Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Ekitabu Kyaghe Eky’Esyangano sye Biblia

 OLHUGHANO 98

Okwa Kithwa ky’Emizeituni

Okwa Kithwa ky’Emizeituni

OYU ni Yesu okwa Kithwa kye Mizeituni. Abalhume bbani abali nabu b’abakwenda biwe. Ni Anderea na mughalha wabu ya Petero, haghuma na Yakobo na mughalha wabu ya Yoane. Enyumba eya wamalhangira erya ni hekalu ya Nyamuhanga eyiri e Yerusalemu.

Hamabirilhaba biro bibiri Yesu ahikire e Yerusalemu okwa nyana y’epunda. Ni Kyakabiri. Yesu abya omwa hekalu okw’itsuka ly’ekiro. Eyo abahereri mubalengesya erihamba Yesu banga mw’itha. Aliriryo mubakwa obuba erikikolha kusangwa abandu banzire Yesu.

‘Inywe nzoka kandi abana b’esyanzoka!’ Yesu kwa birikira athya abakulhu b’amadini. Neryo Yesu mwabugha athi Nyamuhanga anga suyirebo busana n’ebibi bingi ebya babirikolha. Enyuma waho Yesu mwasa okwa Kithwa kye Mizeituni, neryo n’abakwenda bbani aba mubatsuka erimubulya ebibulyo. Wunasi ebya bakabulhaya Yesu?

Abakwenda bakabulhaya okwa bindu ebiri omwa mughulhu owakasa. Bakyasi bathi Yesu akendi syalhusyaho obubi bwosi okwa kihugho. Aliriryo banzire eriminya nga kyasyabya omughulhu wahi. Yesu akendi syasasubulha mughulhu wahi akasyathabalha ng’Omwami?

Yesu akyasi indi abigha biwe okwa kihugho sibendi syamulhangira omughulhu akendi syasubulha. Ni busana akendi syabya elhubulha, kandi sibendi syathoka erimulhangira eyo. Neryo Yesu akabwira abakwenda biwe ebighuma by’okwa bindu ebikendi syabanika okwa kihugho omughulhu akendi syabya akathabalha elhubulha ng’Omwami. Ebighuma kw’ibyo bye byahi?

Yesu akabugha athi hasyabya esyanyuhi nene-nene, abandu bangi basya lhwalha n’erikwa enzalha, erithwa ebiraghiro lya syakanya, kandi hasyabya emisiki minene-minene. Kandi Yesu akathasya bugha athi engulhu mbuya y’obwami bwa Nyamuhanga yasya thulhughanibwa omwa kihugho kyosi. Thwanabiri lhangira ebindu ebyosi ebi bikabya omwa buthuku bwethu buno? Inga! N’ahabw’ekyo thuka kiminya ndeke-ndeke thuthi Yesu hathya ane muthabalha elhubulha. Akisiya inyalhusyaho obubi bwosi okwa kihugho.