Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Ighira Okwa Mukangirirya Mukulhu

 ESURA 12

Yesu Akathukangiriraya Erisaba

Yesu Akathukangiriraya Erisaba

WUKANA kanaya na Nyamuhanga Yehova?— Anzire iwakania nayu. Wukabya wukakania na Nyamuhanga, wukabya iwukasaba. Mughulhu mungyi Yesu iniakakanaya na Thatha wiwe ow’elhubulha. Okwa bundi buthuku iniakanza iniabya iyuwene akakania na Nyamuhanga. Kiro kighuma, e Biblia yikabugha yithi, ‘Mwaya okwa kithwe iyuwene eriyasaba. Neryo bwabere bwabya igholho-gholho, Yesu mwabya yo iyuwene.’Matayo 14:23.

Ni hayi aha wanga sabira Yehova iwune iwuwene?— Obundi wangana kania na Yehova iwune iwuwene wuthe wa kesya omwa kiro. Yesu mwabugha athi: ‘Omughulhu wukasaba wingire omwa kisenge kyawu, neryo wabirikinga olhuyi, iwasaba Thatha wawu.’ (Matayo 6:6) Wukana saba Yehova obuli igholho-gholho wuthe wakesya?— Wutholere iwakolha ekyo.

Yesu mwasaba iniane iyuwene . . . n’omughulhu abya iniane n’abandi

 Kandi Yesu mwasaba iniane haghuma n’abandi bandu. Omughulhu munywani wiwe Lazaro aholha, Yesu mwasaba iniane n’abandu ababya aho Lazaro asangawa iniabiritsikwa. (Yoane 11:41, 42) Kandi Yesu iniakasaba omughulhu abya akahindana n’abigha biwe. Wukanaghenda okwa mihindano aho emisabe yikaheberawa?— Eyo omundu mukulhu yukaha omusabe. Hulikirira ndeke ebya akabugha kundi akakukaniraya na Nyamuhanga. Enyuma w’omusabe wukabugha wuthi “Amina.” Wunasi ekya kikamanyisaya eribugha wuthi “Amina” omusabe akahwamu?— Kikamanyisaya kithi wamanza omusabe oyo. Kikamanyisaya kithi wamalighirana nagho kandi nawu ngoku wanzire iniabya musabe wawu.

Busana naki wutholere iwahulikirira ndeke emisabe eyikahebawa omwa mihindano?

Kandi Yesu mwasaba okwa ndambi y’erirya. Mwasima Yehova busana n’ebyalya. Wukana saba wuthe walya?— Ni kibuya ithwe erisima Yehova busana n’ebyalya thuthe thwatsuka erirya. Owundi mundu angana saba mukalira haghuma. Aliriryo ibbwa wamalya iwune iwuwene? Kutse wanga kolha ki wamalya ebyalya n’abandu abathasima Yehova?— Byamabya bithya, wutholere iwaha omusabe wawu.

Mbwino mughulhu wosi wutholere iwasaba omwa mulenge owakowika? Kutse Yehova angana kowa wamasaba omwa bukuthu?— Ekya Nehemia akolha kyangana thuwathikya eribana eky’erisubirya.  Abya muramya wa Yehova oyuwakolera omwa kikale eky’Omwami Artasasta owe Peresi. Kiro kighuma Nehemia mwalirikana kundi mwowa ngoku esyombimbo esye Yerusalemu, omuyi mukulhu ow’abandu biwe ngoku syabirithera.

Wanga saba kikuthu-kuthu mughulhu wahi, nga Nehemia kwa kolha?

Omwami abere akabulya Nehemia ekyalekire inialirikana, Nehemia mwatsuka erisaba omwa bukuthu. Neryo Nehemia mwabwira omwami ekyalekire inialirikana neryo amamusaba ng’angana ghenda e Yerusalemu erithasya yahimba esyombimbo. Ni kyahi ekyabya kyabere?—

Inga, Nyamuhanga mwasubirya omusabe wa Nehemia. Omwami mwamubwira athi aghende! Omwami mwaha Nehemia y’emithi mingyi ey’erikolesya bakahimba esyombimbo. Kwesi Nyamuhanga angana subirya emisabe yethu, nomuyanga hebwa omwa bukuthu.Nehemia 1:2, 3; 2:4-8.

