Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Ighira Okwa Mukangirirya Mukulhu

 ESURA 26

Ekikaleka Ikyakalha Erikolha Ebibuya

Ekikaleka Ikyakalha Erikolha Ebibuya

SAULO abere akakolha ebindu ebithuwene, nindi oyuwabya akatsema?— Ni Sitani Diabolo. Aliriryo n’abasondoli b’edini y’Ekiyuda nabu ibakatsema. Enyuma waho, Saulo abere abiribya mwigha w’Omukangirirya Mukulhu n’eryahulhwa mwa Paulo, abasondoli b’edini abo mubatsuka erimupona. Busana n’ekyo, wanamalhangira ekikaleka ikyakalira omwigha wa Yesu erikolha ebibuya?—

Ni kyahi ekya hika oku Paulo busana n’erikolha ekibuya?

Kiro kighuma, omuhereri mukulhu oyuwabya akahulhwa mwa Anania mwalhaghira abalhume athi baswiraye Paulo y’omwa busu. Nibya Anania mwalhangira athi Paulo akahiribawa omwa muliki. Paulo mwaghalhwa kutsibu busana n’eribya mwigha wa Yesu. Ng’eky’erileberyako, abandu babi mubaswirya Paulo n’erianza erimwitha omw’amabwe manene-manene.Emibiri 23:1, 2; 2 Abanya Korinto 11:24, 25.

Abandu bangyi bakendi anza thukole ebithatsemesaya Nyamuhanga. Neryo eby’eriyibulya bya bino, Wanzire ekibuya erihika okwa lhulengo lhungahi? Wunanzire ekibuya  erihika n’okwa lhulengo olhw’erikikolha nomwakine indi abandi bakendi kupona busana n’erikolhakyo? Kikayithaghisaya obuthubaha erikolha ekyo, kwa bithe?—

Wangana yibulya, ‘Ekikaleka abandu ibathupona busana n’erikolha ekibuya niki? Mbwino sikyangabya ikitholere eribatsemesya?’ Ku kitholere kithya. Mughulhu mungyi abandu ibakanza Yesu busana n’ebibuya eby’akolha. Kiro kighuma, abandu abosi ab’omwa muyi mubayisorokerya okwa lhukyo lhw’enyumba eya Yesu abya ikeremu. Mubasa kundi Yesu abya akalhamya abandu abalhwere.Mariko 1:33.

Aliriryo okwa bundi buthuku abandu mubathanza ebya Yesu abya akakangirirya. Nomwakine indi abya akangirirya eby’ekwenene, abandi  mubamupona kutsibu kundi mwakania ekwenene. Kiro kighuma eki mukyabya e Nazareti, omuyi owa Yesu akuliramu. Mwaghenda omwa nyumba eya Abayuda babya bakahindaniramu bakaramya Nyamuhanga.

Eyo Yesu mwaha omukania owuwene owaseghemere okw’Amasako. Erimbere abandu mubatsemera gho. Mubasweka busana n’ebinywe bibuya ebya Yesu abugha. Mukyabakalira erikirirya ngoku oyu y’omulhwana oyuwakulira omwa muyi wabu.

Aliriryo mwakania ekindi kindu. Mwakania okwa buthuku omughulhu Nyamuhanga akakanganaya olhukogho lhw’embaghane okw’abandu abathabya Bayuda. Yesu abere abiribugha eki, ababya omwa nyumba y’erihindaniramu mubahithana. Wunasi nga ni busana naki?— Babya bakalengekania bathi n’ibo basa ababya bawithe olhukogho lhwa Nyamuhanga olhw’embaghane. Mubalengekania bathi balengire abandi bandu. Busana n’ekyo mubapona Yesu busana n’ekya abugha. Neryo wunasi ekyabanza erimukolhako?—

E Biblia yikabugha yithi: ‘Mubakurira Yesu y’eyihya sy’omuyi. Mubamuthwalha okwa singiriri y’ekithwe, erianza eriyamughusa omwa ngwangwa n’erimwitha! Aliriryo Yesu mwabatswako.’—Luka 4:16-30.

Busana naki abandu aba bakanza er’itha Yesu?

Ekyo kyamakuhikako, iwangana thasyasuba eyiri abandu abo eribabwira oku Nyamuhanga?— Ekyo ikikendi yithaghisya obuthubaha, kwa bithe?— Aliriryo, enyuma w’omwaka mughuma, Yesu mwasuba e Nazareti. E Biblia yikabugha yithi: ‘Mwatsuka erikangiriryabo omwa nyumba yabu ey’erihindanamu.’ Yesu mwathalekeraho erikangirirya ekwenene busana n’eryubaha abandu abathabya banzire Nyamuhanga.Matayo 13:54.

