Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Ighira Okwa Mukangirirya Mukulhu

 ESURA 8

Abandi Bawithe Obuthoki Kwilhaba Ithwe

Abandi Bawithe Obuthoki Kwilhaba Ithwe

NGANA kyasi ngoku wukaligha wuthi abandi bawithe obuthoki kwilhaba iwe naghe. Wukalengekanaya nindi oyuwithe obuthoki obulengethukireyo?— Ni Nyamuhanga Yehova. Kandi ibbwa Mughalha wiwe, Omukangirirya Mukulhu? Nayu anawithe obuthoki kwilhaba ithwe?— Ee.

Yesu abya ikere na Nyamuhanga elhubulha. Abya Mughalha wiwe ow’ekirimu, kutse malaika. Nyamuhanga mwanahangika abandi bamalaika, kutse abaana b’ekirimu?— Ee, mwahangika esyomiliyoni nyingyi esy’abamalaika. Abamalaika aba bawithe akaghalha n’amaaka kwilhaba ithwe.Abaebrania 1:7; Danieli 7:10.

Wun’ibukire erina ly’omumalaika oyuwakanaya na Maria?— Abya ini Gabrieli. Mwabwira Maria athi omwana wiwe angabere Mughalha wa Nyamuhanga. Nyamuhanga mwahira engebe ya Mughalha wiwe ow’ekirimu omwanda ya Maria nuku Yesu anga buthwa ng’olhumekeke okwa kihugho.Luka 1:26, 27.

Ni byahi ebya Maria na Yozefu bangabya imubabwira Yesu?

Wun’ikirirye ngoku ekithiko-thiko eki mukyabya? Wun’ikirirye ngoku Yesu anabya ikere elhubulha na Nyamuhanga?— Yesu mwabugha athi anabyayo. Yesu mwaminya athi emyatsi ng’eyi? Wunasi, omughulhu abya mulhwana, obundi Maria mwamubwira ebya Gabrieli abugha. Kandi, Yozefu angabya imwabwira Yesu athi Nyamuhanga ya Thatha wiwe-wiwe.

 Yesu abere akabatizibwa, nibya omulenge wa Nyamuhanga mwalhua elhubulha, athi: ‘Oyu ni Mughalha waghe.’ (Matayo 3:17) Kandi omwa kiro, athe aholha, Yesu mwasaba athi: ‘Thatha, wunyisikaye embere syawu kandi omwa lhukengerwa olhwa nabya nalho haghuma nawu ekihugo kithe kya hangikwa.’ (Yoane 17:5) Ni bugha mbu, Yesu mwasaba Nyamuhanga athi amusubaye elhubulha erithasyabya haghuma nayu. Anga thokire athi erithasy’ikalha elhubulha?— Kyanga thokekene Nyamuhanga Yehova inianalya musubaya mw’omundu w’ekirimu, kutse malaika.

Lino nganza erikubulya. Abamalaika abosi nina babuya? Wukalengekanaya wuthi ki?— Erimbere abosi babya babuya. Kyabya kithya kundi Yehova yuwabahangika, kandi ebyosi ebya akakolha ni bibuya. Aliriryo omughuma w’okw’abamalaika mwabya mubi. Eki mukyasa kithi?

Eribana eky’erisubirya, thutholere ithwa suba enyuma omughulhu Nyamuhanga ahangika omulhume n’omukali ab’erimbere, Adamu na Eva. Abandi bandu bakabugha bathi omwatsi owahambire okw’abandu aba ni w’eriyipika-pikira. Aliriryo Omukangirirya Mukulhu abya inianasi ngoku ni kwenene.

Nyamuhanga mwahangika Adamu na Eva, mwabahira omw’irima eryuwene kutsibu erikahulhawa mwa Edeni. Yabya paradiso. Banga buthire abaana bangyi, ibabya lihiika linene, n’eribyaho kera na kera omwa Paradiso.  Aliriryo habya ihane erisomo ery’omughaso erya babya batholere ibigha. Ly’erisomo erya thwabirikaniako. Thulebaye nga thukina libukire.

Adamu na Eva banga thokire bathi eribyaho kera na kera omwa Paradiso?

Yehova mwabwira Adamu na Eva athi banganalya okwa bighuma ebyosi ebya banzire eby’emithi eyiri omw’irima. Aliriryo habya omuthi mughuma owabathabya batholere erirya okwa bighuma byawu. Nyamuhanga mwababwira ekyangabere bamakolha ekyo. Mwabugha athi: ‘Mwasyaholha kundu.’ (Enzuko 2:17; 3:3) Neryo n’isomo lyahi erya Adamu na Eva babya batholere ibaminya?—

Lyabya isomo ery’obwowa. Kwenene, omundu eribyaho atholere iniabya mwowa embere Yehova Nyamuhanga! Adamu na Eva erikwama kya bugha bathi bakendi mwowa kyabya isikiri ghunza. Babya batholere ibakangania ngoku bangabere bowa omwa ebya bakakolha. Ku bowa Nyamuhanga, bangabere ibakakanganaya ngoku bamwanzire kandi ngoku banzire iniabya Muthabali wabu. Bangabere omwa Paradiso erihika kera na kera. Aliriryo ibo erirya okwa muthi oyo, kyanga kanganirye ki?—

Kyanga kanganirye ngoku sibali sima nahake ebya Nyamuhanga abya iniabiribaha. Wangan’owire Yehova nawu ku wabyaho?— Erimbere, Adamu na Eva mubakolha ekyo. Aliriryo omundu  oyuwithe akaghalha kwilhaba ibo mwathebya Eva. Mwaleka iniathowa Yehova. Abya inindi?—

Nindi oyuwaleka enzoka iyabya nga yinemukania na Eva?