 Lino thalengekania okwa kino. Wunatholere iwunamira ahisi wukasaba? Wunatholere iwakukama? Wukalengekanaya wuthi ki?— Okwa bundi buthuku Yesu iniakakukama akasaba. Okwa bundi buthuku iniak’imana, kandi okwa bundi buthuku iniakasamalira elhubulha akasaba, ngoku akolha akasabira Lazaro.

Eki kikakanganaya ki?— Kikakanganaya kithi si kikulhu eribya omwa mibere mirebe. Okwa bundi buthuku ni kibuya eryunamya omuthwe n’eriliba ameso. Okwa bundi buthuku wangananza iwakukama, nga Yesu kwa kolha. Aliriryo, wibuke ngoku thwangana saba Nyamuhanga okwa ndambi yosi-yosi, kandi iniathwowa. Ekikulhu kutsibu ekihambire okwa musabe ly’erikirirya ngoku Yehova anahulikirire. Wun’ikirirye ngoku Yehova akowa emisabe yawu?—

Ni byahi ebya wanga bwira Nyamuhanga omwa musabe?

Ni byahi ebya thwanga bwira Yehova thukamusaba?— Thambwira: Ni byahi ebya wukasaba Nyamuhanga wukakania nayu?— Yehova akathuha ebibuya bingyi, kandi ni kibuya erimusima, kwa bithe?— Thwangana musima busana n’ebyalya ebya akathuha. Aliriryo wune watha musima busana n’okwezi, emithi, n’ebimole ebyuwene?— Yuwakolha n’ebyo.

Kiro kighuma abigha ba Yesu mubamubwira bathi abakangiriraye erisaba. Neryo Omukangirirya Mukulhu mwakolha ekyo, kandi mwababwira ebindu by’omughaso munene ebya batholere erisaba. Wunasi ebindu ebi nga ni byahi?— Imaya e Biblia yawu, wanasukulha Matayo sura 6. Omulhondo 9 erihika okwa 13, thukasanga h’omusabe ow’abandu bangyi bakahulha  mw’omusabe owa Thatha Wethu kutse Omusabe ow’Omukama. Thusome gho haghuma.

Hano thuk’igha ngoku Yesu mwathubwira athi thusabe erikwamana n’erina lya Nyamuhanga. Mwabugha athi thusabe thuthi erina lya Nyamuhanga libye libuyirire. Erina lya Nyamuhanga ni ryahi?— Kwenene, ni yo Yehova, kandi thutholere ithwanza erina eryo.

Ekyakabiri, Yesu mwathukangirirya athi thusabe thuthi Obwami bwa Nyamuhanga bwase. Obwami obu bukayithaghisibawa kundi bukendi syaletha obuholho okwa kihugho n’eriyira kyo mwa paradiso.

Ekyakasathu, Omukangirirya Mukulhu mwabugha athi thusabe thuthi erisonda lya Nyamuhanga likolhawe okwa kihugho ngoku likakolhawa elhubulha. Thwamasaba eki, thutholere ithwakolha ebya Nyamuhanga anzire.

Kandi, Yesu mwathukangirirya athi thusabe Nyamuhanga y’ebyalya ebya thukayighagha ekiro ekyo. Kandi mwabugha athi thutholere ithwa bwira Nyamuhanga thuthi athughanyire busana n’ebisobyo ebya thwabirikolha. Aliriryo athe athughanyira, thukathekawa eritsuka erighanyira abandi bamabya ibabirithusoberya. Ekyo kikana kwolhobera erikolha?—

Erighunzerera, Yesu mwabugha athi thusabe Nyamuhanga Yehova thuthi athutheghaye okwa mubi, Sitani Diabolo. Ni bugha mbu, ebyosi ebi ni bindu bibuya ebya thwanga saba Nyamuhanga.

Thutholere ithw’ikirirya ngoku Yehova akowa emisabe yethu. Eryongera okw’imusaba obuwathikya, thutholere ithwabera erimusima. Akatsema thwamabya ithukamanyisaya ebya thukamusaba kandi thwamamusaba ebitholere. Neryo iniakendi thuha ebindu ebi. Wun’ikirirye ekyo?—

Erindi erihabulha eryuwene erihambire okwa misabe likabanika omwa Abanya Roma 12:12; 1 Petero 3:12; na 1 Yoane 5:14.