Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Ekitabu Kyaghe Eky’Esyangano sye Biblia

 OLHUGHANO 104

Yesu Akasuba Elhubulha

Yesu Akasuba Elhubulha

EBIRO bine mulhaba, Yesu akayikanganaya okw’abigha biwe ngendu nyingi. Kiro kighuma hakuhi abigha nga 500 bakamulhangira. Akabya ababuthukira, wunasi ekya Yesu akabakaniraya? Obwami bwa Nyamuhanga. Yehova athuma Yesu y’okwa kihugho erisyakangirirya okwa Bwami. Kandi akalholha embere erikolha eki n’enyuma w’erilhubukibwa omw’abaholi.

Wunibukire obwami bwa Nyamuhanga nga niki? Inga, Obwami ni buthabali hene-hene obwa Nyamuhanga e lhubulha, na Yesu, Ya Nyamuhanga asombolha eribya mwami. Ngokwa thwabiri igha, Yesu mwakangania ngokw’akendisyabya mwami mubuya akalisya abakwire enzalha, akalhamya abalhwere, n’erilhubukya abaholi nibya!

Neryo ibbwa omughulhu Yesu akendi syathabalha elhubulha ng’omwami ahabw’ebirimo rukumi, ekihugho kikendi syabya kithi? Kwenene, ekihugho kyosi kikendi syakolhwa mwa paradiso mbuya. Sihendi syaswabya malhwa, kutse erithwa ebilhayiro, kutse amalhwere, kutse olhuholho nibya. Thwasi thuthi eki ni kwenene kusangwa Nyamuhanga mwakolha ekihugho eribya paradiso ahabw’abandu eritsemera mukyo. Kyakyaleka inyakolha eririma ly’Edeni okw’itsuka. Kandi Yesu akendisya lhangira athi ebyo Nyamuhanga anzire erikolhwa bikabereribawa.

Hathya obuthuku bukahika obwa Yesu erisuba elhubulha. Ahabw’ebiro 40 Yesu alhwe inyane muyikangania okw’abigha biwe. Neryo bakyasi ndeke-ndeke indi aneho kandi. Aliriryo athalya sighania abigha biwe akababwira athi: ‘Mubye e Yerusalemu erihika aho mwasyabanira omulimu abuyirire.’ Omulimu abuyirire ni kaghalha ka Nyamuhanga akakakolha, akali ng’omuyagha owakabuhirira, akakendi wathikya abigha biwe erikolha erisonda lya Nyamuhanga. Erighunzerera, Yesu akabugha athi: ‘Mwasya thulira abandu okw’ingye erihika omwa bitsweka ebya hali eby’ekihugho.’

Yesu akabya abiribugha ebi, ekindu eky’eriswekya kikabanika. Akatsuka erighenda e lhubulha, ngokwa w’amalhangira hano. Neryo ekithu kikamubisa okwithasya mulhangira, n’abigha sibatha syalhangira Yesu kandi. Yesu akaghenda elhubulha, n’eritsuka erithabalha okw’abigha biwe hano okwa kihugho inyane eyo.