WUNASI abalhume aba nga ni bahi, n’ekya bakakolha nga niki? Bakaghenda okwa malhwa, n’abalhume abali embere banamwimba. Aliriryo wangana bulya wuthi: ‘Busana naki abimbi si bawithe miyali n’amathumo aw’erikolesya omw’amalhwa?’ Thulebaye.

Yehosafati ni mwami ow’obwami bwe Israeli obw’ebihanda bibiri. Ali okwa mughulhu mughumerera n’Omwami Ahabu na Yezebeli ab’obwami obw’endatha obw’ebihanda 10. Aliriryo Yehosafati ni mwami mubuya, na thatha wiwe Asa nayu abya mwami mubuya. Busana n’ekyo ahabw’ebirimo bingi abandu ab’omwa bwami bw’eyikwa obw’ebihanda bibiri bakatsemera engebe eyuwene.

Ibbwa aliriryo ekindu kikabanika ekikitha abandu babuba. Abathumwa bakalethera Yehosafati y’omwatsi bathi: ‘Abasirikali bangi erilhua omwa bihugho bye Moabu, Amoni n’ekithwa Sieri bane mwasa erisyalhwa nawu.’ Abaisraeli bangi bakahindana e Yerusalemu erisyarondya obuwathikya bwa Yehova. Bakaghenda omwa hekalu, eya Yehosafati akasabira athi: ‘Eee Yehova Nyamuhanga wethu, si thwasi eky’erikolha. Si thuwithe buwathikya okw’abasirikali bangi aba. Niwe thuthungerere erithuwathikya.’

Yehova akahulikirira, neryo akathuma omughuma w’okwa baghombe biwe erisyabwira abandu athi: ‘Amalhwa syenyu, aliriryo ni wa Nyamuhanga. Si mwendi lhwa. Mukwame kyathungerera, kandi mulebaye Yehova kw’akendi balhamaya.’

Neryo bukabya bwakya Yehosafati akabwira abandu athi: ‘Muyikethere Yehova!’ Neryo akahira abimbi b’embere sy’abasirikali biwe, neryo banamughenda, bakimbira Yehova y’esyanyimbo. Wunasi ekikalhwamu omughulhu bakahika hakuhi n’olhuhi? Yehova akaleka abasirikali esyanzighu ibalhwa basa n’abasa. Neryo Abaisraeli bakabya bahika, obuli musirikali enzighu iyabiriholha!

Kwesi Yehosafati syalhwe w’amenge eriyikethera Yehova? Thwangabya b’amenge nethu thwama Muyikethera.