalha emibiri y’abandu. Aliwe nomwakine indi sithwanga silhangira, esyombinga kwa sikina lengesaya erithebya abandu erikolha ebindu bibi kutsibu. Sikaletha emilyambo mingyi kwilhaba kera. Sikakolha eki kundi syabirighuswa okwa kihugho erilhua omwa lhubulha.

Ni kyahi ekikaleka esyombinga isithalhangirwa?— Kundi ni mirimu. Aliriryo thwangana minya ngoku sineho. E Biblia yikabugha yithi Sitani ane ‘muthebya abandu omwa kihugho kyosi,’ n’esyombinga siwe sine mumuwathikya.Eribisulirwa 12:9, 12.

Mbwino nethu Diabolo n’esyombinga siwe bangana thuthebya?— Ee, bangana thuthebya thwamathendi yitheya. Aliriryo sithutholere thukubaha. Omukangirirya Mukulhu mwabugha athi: ‘Diabolo syawithe ehamuli okw’ingye.’ Thwamabya ithune hakuhi na Nyamuhanga, iniakendi thutheya oku Diabolo n’esyombinga siwe.Yoane 14:30.

Ni kikulhu eriminya ebindu bibi ebyo esyombinga syanganza thukole. Busana n’ekyo, kilengekanayeko. Ni bindu byahi ebithuwene ebyo esyombinga syakolha sikahika okwa kihugho?— Erighunga ly’amaghetse lyabere lithe lyabya, mubakolha emyatsi y’engyingo n’abakali, ekindu ekya abamalaika babya isibatholere erikolha. Munabwire abamalaika babi bakatsema abandu bakaghana eriowa ebihano bya Nyamuhanga ebihambire okwa myatsi ey’engyingo. Leka nga thakubulya, Ni bahi abatholere erikolha emyatsi y’engyingo?— Wuhikire, b’abandu abathahenie basa.

Munabwire abalhwana n’abasika abalere bakakolha emyatsi y’engyingo, aliriryo eki sikitholere. E Biblia yikabugha yithi Nyamuhanga yuwahangika ekitsuko eky’olhubutho lhw’omulhume n’olhw’omukali.  Yehova mwahira ebitsuko ebi by’okwa mubiri busana n’ekighendererwa eky’embaghane. Abya anzire ibya kolesibwa n’abathahenie basa omwa nzira ey’embaghane. Kikatsemesaya esyombinga omughulhu abandu bakakolha ebya Yehova akathanga. Ng’eky’erileberyako, esyombinga sikatsema omughulhu omulhwana n’omusika bakasatha omwa bitsuko byabu eby’olhubutho. Sithwanzire thukatsemesya esyombinga, kwa bithe?—

Hane ekindi kindu ekyo esyombinga syanzire aliriryo Yehova akiponire. Wunasi nga ni kyahi?— W’omwagha. (Esyonyimbo 11:5) Omundu w’omwagha akabya mutsururu kandi akahuthalhaya abandi. Wibuke ngoku Abanefili, abaana b’esyombinga, ekyo kya bakolha.

Kandi esyombinga syanzire eryubahisya abandu. Okwa bundi buthuku sikayisosekanaya nga b’abandu ababiriholha. Nibya syangana gherererya emirenge y’abandu ababiriholha. Omwa nzira eyi, sikaleka abandu banene ibikirirya bathi abaholire baneho kandi bangana kania n’abaliho. Inga, esyombinga sikaleka abandu bangyi ibikirirya bathi emirimu y’abaholire yineho.

 Busana n’ekyo thutholere ithwa yitheya nuku Sitani n’esyombinga siwe siba thuthebaye. E Biblia yikakunga yithi: ‘Sitani akalengaho eriyisosekania ng’omumalaika oyuwene, n’abaghombe biwe kuthya.’ (2 Abanya Korinto 11:14, 15) Aliriryo, omwa kwenene, esyombinga ni mbi. Thuthalebya ngoku syanga lengesya erithukolha ng’isyo.

Ni hayi aha abandu bak’ighira omwagha kutse amalhwa n’obusingiri n’eby’esyombinga n’eby’emirimu y’abaholi?— Mbwino si ly’erilebya esyondegheka ndebe esy’etivi n’esyofilimu, kutse erilhabira omw’abanywani babi okwa sukuru n’erisiba n’abandu babi? Erikolha ebindu ebi likana thuthunda hakuhi na Nyamuhanga kutse likathuthunda hakuhi na Diabolo n’esyombinga siwe? Wukalengekanaya wuthi ki?—

Erilebya eby’amalhwa kyanga thuhambako kithi?

Wukalengekanaya nindi oyukanza thuhulikirire n’erilebya ebindu bibi?— Ni Sitani n’esyombinga siwe. Busana n’ekyo, iwe naghe thutholere ithwakolha ki?— Thutholere ithwasoma, ithwa hulikirira, n’erilebya ebindu ebyanga thughasira n’erithuwathikya erikolera Yehova. Wukalengekanaya ni bindu nga byahi bibuya ebya thwanga kolha?—

Ni kindu kyahi ekibuya ekya thutholere ithwakolha?

Thwamakolha ebibuya, sihali ekyanga leka ithubaha esyombinga. Yesu awithe amaaka kwilhaba isyo, kandi sikamubaha. Kiro kighuma esyombinga musyalhakira Yesu sithi: ‘Wamasa erisyathuherya kwehi?’ (Mariko 1:24) Mbwino sithwendi syatsema obuthuku bwa Yesu obw’erithoghothya Sitani n’esyombinga siwe bukahika?— Thunalindirire ekyo, thwangana kakasya ndeke-ndeke ngoku Yesu akendi thutheya okwa syombinga thwama yithunda hakuhi nayu na Thatha wiwe ow’elhubulha.

Thusome okwa ebya thutholere ithwakolha, omwa 1 Petero 5:8, 9 na Yakobo 4:7, 8.