Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Ekitabu Kyaghe Eky’Esyangano sye Biblia

 OLHUGHANO 112

Elyathu Likathwikira Okwa Kizinga

Elyathu Likathwikira Okwa Kizinga

THUNGERERA! elyathu liri omwa bitsibu! Likathwikangika mwa bihandi-bihandi! Wanamalhangira abandu abamabiri yitsyadira omw’amaghetse? Abandi bali muhika okwa musike. Oyuli halya nina Paulo? Leka thulebaye ekilhwe kikamuhikako.

Wibuke, ahabw’ebirimo bibiri Paulo ni w’omuliki e Kaisaria. Neryo iyo n’abandi ab’omuliki bakahirawa omwa lyathu, n’erithwalhwa e Roma. Bakabya balhaba hakuhi n’ekizinga ekye Krete, ekihunga kenene ikikalire kikabaswiraya. Ekihunga kikahitha kutsibu indi abalhume isibangathoka eriterekererya elyathu. Kandi sibanga lhangira eryuba omw’ithungi kutse esyangununu omw’ithumbi. Erighunzerera, enyuma w’ebiro bingi, abali omwa lyathu sibakiwithe amaha wosi-osi aw’erisabuka.

Neryo Paulo ak’imana n’eribugha athi: ‘Sihali n’omughuma okwinywe oyukendi herya engebe yiwe; elyathu lisa lya likendi hera. Kusangwa erithumbi erilhabire malaika wa Nyamuhanga mwakasa eyangali n’eribugha athi, “Siwubahe, Paulo! Wutholere iwimana embere sy’omuthabali we Roma Kaisari. Kandi Nyamuhanga akendi lhamya abosi abawuli nabu omwa lyathu.”’

Hakuhi omwakathi k’erithumbi okwa kiro kye 14 enyuma w’ekihunga kinene kya tsukire, abasokya baka yitheghereraya ngokw’amaghetse syakiri mali kutsibu! Busana n’erisagha eritomera olhukuka omwa mwirima, bakaghusa esyananga syabu. Engyakya eyakwamako bakalhangira ekithaka. Neryo bakathwamu erithwalha elyathu ly’okwa musike oyo.

Neryo, bakabya baseghera hakuhi n’omusike, elyathu likatomera omuseghe n’erihathira. Neryo ebisunda bya maghetse bikatsuka eririswirya, n’elyathu likatsuka erithulhangika mwa bihandi-bihandi. Omukulhu w’abasirikali akabugha athi: ‘Inywe bosi abangana ziha muyitsyadire omwa ngetse lhuba-lhuba n’erizihira okwa musike. Abamasighalha muyitsyade enyuma syabu, n’erihamba ebihandi-bihandi ebye lyathu mulerethe kubyo.’ Neryo ekyo kya bakakolha. Omwa mibere eyi abandu bosi 276 ababya omwa lyathu bakahika okwa musike kwa buholho, ngoku malaika analhaghanisaya.

Ekizinga kikahulhawa mwa Melita. Abandu ni b’olhukeri kutsibu, neryo bakatsomana abo abakalhua omwa lyathu. Obuthuku bukabya buwana, Paulo akahirawa omwa lindi lyathu n’erithwalhwa e Roma.