Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Ighira Okwa Mukangirirya Mukulhu

 ESURA 13

Ababya Bigha Ba Yesu

Ababya Bigha Ba Yesu

Omulhume oyu nindi, kandi akabya athi mwigha wa Yesu?

OMUGHOMBE wa Nyamuhanga oyulengethukireyo oyuwabiri thabyaho ni wahi?— Oko ni kwenene ni Yesu Kristo. Wukalengekanaya thwanganabya ng’iyo?— E Biblia yikabugha yithi mwathuhirira h’eky’erileberyako eky’erikwama. Kandi akathukokaya athi thubye bigha biwe.

Wunasi nga kikamanyisayaki eribya mwigha wa Yesu?— Kikamanyisaya bindu bingyi. Eky’erimbere, thutholere ithwa mugherererya. Aliriryo si ky’ekyo kisa. Kandi thutholere ithwikirirya kundu eby’akabugha. Thwamakolha ebi, ithukendi kolha eby’akathubwira.

Abandu bangyi bakabugha bathi bikirirye Yesu. Wukalengekanaya abosi nina bigha biwe?— Eyihi, abosi si bigha biwe. Bangana ghenda okwa kanisa. Aliriryo abangyi b’okw’ibo sibali bathanza erigha ebya Yesu akangiriraya. Omwa kwenene, abakakwama ebya Yesu akolha b’abigha biwe.

Thukanaye okw’abaghuma b’okw’ababya bigha ba Yesu omughulhu abya okwa kihugho. Filipi abya mughuma w’okw’abigha biwe ab’erimbere-mbere. Filipi akayabana munywani wiwe Natanaeli (oyukathasya hulhawa mwa Bartolomayo), oyuwamalhangira inian’ikere omwa ndina y’omuthi. Natanaeli akabya asa eyiri Yesu, Yesu akabugha athi: ‘Lebaya, Omuisraeli ow’okwenene, oyuthe mw’amathebo.’ Natanaeli akakukubalha n’eribulya athi: ‘Wamanyiminya wuthi?’

Ni bahi aba Yesu akabirikira eribya bigha biwe?

Yesu akamusubiraya athi: ‘Mungakulhangira omwa ndina y’omuthi w’omuthini Filipi athe akubirikira.’ Natanaeli  akakukubalha kundi Yesu alhue inianasi ahali, neryo Natanaeli akabugha athi: ‘Wuli Mughalha wa Nyamuhanga, wuli Mwami we Israeli.’Yoane 1:49.

Yuda Iskariota, Yuda (oyukathasya hulhawa mwa Tadeo)

Filipi na Natanaeli mubabya bigha ba Yesu enyuma w’ekiro kighuma abandi balibere bigha biwe. Mwamuli Anderea na mughalha wabu ya Petero, haghuma na Yoane n’obundi mughalha wabu Yoane ya Yakobo. (Yoane 1:35-51) Aliriryo, habere hahwa buthuku bulebe, abigha bbani aba mubasuba okwa mubiiri wabu ow’erisoha. Neryo kiro kighuma, Yesu akabya ane mulendere okwa musike w’Engetse ye Galilaya, akalhangira Petero na Anderea ibane mughusa akatimba kabu k’omwa ngetse. Yesu akababirikira athi: ‘Munyikwame.’

Yakobo (mughalha wa Alufayo), Anderea, Petero

Akabya akathasya lholha aha mbere, Yesu akalhangira Yakobo na Yoane. Bane omwa bwathu na thatha wabu, ibane musona obutimba  bwabu. Yesu akababirikira athi nabu bamukwame. Wanga kolire ki Yesu kwabya in’iwe abirikira? Wangana mukwamire aho n’aho?— Abalhume aba banasi Yesu. Banasi Nyamuhanga ngoku yuwamuthuma. Neryo aho n’aho bakaleka omubiiri wabu ow’erisoha n’erikwama Yesu.Matayo 4:18-22.

