Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Ekitabu Kyaghe Eky’Esyangano sye Biblia

 OLHUGHANO 72

Nyamuhanga Akawathikaya Omwami Hezekia

Nyamuhanga Akawathikaya Omwami Hezekia

WUNASI ekikaleka omulhume ono inyasaba oku Yehova? Ekyalekire inyahira esya nyawaliho esi sy’embere w’ekiherero kya Yehova niki? Omulhume ni Hezekia. Ni mwami ow’obwami bw’eyikwa obw’ebihanda bibiri ebye Israeli. Kandi ali omwa butsibu obukalire. Busana naki?

Kusangwa abasirikali be Asuria babirithoghothya obwami bw’eyighulhu obw’ebihanda 10. Yehova mwaleka kino kibye kusangwa abandu abo babya babi kutsibu. Na lino abasirikali be Asuria babiriasa erisyalhwa n’obwami obw’ebihanda bibiri.

Omwami we Asuria mwan’amabiri tsindikira Omwami Hezekia y’esyanyawaliho. Esi sy’esyanyawaliho esya Hezekia amabirihira hano embere sya Nyamuhanga. Esyanyawaliho sikasekereraya Yehova, n’eribwira Hezekia ahanike. Kino kya kikaleka Hezekia inyasaba athi: ‘Ee Yehova, thulhamaye okwa mwami we Asuria. Neryo amahanga osi asyaminya athi iwe musa niwe Nyamuhanga.’ Nyamuhanga anamwendi hulikirira Hezekia?

Hezekia ni mwami mubuya. Syali ng’abami babi ab’obwami obw’ebihanda 10 ebye Israeli, kutse nga thatha wiwe mubi Omwami Ahazi. Hezekia alhwe muyighenderezya akasikya ebihano byosi bya Yehova. Neryo, Hezekia akabya abirighunza erisaba, omuminyereri Isaya akamuthumira omwatsi owakalhua eyiri Yehova athi: ‘Omwami we Asuria siendi asa omwa Yerusalemu. Sihali na mughuma okwa basirikali biwe oyukendi hika hakuhi n’omuyi. Sibendi lhasa n’omusoha n’omughuma okwa muyi.’

Thalebya ekisasani okwa lhupapura lhuno. Wunasi abasirikali abosi abaholire aba ngani bahi? Ni b’Asuria. Yehova mwakathuma malaika wiwe, n’omw’ithumbi ighuma malaika mwak’itha abasirikali ab’Abasuria 185,000. Busana n’eki omwami we Asuria akahanika n’erisuba eka.

Obwami bw’ebihanda bibiri bwamabiri lhamibwa, n’abandu bamabana obuholho ahabw’akathambi kake. Aliriryo Hezekia akabya abiriholha mughalha wiwe Manase akabya mwami. Manase na mughalha wiwe ya Amoni oyuwamusubuka abosi bakabya bami babi. Lithya kandi ekihugho kikusulha mw’erithwa ebihano n’ebikorwa by’obwithi. Neryo Omwami Amoni akabya abiri thibwa n’abaghombe biwe, mughalha wiwe Yosiya akayirawa mwa mwami ow’obwami bw’ebihanda bibiri.