Ekindi kiro, ekyabya kya Sabato, Yesu abya omwa nyumba ey’erihindaniramu omwabya omulhume oyuwabya alehemire kw’okuboko. Yesu abya awithe obuthoki erilhua oku Nyamuhanga obw’erilhamya omulhume oyo. Aliriryo abandi balhume ababyaho mubanza erilyambya Yesu. Omukangirirya Mukulhu angakolire ki?— Mwatsuka eribulya:  ‘Wamabya iwulhue wuwithe embuli eyiryathoghera omwa buhya okwa kiro kya Sabato, iwune mwendi lhusya y’omo?’

Omw’okwenene, ibakendi lhusya embuli y’omwa buhya, nomwakine indi ni Sabato, ekiro ekya babya batholere erilhuhukamu. Neryo Yesu mwabugha athi: ‘Ni kibuya eriwathikya omundu okwa kiro kya Sabato, kundi omundu ni w’obughuli bunene okwa mbuli!’ Ka mukyalhangirika ngoku Yesu abya atholere iniawathikya omulhume oyu omw’imulhamya!

Yesu mwabwira omulhume athi ananule okuboko kwiwe. Aho n’aho mukwalhama. Omulhume oyo ka mwatsema! Kandi ibbwa abandi balhume abo? Mubanatsema?— Eyihi. Nibya mubongera eripona Yesu. Mubahulhuka n’erilebya ngoku banga mwitha!Matayo 12:9-14.

Kwa kine kithya munabwire. Nomuthwanga kolha ebibuya bingahi, sithwanga tsemesya obuli omundu. Neryo thutholere ithwa thwamu nga nindi oyutholere ithwa tsemesya. Amabya ini Yehova Nyamuhanga na Mughalha wiwe, Yesu Kristo, thutholere ithwa kolha ebya bakathubwira bathi thukole. Aliriryo thwamakolha eki, nindi oyukendi thupona? Nindi oyukendi leka ikya thukalira erikolha ekibuya?—

Ni Sitani Diabolo. Aliriryo n’abandi ni bahi?— B’abo ababirithebwa na Diabolo eriligha emyatsi ey’amabehi. Yesu mwabwira abasondoli b’edini ey’omwa buthuku bwiwe athi: ‘Inywe muli baana ba thatha wenyu Sitani, kandi esyongumbu sya thatha wenyu sya mwanzire erikolha.’Yoane 8:44.

Hali abandu bangyi abo Diabolo anzire. Yesu mwabahulha mwa ‘ekihugho.’ Wukalengekanaya ‘ekihugo’ ekya Yesu akakanayako ni kyahi?— Thuthalebya Yoane sura 15, omulhondo 19, thwana lhangira omwatsi oyu. Aho thukasoma ebinywe bya Yesu bino: ‘Nga muli b’ekihugho, kumbe ekihugho kyanga banzire nga bakyo. Nikwa nayisogha inywe omwa kihugho kino, kandi simuli bakyo; kikaleka ekihugho ikyabakwa obusu.’

Busana n’ekyo ekihugho ekya pona Yesu b’abandu abosi abathe bigha biwe. Busana naki ekihugho kiponire abigha ba Yesu?— Thalengekania  okwa kino. Omuthabali w’ekihugho nindi?— E Biblia yikabugha yithi: ‘Ekihugho kyosi kiri omwa buthoki bw’omubi oyu.’ Omubi oyo ni Sitani Diabolo.1 Yoane 5:19.

Lino wanamalhangira ekikaleka ikyakalha erikolha ekibuya?— Sitani n’ekihugho kiwe bikaleka ikya thukalira. Aliriryo hane eyindi nzumwa. Wun’ibukire nga ni yahi?— Omwa Sura 23 ey’ekitabu kino, muthw’igha ngoku ithwe abosi thukabuthawa n’ekibi. Mbwino sikyendi syatsemesya kutsibu omughulhu ekibi, Diabolo, n’ekihugho kiwe bya syahwaho?—

Ekihugho kino kikendi syabya kya hwaho, ni kyahi ekikendi syabya okw’abakakolha ebibuya?

E Biblia yikalhaghanisaya yithi: ‘Ekihugho kya syahwa.’ Eki kikamanyisaya kithi abosi abathe bigha b’Omukangirirya Mukulhu basyaheribwa. Sibendi syalighirwa eribyaho kera na kera. Wunasi abakendi syabyaho erihika kera na kera?— E Biblia yikalholha embere iyine mubugha yithi: ‘Oyukakolha erisonda lya Nyamuhanga asyakotha kera na kera.’ (1 Yoane 2:17) Ee, abo basa abakakolha ebibuya, abakakolha ‘erisonda lya Nyamuhanga,’ bakendi syabyaho kera na kera omwa kihugho kihya-kihya kya Nyamuhanga. Busana n’ekyo, nomukyanga kalha, thwanzire ithwakolha ekibuya, kwa bithe?—

Thusome haghuma amasako ano awakakanganaya ngoku sikyolho erikolha ekibuya: Matayo 7:13, 14; Luka 13:23, 24; na Emibiri 14:21, 22.

Thasyaminya Bingyi

Ekitabu Kyaghe eky’Esyangano sye Biblia

Olhughano 116: Ngoku Thwangabyaho Kera na Kera