LHANGIRA Yesu hano anakumbathire omwana mulere. Wukalhuaho iwakiminya indi Yesu kwenene atsomene abalere. Abalhume abathungerere b’abakwenda biwe. Yesu akababwira ki? Leka thulebaye.

Yesu n’abakwenda biwe mubanamabiri hika erilhua omwa lhughendo lhuli. Bane omwanzira, abakwenda mubabya n’erikangalhukania. Neryo enyuma w’olhughendo Yesu akababulhaya athi: ‘Mulyakuba buhaka ki omwanzira?’ Omwa kwenene, Yesu anasi obuhaka nga bulhue bwaki. Aliriryo akabulhaya ekibulyo erilebya abakwenda biwe nga bane mwendi mubwira.

Abakwenda sibali subiraya, kusangwa omwanzira balhue bakakuba obuhaka omw’ibo omukulhu nga nindi. Abandi abakwenda banzire eribya b’ekitsumbi kinene kwilhaba abandi. Yesu akendi babwira athi ngokwa si kyuwene eryanza eribya mukulhu?

Akabirikira omulhwana omulere, n’erimw’imania embere sy’abosi. Neryo akabugha n’abigha biwe athi: ‘Kwenene nga bugha nenyu, mwamathendi binduka mukabya ng’abana balere, simwendi syingira omw’obwami bw’elhubulha. Omukulhu omw’obwami y’oyukayikehaya ng’omwana oyu.’ Wunasi ekyaleka Yesu inyabugha eki?

Abana balere sibali yitsomanira eribya bakulhu kutse ab’ekitsumbi kwilhaba abandi. Neryo abakwenda batholere ibigha eribya ng’abana omwa mulingo oyu kandi isibaneghena nga nindi oyuwangabya mukulhu kutse ow’ekitsumbi.

Hane n’obundi buthuku, nibya, Yesu akakangania ngokw’atsomene abana balere. Emikera mike yikabya yalhaba, abandi bandu bakaletha abana babu erisya lebya Yesu. Abakwenda bakalengesaya eribakakirya. Aliriryo Yesu akabwira abakwenda biwe athi: ‘Muleke abana base eyangali, simubakakiraye, kusangwa obwami bwa Nyamuhanga ni bw’abandu abali ng’abo.’ Neryo Yesu akahira abana bw’omwa byalha biwe, n’eribatsumulha. Si kibuya eriminya thuthi Yesu anzire abana balere?