Natanaeli, Filipo, na Yoane

Abalhume aba babere babiribya bigha ba Yesu, mbwino mukyamanyisya kithi mughulhu wosi mubabya bakakolha ebihikire bisa-bisa?— Eyihi. Wangan’ibuka abalhume aba nibya ngoku mubana kuba obuhaka omukulhu nga nindi omw’ibo. Aliriryo mubahulikirira Yesu, kandi babya banzire erikolha esyombinduka. Nethu thwamabya ithuna nzire erikolha esyombinduka, ithwanganabya bigha ba Yesu.

Yakobo (mughalha wabu Yoane), Anderea, Petero

Yesu mwakokya obuli musindo wosi ow’abandu eribya bigha biwe. Kiro kighuma, omuthabali oyuwabya iniakine mulere kandi mughuda, mwasa oku Yesu n’erimubulya ngoku anga bana engebe y’erikotha. Omuthabali oyu abere abiribugha athi erilhua bulere akakenga ebihano bya Nyamuhanga, Yesu mwamukokya: ‘Wase wunyikwame.’ Wunasi ekya kwamako?—

Omulhume abere abiriminya eribya mwigha wa Yesu ngoku ni kikulhu kwilhaba eribya mughuda, mwathatsema nahake. Mwathabya mwigha wa Yesu kundi abya anzire esyosente siwe kwilhaba Nyamuhanga.Luka 18:18-25.

Yesu abere abirighunza hakuhi omwaka mughuma n’embindi iniane muthulira, mwasombolha omw’abigha biwe mw’abakwenda 12. Abakwenda babya balhume abo athuma erikolha omubiiri w’embaghane. Wunasi amena wabu?— Thulebaye nga thwangana minya gho. Lebaya ebisasani byabu ebiri hano, kandi wana lebya nga wangana hulha amena wabu. Enyuma waho, lengesaya eriahulha amena wabu isiwatha soma gho.

Abakali abawathikaya Yesu aba akayathulira ni bahi?

Erighunzerera, omughuma w’okw’abakwenda 12 mwabya mubi. Abya Yuda Iskariota. Enyuma waho, owundi mwigha mwasombolhwa  eribya mukwenda. Wunasi erina liwe?— Abya Matia. Enyuma waho, Paulo na Barnaba nabu mubabya bakwenda, aliriryo sibabya baghuma b’okw’abakwenda 12.Emibiri 1:23-26; 14:14.

Ngoku thw’igha omwa Sura 1 ey’ekitabu kino, Yesu mwatsomana abaana balere. Ekyaleka iniakolha ekyo niki?— Kusangwa abya inianasi ngoku banganabya bigha biwe. Erithwalira haghuma, mughulhu mungyi abaana bangana bugha ebyangaleka abandu bakulhu ibahulikirira n’erileka ibigha bingyi ebihambire okwa Mukangirirya Mukulhu.

N’abakali bangyi mubabya bigha ba Yesu. Abandi ibakaghenda nayu omwa yindi miyi  akayathulira. Maria Magdalene, Yoana, na Susana mubaghenda nayu. Kandi banganabya imubawathikya Yesu eritsumba ebyalya n’erimwogherya esyongyimba siwe.Luka 8:1-3.

Wunanzire eribya mwigha wa Yesu?— Wibuke ngoku erikwama kya bugha thuthi thuli bigha ba Yesu sikiri ghunza. Thutholere ithwakangania ngoku thuli bigha ba Yesu ahosi-hosi ahathuli, butsira omughulhu thukaghenda okwa mihindano y’Ekikrisitayo lisa. Wangana minya eyindi myanya eya thutholere ithwa kanganiryamo ngoku thuli bigha ba Yesu?—

Ee, thutholere ithwakolha ekyo ithune eka. Kandi n’omughulhu wuli okwa sukuru. Iwe naghe, ekya thuthatholere thuk’ibirirwa ly’eribya bigha ba Yesu ab’ekwenene, thutholere ithwakolha ngoku akolha omwa musibo wosi, buli kiro, n’ahosi-hosi aha thwangabya.

Ni hayi aha thutholere ithwa kanganirya ngoku thuli bigha ba Yesu?

Lino thusome haghuma ekye Biblia yikabugha ekihambire okw’abigha ba Yesu, omu Matayo 28:19, 20; Luka 6:13-16; Yoane 8:31, 32; na 1 Petero 2:21.