E Biblia yikabugha yithi enzoka, muyakania na Eva. Aliriryo wunasi ngoku enzoka siyanga thoka erikania. Neryo ibbwa muyathoka yithi erikania?— Omumalaika mwaleka enzoka iyabya nga yayikakanaya. Aliriryo omwa kwenene omumalaika yuwabya akakania. Omumalaika abya iniabiritsuka erilengekania ebindu bibi. Abya anzire Adamu na Eva bamuramaye. Abya anzire ibakolha ebya akababwira. Mwanza abye nga Nyamuhanga.

Neryo omumalaika mubi oyo mwahira omwa Eva mw’amalengekania mabi. Erilhabira omwa nzoka, mwabwira Eva athi: ‘Nyamuhanga mwathababwira ekwenene. Simwendi syaholha mwamalya okwa muthi. Mukendibya n’amenge nga Nyamuhanga.’ Wangan’ikirirye ebinywe ebi?—

Eva mwatsuka erianza ekindu ekya Nyamuhanga athamuha. Mwalya ekighuma eky’omuthi owathangawa. Enyuma waho amaha Adamu. Adamu mwathikirirya ebyo enzoka ya bugha. Aliriryo erianza eribya na Eva lyabya lilengire erianza Nyamuhanga. Neryo nayu mwalya okwa muthi.Enzuko 3:1-6; 1 Timoteo 2:14.

 Ni kyahi ekyalhwiririramu?— Adamu na Eva mubaherya erihikana lyabu, mubakekelhuha, n’eriholha. Neryo kundi babya isi bakihikene, n’abaana babu abosi nabu mubabya isi bahikene n’erighunzerera bamakekelhuha n’eriholha. Nyamuhanga mwathabiha! Omwa kwenene engebe yiseghemere okw’imwowa. (Abanya Roma 5:12) E Biblia yikathubwira yithi omumalaika oyuwatheba Eva akahulhawa mwa Sitani Diabolo, n’abandi bamalaika ababya babi bakahulhawa mwa esyombinga.Yakobo 2:19; Eribisulirwa 12:9.

Ni kyahi ekyabya kyahikire oku Adamu na Eva enyuma w’erithendi owa Nyamuhanga?

Lino, wanamabiri yitheghererya ekyaleka omumalaika mubuya oyo Nyamuhanga ahangika iniabya mubi?— Enzumwa yiri yithi, mwatsuka erilengekania ebindu bibi. Abya anzire ekitsumbi ky’embere-mbere. Abya inianasi ngoku Nyamuhanga abiribwira Adamu na Eva athi babuthe abaana, neryo Sitani abya anzire abosi ibamuramya. Diabolo anzire obuli mundu wosi iniaghana eriowa Yehova. Busana n’ekyo akalengaho erithuhira mw’amalengekania mabi.Yakobo 1:13-15.

Diabolo akabugha athi sihali omundu wosi-wosi oyuwanganza Yehova. Akabugha athi iwe naghe sithwanzire Nyamuhanga kandi athi sithwanzire erikolha ebya Nyamuhanga akabugha. Akabugha athi thukowa Yehova omughulhu thwangabya ithuli ndeke. Mbwino ebya Diabolo akabugha ebi binahikire? Mbwino kwa thuli thuthya?

Omukangirirya Mukulhu mwabugha athi Diabolo ni mubehi! Yesu mwakangania kwenene ngoku anzire Yehova omw’ibya mwowa embere Siwe. Kandi n’omwa mibere eyikalire Yesu mwowa Nyamuhanga. Mwakolha ekyo mughulhu wosi, n’omughulhu abandi bandu balengesaya erimulemesya. Mwabya muthaleghulha oku Yehova erihika okwa lhuholho. Ky’ekyaleka Nyamuhanga iniamulhubukya eribyaho kera na kera.

Neryo nindi oyo wanga bugha wuthi y’enzighu yethu nkulhu?— Omwa kwenene, ni Sitani Diabolo. Wangana mulhangira?— Eyihi nahake! Aliriryo thunasi ngoku aneho kandi ngoku awithe amaaka kwilhaba ithwe. Aliriryo, nindi oyuwithe obuthoki obulengire kwilhaba Diabolo?— Ni Nyamuhanga Yehova. Busana n’ekyo thukyasi ngoku Nyamuhanga angana thutheya.

Soma okwa Oyo thutholere ithwa ramya: Eryibuka Ebihano 30:19, 20; Yosua 24:14, 15; Emisyo 27:11; na Matayo 4:10.